10/12/2023
လူတစ်ယောက်မှာ သူပိုင်ဆိုင်တဲ့ ငွေကို သိမ်းဆည်းတဲ့ ဘဏ်အကောင့် တစ်ခုရှိတတ်ကြတယ်။
ဘဏ်အကောင့်ထဲမှာ သူပိုင်ဆိုင်တဲ့ Money ငွေကြေးကို သိုလှောင်တယ်။
ဒီလိုပဲ လူတစ်ယောက်စီမှာ Self-Value ဘဏ်အကောင့် တစ်ခုစီရှိကြတယ်။
ဒီအကောင့်မှာ သူ့ကိုယ်သူ လေးစားမှု၊ ချစ်ခင်မှု၊ တန်ဖိုးထားမှု၊ Self-love, Self-respect တွေကို သိမ်းဆည်းသိုလှောင်ကြပါတယ်။
လူတွေဟာ ငွေရှာကြတယ်။ ငွေရှာရင် ဘဏ်အကောင့်ထဲ ငွေဝင်လာတယ်ပေါ့။
ရှာပြီးရင် ပိုင်ဆိုင်တဲ့ ငွေကို ပြန်သုံးကြတယ်။ သုံးတဲ့အခါ ဘဏ်ထဲက ငွေတွေ ပြန်ထွက်တယ်ပေါ့။ အခြို့လည်း လိုအပ်ချက်အတွက်သုံးတယ်။ အခြို့လည်း ပျော်ချင်ပါးချင်လို့ ဖြုံး ကြတာရှိတယ်။ အခြို့လည်း အနာဂါတ်အတွက် ရင်းနှီးမြှုပ်နှံတတ်ကြတယ်။
ဒီလိုပဲ ကျနော်တို့ဟာ Self-Value ဘဏ်အကောင့်အတွက် Self-respect currency တွေ ဝင်လာအောင် လုပ်ကြရတယ်။ ကိုယ့်ကိုကိုယ် စောင့်ရှောက်တာ၊ စိတ်ချမ်းသာအောင်ထားတာ၊ ကျန်းမာအောင်နေတာ၊ စဉ်းစားဉာဏ်ရင့်သန်ဖို့ စာဖတ်တာ၊ ပညာသင်တာ၊ ကိုယ်ကိုတန်ဖိုးထားတဲ့ သူတွေနဲ့ ယှဉ်တွဲနေထိုင်တာ။ ဒါတွေက Self-respect currency တွေ ရှာဖွေ စုဆောင်းခြင်း ဖြစ်ပါတယ်။ အပန်းဖြေ ခရီးထွက်တာ၊ လေ့ကျင့်ခန်းလုပ်တာ၊ တရားထိုင်တာ၊ ချစ်ခင်သူတွေနဲ့ တွေ့ဆုံတာ စတဲ့ လုပ်ရပ်တွေပေါ့။
တစ်ဖက်မှာလည်း ကျနော်တို့ ဒီ Self-respect Currency ကို ပြန်လည်သုံးစွဲကြတယ်။
အရက်သောက်တာ၊ လောင်းကစားလုပ်တာ၊ စိတ်အလိုလိုက်တာ၊ မူးယစ်ဆေးသုံးတာ၊ မဆင်မခြင်စားတာ၊ အိပ်ရေးပျက်ခံတာ၊ ဖြစ်သလိုနေတာ၊ သူတစ်ပါးအတွက် ကိုယ့်ကိုကိုယ်ထိခိုက်ခံတာ၊ နစ်နာအောင်လုပ်တာ စတာတွေပေါ့။ ဒါတွေက ငွေကို သုံးပစ်နေတာနဲ့ တူတယ်။
ကျနော်တို့ဟာ ဝင်ငွေ နှင့် ထွက်ငွေ မျှတဖို့ ကြိုးစားရပါမယ်။
ငွေကြေး ဘဏ်အကောင့်မှာ ဝင်ငွေနည်းပြီး အသုံးအစွဲကြမ်းရင် မွဲသွားပါမယ်။ ခွေး ဖြစ်ပါမယ်။
Self-Value ဘဏ်အကောင့်ထဲမှာ ဝင်ငွေနည်းပြီး အသုံးအစွဲကြမ်းရင် ဒီထက် ဆိုးပါတယ်။ ကျနော်တို့ရဲ့ စိတ် နှင့် ခန္တာကိုယ်အပေါ် ထိန်းသိမ်းနိုင်စွမ်းတွေ လျော့ပါးပျောက်ဆုံးလာပါမယ်။ ဦးနှောက် အလုပ် လုပ်ပုံတွေ ဂယောက်ဂယက်ဖြစ်လာမယ်။ ခန္တာကိုယ် နှင့် စိတ်ရဲ့ ကျန်းမာရေးပျက်စီးလာပါမယ်။ ဆုံးဖြတ်နိုင်စွမ်းတွေ ကျလာမယ်။ ကိုယ့်ကိုကိုယ် လေးစားတန်ဖိုးထားခြင်း မရှိတဲ့အခါ၊ အခြားသူတွေအပေါ်လည်း လေးစားတန်ဖိုးထားခြင်းတွေ မရှိဖြစ်လာမယ်။
ဒါကြောင့် ကိုယ်ဘာပဲ လုပ်လုပ်၊ ငါလုပ်နေတာဟာ၊ Self-respect အကောင့်ထဲကို ငွေထည့်နေတာလား၊ ငွေထုတ်သုံးနေတာလား ဆိုတာတော့ သတိကပ်ထားပါ။ ထည့်တာများနေပါစေ။ ထုတ်တန်တာလည်း ထုတ်သုံးနိုင်ပါတယ်။ ထုတ်ပြီးရင်လည်း ငွေပြန်ရှာပါ။ ပြန်စုဆောင်းပါ။ အကောင့်ထဲမှာ Self-respect currency များလေလေ၊ ဘဝကို တန်ဖိုးရှိရှိ ဖြတ်သန်းနိုင်လေလေပါပဲ။
အခြို့ကျတော့လည်း၊ မကောင်းတာ ဘာမှအလုပ်ဘူး ဆိုတာမျိုး။ ကိုယ့်ကိုကိုယ် ထိခိုက်စေတာဆို လုံးဝ မလုပ်ဘူးဆိုပြီး ရှောင်တယ်။ ဒါကျတော့လည်း (ကျနော့် ကိုယ်ပိုင်အတွေးအရ) သိပ်တော့ အားမပေးချင်ဘူးရယ်။ ဟုတ်တယ်လေ၊ ငွေရှာတာ သုံးဖို့ ပဲမဟုတ်လား။ ရှာပဲ ရှာပြီး အသုံး အဖြုံးလေးမှ မရှိတော့လည်း ဘဝကြီးက ပျင်းစရာ။ ငံပြာရည်တို့၊ ငရုတ်သီး မှုန့်တို့ဆိုတာ သူတို့ချည်းစာလို့ ဘယ်မှာ နှစ်လိုဖွယ်ရှိလို့လဲ။ ဒါပေမယ့်လို့ သူတို့ မပါပဲ အသုတ်တစ်ပွဲ သုတ်စားကြည့်ပါလား။ ဘယ်မှာ ခံတွင်းတွေ့လို့တုန်း။ ဘဝမှာ အခြို့ကိစ္စတွေဟာလည်း အဲ့ဒီလိုပါပဲ။ အချိုးကျ ရောနှောပါဝင် နေတာက ဘဝကို ပိုပြီး လူသားဆန်စေပါတယ်။
ဒါ့ကြောင့် အရက်သောက်မလား သောက်ပါ။ ပေါက်ကရ လုပ်မလား၊ လုပ်ပါ။ ကိုယ့်ရဲ့ စိတ်၊ ခန္တာ၊ ဦးနှောက်ကို အလွန်အကျွံ အသုံးချမလား၊ ချပါ။ တစ်ခုပဲ။ တစ်ခုပါပဲ။ သုံးတာထက် ရှာတာ ပိုများပါစေ။ Self-respect currency ကို အလွန်အကျွံ မဖြုံးတီးမိပါစေနဲ့။ မတော်လို့ ဖြုံးတီးမိရင် သတိကပ်ပြီး ရပ်နားပါ။ ပြန်ရှာပါ။ စုဆောင်းပါ။ ကိုယ်ရှာနိုင်တာထက် လျော့သုံးဖို့ ကန့်သတ်ထားပါ။
Self-Value ဘဏ်အကောင့်ထဲမှာ Self-respect ငွေကြေးတွေ ပြည့်ပြည့်ဝဝ ရှိနေပါစေ။ ဘဝမှာ လူတွေဟာ မကောင်းတာ တစ်ခုခု လုပ်မိလို့ လမ်းဆုံးရောက်တာ မဟုတ်ပါဘူး။ Self-respect မွဲသွားလို့ လမ်းဆုံးရောက်သွားကြတာပါ။
သဗ္ဗေ သတ္တာ ကံမ္မသကာ
Bob Thwin Naung Soe
