20/12/2021
ချစ်သူနှစ်ဦးကြားမှာ ပျင်းရိငြီးငွေ့လာတာဟာ မဖြစ်သင့်တဲ့ အချက်တစ်ခုဖြစ်ပါတယ်။ ဒီလို ပျင်းရိငြီးငွေ့လာပြီဆိုရင် နှစ်ဦးသားအတူတူလုပ်ဆောင်နိုင်မယ့် စိတ်၀င်စားစရာတစ်ခုခုကို ရှာဖွေဖို့ အချိန်ပါပဲ။ ဒီအတွက် ဝါသနာသစ်တစ်ခုခုကို ရွေးချယ်လုပ်ဆောင်တာက အကောင်းဆုံးနည်းလမ်းဖြစ်မှာပါ။ ဒါ့ကြောင့် ချစ်သူစုံတွဲကို တစ်ဦးနဲ့တစ်ဦး ပိုမိုရင်းနှီးစေပြီး ဆက်ဆံရေးခိုင်မြဲစေနိုင်မယ့် ဝါသနာလေးတွေကို စုစည်းဖော်ပြလိုက်ပါတယ်။
၁။ ချက်ပြုတ်ခြင်း
ဟင်းလျာအသစ်တွေရဲ့ ဟင်းချက်နည်းတွေကို လေ့လာပြီး စမ်းသပ်ချက်ပြုတ်တာက နှစ်ယောက်စလုံးအတွက် ပျော်စရာကောင်းမှာ သေချာပါတယ်။ ပျော်စရာကောင်းရုံတင်မဟုတ်ပါဘူး။ အသစ်အဆန်းတွေကိုလည်း လေ့လာသင်ယူပြီးသား ဖြစ်မှာပါ။ အချက်အပြုတ်သင်တန်းတစ်ခုခု တက်လည်းရနိုင်သလို အွန်လိုင်းကနေ ဗီဒီယိုဖိုင်တွေ ကြည့်ပြီးတော့ပဲဖြစ်ဖြစ်၊ စာဖတ်ပြီးတော့ပဲဖြစ်ဖြစ် လေ့လာသင်ယူနိုင်ပါတယ်။ ကိုယ်တိုင်ကိုယ်ကျ အတူတူချက်ပြုတ်ခြင်းက ကျန်းမာရေးအတွက်လည်း အထောက်အကူဖြစ်စေပါတယ်။
၂။ ကိုယ်လက်လှုပ်ရှားဆောင်ရွက်မှုများ
သင့် ချစ်သူနဲ့အတူတူ လုပ်ဆောင်လို့ရတဲ့ အားကစားနည်းတွေ အများကြီးရှိပါတယ်။ စက်ဘီးစီးတာ၊ ပြေးတာ၊ အလေးမတာ၊ ယောဂကျင့်တာ နဲ့ တောင်တက်တာတွေ အစရှိသဖြင့် လုပ်ဆောင်လို့ရပါတယ်။ နှစ်ယောက်စလုံးအတွက် ပျော်စရာကောင်းပြီး စိန်ခေါ်မှုရှိစေတဲ့တစ်ခုခုကို ရွေးချယ်လုပ်ဆောင်ခြင်းက အချင်းချင်းအပြန်အလှန် နားလည်မှုနဲ့ ပံ့ပိုးကူညီမှုရှိဖို့အတွက် အခွင့်အလမ်းဖြစ်စေပါတယ်။ ကျန်းမာရေးကိုလည်း အထောက်အကူဖြစ်သလို နှစ်ဦးလက်တွဲပြီး အရင်က မလုပ်ဖူးခဲ့တာတွေကို အောင်မြင်စွာ လုပ်ဆောင်နိုင်တဲ့ အမှတ်တရတွေလည်း ရရှိလာမှာပါ။
၃။ ဘာသာစကားသစ်တစ်ခု သင်ယူခြင်း
ဘာသာစကားအသစ်တစ်ခုခုကို လေ့လာသင်ယူတာက အခြားအရာတွေထက် ပိုပြီးခက်ခဲနိုင်ပါတယ်။ ဒါပေမယ့် အခြားနိုင်ငံတစ်ခုခုကို ခရီးသွားဖို့ စဉ်းစားဖူးပါသလား။ စဉ်းစားဖူးတယ်ဆိုရင်တော့ နှစ်ယောက်စလုံး စိတ်၀င်စားတဲ့ ဘာသာစကားတစ်ခုခုကို ရွေးချယ်လိုက်ပါ။ ရွေးချယ်ပြီးတာနဲ့ အတူတူသင်တန်းသွားတက်တာပဲ ဖြစ်ဖြစ်၊ အိမ်ကနေပဲ အွန်လိုင်းမှတဆင့်လေ့လာတာပဲဖြစ်ဖြစ် လုပ်လို့ရပါတယ်။ နှစ်ယောက်သား အပြန်အလှန် စကားပြောရင်း လေ့ကျင့်နိုင်ပါတယ်။ အခြားဘာသာစကားတစ်ခုခုနဲ့ ချစ်တယ်လို့ ပြောနိုင်ဖို့ သိပ်သင်စရာမလိုပါဘူး။
၄။ ဂိမ်းကစားခြင်း
ကလေးကလားအလုပ်လို့ ထင်နိုင်ပါတယ်။ ဒါပေမယ့် ဂိမ်းအသစ်တစ်ခုကို လေ့လာကစားခြင်းက သင့်ရဲ့စိတ်ကို ထက်မြက်စေနိုင်ပါတယ်။ ဘုတ်ပြားနဲ့ကစားရတဲ့ ဂိမ်း၊ ဗီဒီယိုဂိမ်း၊ အွန်လိုင်းဂိမ်း တစ်ခုခုကို ရွေးလိုက်ပါ။ ဂိမ်းအများစုက စဉ်းစားတွေးခေါ်ပြီး အစီအစဉ်တကျကစားတတ်ဖို့ လိုပါတယ်။ ဒီကနေတဆင့် အရေးကြီးတဲ့ ပြောဆိုဆယ်သွယ်မှုနဲ့ လေးစားမှုတို့လိုမျိုး ဆက်ဆံမှုစွမ်းရည်တွေ တိုးတက်လာနိုင်ပါတယ်။ အသင်းအဖွဲ့စိတ်ဓာတ်ကိုလည်း သင်ယူနိုင်ပါတယ်။
၅။ ကခုန်ခြင်း
အကခန်းမကြီးမှာပဲဖြစ်ဖြစ်၊ ဟစ်ဟော့အကမျိုးပဲဖြစ်ဖြစ် ကခုန်ခြင်းက ချစ်သူစုံတွဲတွေအတွက် ပျော်ရွှင်စရာအချိန်တွေကို ဖြစ်စေပါတယ်။ တေးဂီတနဲ့ လိုက်လျောညီထွေဖြစ်အောင် လှုပ်ရှားဖို့ သင်ယူရတာက ကိုယ်ဟန်အနေအထားမှန်ကန်ဖို့၊ စိတ်အားထက်သန်ဖို့နဲ့ ခန္ဓာကိုယ် ကျန်းမာရေးတို့ကို အထောက်အကူဖြစ်စေပါတယ်။ ချစ်တဲ့သူနဲ့ အတူတူလုပ်ရတာက ပိုပြီးတော့ ပျော်ဖို့ကောင်းပါတယ်။ ဒါ့အပြင် ရိုမန်းတစ်လည်း ဆန်ပါတယ်။ နှစ်ယောက်စလုံးကို ရုပ်ပိုင်းဆိုင်ရာရော စိတ်ပိုင်းဆိုင်ရာပါ ပိုမိုနီးကပ်စေပါတယ်။
ဘယ်လိုဝါသနာမျိုးကိုပဲ ရွေးချယ်တာဖြစ်ဖြစ် နှစ်ယောက်အတူတူလုပ်ရတဲ့ အရာမှန်သမျှက သင့်တို့နှစ်ဦးကြား ဆက်ဆံရေးကို ပိုမိုခိုင်မာစေနိုင်ပါတယ်။ တစ်ခုသိထားရမှာက အကုန်အကျများတဲ့ ဝါသနာတွေတော့ မလုပ်ဖို့ပါပဲ။
#ဟီခဲအမျိုးသားအားဆေး
