31/03/2026
🩺إيه أهم الحاجات اللي لازم تعرفيها لو ابنك عنده فتاق إربي؟
يا مامي متخافيش
الفتاق الإربي مش معناه إن في حاجة خطيرة
بس لازم تاخدي بالك كويس
هو ببساطة بيحصل لما جزء صغير من الأمعاء ينزل ناحية الخصية أو في المنطقة الإربية وبيبان زي انتفاخ بسيط أو كلكيعة خاصة لما البيبي يعيط أو يعطس أو يكح وبيختفي لما الطفل يسكت
مهم نعرف إن الفتاق مش هيروح لوحده الحل الوحيد هو التدخل الجراحي البسيط
العملية بتكون بسيطة وآمنة جدًا والغرز كمان بتكون تجميلية ومفيش أي أثر للعملية خاصة لما تتعمل على ايد جراح أطفال متخصص
ممكن الفتاق نستنى عليه شويه عادي بس بنتابع مع جراح أطفال متخصص علشان لو الانتفاخ ده كبر وحجر وبقى مؤلم للطفل في الحالة دي لازم تدخل جراحي فورًا
علشان ميحصلش اختناق للفتق ونفقد لاقدر الله مبيض في الإناث أو خصية في الأطفال الذكور أو يحصل تسمم دموي أو غرغرينا في الأمعاء
اطمنوا العملية دي من أكتر العمليات اللي بتتعمل للأطفال وبنسبة نجاح عالية جدًا ونتيجة تجميلية
وأهم حاجة المتابعة بدري علشان نحمي البيبي من أي مضاعفات ممكن تحصل لا قدر الله
