Rural Health Unit of Roxas, Palawan

29/07/2026

💉 𝘽𝙖𝙬𝙖𝙩 𝙗𝙖𝙠𝙪𝙣𝙖 𝙖𝙮 𝙞𝙨𝙖𝙣𝙜 𝙝𝙖𝙠𝙗𝙖𝙣𝙜 𝙩𝙪𝙣𝙜𝙤 𝙨𝙖 𝙢𝙖𝙨 𝙡𝙞𝙜𝙩𝙖𝙨 𝙣𝙖 𝙠𝙞𝙣𝙖𝙗𝙪𝙠𝙖𝙨𝙖𝙣.

Ang pagbabakuna ay isa sa mga pinakaligtas at pinakamabisang paraan upang maprotektahan ang mga bata laban sa tigdas at rubella—mga sakit na maaaring magdulot ng malubhang komplikasyon at maging ng pagkamatay.

Sa pamamagitan ng Measles-Rubella Supplemental Immunization Activity (MR SIA), sama-sama nating pinangangalagaan ang kalusugan ng bawat batang Palaweño.

Magpabakuna. Magprotekta. Magligtas ng buhay. ❤️💉

29/07/2026

💉 Tigdas ay nakahahawa, ngunit naiiwasan sa pamamagitan ng bakuna.

Ang tigdas ay isa sa mga pinaka-nakakahawang sakit. Mabilis itong kumakalat sa pamamagitan ng pag-ubo, pagbahing, at malapit na pakikisalamuha sa taong may impeksyon. Kapag hindi naagapan, maaari itong magdulot ng malubhang komplikasyon tulad ng pulmonya, impeksyon sa utak, pagkabulag, malnutrisyon, at maging ng pagkamatay.

🔍 Alamin ang mga senyales ng tigdas:
✔️ Mataas na lagnat
✔️ Sipon at ubo
✔️ Pamumula ng mata
✔️ Mapupulang pantal sa katawan

👩‍⚕️ Kung mapansin ang mga sintomas, agad na kumonsulta sa pinakamalapit na health center upang mabigyan ng tamang pangangalaga at maiwasan ang pagkalat ng sakit.

29/07/2026

𝗟𝗚𝗨 𝗥𝗢𝗫𝗔𝗦, 𝗦𝗨𝗠𝗨𝗦𝗨𝗣𝗢𝗥𝗧𝗔 𝗦𝗔 𝗪𝗛𝗢 𝗠𝗢𝗡𝗜𝗧𝗢𝗥𝗜𝗡𝗚 𝗣𝗔𝗥𝗔 𝗦𝗔 𝗨𝗣𝗖𝗢𝗠𝗜𝗡𝗚 𝗠𝗘𝗔𝗦𝗟𝗘𝗦-𝗥𝗨𝗕𝗘𝗟𝗟𝗔 𝗦𝗨𝗣𝗣𝗟𝗘𝗠𝗘𝗡𝗧𝗔𝗟 𝗜𝗠𝗠𝗨𝗡𝗜𝗭𝗔𝗧𝗜𝗢𝗡 𝗔𝗖𝗧𝗜𝗩𝗜𝗧𝗜𝗘𝗦

Bilang paghahanda para sa nalalapit na Measles-Rubella Supplemental Immunization Activity (MR-SIA), magsasagawa ng monitoring at technical assistance ang World Health Organization (WHO) sa MIMAROPA Region sa pangunguna ni Dr. Prashun Rana, WHO Consultant para sa MR-SIA, na nakatakdang magsagawa ng deployment sa rehiyon mula Hulyo 26 hanggang Agosto 31, 2026.

Sa kanyang pagbisita sa Palawan, kabilang ang Bayan ng Roxas, magsasagawa si Dr. Rana ng field monitoring, supportive supervision, on-site coaching, at pagbibigay ng mga rekomendasyon upang higit pang mapalakas ang implementasyon ng National Immunization Program, partikular ang MR-SIA.

Bilang kinatawan ni Mayor Pedy B. Sabando, nagpahayag ng buong suporta ang Municipal Administrator Engr. Teodoro V. Cayetano Jr. sa isasagawang aktibidad.

Patuloy ang pakikiisa ng Pamahalaang Lokal ng Roxas sa mga programang naglalayong mapangalagaan ang kalusugan ng mamamayan, lalo na ng mga kabataan, sa pamamagitan ng ligtas at epektibong pagbabakuna. Patuloy na nakikipagtulungan ang LGU Roxas sa Department of Health at World Health Organization upang matiyak ang matagumpay na implementasyon ng MR-SIA at mapanatiling ligtas ang komunidad laban sa mga sakit na maiiwasan sa pamamagitan ng bakuna.

28/07/2026

28/07/2026

𝗧𝗔𝗥𝗔𝗕𝗜𝗔𝗡𝗚𝗔𝗡 𝗣𝗥𝗢𝗚𝗥𝗔𝗠 𝗔𝗡𝗗 𝗥𝗘𝗧𝗢𝗢𝗟𝗘𝗗 𝗖𝗢𝗠𝗠𝗨𝗡𝗜𝗧𝗬 𝗦𝗨𝗣𝗣𝗢𝗥𝗧 𝗣𝗥𝗢𝗚𝗥𝗔𝗠 | 𝗦𝗘𝗥𝗕𝗜𝗦𝗬𝗢 𝗖𝗔𝗥𝗔𝗩𝗔𝗡 𝗔𝗧 𝗧𝗢𝗪𝗡 𝗛𝗔𝗟𝗟 𝗦𝗘𝗦𝗦𝗜𝗢𝗡, 𝗜𝗡𝗜𝗛𝗔𝗧𝗜𝗗 𝗦𝗔 𝗕𝗔𝗥𝗔𝗡𝗚𝗔𝗬 𝗕𝗔𝗚𝗢𝗡𝗚 𝗕𝗔𝗬𝗔𝗡, 𝗥𝗢𝗫𝗔𝗦, 𝗣𝗔𝗟𝗔𝗪𝗔𝗡

Sa inisyatiba ni Mayor Pedy B. Sabando at ng Lokal na Pamahalaan ng Roxas, katuwang si Mam Ann Marie Salve H. Ylagan, MLGOO ng DILG, matagumpay na isinagawa ang Tarabiangan Program and Retooled Community Support Program (RCSP) – Serbisyo Caravan and Town Hall Session sa Barangay Bagong Bayan, Roxas, Palawan.

Layon ng programang ito na mailapit sa mga mamamayan, lalo na sa mga nasa malalayong barangay, ang iba't ibang serbisyo mula sa Lokal na Pamahalaan, mga national agencies, at uniformed personnel upang higit nilang maramdaman ang presensya at malasakit ng pamahalaan.

Kabilang sa mga serbisyong ipinagkaloob ang libreng medical check-up at pamamahagi ng gamot mula sa Municipal Health Office (MHO), libreng gupit, tuli, tooth extraction, pagbibigay ng impormasyon ukol sa mga health benefits, pagsasa-ayos ng mga dokumento, at pamamahagi ng mga binhi (seeds).

Nakiisa rin ang iba't ibang tanggapan ng Lokal na Pamahalaan at mga national agencies sa paghahatid ng kani-kanilang mga programa at serbisyo.

Nagkaroon ng bukas na talakayan sa pagitan ng Alkalde, mga residente at ng mga kinatawan ng pamahalaan. Sa pamamagitan nito, naiparating ng mga mamamayan ang kanilang mga hinaing, mungkahi, at katanungan na agarang nabigyan ng kaukulang kasagutan at tugon.

Lubos naman ang pasasalamat ng pamunuan ng Bagong Bayan sa pangunguna ni Kapitan Diosdado Agustin sa serbisyong inilapit sa kanilang barangay.

Patuloy na isinusulong ng pamunuan ni Mayor Pedy B. Sabando ang mga programang naglalapit ng serbisyo sa bawat barangay bilang bahagi ng layunin ng Lokal na Pamahalaan na maihatid ang mahusay, mabilis, at inklusibong serbisyo sa bawat mamamayan ng Bayan ng Roxas.

27/07/2026

📢 𝐏𝐀𝐆𝐏𝐀𝐏𝐀𝐋𝐀𝐊𝐀𝐒 𝐍𝐆 𝐊𝐀𝐀𝐋𝐀𝐌𝐀𝐍 𝐏𝐀𝐑𝐀 𝐒𝐀 𝐌𝐀𝐒 𝐋𝐈𝐆𝐓𝐀𝐒 𝐀𝐓 𝐌𝐀𝐒 𝐌𝐀𝐋𝐔𝐒𝐎𝐆 𝐍𝐀 𝐊𝐀𝐁𝐀𝐓𝐀𝐀𝐍! 💙

Noong Hulyo 25, 2026, matagumpay na nagsagawa ang Municipal Health Office ng Roxas ng isang Information and Education Campaign tungkol sa HIV/AIDS, pag-iwas sa maagang pagbubuntis (Teen Pregnancy), at Drug Abuse Prevention para sa mga kabataan ng Barangay San Jose, Roxas, Palawan.
Isinagawa ang aktibidad sa pakikipagtulungan ng Sangguniang Kabataan (SK) Federation, na nagbigay ng pagkakataon sa ating mga kabataan na mapalawak ang kanilang kaalaman at magkaroon ng mas malalim na pag-unawa sa mga isyung kinakaharap ng kanilang henerasyon.

Lubos nating ikinagagalak ang aktibong pakikilahok ng mga kabataan, na nagpakita ng interes sa talakayan sa pamamagitan ng pagtatanong, pagbabahagi ng kanilang mga pananaw, at pakikiisa sa mga gawain. Ang kanilang sigasig ay patunay na ang wastong impormasyon at bukas na komunikasyon ay mahalagang sandata sa paghubog ng responsableng kabataan.

Patuloy na magsisikap ang Municipal Health Office sa ilalim ng pamumuno ni Mayor Pedy Bautista Sabando " PBS " ng Roxas na maghatid ng mga programang nagtataguyod ng kalusugan, tamang kaalaman, at positibong pagpapahalaga upang makabuo ng isang komunidad na ligtas sa HIV, maagang pagbubuntis, at ilegal na droga.

💙 Ang kaalaman ang unang hakbang tungo sa tamang desisyon. Sama-sama nating gabayan ang ating kabataan tungo sa isang mas maliwanag, malusog, at ligtas na kinabukasan.

27/07/2026

Buong suporta ang Pamahalaang Panlalawigan ng Palawan sa pangunguna ni 𝐏𝐚𝐥𝐚𝐰𝐚𝐧 𝐆𝐨𝐯𝐞𝐫𝐧𝐨𝐫 𝐀𝐦𝐲 𝐑𝐨𝐚 𝐀𝐥𝐯𝐚𝐫𝐞𝐳 sa pagsasagawa ng 𝙈𝙚𝙖𝙨𝙡𝙚𝙨-𝙍𝙪𝙗𝙚𝙡𝙡𝙖 𝙎𝙪𝙥𝙥𝙡𝙚𝙢𝙚𝙣𝙩𝙖𝙡 𝙄𝙢𝙢𝙪𝙣𝙞𝙯𝙖𝙩𝙞𝙤𝙣 𝘼𝙘𝙩𝙞𝙫𝙞𝙩𝙮 (𝙈𝙍 𝙎𝙄𝘼) 𝙖𝙩 𝙑𝙞𝙩𝙖𝙢𝙞𝙣 𝘼 𝙎𝙪𝙥𝙥𝙡𝙚𝙢𝙚𝙣𝙩𝙖𝙩𝙞𝙤𝙣 sa lalawigan ng Palawan bilang bahagi ng patuloy na pagsisikap na mapanatiling ligtas, malusog, at protektado ang bawat batang Palaweño.

Ang MR SIA ay isang mahalagang kampanya ng Department of Health na naglalayong mabigyan ng karagdagang proteksyon laban sa tigdas at rubella ang mga batang may edad 6 hanggang 59 buwan, habang ang Vitamin A Supplementation naman ay tumutulong sa pagpapalakas ng resistensya, pagpapanatili ng malusog at tamang paglaki ng mga bata.

Suportahan ang MR SIA at Vitamin A Supplementation. Dalhin ang inyong anak, magpabakuna, at magpa-Vitamin A para sa isang mas malusog at mas ligtas na kinabukasan ng bawat batang Palaweño! 💚💉🍊

24/07/2026

𝗣𝗔𝗚𝗦𝗔𝗦𝗔𝗚𝗔𝗪𝗔 𝗡𝗚 𝗢𝗥𝗬𝗘𝗡𝗧𝗔𝗦𝗬𝗢𝗡 𝗨𝗞𝗢𝗟 𝗦𝗔 𝗣𝗔𝗚𝗗𝗜𝗗𝗜𝗦𝗜𝗠𝗣𝗘𝗞𝗧𝗔 𝗡𝗚 𝗜𝗡𝗨𝗠𝗜𝗡𝗚 𝗧𝗨𝗕𝗜𝗚 𝗦𝗔 𝗕𝗚𝗬. 𝗧𝗔𝗥𝗔𝗗𝗨𝗡𝗚𝗔𝗡, 𝗥𝗢𝗫𝗔𝗦, 𝗣𝗔𝗟𝗔𝗪𝗔𝗡

Bilang bahagi ng patuloy na pagsisikap na mapanatili ang kaligtasan at kalinisan ng inuming tubig sa komunidad, matagumpay na nagsagawa ng oryentasyon ukol sa pagdidisimpekta ng inuming tubig para sa mga Community Volunteer Health Workers (CVHW) ng Barangay Taradungan.

Pinangunahan ang nasabing gawain nina Anthony M. Malirong, Sanitary Inspector III, Melvin Y. Yara, Rural Sanitary Inspector II, at Paulino Jr. B. Gonzaga, Sprayman.

Tinalakay sa oryentasyon ang wastong paraan ng pagdidisimpekta ng inuming tubig upang maiwasan ang pagkalat ng mga sakit na dulot ng maruming tubig at mapangalagaan ang kalusugan ng bawat mamamayan.

Bahagi rin ng aktibidad ang aktuwal na demonstrasyon sa tamang paggawa ng stock solution, gayundin ang return demonstration ng mga kalahok upang matiyak ang kanilang sapat na kaalaman at kahandaan sa wastong pagsasagawa ng water disinfection sa kani-kanilang nasasakupan.

Lubos na sinusuportahan ng Pamahalaang Bayan ng Roxas, sa pangunguna ni Mayor Pedy B. Sabando, ang mga programang naglalayong mapanatili ang kalusugan at kaligtasan ng bawat Roxaseño. Patunay ito ng patuloy na pagtutulungan ng lokal na pamahalaan at ng sektor ng kalusugan sa paghahatid ng de-kalidad at maagap na serbisyong pangkalusugan sa bawat barangay.

19/07/2026

DOH URGES PUBLIC TO SUPPORT JULY DEWORMING PROGRAM, WARNS AGAINST MISINFORMATION