17/04/2026
Hindi lahat ng sakit ay agad nakikita, pero ang banta nito ay totoo at maaaring magdulot ng pangmatagalang pinsala.
Ang Measles (tigdas) at Rubella (German measles) ay mga nakakahawang sakit na mabilis kumalat lalo na sa mga batang hindi pa kumpleto ang bakuna. Maaari itong magsimula sa simpleng lagnat, ubo, sipon, at pantal, ngunit maaari ring humantong sa pulmonya, impeksyon sa utak, komplikasyon sa pandinig, at sa malalang kaso ay kamatayan. Sa rubella, partikular itong mapanganib sa mga buntis dahil maaaring magdulot ng congenital defects sa sanggol.
Kaya mahalaga ang MRSIA—isang libreng malawakang pagbabakuna para sa mga batang edad 6–59 buwan.
Ang ibig sabihin nito ay:
MR – Measles-Rubella, ang mga sakit na layong maiwasan ng bakuna
SIA – Supplemental Immunization Activity, isang dagdag na kampanya ng pagbabakuna na isinasagawa upang masigurong mas maraming bata ang protektado, kahit pa sila ay mukhang malusog o dati nang nabakunahan
Layunin ng programang ito na sabay-sabay na mabakunahan ang mga bata upang mapataas ang immunity sa komunidad at maputol ang pagkalat ng sakit. Kapag mas maraming batang nabakunahan, mas nagiging protektado rin ang mga hindi pa maaaring bakunahan.
Mga magulang, ang pagpapabakuna ay isang simpleng hakbang na may malaking epekto hindi lamang para sa inyong anak kundi para sa buong komunidad.
Pumunta sa pinakamalapit na health center upang alamin ang iskedyul ng MRSIA sa inyong lugar. Libre ito, ligtas, at mahalaga para sa pangmatagalang proteksyon ng mga bata.
