27/07/2026
࿇ ကောင်းသော ဇာတာအကျိုးပေး လျင်မြန်စေတဲ့ ပုတီးစိပ် ࿇
မရေးပေးပဲ မနေနိုင်လောက်အောင် ကောင်းတဲ့ ပုတီးစိပ်နည်းလေးတစ်ခု တွေ့ထားလို့ ရေးပေးပါဦးမယ်။ ဒီပုတီးစိပ်နည်းကို ဝိဇ္ဇာဓိုရ်ဖြစ်နေတဲ့ အင်းဝဘုရင် ပထမ မင်းခေါင်က သတ္တမမြောက် ကျော်အောင်စံထား ဆရာတော်ကြီးထံ ဆွမ်းလာကပ်ရင်း လှူဒါန်းသွားခဲ့တာပါ။ (ပုပ္ပါးဘိုးမင်းခေါင်နဲ့ အင်းဝဘုရင်မင်းခေါင် မတူပါဘူး။) လျှောက်ထားချက်တွေအရ ဘုရင်မင်းခေါင်ရဲ့ငယ်နာမည်ဟာ မင်းဆွေဖြစ်ပြီး မြန်မာသက္ကရာဇ် ၇၃၄ ခုနှစ်မှာ ဖွားမြင်ခဲ့ကာ ခမည်းတော်ကတော့ မင်းကြီးစွာစော်ကဲ ဖြစ်ပါတယ်။
မင်းဆွေရဲ့ဇာတာကို ဟူးရားဖြူ၊ ဟူးရားညိုတို့နဲ့ စစ်ဆေးကြည့်ရာမှာတော့ နောင်တစ်ချိန်မှာ ရှင်ဘုရင်ဖြစ်လာမယ့်အကြောင်းကို သိလိုက်ရတဲ့အတွက် ငယ်စဉ်ကပင် မျက်ကွယ်ရာ သေပေစေတော့လို့ သဘောထားပြီး ထွန်းတုံးပူတက်တောင်ဘက် ကျောက်ဆည်ပန်းထိမ် မဖဲအရပ်ကို ပို့ထားခြင်း ခံခဲ့ရပါတယ်။ အသက် ၁၀ နှစ်အရွယ်တိုင်အောင် ဘဝကို ပင်ပန်းဆင်းရဲစွာ ဖြတ်သန်းခဲ့ရပြီးနောက်မှာ အသက်ရှင်ကျန်နေသေးတဲ့အတွက် "ကံအတိုင်းဖြစ်စေတော့" ဆိုပြီး ပြန်ခေါ်ကာ ပင်လယ်ကျေးသံဃရာဇာ ဆရာတော်ထံမှာ စာပေသင်ကြားစေခဲ့ပါတယ်။ ဆရာတော်ဟာ ပိဋကတ်ကိုသာမက ဗေဒင်ကိုပါ နှံ့စပ်ကျွမ်းကျင်တဲ့အတွက် မင်းဆွေတစ်ယောက် ရှင်ဘုရင်ဖြစ်မှာကို သိလာပြီး မင်းအဖြစ်ကို လျင်မြန်စွာ ရစေဖို့ အခုပြောပြမယ့် ပုတီးစိပ်နည်းကို သင်ကြားပေးခဲ့ပါတယ်။
မင်းဆွေဟာ ဒီပုတီးစိပ်နည်းအတိုင်း နေ့စဉ် မနက်တိုင်း ၃ ပတ်စီ မပျက်မကွက် စိပ်လာခဲ့ပါတယ်။ မင်းဆွေ အသက် ၁၂ နှစ်အရွယ်ကို ရောက်ချိန်မှာတော့ တစ်ခုသော မိုးသောက်ယံမှာ ချက်က အူတွေထွက်ပြီး အင်းဝမြို့ကြီးကို ရစ်ပတ်ထားတယ်လို့ အိပ်မက် မြင်မက်ပါတယ်။ ဆရာတော်ကို လျှောက်ထားတော့ ရုတ်တရက် ထပြီး မင်းဆွေကို ခြေထောက်နဲ့ ကန်ကျောက်ကာ "မင်းသား အိပ်မက်အလိုအရ မကြာခင် မင်းဖြစ်ရလိမ့်မည်။ မင်းဖြစ်လျှင် မေ့မည်စိုး၍ ငါခြေနှင့် အမှတ်ပေးသည်။" လို့လည်း မိန့်တော်မူခဲ့ပါတယ်။
မင်းဆွေဟာ အသက် ၂၉ နှစ်အရွယ်မှာ အမှန်တကယ်ပဲ ရှင်ဘုရင်ဖြစ်လာခဲ့ပါတယ်။ ထီးနန်းကို သိမ်းပိုက်ပြီးနောက်မှာတော့ ပုဂံရွှေစည်းခုံဘုရားကို ထွက်တော်မူပြီး ဖူးမြင်တဲ့အခါ အင်္ဂါထောင့်က သိကြားမင်းကိုယ်တိုင် ဖန်တီးပြုလုပ်ထားတဲ့ ခြင်္သေ့ရုပ်ဟာ ခေါင်း၊ ခါး၊ တင်ပါး၊ အမြီး၊ နားတွေ အားလုံးလှုပ်ပြီး မြူးရွှင်တဲ့အမူအရာ နိမိတ်ကို ပြတဲ့အတွက် ဘုရင့်ဘုန်းကံကြီးမားလှကြောင်း မှူးမတ်တွေနဲ့ ပြည်သူအများ နားလည်သွားခဲ့ရပါတယ်။
အဲဒီညမှာပဲ စက်တော်ခေါ်ရင်း မှေးခနဲဖြစ်ခိုက်မှာ "မင်းခေါင် ဟူသော အမည်ခံလေ" လို့ အိပ်မက်လိုလို၊ တကယ့်အပြင်မှာလိုလို ကြားလိုက်ရတဲ့အတွက် မင်းဆွေကနေ ဘုရင်မင်းခေါင် ဖြစ်လာခဲ့ရပါတယ်။ နောက်ပိုင်းမှာတော့ ရာဇာဓိရာဇ်နဲ့ နှစ်ပေါင်းများစွာကြာအောင် စစ်ဖြစ်ခဲ့ကြပါတယ်။ ဒါပေမယ့် သားတော် မင်းရဲကျော်စွာ ကျဆုံးပြီးချိန်က စလို့ စစ်တိုက်ခြင်းကို စွန့်လွှတ်လိုက်ကာ ပုတီးကိုသာ တစိုက်မတ်မတ်စိပ်ပြီး ပြင်းပြင်းထန်ထန် အားထုတ်ခဲ့တဲ့အတွက် သိဒ္ဓိမဟိဒ္ဓိနဲ့ ပြည့်စုံတဲ့ ဝိဇ္ဇာဓိုရ်အဖြစ် ကူးပြောင်းလို့ အသေထွက် (သေချင်ယောင်ဆောင်ပြီး) ထွက်သွားပါတော့တယ်။
ဘုရင်မင်းခေါင်ဟာ ထွက်ရပ်လမ်းကို မလိုက်ခင် အသက် ၁၀ နှစ်ကျော်အရွယ်ကနေ အသက် ၄၅ နှစ်အရွယ်အထိ ဒီပုတီးစိပ်နည်း တစ်နည်းတည်းကိုသာ တစ်နေ့ ၃ ပတ်ကနေ ၉ ပတ်အထိ စိပ်ခဲ့တယ်လို့ ဆိုပါတယ်။ ဝိဇ္ဇာဓိုရ်ဖြစ်ပြီးနောက်မှာလည်း လက်မလွှတ်ပဲ ဗောဓိပက္ခိယတရား ၃၇ ပါးနဲ့အညီ ၃၇ ပတ်စိပ်ပါသတဲ့။ ဒီပုတီးစိပ်နည်းဟာ ဘုရင်မင်းခေါင်ကို မင်းသားဘဝကနေ မင်းအဖြစ် လျင်မြန်စွာ ရောက်ရှိစေခဲ့ရုံသာမက သက်တမ်းတစ်လျှောက် စစ်ပွဲပေါင်းများစွာ ကြုံခဲ့ရပေမယ့် အန္တရာယ်ကင်းစေခဲ့တာ၊ ဘုန်းတန်ခိုးအာနုဘော်ကြီးမားစေခဲ့တာ၊ နောင်ပိုင်းမှာ ဝိဇ္ဇာဓိုရ်ဖြစ်လာဖို့ အထောက်အပံ့ဖြစ်စေခဲ့တာ စတဲ့ အကျိုးကျေးဇူးတွေကိုပါ ပေးစွမ်းနိုင်ခဲ့တာ ထင်ရှားလှပါတယ်။ ပုတီးစိပ်နည်းကို ပြောပြပါတော့မယ်။
"သိဒ္ဓံ နမောဗုဒ္ဓါယ အ အာ ဣ ဤ ဥ ဦ ဧ အဲ ဩ ဪ အံ အား။"
(အားလုံးဆုံးမှ ပုတီးတစ်လုံးချရန် ဖြစ်ပါတယ်။)
.........
ဘုရင်မင်းခေါင်ရဲ့ လျှောက်ထားချက် အတ္ထုပ္ပတ္တိအရ ရေစက်တိုက်ဆိုင်သူများလည်း ဒီပုတီးစိပ်နည်းကို မိမိတို့ရဲ့ကောင်းသော ဇာတာအကျိုးပေးတွေ အလျင်အမြန်ရောက်ရှိလာစေဖို့ စိပ်နိုင်ကြပါလိမ့်မယ်။ မြန်မာအက္ခရာတွေဟာ နဂိုတည်းက လေးနက်တဲ့ စွမ်းအားတွေကို ပိုင်ဆိုင်ထားကြလို့ အင်းစမတွေအဖြစ် အသုံးပြုနိုင်တာကို သိထားကြပြီးဖြစ်မှာပါ။ ဒီပုတီးစိပ်နည်းအတွင်းမှာ သရတွေကို ထည့်သွင်းထားတာဟာလည်း သဘောတရား တူညီပါတယ်။ ဒီပုတီးစိပ်နည်းဟာ လာမယ့် ဒုတိယဝါဆိုလပြည့်နေ့အကြို ကျွန်တော်ရဲ့လက်ဆောင်ပဲ ဖြစ်ပါတယ်။ ရေစက်တိုက်ဆိုင်သူအပေါင်း ကျန်းမာချမ်းသာခြင်းများနဲ့ ပြည့်စုံကြပါစေ။ share ထားနိုင်ပါတယ်။ နောက်ရက်တွေမှာလည်း လောကီပညာအကြောင်း စာတွေဆက်ရေးသွားဦးမှာမို့ ဖတ်လိုရင် follow လုပ်ထားနိုင်ပါတယ်ခင်ဗျာ။
⬧⬧⬧⬧⬧⬧⬧⬧⬧⬧
✶ ပညာဒါနစာတွေနဲ့ ပတ်သက်ပြီးဖြစ်စေ၊ လောကီပညာအကြောင်းဖြစ်စေ၊ သိချင်တာရှိရင် လာမေးနိုင်ပါတယ်။ တတ်နိုင်သလောက် ဖြေကြားပေးပါမယ်။
✶ ကိစ္စပေါင်းစုံအတွက် အဟောမေးနိုင်ပါတယ်။ ဆေးဖယောင်းတိုင် အစီအရင်လည်း ပြုလုပ်ပေးပါတယ်။
09780992963 ဖုန်း/viber/telegram
