10/05/2026
မြိုသိပ်ထားရသော မကျေလည်မှုတွေဆိုတာ တစ်ကြိမ်တစ်ခါတည်း ပေါ်ထွက်လာတဲ့ ခံစားချက်တွေ မဟုတ်နေတတ်ပါဘူး။ အချိန်ကြာလာတဲ့အထိ မညီမျှမှုတွေ၊ မမျှတမှုတွေကို ကိုယ့်အတွင်းထဲမှာ အကြိမ်ကြိမ်အခါခါ ခံစားနေရခြင်းကနေ တဖြည်းဖြည်း စုပေါင်းလာတတ်တဲ့ အရာတစ်ခုလို့ပဲ ဆိုလိုက်ချင်ပါတယ်။
မြိုသိပ်ထားမှုတွေ၊ မကျေလည်မှုတွေ သိပ်များသွားတဲ့အခါ စိတ်ပျက်မှုတွေဖြစ်လာတယ်။ ဒေါသတွေပါလာတယ်။ တစ်ခုခုဆို ပေါက်ကွဲဖို့ ပိုလွယ်ကူလာတယ်။
လက်ရှိအခြေဟာ ကိုယ့်ကို စိတ်ဆိုး၊ အဆင်မပြေဖြစ်စေဖို့ trigger ဖြစ်လာတယ်ဆိုပေမယ့် ကိုယ့်စိတ်ထဲ စုစုထားခဲ့ရတဲ့ သေးသေးလေးတွေ၊ အချိန်နဲ့အမျှ ဖြစ်တည်လာတဲ့ စိတ်ထဲက မြိုသိပ်မှုတွေဟာ လက်ရှိမှာ အင်နဲ့အားနဲ့ ကိုယ့်ဆီကို ဝင်လာသလိုပဲ။ ဒါ့ကြောင့် တချို့တွေ အချိန်တစ်ခုမှာ ဘာမှမဟုတ်လည်း ပိုစိတ်ဆတ်၊ စိတ်တိုလွယ်လာတာမျိုးတွေ တွေ့ရတတ်တယ်။
စုပေါင်းလာတယ်ဆိုကတည်းက “တစ်ကြိမ်တည်း” ကြောင့် မဟုတ်ဘဲ “ထပ်တလဲလဲ ဖြစ်နေမှုတွေ” များလာတဲ့အကြိမ်တွေကြောင့် ဖြစ်လာတတ်တာများတယ်။ ဥပမာ ပြောရရင်
🔲 ကိုယ့်လိုအပ်ချက်တွေကို အမြဲလျစ်လျူရှုခံနေရတဲ့အခါ (သို့)
🔲 ပြောခဲ့ပေမယ့် မပြောင်းလဲမှုတွေကိုပဲ ဆက်တိုက် လက်ခံပေးနေရတဲ့အခါ၊
🔲 ကိုယ့်ဘက်ကပဲ အလျော့ပေးသည်းခံ၊ ကိုယ့်ကိုယ်ကိုယ်နောက်ပို့ရတာတွေများလာတဲ့အခါ…
ဒီလိုအခါတွေမှာ အဲ့ဒီခံစားချက်က အတွင်းမှာ တဖြည်းဖြည်း စုပေါင်းလာပြီး နောက်ဆုံးမှာ မကျေလည်မှု၊ နာကျင်မှုတွေ၊ ဒေါသတွေအဖြစ် ပြောင်းလဲလာတတ်ပါတယ်။
ဒီမကျေလည်နေတဲ့ ခံစားချက်တွေဆိုတာ စိတ်ပျက်အားလျော့မှုတွေ၊ ဒေါသတွေချည်းပဲ မဟုတ်နေနိုင်ဘူး။ တခါတလေ ဒီခံစားချက်တွေရဲ့ နောက်ကွယ်မှာ နူးညံံ့တဲ့လိုအပ်ချက်လေးတွေပါ တည်ရှိနေတတ်တာကိုလည်း ကျွန်မတို့တွေ သတိပြူနိုင်ပါသေးတယ်။
🔲 “ငါ့ကို နားလည်ပေးစေချင်မိတယ်…”
🔲 “ငါ့ကို မြင်ပေးစေချင်မိတယ်…”
🔲 “ငါ့စကားတွေကို အရေးတယူဖြစ်ပေးစေချင်မိတယ်”
🔲 “ ငါပင်ပန်းနေတာကို တချက်လောက် သတိထားမိစေချင်မိတယ်” ဆိုတဲ့ အသံလေးတစ်ခုလည်း ဖြစ်နေနိုင်ပါတယ်။
ဒီလို ဖြစ်နေတဲ့ ခံစားချက်တွေကို ဆက်ပြီး ကိုယ့်ဘက်ကလည်း လျစ်လျူရှုထားရင်၊ တစ်ဘက်နဲ့လည်း အေးအေးဆေးဆေး ပြောဆိုဆွေးနွေးမှုကို မပြုလုပ်ရင် (သို့) ပြုလုပ်ခွင့် မရခဲ့ရင် အချင်းချင်းကြားမှာ နားလည်မှုတွေ၊ connection တွေ၊ ရင်းနှီးမှုတွေကိုပါ တဖြည်းဖြည်း ပြိုပျက်စေလာနိုင်ပါတယ်။
အပေါ်ကပြောခဲ့သလို တစ်ခါတလေ မကျေမလည် တနုံ့နုံ့ဖြစ်နေတဲ့ ခံစားချက်တွေအောက်မှာ မကြားရသေးတဲ့ လိုအပ်ချက်တစ်ခု၊ မမြင်ရသေးတဲ့ နာကျင်မှုတစ်ခု ရှိနေနိုင်ပါတယ်။
ဒါကြောင့် အဲဒီခံစားချက်တွေကို အမြန်တုံ့ပြန်မိမယ့်အစား အချိန်ယူ ကိုယ့်ကိုယ်ကို သတိထားကြည့်နိုင်ပါတယ်။ ဒီအခြေအနေမှာ -
◻️ “ငါဘာလိုအပ်နေလဲ…”
◻️ “ငါဘာကြောင့် ဒီလောက် ခံစားရလဲ…” ဆိုတာတွေကို တဖြည်းဖြည်း နားလည်လာဖို့ ကြိုးစားကြည့်နိုင်ပါတယ်။
ဒီလို နားလည်မှုလေးတွေ ရလာတဲ့အခါ ကိုယ်နဲ့ ကိုယ်ကြားမှာလည်း နူးညံ့မှုလေးတစ်ခု ပိုတိုးဖန်တီးလာနိုင်တယ်။ တစ်ဖက်လူနဲ့ ဆက်ဆံရေးထဲမှာလည်း ဘယ်အရာဟာ အကောင်းဆုံးဖြစ်နိုင်မလဲဆိုတဲ့ လိုအပ်မှု၊ စည်းဘောင်၊ ညှိနှိုင်းမှု၊ ပြင်ဆင်မှု၊ ရွေးချယ်မှု စတာတွေကို ပိုနားလည်နိုင်တဲ့ နေရာတစ်ခု ဖန်တီးလာနိုင်ပါတယ် 🌿🌿🌿
မေတ္တာဖြင့်
Andrea
✅ လွတ်လပ်စွာ Share နိုင်ပါသည်။
⚠️ Copy ကူး၍ နာမည်ပြောင်းခြင်း ခွင့်မပြုပါ။
