16/08/2026
အလုပ်ခွင်နဲ့ နေ့စဉ်ဘဝမှာ အခက်အခဲတွေ၊ စိတ်ပျက်စရာတွေနဲ့ အဆင်မပြေတဲ့ လူပုဂ္ဂိုလ်တွေနဲ့ ကြုံတွေ့ရတာဟာ ရှောင်လွှဲလို့မရတဲ့ သဘာဝတရားတစ်ခုပဲ။
စိန်ခေါ်မှုတွေ၊ အခြေအနေတွေနဲ့ ဘေးလူတွေရဲ့ စိတ်နှောက်ယှက်မှုကြောင့် အလုပ်ကို ဆက်မလုပ်ချင်လောက်အောင် စိတ်ဓါတ်ကျမိတဲ့ အခိုက်အတန့်တွေ ရှိတတ်ပေမဲ့ အဲဒီလိုအချိန်မျိုးမှာ မိမိရဲ့ ကိုယ်ပိုင်အရည်အသွေးနဲ့ တန်ဖိုးတွေကို မယုတ်လျော့စေဖို့ ထိန်းသိမ်းထားနိုင်ခြင်းကသာ အစစ်အမှန် ခိုင်မာမှုပါ။
အများစု မှားယွင်းတတ်တဲ့ သဘောထားကတော့ ...
"သူတို့ကောင်းမှ ငါကောင်းမယ်၊ သူတို့ မကောင်းရင် ငါလည်း အရေးစိုက်စရာမလိုဘူး"
ဆိုတဲ့ အတွေးပဲ။
ဒါဟာ ကိုယ့်ရဲ့ စံနှုန်းနဲ့ အရည်အသွေးကို သူတစ်ပါးရဲ့ ပြုမူဆက်ဆံပုံပေါ်မှာ လုံးဝပုံအပ်လိုက်တာဖြစ်ပြီး၊ ရေရှည်မှာ မိမိရဲ့ စိတ်ဓာတ်နဲ့ စာရိတ္တကို ပျက်စီးစေတယ်။
စိန်ခေါ်မှုတွေ လာရောက်ရိုက်ခတ်သည့်တိုင်အောင်
"ဘယ်သူ့ကြောင့်မှ ကိုယ့်အရည်အသွေးကို ယုတ်လျောမခံဘူး"
ဆိုတဲ့ စိတ်ဓါတ်ကို ခိုင်မာစွာ တည်ဆောက်ထားရမယ်။
အလုပ်တစ်ခုကို မလုပ်ချင်ရင် ပွင့်ပွင်းလင်းလင်းပဲ စွန့်လွှတ်လိုက်တာက ပိုကောင်းတယ်။
ကိုယ်လုပ်နေသမျှ ကာလပတ်လုံးတော့
ကိုယ့်ရဲ့ အစွမ်းအစနဲ့ အရည်အသွေးတွေကို တိုးတက်မလာရင်တောင်မှ လျော့ကျမသွားအောင် စိတ်ဓာတ်ကို လေ့ကျင့်ထားဖို့နဲ့ ကြိုတင်ကာကွယ်ထားဖို့ လိုအပ်တယ်။
ကိုယ့်ရဲ့ အလုပ်အပေါ် ထားတဲ့ စေတနာ၊ ကျွမ်းကျင်မှုနဲ့ စံနှုန်းတွေဟာ ဘေးလူတွေရဲ့ ကောင်းခြင်း၊ မကောင်းခြင်းနဲ့ မဆိုင်ဘဲ မိမိကိုယ်တိုင်နဲ့သာ သက်ဆိုင်သည့် အရာတွေပဲဆိုတာကို ကောင်းကောင်း စွဲမြဲနေရမှာဖြစ်တယ်။
နောင်အနာဂတ်မှာလည်း ဘယ်အလုပ်မှာမဆို အလုပ်သဘာဝအရ အခက်အခဲတွေ၊ ပေါင်းသင်းဆက်ဆံရ ခက်ခဲတဲ့ လုပ်ဖော်ကိုင်ဖက်တွေနဲ့ ထပ်ကြုံတွေ့ရဦးမှာ သေချာတယ်။
အခင်းအကျင်းတွေ ပြောင်းလဲသွားနိုင်ပေမဲ့ လူနဲ့ ပြဿနာဆိုတာ ဘယ်နေရာမဆို ရှိနေတတ်တာကြောင့် ကိုယ့်အရည်အသွေးနဲ့ ကိုယ်ပိုင်တန်ဖိုးကို မယုတ်လျော့စေဘဲ မြဲမြံစွာ ထိန်းသိမ်းထားခြင်းကသာလျှင် ဘယ်လိုအခြေအနေမှာမဆို အောင်မြင်စွာ ရပ်တည်နိုင်မယ့် နည်းလမ်းဖြစ်ပါတယ်။
ဒါကြောင့်
ဘယ်သူ ဘယ်ဝါကြောင့်မှ
ကိုယ့်အရည်အသွေးတွေကို မယုတ်လျော့စေပါနဲ့၊
မိမိကိုယ်သာ ကိုးကွယ်အားထားရာဆိုတာ ဒါပါပဲ ...
နန္ဒာစာရ
