12/08/2022
Ang asthma o hika ay isang kondisyon kung saan ang mga daluyan ng hangin papunta sa baga ay nagiging masikip na nagiging sanhi ng paghirap sa paghinga.
Ang karaniwang sanhi ng pag-atake nito ay alikabok, kemikal, at usok na nagdudulot ng taluhiyang o allergies, stress, impeksyon, ehersisyo, at mga ilang gamot.
Sa pagtatapos ng National Asthma Week, ang Kagawaran ay muling nagpapaalala na mahalagang makontrol ang hika.
Narito ang ilan sa mga dapat gawin upang makatulong maibsan o maiwasan ang pag-atake nito:
1. Dalhin sa lahat ng oras ang resetang gamot para sa hika. Inumin o gamitin ito ayon sa nakatakdang oras at alamin ang maagang senyales ng pag-atake nito.
2. Iwasan ang paninigarilyo o ang usok galing dito.
3. Magbawas ng timbang.
4. Iwasan ang mga gamot, mga pagkain o mga bagay na nagdudulot ng mga sintomas ng hika.
5. Magpabakuna laban sa trangkaso, pulmonya at COVID-19.
Sa tulong ng generics, ang mga gamot para dito ay mas pinaabot-kaya sa ating mga Pilipino na mabibili sa iba't-ibang ospital at pangunahing botika sa bansa.
Para sa karagdagang impormasyon tungkol sa inyong mga gamot, maaaring komunsulta sa doktor o sa mga botika na malapit sa inyong lugar.
