Dr. Bushra mustafa ELGhariani Ent د.بشرى مصطفى الغرياني أنف وأذن وحنجرة

03/07/2026

ENT Excellence Summit - Libya
برعاية شركة فاركو للأدوية الطبية 🌸
و بمشاركة البروفيسور أيمن المدني رئيس قسم الأنف والأذن والحنجرة ، كلية الطب - جامعة الإسكندرية 🌸🌸

30/06/2026

ولأننا في فصل الصيف 🤷‍♀️ وموسم البحر وأحواض السباحه 🌊🐳🪸
أكتر حالات تواجه فينا ف العيادة هيا حالات ( التهاب الأذن الخارجية (Otitis Externa) أو مايعرف بــ (أذن السباحين) وسموه بالاسم هدا لأنه يجي للسباحين أو بعد ما الشخص يمشي للبحر و ودنه تتعرض هلبا للمية سواء حوض أو بحر 🌊

🔹 شن أعراضه هالألتهاب يا دكتورة ؟؟

✅ ألم ف الأذن يزداد مع شد صيوان الأذن.
✅ حكة داخل الأذن.
✅ إحساس بانسداد أو ضعف بالسمع.
✅ إفرازات من الأذن (أحيانًا) .
✅ احمرار وتورم بقناة الأذن الخارجية.

🔹 شن هيا أسبابه ؟
✔ السبب الرئيسي زي ماقلنا هوا دخول المية إلى الأذن بشكل متكرر (خصوصًا وقت السباحة) وعدم تجفيفها بشكل صحيح ..
✔ تنظيف الأذن بطريقة خاطئة بإستخدام أعواد القطن أو الأجسام الحادة .
✔ التهابات بكتيرية أو فطرية.

🔹 كيف نحمو الأذن من التهاب الأذن الخارجية ؟

✅ أول شي تجفيف الأذن كويس بعد الاستحمام أو السباحة.
✅ تجنب إدخال أي أدوات داخل الأذن.
✅ مراجعة الطبيب عند ظهور الألم أو الإفرازات .
⚠️ ومانستحدموش أي قطرة للأذن دون استشارة الطبيب، خاصة إذا كان هناك ثقب بطبلة الأذن.

🔹 العلاج :
علاجنا يكون حسب حالة المريض ونوع الالتهاب طبعاً ، بس اهم شي انه فترة العلاج نحافظو ع الأذن جافة من المية ومانخلوش المية تخشلها نهائياً باش مانزيدوش الطين بلة 🤷‍♀️ ويزيد الالتهاب ف الأذن 👂

وفي حالات الالتهاب البكتيري نوصفو مضاذات حيوية مناسبه ممكن تكون موضعيه ف الأذن أو عن طريق الأقراص وفي الحالات الحادة نستخدمو الاتنين معاً ..
وفي الحالات الفطرية ! ضروري انضفو الأذن كويس ف العيادة وبعدها نوصفو مضاد فطرية مناسب لحالة المريض ،،

وأكيد طبعاً ( مانقطروش الخل 🫤 ومانحطوش تومة 😑 ومانحطوش الزيت و مانزردوش في الوذن من غير استشارة طبيب ) 🧑‍⚕️

وأكيد طبعاً الكشف المبكر حيساعدنا ويفيدنا و حيمنع علينا هلبا مضاعفات 🌸🥰🤗
ودمتم بخير وعطلة صيفية ممتعة ان شاءالله 🤗🌸
................................................................................

💜 🌸 د. بشرى الغرياني
#طبيبة #الأنف #والأذن #والحنجرة

10/06/2026

01/06/2026

ولاننا كيف طالعين من عيد الاضحى واكيد أغلبكم تعرض لي التراب وصوف الأضاحي ولاننا في موسم الحساسية !!!
اليوم حابة نهدرزلكم شوية علي حساسية الأنف 🌸🌸

حساسية الأنف (Allergic Rhinitis) :
كلنا نعرفو إنه من أكثر المشاكل الشائعة التي يعاني منها الكبار والصغار هيا حساسية الأنف ، والأغلب يحسابوها مجرد “بردة بسيطة ” لكن في الحقيقة هيا حالة تحسسية مزمنة و تحتاج لفهم وعلاج صحيح باش ماتأترش على جودة الحياة أو تسبب مضاعفات.

شن هيا حساسية الأنف؟

حساسية الأنف هي رد فعل مناعي مبالغ فيه من جسمنا لما نتعرضو لمواد معينه زي : الأتربة أو حبوب اللقاح ، الغبار ، الأدخنة ، بعض الروائح القوية ..

لما نتعرضو لهذه المثيرات يبدا جسمنا يفرز في مادة الهيستامين، وهذا يسبب في ظهور أعراض الحساسية 🤷‍♀️ ..

باهي بالمختصر يادكتورة شن هيا الحاجات الي تسبب في حساسية الأنف ؟

تصير الحساسية لما نتعرضو لمثيرات معينة منها :

• الأتربة والغبار
• العث الموجود في السجاد والمفروشات .
• حبوب اللقاح من النباتات .
• وبر الحيوانات .
• ريش الطيور .
• العطور والروائح النفاذة .
• الدخان والتلوث الجوي .
• التغيرات الجوية المفاجئة .
• بعض أنواع العطور أو المنظفات .

وماننسوش أنه العامل الوراثي ليه دور كبير في الموضوع 🤷‍♀️ ، يعني الأطفال الي عندهم تاريخ عائلي للحساسية حيكونو أكثر عرضة للإصابة بالحساسية للأسف ..

كيف نعرف روحي عندي حساسية يادكتوره ؟ يعني شن أعراض حساسية الأنف ؟

• العطس المتكرر خصوصًا في الصباح …
• انسداد الأنف أو احتقان الأنف …
• سيلان الأنف (وتكون الإفرازات مائية و شفافة) ..
• حكة في الأنف أو الحلق ..
• حكة واحمرار في العين ..
• دموع في العين ..
• ضعف حاسة الشم أحيانًا ..
• صداع أو إحساس بضغط في الوجه ..

هل حساسية الانف خطيرة يادكتوره وليها مضاعفات ؟
بالنسبة للخطوره هيا مش خطيرة ! ولكن ممكن تسبب بعض المضاعفات لو أهملناها وماعالجناش الموضوع بكري 🥲

زي شني المضاعفات هده يادكتورة ؟
المضاعفات ممكن تكون ⬇️

• التهاب الجيوب الأنفية
• التهابات الأذن الوسطى
• تضخم اللحمية عند الأطفال
• الشخير أثناء النوم
• صعوبة التنفس من الأنف

كيف نشخصو حساسية الأنف ؟
تشخيصها يعتمد علي عدة عوامل زي :
اول شي التاريخ المرضي للمريض ..
تاني شي فحص الانف إكلينيكياً
وآخر شي في بعض الحالات نتطرو لي اجراء اختبار الحساسية أو تحليل IgE …

نجو لي اهم حاجة وهيا علاج حساسية الأنف ✅‼️

أول وأهم نقطة ف العلاج هيا : تجنب الأشياء المثيرة للحساسية !!
يعني ؟
• تقليل التعرض للأتربة
• تهوية المنزل جيدًا
• غسل المفروشات بالماء الساخن
• تجنب العطور القوية
• استخدام كمامة في الأماكن المليئة بالأتربة

تاني شي هوا العلاج الدوائي …
زي ⬇️
• مضادات الهيستامين .
• بخاخات الأنف المضادة للحساسية .
• بخاخات الكورتيزون الأنفية .
• غسل الأنف بالمحلول الملحي .
• استخدام حقن الحساسية لتقليل استجابة الجسم للمثيرات .

لو إنتَ أو إنتِ مرضى حساسية الآنف ننصحكم تلتزمو بي التعليمات الاتية : ⬇️

✔ تجنبو التعرض المباشر للغبار والأتربة والروائح القوية .
✔ استخدامو بخاخ الأنف بالمحلول الملحي بانتظام .
✔ اشربو كميات كافية من السوائل يومياً .
✔ عدم استخدام قطرات الأنف بدون استشارة الطبيب .
✔ علاج أي التهابات بالجيوب الأنفية مبكرًا .
✔ عدم استخدام سمن المعيز والقسط الهندي وخل التفاح 🌚🦦 ( النقطة هده اجتهاد داتي مني ) 🤣

وأكيد طبعاً الكشف المبكر أكيد حيساعدنا ويفيدنا و حيمنع علينا هلبا مضاعفات 🌸🥰🤗
ودمتم بخير ويومكم قنين وكل عام وانتم بألف خير 🤗🌸
................................................................................

💜 🌸 د. بشرى الغرياني
#طبيبة #الأنف #والأذن #والحنجرة

10/05/2026

شن هيا الغدة الدرقية وشن وضيفتها؟ اكيد تعرفو إنه فيه غدة في الجزء الامامي في رقبتنا، شكلها زي الفراشة، 🦋وهي عبارة عن غدة صماء ، وهيا اللي تتحكم في "ترمومتر" نشاطنا وطاقة حرق جسمنا ؟ 🌡️ يعني هيا المسؤوله عن عميلة الأيض وإنتاج الطاقة ف جسمنا 🤷‍♀️
​
وطبعاً الغدة الدرقية هي المسؤولة عن إنتاج الهرمونات اللي تنظملنا في ضربات القلب، درجة حرارة الجسم، وتتحكم في تنظيم مستويات الكالسيوم في جسمنا وحتى في حالتنا المزاجية !. 😴
​

شن العلامات اللي تقولك "انتبه" راهو الغدة الدرقية عندك فيها مشكله ؟ 🧐
​
🔴 لو صاير عندك خمول في الغدة :
حيكون عندك زيادة وزن غير مبررة، إحساس دايم بالبرد، وكسل وفشل شديد.
​
🔴 ولو فيه نشاط زايد في الغدة :
حيكون عندك ضربات قلب سريعة ، فقدان وزن مفاجئ، وقلق وتوتر مستمر .
​
وطبعاً التشخيص ساهل و بسيط جداً و يكون اولاً بتحليل دم صغير، وممكن نحتاجو بعده جهاز موجات فوق صوتية (ultrasound ) علي الغدة في بعض الحالات باش نعرفو سبب المشكله 🤷‍♀️

لو حسيت انه عندك تورم ف الغدة أو احدى جانبي الغدة أو عندك بعض من الأعراض المذكوره فنصيحتي ليك إنك تزور طبيب انف وأذن وحنجرة لأنه الكشف المبكر حيساعدك ويفيدك ويمنع عليك هلبا مضاعفات 🌸🤗

ودمتم بخير ويومكم قنين 🤗 🌸
................................................................................

💜 🌸 د. بشرى الغرياني
#طبيبة #الأنف #والأذن #والحنجرة

07/05/2026

‎معلومة سريعة و مكررة للتذكير 🤷‍♀️ℹ️

ماتنسوش إنه مش كل صداع حوالين العين أو الجبهة يعني "جيوب أنفية"🤷‍♀️

والصداع الي خلف الرأس وأعلى الرأس مش جيوب أنفية برضو 🤷‍♀️ لانه عنده أسباب تانيه متعددة !

لأنه لاحظت أغلبية الحالات اول مايخش يشكي من صداع يقولك عندي جيوب أنفية طول 🤷‍♀️ مشخص نفسه بي نفسه وطبعاً تشخيصه غلط 🥲🦦 ! 😁

وبعد الكشف يطلع صداع نصفي أو إرتفاع ضغط أو شد عضلي في الرقبة أو غيرها من الأسباب المتعددة والي يطول شرحها وليست جيوب أنفية نهائياً 😢🤗

و طبعاً أكيد الكشف المبكر حيساعدنا ويفيدنا و حيمنع علينا هلبا مضاعفات 🌸🥰🤗

ودمتم بخير وخميسكم طيب 🌸
................................................................................

💜 🌸 د. بشرى الغرياني
#طبيبة #الأنف #والأذن #والحنجرة

06/05/2026

الحالات الي يراسلو فيا من غريان يسألو علي الكشف 🌸 إنتم محظوظين بي وجود افضل اخصائي انف وأذن وحنجرة في غريان 🌸 الدكتور ضياء الدين الغوج 🌸 ديرو متابعه لصفحته ويومكم جميل 🌸

https://www.facebook.com/share/1DgTCkaYAn/?mibextid=wwXIfr

06/05/2026

مع صهد وارتفاع درجة حرارة الطقس اليوم ! ح تزيد نسبة نزيف الأنف عند مرضى حساسية الأنف 👃

حبيت نرجع نذكركم بي طريقة التعامل مع نزيف الأنف في المنزل 🌸

اول شي نضغطو علي الجزء الغضروفي الأمامي من الانف لمده عشر دقايق مع اماله الرأس للأمام (لمنع بلع الدم ) 🩸 و يفضل المريض يكون مقعمز و مش راقد او متسطح ( نفس الشي لمنع بلع الدم ) و نديرو كمادات تلج علي الانف هدا يساعد في وقف النزيف .

وطبعاً في حالة درنا الحاجات هذه كلها و فاتو عشرة دقايق أو ربع ساعه و النزيف موقفش شن نديرو ؟
هنا لازم ضروري جداً نمشو لأقرب مصحة او مستشفى فيها طبيب انف وأذن وحنجرة .

ملاحظة مهمة :

قسط هندي في الانف لااااااا 🫨🤧
سمن معيز في الانف لاااااا 🐐
بُن (قهوة) في الانف لاااااا ☕️

وماننسوش إنه الكشف المبكر ممكن يمنع هلبا مضاعفات ☺️🌸 ويومكم طيب 🌸🌸................................................................................

💜 🌸 د. بشرى الغرياني
طبيبة الأنف والأذن والحنجرة .

02/05/2026

في العيادة أول مايخش مريض يشكي من طنين الأذن ، ديما بعد ما نسمع منه وناخد منه التاريخ المرضي الي يخص موضوع الطنين بالكامل ،، ونجي نكشف عليه لازم وضروري نشوف أنف المريض ونتأكد هل عنده أعراض تحسس مزمن ف الانف أو لا !!!

السؤال الي تعودت نسمعه من المريض وعلامات التعجب كلها في تعابير وجهه 😯🫨 يكون كالأتي ( الطنين في وداني يادكتوره شن علاقة خشمي ) ؟؟ 🤔💭

فا نرد علي المريض ونقوله تعالى نقولك ونشرحلك شن علاقة الطنين بحساسية الأنف :

الحساسية تسبب تورم في الأغشية المخاطية داخل الأنف والبلعوم الأنفي ، و ممكن التورم هدا يأتر على قناة استاكيوس المسؤولة عن تهوية الأذن الوسطى وتنظيم الضغط داخل الأذن ويخليها ماتخدمش كويس او يصير فيها انسداد 🤷‍♀️

فا لما القناة هده يصير فيها انسداد حيطلعو علينا الأعراض الي بنذكرهم توا :
🌸 تحس الوذن مسكره .
🌸 تحس بي ضغط داخل الأذن .
🌸 وأخر شي حتسمع طنين 🤷‍♀️ ..

وأكيد طبعاً لو طلع سبب الطنين هوا حساسيه الانف ف الموضوع حيكون سهل وبسيط لأنه بالعلاج الصح للحساسيه والمحافظة أكيد حيختفي الطنين 🤗

يعني لو كنت تعاني من حساسية أنف وعندك طنين ويزيد في موسم الحساسية ! فا توقع إنه الحساسيه هيا السبب ف الموضوع 🤷‍♀️ و طبعاً ما تترددش إنه تزور طبيب أنف وأذن وحنجرة لأنه الكشف المبكر حيساعدنا ويفيدنا و حيمنع علينا هلبا مضاعفات 🌸🥰🤗

ودمتم بخير وليلتكم سعيدة 🤗 🌸
................................................................................

💜 🌸 د. بشرى الغرياني
#طبيبة #الأنف #والأذن #والحنجرة

29/04/2026

موضوع الليلة ( إلتهاب العصب السابع)

شن هوا العصب السابع ؟

هوا العصب المسؤول عن حركة عضلات الوجه
💠 مسؤول عن فتح وتسكير العين
💠 مسؤول عن الابتسامة
💠 مسؤول عن رفع الحواجب

وين مكانه ؟
مكانه يطلع من قاع الجمجمة ويمر ف الأذن الوسطى وبعدها يطلع من خلف الأذن ويخش ف الغده النكافية وبعدها ينقسم لي خمسة اعصاب فرعية يتوزعو باش يغدو عضلات الوجه بالكامل 🤷‍♀️

طبعاً التهاب العصب السابع من الأمراض الشائعه جداً
و أعراضه تبدأ تدريجياً بي ضعف في حركة عضلات الوجه وتبدا تتحول بعدها إلى شلل كامل في حركة الوجه ..

و أعراضه كالأتي :

🔴 العين تقعد مفتوحة ومعاش تقدر تسكرها بي شكل كامل ..
🔴 صعوبه في نفخ الخدود 😁 لو تقول للمريض انفخ 🎈مش حيقدر 🤷‍♀️
🔴 صعوبة ف الابتسامه ولما تقول للمريض يبتسم تلاحظ انه الفم مايل علي جهة وحدة ..
🔴 صعوبة في رفع الحاجبين ..
🔴اختفاء واضح لخطوط الابتسامه ف الوجه ..

أسبابه :
أسبابه متعددة و أحياناً يكون مافيش سبب واضح ليه ،، بس من اهم وأشهر أسبابة إنه يصير بعد فترة أسبوعين او تلاته من بردة أو التهاب أذن الوسطى ،
أو بسبب تعرض المريض مباشرة وفترة طويلة لي هواء مصقع وقوي زي المكيف أو روشن سيارة ، وبعدها بي ايام يصير تورم ف العصب داخل القناه الي يمر منها ف الأذن الوسطى ويصير هذا الشلل ..

امتا نخاف ونطلبو ع المريض صورة رنين ونحولوه ع طبيب اعصاب ؟
لو كان الشلل هذا معاه تنميل ف الوجه وفقدان الإحساس في الوجه او اليدين او الرجلين ومشكله ف النطق وصعوبة ف حركة الأطراف ( اليدين والرجلين ) ..

شن علاجه يادكتورة ؟
أول شي ضروري نحمو العين الي حتقعد مفتوحة ومعاش حتتسكر بسبب هذا الشلل ، نوصفو للمريض في قطرات حافضة للعين ، ونوصيه إنه يحاول يسكر العين بي بلاستر وقطن وماخليهاش مفتوحة باش ماتنجرحش القرنية ويخش المريض في التهابات ف العين ..
تاني شي علاج التهاب وشلل العصب السابع يعتمد كلياً علي الكورتيزون ،، يحدد الطبيب الجرعه ويبدا ينقصها تدريجياً لين تتحسن حالة المريض ..
تالت شي ممكن يحتاج المريض لي جلسات علاج طبيعي باش نحفزو العصب وعضلات الوجه انها ترجع لوضعها الطبيعي 🤷‍♀️

لو حسيت لا قدر الله إنه عندك بداية احد الأعراض هذه تفكر إنه الكشف المبكر مهم جداً و حيمنع علينا هلبا مضاعفات وبسرعه لي اقرب طبيب انف وأذن وحنجرة 🌸🤗

ودمتم بخير وليلتكم سعيدة 🍯 🌸
................................................................................

💜 🌸 د. بشرى الغرياني
#طبيبة #الأنف #والأذن #والحنجرة