23/04/2025
---
"عزوز واللي دارها صاحبه"
كان عزوز شاب معروف في الحومة، راجل طيب وداير همه، يخدم على روحه وعلى أمه، ويحب صاحبه خالد كأنه خوه من ظهر امه. لا فرح إلا وهو معاه، لا ضيقة إلا وهو سند له. الناس كلها تقول: "هذو الاثنين كيف السمنة على العسل".
لكن يا حسرة... ما كل من تضحكله الدنيا راهو صافي.
عزوز كان خاطب هند، بنت ناس، وهو يموت فيها، وكان يحكي كل تفاصيله لخالد، حتى الحب اللي بينه وبينها.
ومره، عزوز شد مشوار برا البلاد يخدم شهرين، عشان يجمع قرشين ويجهز روحه للعرس. خلاها أمانة في رقبة صاحبه، وقاله:
"دير بالك عليها يا خوي، راهي غالية عليا."
وخالد قاله:
"اطمن، والله لا يصيبها شر وأنا حي."
لكن ما درى عزوز إن الخيانة جاية من أقرب الناس، من اللي كان يقول عليه "أخوي".
خالد استغل غياب عزوز، وبدى يتقرب من هند... بكلام ناعم، وبطريقته المعروفة. شوي شوي، بدأ يزرع الشك في قلبها، يقولها:
"عزوز مشغول عليك؟ توه لو يحبك صح، ما يخليكش تستني!".
والبنت، ضعفت... قلبها مال، وبدت تسمع أكتر ما تسأل. وداروا علاقة من ورا ظهر عزوز.
رجع عزوز فرحان، شايل الهدايا ونيته صافية، لكن قلبه حاس بشي غريب... هند مش هي، والناس بدت تتجنب الكلام.
وفي يوم، جاته رسالة من رقم مجهول فيها صورة:
"شوف اللي تحسّبهم أمان، كيف خانوك في وضح النهار."
عزوز صدم... والقلب اللي كان كبير، تقسم نصين.
واجههم، والكل سكت... لا هند كذّبت، ولا خالد دار روحه بريء.
قالهم عزوز بكل برود:
"الخيانة ما تجيش من العدو، تجي من اللي تعطيه المفتاح وتحسبه حارس دارك."
وطلع سايبهم
