Barangay Poblacion Health Promotion

11/03/2026

PhilHealth YAKAP: Yaman ng Kalusugan Program

Magandang araw po sa mga taga Barangay Poblacion!

Inaanyayahan po namin ang lahat sa gaganaping Mass Registration para sa PhilHealth YAKAP: Yaman ng Kalusugan Program sa Biyernes, March 13, 2026. Ito po ay gaganapin sa Barangay Poblacion, mula 8:00 AM hanggang 12:00 NN.

Maari na po ninyong ihanda ang mga sumusunod upang mas mapabilis ang proseso ng pagpaparehistro:• Photocopy ng Valid ID para sa mga 21 years old pataas• Photocopy ng Birth Certificate para sa mga 20 years old pababa

Ano ang PhilHealth YAKAP?✅ Ang PhilHealth YAKAP ay programa ng pamahalaan na naglalayong tulungan ang mga Pilipino na mapanatili ang mabuting kalusugan at maiwasan ang mga karamdaman sa pamamagitan ng mga serbisyong pangkalusugan.

Sino ang maaaring maging bahagi nito?✅ Lahat ay maaaring makinabang—miyembro man o dependent, bata man o matanda—bilang bahagi ng programang ito para sa kalusugan ng bawat Pilipino.

Kung may katanungan po, maaari po kayong makipag-ugnayan sa ating mga Barangay Health Workers.

Maraming salamat po.

28/01/2026

📣 ANNOUNCEMENT 📣

Inaanyayahan po ang lahat sa
💃 ZUMBA FOR ALL 💃

🗓 Friday, January 30
⏰ 4:00 PM
📍 Barangay Poblacion

✨ Open po ito sa lahat — isama po ninyo ang inyong mga batang anak!
👩‍👧‍👦 Mga mommies
👵 Senior citizens

🍽 May pakain pagkatapos ng zumba para sa mga mommies, senior citizens at mga bata.

👶 Pagkatapos ng aktibidad ay magkakaroon din ng pamimigay ng:
🧼 Hygiene kits
🥛 Gatas
🍎 Mga prutas

Tara na at magsaya nang sabay-sabay sa healthy, active, at masayang zumba!
Kita-kits po sa Barangay Poblacion! 💖

22/01/2026

ALAM NIYO BA?
Liver Cancer and Viral Hepatitis Awareness and Prevention Month ngayong buwang ng Enero. Dalawang sakit na may kaugnayan sa isa't-isa. Ang pagkakaroon ng hepatitis B, hepatitis C, at fatty liver ay posibleng maging sanhi ng liver cancer dahil sa pamamaga, peklat, o pagliit ng atay na dulot ng mga ito.

Ipinapaalala ng Bataan Provincial Health Office na panatilihing magkaroon ng malusog at mayroong tamang timbang na katawan. Mahalagang umiwas sa mga unhealthy habits gaya ng pag-inom ng alak, paninigarilyo, paggamit ng kontaminadong karayom, sobrang pagkain ng junk foods, fast foods, at matatamis na pagkain (mga pagkaing di maganda sa kalusugan), at ang hindi pag-eehersisyo.

Mahalin ang atay dahil ito ay isa sa mga pangunahing organo na may malaki at mahalagang trabaho sa ating katawan. Sama-sama nating itaas ang kamalayan, isulong ang mga hakbang para sa pamumuhay ng mahaba at may malusog na pangangatawan.

22/01/2026

ALAM NIYO BA?
Simula na naman ng Weekly Iron and Folic Acid Supplementation! Hinihikayat ng Bataan Provincial Health Office ang lahat ng mga kababaihang nasa edad 10-49 na taong gulang o ang mga kababaihang nasa reproductive age na tanggapin ang Weekly Iron and Folic Acid (WIFA) supplement na maaaring makuha sa pinakamalapit na barangay health station sa inyong lugar; at sa mga pampublikong paaralan para naman sa mga kababaihang nasa ika-7 hanggang ika-10 baitang.

Ito ay dahil kadalasang tinatamaan ng anemia ang mga kababaihan dahil sa kanilang buwanang dalaw (menstruation).

Ang anemia ay isang sakit sa dugo na ang mga sintomas ay pagiging matamlay, fatigue, pagkahina at mabilis na pagkahingal.

Sa wastong pagtanggap ng IFA, makasisigurong sapat ang hemoglobin sa ating red blood cells na siyang nagdadala ng oxygen sa iba't-ibang parte ng ating katawan.

Sama-sama tayo sa paglaban sa malnutrisyon para sa mas matatag na pamilyang Bataeño.

05/11/2025

ALAM NIYO BA?
Ang pinakamadalas na naidudulot ng hindi paghugas ng kamay ay ang pagkakaroon ng diarrhea na karaniwang sanhi ng Salmonella, E. coli, norovirus, at hand, foot, and mouth disease; mga sakit na hindi magagamot sa simple o pangunang lunas. At ang ilan naman sa mga bago at malubhang sakit na maaaring maidulot nito ay ang COVID-19 at Mpox.

Importante sa buhay at kalusugan ng tao ang palagi at wastong paghuhugas ng kamay sapagkat ang mga nabanggit na halimbawa ng sakit ay maaaring maikalat sa simpleng pakikipagkamayan sa tao o kaya nama'y paghawak sa mga bagay gaya ng pintuan, lamesa, upuan, at iba pa.

Tandaan, sa simpleng hakbang na ito ay nailalayo mo sa sakit ang iyong sarili at mga mahal sa buhay. Sama-sama tayo sa pagkamit ng isang lalawigang matatag at protektado.

05/11/2025

05/11/2025

ALAM NIYO BA?
Mas madaling gamutin ang breast cancer kapag maagang natuklasan; at mas malaki rin ang tyansang gumaling kung ito ay agad bibigyan pansin.

Sa pagdiriwang ng Breast Cancer Awareness Month ngayong Oktubre, nais hikayatin ng Bataan Provincial Health Office na regular na gawin ang 'SSS' o Sariling Salat sa Suso; at sakali mang may mapansing hindi normal ay agad komunsulta sa eksperto.

Narito ang QR code ng listahan ng mga Accredited Philhealth Konsulta Package providers para sa mga nais magpa-clinical breast examination; at QR code ng listahan ng Cancer Assistance Fund sites para naman sa mga kailangang sumailalim sa mammography at breast ultrasound.

Laging piliin ang healthy lifestyle. Sama-sama tayo sa pagkamit ng isang malusog na komunidad para sa mas matatag na pamilyang Bataeño.

25/10/2025

ALAM NIYO BA?
Dahil sa papalit-palit na panahon, uso na naman ang influenza-like illness (ILI) o mga sakit na may kaparehong sintomas ng influenza ngunit ito ay dulot ng iba't-ibang virus o bacteria.

Karaniwang sintomas nito ay tatagal ng halos 10 araw at kabilang dito ang UBO, PAMAMAGA NG LALAMUNAN, LAGNAT NA DI BABABA SA 38°C; at maaari rin maranasan ang mga sumusunod:
-Sipon
-Pananakit ng ulo
-Panginginig
-Pananakit ng katawan
-Panghihina
-Pagsusuka
-Pagtatae

Dahil ito ay naipapasa sa pamamagitan ng droplets na galing sa ubo o bahing ng taong may sakit, ipinapayo ng Bataan Provincial Health Office na ugaliin ang paghuhugas ng kamay at pag-disinfect ng mga gamit, magsuot ng facemask, umiwas sa masisikip at mataong lugar, at buksan ang mga bintana para sa magandang air flow at bentilasyon.

Takpan ang bibig at ilong sa tuwing uubo o babahing at siguraduhin na bakunado, protektado ang buong pamilya dahil ang kaligtasan ng bawat isa ay responsibilidad ng lahat.

Sama-sama tayo sa pagkamit ng isang ligtas at malusog na komunidad para sa mas matatag na pamilyang Bataeño.

25/10/2025

WALANG OUTBREAK NG INFLUENZA!
Ayon sa Department of Health (DOH), uso ang flu ngayon dahil sa papalit-palit na panahon.

Noon lamang ika-7 ng Oktubre ay idineklara ng DOST-PAGASA ang pagtatapos ng panahon ng Habagat at ang pagpasok naman ng panahon ng Amihan.

Dahil dito, mas madaling kumakalat ang virus o bacteria na dulot ng influenza-like illnesses (ILI) o trangkaso.

Ayon naman sa datos na hawak ng Bataan Provincial Health Office, kasalukuyang mas mababa ang bilang ng mga kaso ng ILI ngayong taon kumpara sa nakaraang taon.

Tandaan, ang ILI o trangkaso ay naipapasa sa pamamagitan ng droplets na galing sa ubo o bahing ng taong may sakit, kaya't ipinapayo ng Bataan Provincial Health Office na ugaliin ang paghuhugas ng kamay at pag-disinfect ng mga gamit, magsuot ng facemask, umiwas sa masisikip at mataong lugar, at buksan ang mga bintana para sa magandang air flow at bentilasyon.

Takpan ang bibig at ilong sa tuwing uubo o babahing at siguraduhin na bakunado, protektado ang buong pamilya.

Wala mang outbreak ay ugaliin pa rin ang mga nabanggit upang makaiwas sa sakit para sa mas masaya at produktibong araw.

Sama-sama tayo sa pagkamit ng isang ligtas at malusog na komunidad para sa mas matatag na pamilyang Bataeño.

12/10/2025

ALAM NIYO BA?
Buwan na naman ng Vitamin A supplementation ngayong Oktubre, kung kaya't paanyaya ng Bataan Provincial Health Office na dalhin ang inyong mga anak na 6-59 na buwang gulang sa pinakamalapit na barangay health station sa inyong lugar para makatanggap ng vitamin A drops, gayundin sa mga kapapanganak na nanay.

Isa sa karaniwang problemang pang-nutrisyon dito sa Pilipinas ay ang Vitamin A deficiency na nagdudulot ng pagkahina ng ating katawan sa paglaban nito sa impeksyon, pagbagal ng paglaki ng mga bata at ng development ng ilang mga organo. Sa mga pagkakataon namang hindi agad mabibigyang pansin, ito ay maaaring mauwi sa pagkabulag at kamatayan.

Huwag balewalain ang nutrisyon para sa malakas at maayos na paggana ng bawat organo sa ating katawan. Patuloy ding sundin ang Pinggang Pinoy at ang 10 Kumainments. Sama-sama tayo sa pagkamit ng isang masiglang komunidad para sa mas matatag na pamilyang Bataeño.