មន្ទីរពេទ្យបង្អែកខេត្តមណ្ឌលគិរី

19/08/2026

សកម្មភាពចុះវាយតម្លៃគុណភាពសេវាសុខាភិបាល ឆមាសទី២ ឆ្នាំ២០២៦
=================
ក្រុមការងារនៃ មន្ទីរសុខាភិបាលនៃរដ្ឋបាលខេត្តប៉ៃលិន បានអញ្ជើញចុះបំពេញបេសកកម្ម និងធ្វើការវាយតម្លៃគុណភាពសេវាប្រចាំឆមាសទី២ ឆ្នាំ២០២៦ នៅ មន្ទីរពេទ្យបង្អែកខេត្តមណ្ឌលគិរី។
ការធ្វើឡើងក្នុងស្មារតីសហប្រតិបត្តិការ និងមានគោលបំណងសំខាន់ៗដូចជា៖
ពង្រឹងគុណភាពសេវា៖ ត្រួតពិនិត្យការអនុវត្តស្តង់ដារគុណភាព និងសុវត្ថិភាពអ្នកជំងឺ ដើម្បីធានាថាប្រជាពលរដ្ឋទទួលបានសេវាថែទាំសុខភាពកាន់តែប្រសើរ។
ស្វែងរកចំណុចកែលម្អ៖ ពិភាក្សា រកចំណុចខ្លាំងដើម្បីបន្តអនុវត្ត និងកំណត់ចំណុចខ្វះខាតដើម្បីធ្វើការកែលម្អរួមគ្នា។
ក្រុមការងារបានធ្វើការចុះពិនិត្យផ្ទាល់តាមផ្នែកនីមួយៗ ពិនិត្យឯកសារពាក់ព័ន្ធ និងមានការពិភាក្សាផ្លាស់ប្តូរមតិយោបល់យ៉ាងផុសផុលជាមួយក្រុមគ្រូពេទ្យ និងបុគ្គលិកប្រចាំការ។
ដោយមានការសម្រសម្រួលពីលោកប្រធានមន្ទីរពេទ្យ​ និងក្រុមការងារ​ QIមន្ទីរពេទ្យ​ វេជ្ជបណ្ឌិត គ្រូពេទ្យ និងបុគ្គលិកសុខាភិបាលទាំងអស់នៃ មន្ទីរពេទ្យបង្អែកខេត្តមណ្ឌលគិរី បានទទួលស្វាគមន៍យ៉ាងកក់ក្តៅ និងសហការយ៉ាងល្អប្រសើរក្នុងដំណើរការវាយតម្លៃនេះ។🇰🇭✨

#មន្ទីរសុខាភិបាលនៃរដ្ឋបាលខេត្តប៉ៃលិន #មន្ទីរពេទ្យបង្អែកខេត្តមណ្ឌលគិរី #វាយតម្លៃគុណភាពសេវា២០២៦ #សុខាភិបាលកម្ពុជា #ក្រសួងសុខាភិបាល

19/08/2026

🤝 កិច្ចសហប្រតិបត្តិការដើម្បីលើកកម្ពស់គុណភាពព្យាបាលជំងឺគ្រុនឈាម! 🦟
====================
មន្ទីរពេទ្យបង្អែកខេត្តមណ្ឌលគិរី មានការសហការយ៉ាងជិតស្និទ្ធជាមួយ មន្ទីរពេទ្យសម្ព័ន្ធមេត្រីភាព កុមារជាតិ បានរៀបចំបទបង្ហាញដ៏មានសារៈសំខាន់មួយក្រោមប្រធានបទ ៖ "ករណីសិក្សាស្ដីពីជំងឺគ្រុនឈាម (Dengue Fever Case Study)"។
ចំណេះដឹង បច្ចេកទេស និងបទពិសោធន៍ជាក់ស្តែងពីករណីសិក្សានេះ ត្រូវបានយកមកចែករំលែកបន្តយ៉ាងក្បោះក្បាយទៅកាន់ តំណាងក្រុមគ្រូពេទ្យមកពី មន្ទីរពេទ្យខេត្តចំនួន ៧ ផ្សេងទៀត។
គោលដៅរួមនៃកម្មវិធីនេះគឺ៖
ធ្វើបច្ចុប្បន្នភាពចំណេះដឹងផ្នែកគ្លីនិកដល់ក្រុមគ្រូពេទ្យ
ពង្រឹងប្រសិទ្ធភាពនៃការសង្គ្រោះ និងព្យាបាលអ្នកជំងឺគ្រុនឈាមឱ្យបានទាន់ពេលវេលា
ពង្រីកបណ្តាញទំនាក់ទំនង និងកិច្ចសហការរវាងមន្ទីរពេទ្យថ្នាក់ជាតិ និងថ្នាក់ខេត្ត។
ក្រុមគ្រូពេទ្យទាំងអស់ តែងតែខិតខំប្រឹងប្រែងដើម្បីសុខុមាលភាពប្រជាពលរដ្ឋ! រួមគ្នាដើម្បីការពារ និងលុបបំបាត់ជំងឺគ្រុនឈាម!
#មន្ទីរពេទ្យបង្អែកខេត្តមណ្ឌលគិរី #មន្ទីរពេទ្យកុមារជាតិ #ជំងឺគ្រុនឈាម #ក្រសួងសុខាភិបាល

16/08/2026

ចក្ខុវិស័យ​ បេសកកម្ម​ និងគុណតម្លៃ

15/08/2026

ទម្រង់សិទ្ធិអតិថិជន🎉🎉🎉

13/08/2026

មន្ទីរពេទ្យបង្អែកខេត្តមណ្ឌលគិរី
===================
ការធ្វេីអនាម័យនៅក្នុងបរិវេណមន្ទីរពេទ្យ! 🏥✨
ថ្ងៃនេះ ក្រុមគ្រូពេទ្យ និងបុគ្គលិកទាំងអស់នៃមន្ទីរពេទ្យបង្អែកខេត្តមណ្ឌលគិរី បានរួមគ្នាប្រតិបត្តិការសម្អាតអនាម័យជុំវិញបរិវេណមន្ទីរពេទ្យ។ មិនត្រឹមតែផ្តល់សេវាថែទាំសុខភាពប៉ុណ្ណោះទេ យើងក៏ប្តេជ្ញាផ្តល់នូវបរិស្ថានដែលមានអនាម័យល្អ ដើម្បីសុខុមាលភាពរបស់អ្នកជំងឺ និងសហគមន៍របស់យើងផងដែរ៕

#មន្ទីរពេទ្យបង្អែកខេត្តមណ្ឌលគិរី #បរិស្ថានល្អ #សុខភាពល្អ #មណ្ឌលគិរីស្អាត

11/08/2026

06/08/2026

មន្ទីរពេទ្យបង្អែកខេត្តមណ្ឌលគិរី🏥
======================

🏥 ឯកឧត្តមសាស្ត្រាចារ្យរង ហេង ប៊ុនគៀត អញ្ជើញចុះអភិបាល និងពង្រឹងការងារឱសថ នៅមន្ទីរពេទ្យបង្អែកខេត្តមណ្ឌលគិរី 💊

នាថ្ងៃអង្គារ ៦រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៤ ខែសីហា ឆ្នាំ២០២៦
ឯកឧត្តមសាស្ត្រាចារ្យរង ហេង ប៊ុនគៀត រដ្ឋលេខាធិការក្រសួងសុខាភិបាល បានអញ្ជើញចុះបំពេញបេសកកម្មចុះអភិបាល និងពង្រឹងការងារគ្រប់គ្រងឱសថ នៅក្នុងមន្ទីរពេទ្យបង្អែកខេត្តមណ្ឌលគិរី ដើម្បីត្រួតពិនិត្យ និងជំរុញការផ្តល់សេវាសុខាភិបាលជូនប្រជាពលរដ្ឋឱ្យកាន់តែមានប្រសិទ្ធភាពខ្ពស់។
គោលបំណងសំខាន់ៗរួមមាន៖
✅ ត្រួតពិនិត្យការផ្គត់ផ្គង់ និងការគ្រប់គ្រងឃ្លាំងឱសថឱ្យស្របតាមស្តង់ដារបច្ចេកទេស។
✅ ធានាឱ្យបាននូវគុណភាព សុវត្ថិភាព និងប្រសិទ្ធភាពនៃការប្រើប្រាស់ឱសថជូនដល់អ្នកជំងឺ។
✅ ពង្រឹងសមត្ថភាពមន្ត្រីទទួលបន្ទុកការងារឱសថ ក្នុងការឆ្លើយតបឱ្យបានទាន់ពេលវេលានូវតម្រូវការជាក់ស្តែងរបស់មន្ទីរពេទ្យ។
ក្នុងឱកាសនោះ ឯកឧត្តមរដ្ឋលេខាធិការ ក៏បានពាំនាំនូវការសាកសួរសុខទុក្ខ និងកោតសរសើរវាយតម្លៃខ្ពស់ចំពោះថ្នាក់ដឹកនាំ វេជ្ជបណ្ឌិត គ្រូពេទ្យ និងបុគ្គលិកសុខាភិបាលនៃមន្ទីរពេទ្យបង្អែកខេត្តមណ្ឌលគិរីទាំងអស់ ដែលតែងតែលះបង់កម្លាំងកាយចិត្ត ក្នុងការបម្រើ និងសង្គ្រោះអាយុជីវិតប្រជាពលរដ្ឋក្នុងខេត្ត។ ជាមួយគ្នានេះ ឯកឧត្តម ក៏បានផ្តល់នូវអនុសាសន៍ណែនាំគន្លឹះមួយចំនួន ដើម្បីបន្តលើកកម្ពស់គុណភាពសេវាថែទាំសុខភាពឱ្យកាន់តែល្អប្រសើរថែមទៀត។

04/08/2026

មន្ទីរពេទ្យបង្អែកខេត្តមណ្ឌលគិរី
==================
🔺ក្រុមវេជ្ជបណ្ឌិតឯកទេសពីមន្ទីរពេទ្យកុមារជាតិ ចុះបណ្ដុះបណ្ដាល និងពិនិត្យជំងឺគ្រុនឈាមនៅខេត្តមណ្ឌលគិរី!

ថ្ងៃអង្គារ ៦រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៤ ខែសីហា ឆ្នាំ២០៦ ក្រុមវេជ្ជបណ្ឌិតមកពី មន្ទីរពេទ្យកុមារជាតិ បានអញ្ជើញចុះមកបំពេញបេសកកម្មដោយផ្ទាល់នៅ មន្ទីរពេទ្យបង្អែកខេត្តមណ្ឌលគិរី ដើម្បីចូលរួមចំណែកលើកកម្ពស់គុណភាពនៃការព្យាបាល និងថែទាំសុខភាពក្នុងខេត្តឱ្យកាន់តែមានប្រសិទ្ធភាពខ្ពស់។
នៅក្នុងបេសកកម្មនេះ ក្រុមវេជ្ជបណ្ឌិតបានផ្ដោតសំខាន់លើសកម្មភាពចម្បងៗរួមមាន៖
ការបណ្ដុះបណ្ដាលជំនាញ៖ ចែករំលែកបទពិសោធន៍ ធ្វើបច្ចុប្បន្នភាពចំណេះដឹងវេជ្ជសាស្ត្រ និងបណ្ដុះបណ្ដាលពង្រឹងសមត្ថភាពបន្ថែមដល់ក្រុមគ្រូពេទ្យ និងបុគ្គលិកសុខាភិបាលប្រចាំការនៅមន្ទីរពេទ្យបង្អែកខេត្ត។
ការចុះពិនិត្យ និងព្យាបាលផ្ទាល់៖ ក្រុមវេជ្ជបណ្ឌិតបានចុះពិនិត្យ វាយតម្លៃ និងតាមដានស្ថានភាពអ្នកជំងឺគ្រុនឈាមយ៉ាងយកចិត្តទុកដាក់ នៅតាមផ្នែកនីមួយៗក្នុងមន្ទីរពេទ្យ ដើម្បីធានាថាកុមារនិងអ្នកជំងឺគ្រុនឈាមទាំងអស់ទទួលបានការព្យាបាលយ៉ាងត្រឹមត្រូវ និងទាន់ពេលវេលា។
សារអប់រំសុខភាពដល់មាតាបិតា និងអាណាព្យាបាល៖
ដោយសារជំងឺគ្រុនឈាមនៅតែជាហានិភ័យខ្ពស់សម្រាប់កុមារ សូមបងប្អូនប្រជាពលរដ្ឋទាំងអស់បន្តចូលរួមបង្កើនការប្រុងប្រយ័ត្ន៖
លុបបំបាត់ជម្រកមូសខ្លា៖ សម្អាតបរិស្ថានជុំវិញផ្ទះ វត្ថុដក់ទឹក គ្របពាងទឹកឱ្យជិត និងដាក់ថ្នាំអាបែត។
ការពារការខាំ៖ ស្លៀកពាក់ខោអាវដៃវែងជើងវែង និងតម្រូវឱ្យគេងក្នុងមុងជានិច្ច ទោះជាពេលថ្ងៃឬយប់។
ស្វែងរកការព្យាបាលបន្ទាន់៖ ប្រសិនបើកុមារមានអាការៈក្ដៅខ្លួនខ្លាំងភ្លាមៗ (លើសពី ៣៩ អង្សាសេ) សន្លឹម ក្អួត ឬឈឺពោះ សូមប្រញាប់បញ្ជូនកូនមកមន្ទីរពេទ្យ ឬមណ្ឌលសុខភាពដែលនៅជិតបំផុតជាបន្ទាន់ ជៀសវាងការទិញថ្នាំព្យាបាលដោយខ្លួនឯង។

សូមថ្លែងអំណរគុណយ៉ាងជ្រាលជ្រៅដល់ក្រុមវេជ្ជបណ្ឌិតនៃ មន្ទីរពេទ្យកុមារជាតិ និងការសម្របសម្រួលដ៏ល្អពីសំណាក់ថ្នាក់ដឹកនាំ មន្ទីរពេទ្យបង្អែកខេត្តមណ្ឌលគិរី ដែលតែងតែយកចិត្តទុកដាក់ខ្ពស់ចំពោះសុខមាលភាពកុមារនិងអ្នកជំងឺទាំងអស់! 🇰🇭❤️

03/08/2026

🩺 វគ្គបណ្តុះបណ្តាលស្តីពី «ការធ្វើរោគវិនិច្ឆ័យ និងការព្យាបាលជំងឺគ្រុនឈាម» នៅខេត្តមណ្ឌលគិរី
📍 នាព្រឹកថ្ងៃចន្ទ ៥រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣ ខែសីហា ឆ្នាំ២០២៦ នៅមន្ទីរពេទ្យបង្អែកខេត្តមណ្ឌលគិរី មានរៀបចំវគ្គបណ្តុះបណ្តាលស្តីពី ការធ្វើរោគវិនិច្ឆ័យ និងការព្យាបាលជំងឺគ្រុនឈាម ដើម្បីពង្រឹងសមត្ថភាព និងធ្វើបច្ចុប្បន្នភាពចំណេះដឹងផ្នែកវេជ្ជសាស្ត្រដល់ក្រុមគ្រូពេទ្យជួរមុខ។
កម្មវិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់៖
🔹 ឯកឧត្តមវេជ្ជបណ្ឌិត លី ឈួង រដ្ឋលេខាធិការក្រសួងសុខាភិបាល
🔹 លោក ជាក់ ម៉េងហៀង អភិបាលរង នៃគណៈអភិបាលខេត្តមណ្ឌលគិរី
🔹 ឯកឧត្តម ស្រូយ អាដុល្លា អនុរដ្ឋលេខាធិការក្រសួងសុខាភិបាល
ព្រមទាំងមានការអញ្ជើញចូលរួមជាកិត្តិយស និងសម្របសម្រួលដោយ៖
🔸 លោកសាស្ត្រាចារ្យ ម៉េង ឆាយ នាយករងមន្ទីរពេទ្យកុមារជាតិ
🔸 លោក អ៉ី គង់ អនុប្រធានមន្ទីរសុខាភិបាល នៃរដ្ឋបាលខេត្តមណ្ឌលគិរី
🔸 លោក នូរ សុមេធា អនុប្រធានមន្ទីរពេទ្យបង្អែកខេត្តមណ្ឌលគិរី
🔸 លោក លឹម​ តិចឡុង អនុប្រធានមន្ទីរពេទ្យបង្អែកខេត្តមណ្ឌលគិរី
សិក្ខាសាលានេះក៏មានការចូលរួមយ៉ាងយកចិត្តទុកដាក់ពីសំណាក់ លោក លោកស្រី ជាវេជ្ជបណ្ឌិត គ្រូពេទ្យព្យាបាល និងគិលានុបដ្ឋាក-គិលានុបដ្ឋាយិកា មកពីគ្រប់ផ្នែកទាំងអស់ដែលកំពុងបម្រើការក្នុងមន្ទីរពេទ្យផងដែរ។
💡 គោលបំណងសំខាន់៖ ការជួបជុំនេះធ្វើឡើងដើម្បីចែករំលែកបទពិសោធន៍ ជំនាញបច្ចេកទេស និងវិធានការព្យាបាលថ្មីៗ ដើម្បីធានាបាននូវការធ្វើរោគវិនិច្ឆ័យជំងឺគ្រុនឈាមបានឆាប់រហ័ស ត្រឹមត្រូវ និងការព្យាបាលប្រកបដោយប្រសិទ្ធភាពខ្ពស់ សំដៅលើកកម្ពស់សុខុមាលភាព និងសង្គ្រោះអាយុជីវិតប្រជាពលរដ្ឋក្នុងមូលដ្ឋានខេត្តមណ្ឌលគិរី។

#ក្រសួងសុខាភិបាល #មន្ទីរសុខាភិបាលខេត្តមណ្ឌលគិរី #ជំងឺគ្រុនឈាម #សុខភាពសាធារណៈ #មណ្ឌលគិរី

03/08/2026

មន្ទីរពេទ្យបង្អែកខេត្តមណ្ឌលគិរី
======================
សូមថ្លែងអំណរគុណជាអនេកជូនចំពោះ៖

១.លោកជំទាវ. ទាវ​ សុនិកា បានផ្ដល់ឈាមប្រភេទO+មួយប្លោក

ដោយទឹកចិត្តសប្បុរសធម៌ជូនមន្ទីរពេទ្យបង្អែកខេត្តមណ្ឌលគិរីដើម្បីជួយសង្រ្គោះអ្នកជំងឺដែលមានជំងឺខ្វះគ្រាប់ឈាមកំពុងសម្រាកព្យាបាលនៅមន្ទីពេទ្យខេត្តមណ្ឌលគិរី។
តាងនាមថ្នាក់ដឹកនាំនៃមន្ទីរពេទ្យសូមប្រសិទ្ធិពរជូនចំពោះ​លោកជំទាវ ព្រមទាំងក្រុមគ្រួសារសូមមានសុខភាពល្អ និងទទួលបានពុទ្ធបួន ប្រកាគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។សូមអរគុណ!❤️❤️
#អ្នកបរិច្ចាកឈាមគឺជាវីរៈបុរស #មន្ទីរសុខាភិបាលនៃរដ្ឋបាលខេត្តមណ្ឌលគិរី #មន្ទីរពេទ្យបង្អែកខេត្តមណ្ឌលគិរី