08/10/2026
🔥 #မင်းအောင်လှိုင်၏ မလေးရှားခရီးစဉ်ကို APHR ကန့်ကွက်၊ မြန်မာနိုင်ငံသားများ ပြန်ပို့မှု ရပ်ဆိုင်းရန် တောင်းဆို
DMG ၊ အောက်တိုဘာ ၆
မလေးရှားဝန်ကြီးချုပ် အန်ဝါအီဘရာဟင်က မြန်မာစစ်ခေါင်းဆောင် မင်းအောင်လှိုင်ကို တရားဝင်ခရီးစဉ် အဖြစ် လက်ခံတွေ့ဆုံမည့်အပေါ် အာဆီယံလွှတ်တော်အမတ်များ လူ့အခွင့်အရေးအဖွဲ့ (APHR) က ကန့်ကွက် လိုက်ပြီး ယင်းသို့လက်ခံခြင်းသည် စစ်အုပ်စုကို တရားဝင်မှုရရှိစေနိုင်ကြောင်း သတိပေးထားသည်။
မင်းအောင်လှိုင်သည် အောက်တိုဘာ ၆ ရက်တွင် မလေးရှားနိုင်ငံသို့ တရားဝင်ခရီးစဉ် စတင်မည်ဖြစ်ပြီး ၎င်း ကို နိုင်ငံတော်အဆင့် ဂုဏ်ပြုလက်ခံခြင်းသည် လေကြောင်းတိုက်ခိုက်မှုများနှင့် အတင်းအဓမ္မစစ်မှု ထမ်းခိုင်း စေမှုများကို ရင်ဆိုင်နေရသည့် မြန်မာပြည်သူများထံ မှားယွင်းသည့်သတင်းစကား ပေးပို့ရာရောက်မည်ဟု APHR က အောက်တိုဘာ ၅ ရက်တွင် ထုတ်ပြန်သည်။
“မလေးရှားအနေနဲ့ မင်းအောင်လှိုင်ကို လုံးဝလက်မခံသင့်ပါဘူး။ သူ့အတွက် ခင်းပေးလိုက်တဲ့ ကော်ဇောနီ တိုင်းဟာ လေကြောင်းတိုက်ခိုက်မှုတွေနဲ့ အတင်းအဓမ္မစစ်မှုထမ်းခိုင်းစေမှုတွေကြားမှာ နေထိုင်နေရတဲ့ မြန်မာပြည်သူတွေကို ဒေသတွင်းနိုင်ငံတွေက သူတို့အပေါ် လုပ်ဆောင်နေတာတွေကို လက်ခံလိုက်ပြီဆိုတဲ့ သတင်းစကား ပေးပို့ရာရောက်ပါတယ်” ဟု APHR ဥက္ကဋ္ဌနှင့် အင်ဒိုနီးရှားလွှတ်တော်အမတ် Mercy Chriesty Barends က ပြောသည်။
၂၀၂၁ ခုနှစ် စစ်အာဏာသိမ်းပြီးနောက် အာဆီယံထိပ်သီးအစည်းအဝေးများသို့ မြန်မာနိုင်ငံမှ နိုင်ငံရေး ကိုယ်စားလှယ်များ တက်ရောက်ခွင့် ကန့်သတ်ထားသည့်အတွက် မလေးရှား၏ ယခုလက်ခံတွေ့ဆုံမှုသည် မင်းအောင်လှိုင်အတွက် အရေးပါသည့် သံတမန်ရေးအကျိုးအမြတ်တစ်ခု ဖြစ်လာနိုင်ကြောင်း APHR က ဆိုသည်။
တစ်ချိန်တည်းတွင် မလေးရှားက မြန်မာနိုင်ငံသားများကို ပြန်ပို့နေမှုအပေါ်လည်း APHR က စိုးရိမ်ကြောင်း ပြောသည်။
မလေးရှားသည် စက်တင်ဘာ ၂၉ ရက်တွင် အမျိုးသမီး ၇၉ ဦးနှင့် ကလေး ၂၇ ဦးအပါအဝင် မြန်မာနိုင်ငံသား ၁,၄၇၆ ဦးကို ပြန်ပို့ခဲ့ပြီး နောက်ထပ် ၃,၅၂၄ ဦးကိုလည်း ပြန်ပို့ရန် စီစဉ်ထားကြောင်း APHR က ဆိုသည်။
ယင်းသို့ ပြန်ပို့မှုသည် ရခိုင်ပြည်၊ ကျောက်တော်မြို့ရှိ ဈေးတစ်ခုအနီးကို မြန်မာစစ်တပ်က လေကြောင်း တိုက်ခိုက်ခဲ့၍ အရပ်သား အနည်းဆုံး ၄၉ ဦး သေဆုံးပြီး ရက်ပိုင်းအကြာတွင် ပြုလုပ်ခဲ့ခြင်းဖြစ်ကြောင်း APHR က ထောက်ပြထားသည်။
ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) သည် အဆိုပါ ပြန်ပို့ရေးလုပ်ငန်းစဉ်တွင် ပါဝင်ခဲ့ ခြင်းမရှိသလို လက်ရှိမြန်မာနိုင်ငံ၏ အခြေအနေသည် ဘေးကင်းစွာ နေရပ်ပြန်နိုင်သည့် အခြေအနေမဟုတ် သေးကြောင်း ပြောထားသည်ဟု APHR က ဆိုသည်။
ပြန်ပို့ခံရသူများသည် ဖမ်းဆီးထိန်းသိမ်းခံရခြင်း၊ အတင်းအဓမ္မစစ်မှုထမ်းခိုင်းစေခြင်းနှင့် မတရားပြုမူဆက်ဆံ ခံရခြင်းတို့ ကြုံတွေ့နိုင်သည့် အန္တရာယ်ရှိပြီး လူဝင်မှုကြီးကြပ်ရေးထိန်းသိမ်းရေးစခန်းများအတွင်း ပေးသည့် သဘောတူညီချက်ကိုလည်း လွတ်လပ်ပြီး သိရှိနားလည်စွာ ပေးသည့်သဘောတူညီချက်အဖြစ် မယူဆနိုင် ကြောင်း APHR က ပြောသည်။
ယင်းသို့ ပြန်ပို့နေမှုသည် ညှဉ်းပန်းနှိပ်စက်ခံရနိုင်သူ သို့မဟုတ် အသက်အန္တရာယ်ရှိသူ မည်သူ့ကိုမျှ ပြန်ပို့မည် မဟုတ်ဟု မလေးရှားအစိုးရက ဩဂုတ်လတွင် ပြုလုပ်ခဲ့သည့် ကတိကဝတ်နှင့် ကိုက်ညီမှုမရှိသလို အန္တရာယ်ရှိ သည့် နေရာသို့ အတင်းအကျပ် ပြန်မပို့ရဟူသော non-refoulement မူနှင့်လည်း ကိုက်ညီမှုမရှိကြောင်း APHR က ဆိုသည်။
ထို့ကြောင့် မြန်မာနိုင်ငံသို့ ဘေးကင်းလုံခြုံပြီး လူ့ဂုဏ်သိက္ခာရှိစွာ ပြန်နိုင်သည့် အခြေအနေမရောက်မချင်း နောက်ထပ်ပြန်ပို့မှုများကို ရပ်ဆိုင်းထားရန်နှင့် ပြန်ပို့ရန်စီစဉ်ထားသူများအား UNHCR က တွေ့ဆုံစိစစ်ခွင့်ရရှိ စေရန် APHR က မလေးရှားအစိုးရကို တောင်းဆိုထားသည်။
ထို့အပြင် မြန်မာစစ်တပ်ကျောထောက်နောက်ခံပြု အစိုးရကို တရားဝင်အစိုးရအဖြစ် အသိအမှတ်ပြုရာ ရောက်စေနိုင်သည့် သဘောတူညီချက်များ လက်မှတ်မထိုးရန်၊ ပူးတွဲကြေညာချက်များ မထုတ်ပြန်ရန်နှင့် မင်းအောင်လှိုင်ကို နောက်ထပ်ဖိတ်ကြားမှုများ မပြုလုပ်ရန်လည်း APHR က တောင်းဆိုထားသည်။
#မြန်မာ #မလေးရှား #မင်းအောင်လှိုင် #အာဆီယံ #မြန်မာဒုက္ခသည် #လူ့အခွင့်အရေး #နေရပ်ပြန်ပို့မှု #အာရက္ခ #ကျောက်တော်