12/08/2026
🌟️ ليه مرات بتاخد علاجات وما بتحس بتحسن حتى لو علاج الدكتور كان صح؟🤔
مرات كتيرة بيجوني مرضى في العيادة بيقولوا لي يا دكتور أنا قابلت دكتور فلان وكتب لي العلاجات دي و ما بقيت كويس.
🔷 ️طيب مبدئياً كدا إذا الدكتور كتب ليك علاجات وما اتحسنت دا ما بيعني طوالي إنو الدكتور غلطان أو كتب ليك علاج غلط، لازم نعرف إنو التعافي والشفاء أحياناً بياخد وقت وفي عوامل بتأثر على سرعة الشفاء منها:
1️⃣ قبل كل شيء لازم نعرف إنو الشفاء من الله عز وجل والطبيب والعلاجات عبارة عن أسباب فلازم نعمل بالأسباب لكن ما ننسى ندعي ونتضرع لربنا بالشفاء العاجل.
2️⃣ في بعض الأدوية بتاخد وقت عشان تشتغل ويظهر مفعولها في الجسم.
3️⃣ إختلاف استجابة الجسم وامتصاصه للأدوية من شخص لآخر، مثلاً قد يختلف باختلاف العمر و الوزن و كذلك صحة المعدة والجهاز الهضمي.
4️⃣ عدم الالتزام بمواعيد الدواء أو أخذ جرعة ناقصة أو توقيف قبل اكتمال فترة العلاج.
5️⃣ في بعض الأدوية وبعض الأكلات بتتداخل مع بعض فبتقلل الإمتصاص وبتأخر مفعوله مثلا زي القريب فروت (القرين) بيقلل امتصاص حبوب الملاريا (الكوارتم).
6️⃣ إختلاف طبيعة المرض ودورته الزمنية في بعض الأمراض بتكمل دورتها وفترتها الزمنية في الجسم زي الفيروسات ونزلات البرد فبياخدوا زمنهم الطبيعي والدواء بيخفف الأعراض لحدي ما الجسم يتغلب على المرض.
7️⃣ بعض الأمراض بتحتاج لفحص تزريع عشان يتعرف الدواء المناسب و التزريع بيحتاج حوالي 7 أيام على الأقل عشان تطلع النتيجة النهائية، وزارة الصحة عشان تسرع بدء العلاج و تخفف على المريض عادة بتعمل بروتكولات بتحدد فيها الأدوية الفعالة لكل مرض على حسب الدولة أو المنطقة وعلى حسب الأبحاث العلمية المتاحة فالدكتور بيختار الأدوية المناسبة على حسب البروتوكول و أحيانا قد ما يحصل استجابة للعلاج إلا بعد عمل فحص التزريع.
8️⃣ تطور المرض أو الإصابة بمرض جديد، بعض الأمراض بتبدأ بأعراض خفيفة وفجأة بتشتد كتطور طبيعي للمرض، أو ممكن يكون في مرض تاني جديد اتصاب بيهو المريض في فترة العلاج وبيحتاج لعلاج مختلف.
9️⃣ الضغوطات النفسية والقلق والتوتر و الإرهاق وقلة النوم والتغذية الغير جيدة دي كلها حاجات ممكن تؤثر سلباً على سرعة الشفاء.
🌟 ️الخلاصة ...
إذا أخدت علاجات وما اتحسنت من حقك ترجع للطبيب يقيم حالتك مرة تانية ويختار ليك الخيار المناسب، إما ح يخليك تواصل على العلاج نفسه او ح يزيد ليك الجرعة أوح يغير ليك الدواء أو ح يفحص ليك عشان يتأكد إذا في مرض تاني جديد.
🔷️ دايما نحنا كأطباء بنكون حريصين جداً على كتابة العلاج المناسب للمريض وبنفرح شديد لما مريضنا يتعافى و يبقى كويس وفي رأيي دا اكبر مكسب بالنسبة لينا❤️
🌷 أبقوا عافية و دمتم في أمان الله وحفظه🌷
د.عاطف عبدالرحمن
🩺
#السودان
