D. Sahar Alrasheed

D. Sahar Alrasheed سحر الرشيد أخصائية مختبرات طبية تخصص مايكروبيولوجي🔬🌸BSc ln Medical Laboratory Science

السلام عليكم 🌸🌸طبعا معظمنا أو كلنا بنحب فصل الخريف م اظن في زول م بحب المطر والأجواء الخريفية بتاعة اليومين دي ربنا يجعل...
30/07/2026

السلام عليكم 🌸🌸
طبعا معظمنا أو كلنا بنحب فصل الخريف م اظن في زول م بحب المطر والأجواء الخريفية بتاعة اليومين دي ربنا يجعله خريف خير وبركة علينا كلنا يارب العالمين 🌸🌸
يلا مع الخريف دائما بتظهر كمية بتاعة أمراض معظمها الناقل الأساسي فيها البعوض و الذباب🪰🦟🪰
نتكلم عن موضوع الذباب ونحاول نشرح كل الامراض البسببها ان شاء الله في بوستات جااية🙏🙏🙏

*1. ليه الذباب بزيد في الخريف؟*👇👇👇🪰🪰
1. *الرطوبة + الأوساخ* = بيئة مثالية للتكاثر
2. *بقايا الأكل والمخلفات* بتتجمع بسبب المطر
3. *دورة حياتو سريعة*: البيضة لذبابة كاملة في 7-10 أيام بس

أكتر نوع منتشر هو :
- *الذباب المنزلي*: البنقل الأمراض🪰🪰

*2. كيف الذبابة بتنقل المرض؟* 🦠
الذبابة ما بعض. هي بتقيف في الوسخ "قمامة، براز، جيفة"
بعدين تجي تقعد في أكلك. في رجولها وجسمها ملايين البكتيريا + هي بتستفرغ على الأكل عشان تهضمو قبل تاكلو 😲😲😲😲😲

*3. أهم الأمراض البنقلها الذباب:*🔬🔬👇👇
- *الإسهال والنزلة المعوية*
- *الكوليرا*
- *التيفوئيد*
- *التهاب الكبد الوبائي A*
- *الديدان المعوية*
- *الرمد الصديدي*
- *الجمرة الخبيثة*

*4. الوقاية = 3 حلقات* 🛡️

*أ. محاربة الذباب*
1. *النظافة*: اقفلي القمامة في كيس محكم وارميها يومي
2. *رشي المبيد* في أماكن تجمعو الصباح بدري
3. *الصواعق الكهربائية + اللاصق* في المطبخ
4. *سلك الناموس* في الشبابيك والأبواب

*ب. حماية الأكل*
1. *غطي الأكل والشراب* دايماً حتى لو دقيقة
2. *غسلي الخضار والفواكه* بموية نظيفة + خل
3. *ما تخلي أكل مكشوف* برا التلاجة

*ج. النظافة الشخصية*
1. *غسيل اليدين* بالصابون بعد الحمام وقبل الأكل
2. *نظافة الحمامات* وعدم ترك المياه راكدة

*5. لو الزول اتصاب نعمل شنو؟*
1. *الإسهال*: محلول الجفاف ORS + موية كتير
2. *الحمى*: كمادات + مستشفى فوراً
3. *ما تاخدي مضاد حيوي من راسك* امشي الدكتور

*الخلاصة:*
الذبابة = عربية إسعاف للجراثيم 🪰🚑
في الخريف حربنا معاها بتكون مضاعفة. النظافة هي 70% من الحل.

في البوستات الجاية ح اشرح الأمراض دي واحد واحد ان شاء الله 🙏🙏🌸🌸

ورونا في التعليقات بتحاربو الذباب كيف؟؟؟ 👇👇👇

🔬❤️ السلام عليكم 🌸🌸مبدئيا بعتزر عن الصورة جدا بس دي واحدة من أعظم مشاكل السكري الممكن يصل ليها المريض إذا أهمل نفسه والح...
27/07/2026

🔬❤️
السلام عليكم 🌸🌸
مبدئيا بعتزر عن الصورة جدا بس دي واحدة من أعظم مشاكل السكري الممكن يصل ليها المريض إذا أهمل نفسه والحواليه م انتبهو للحاجة دي 💔💔💔إذا عندنا مريض نتفقد حالته ونتابع تغيرات جسمه واي تغيير ملاحظ جري على الدكتور عشان نلحق العلاج من البداية

العينة من جرح قدم سكري دخلت المعمل.. 48 ساعة بتحدد مصير الرجل" 🦶🧫🚨*

*1. استلام العينة - هنا 90% من التشخيص*
جاتنا عينة من جرح قدم سكري في حقنة مقفولة.
`أوع تستلم مسحة بقطنة من السطح` ❌ دي كلها Normal flora وحتضيع المريض

*الصح:*
- `Tissue biopsy` من عمق الجرح
- أو `Aspiration بالحقنة` للصديد
- بعد نغسل السطح بـ Normal saline كويس
- وتجي في `Anaerobic transport vial` عشان البكتيريا اللاهوائية بتموت في الهوا في 10 دقايق

لو العينة غلط = نتيجة غلط = ممكن بتر لا قدر الله

*2. الزراعة -*
ما بنقدر نزرع Anaerobes في طبق عادي. محتاجين جو خالي من الأكسجين 100%

*بنزرع في 3 أطباق:*
1. `Blood Agar`: للبكتيريا الهوائية + الفطريات
2. `MacConkey Agar`: للـ Gram negative الهوائية
3. `Anaerobic Blood Agar + Brucella Agar`: ده بيت اللاهوائيات

بعدها الطبق اللاهوائي بدخل `Anaerobic Jar` أو `Anaerobic Chamber`
بنشفط الهوا وبنملاهو غاز: 80% N2 + 10% CO2 + 10% H2
وبنخت `Methylene blue indicator` عشان لو بقى أزرق معناها في أكسجين ودخلنا في فشل
الحضانة: 37° لمدة 48 ساعة

*3. تاني يوم.. بنفتش على منو؟*
بنطلع الأطباق ونشم أول شي 😷
- `Bacteroides fragilis`: ريحة كريهة جداً زي الجيفة/التعفن دي علامتها المميزة
- `Peptostreptococcus`: مستعمرات صغيرة لامعة
- `Clostridium`: مستعمرات كبيرة مع هالة تحلل Beta-hemolysis

بنعمل `Gram Stain` سريع:
- `Bacteroides`: Gram negative bacilli
- `Peptostreptococcus`: Gram positive cocci in chains
- `Clostridium`: Gram positive bacilli with spores

*4. اختبار الحساسية - AST*
اللاهوائيات عنيدة. ما أي مضاد بشتغل
بنستخدم `Brucella blood agar` مع أقراص مضادات خاصة باللاهوائيات
أهم المضادات: `Metronidazole, Clindamycin, Ampicillin-Sulbactam, Meropenem

فضلا 🙏🙏💔`إذا لوحظت اي عرض لسلامة المريض
يمشي المستشفى فورا عشان يلحق يتعالج

#توعية صحية
#انقذ مريض سكري
#مايكروبايولوجست

السلام عليكم 🌸🌸نواصل في موضوع السكري والمراحل الصعبة الممكن يصل ليها مريض السكري ويمكن كلنا أو أغلبنا عندنا مريضين سكر ف...
26/07/2026

السلام عليكم 🌸🌸
نواصل في موضوع السكري والمراحل الصعبة الممكن يصل ليها مريض السكري ويمكن كلنا أو أغلبنا عندنا مريضين سكر في البيت تعبانين معاهم ننظم ليهم في الأدوية ونمنعهم ونقيف على احتياجاتهم عشان ما نصل للمراحل المتأخرة دي ف ننتبه جدا جدا للحالات دي والعلامات الممكن تظهر في مرضانا 🙏🙏👇👇👇

مريض سكري + جرح صغير = بتر؟ تعالو نفهم السبب 🦶🚨

**بسم الله نبدأ**

**1. ليه مريض السكري بتقرح؟**
السكر العالي بعمل حاجتين خطيرات:
1. `Neuropathy`: المريض ما بحس برجلو.. يدوس في مسمار ما يحس
2. `Poor blood circulation`: الدم ما واصل كويس.. الجرح ما ببرأ

النتيجة: جرح صغير + سكر = بوابة مفتوحة للبكتيريا

**2. منو الأخطر هنا؟ البكتيريا اللاهوائية Anaerobes**
دي بكتيريا ما بتحب الأكسجين خالص
بتحب الجروح العميقة.. الميتة.. الريحتها كعبة

أشهر المجرمين:
1. `Bacteroides fragilis`: ملكة التعفن وريحتها فظيعة
2. `Peptostreptococcus`: بتعمل خراج
3. `Clostridium`: دي بتاعت الغرغرينا الغازية Gas gangrene
4. `Fusobacterium`

المشكلة: البكتيريا دي بتجي معاها بكتيريا هوائية
عشان كده بنسميها `Mixed infection`.. ودي أصعب شي في العلاج

**3. الأعراض البتخوف الدكتور:**
1. ريحة الجرح كريهة جدا.. ريحة تعفن
2. صديد لونو رمادي أو بني
3. غازات تحت الجلد.. لما تضغطي تسمعي طقطقة
4. لون الجلد أسود
5. المريض سخن وتعبان

لمن تشوفي 2 من ديل.. طوالي قولي للدكتور: "شاكين في Anaerobes"

طيب نشخصها كيف؟
البوست الجاي خاشين المعمل نشوف بنزرعها كيف وبنطلعها كيف 🔬

سؤال: شفتو حالة غرغرينا قبل كده؟ كانت الريحة كيف؟
احكو في الكومنتات.. للتوعية 👇

السلام عليكم 🌸🌸نواصل في سلسلة المضاد الحيوي وليه الدكتور بطلب تزريع 🙏🙏🙏"المزرعة والحساسية - بنختار المضاد الصاح كيف 🧪سؤا...
23/07/2026

السلام عليكم 🌸🌸
نواصل في سلسلة المضاد الحيوي وليه الدكتور بطلب تزريع 🙏🙏🙏
"المزرعة والحساسية - بنختار المضاد الصاح كيف
🧪
سؤال بتسأله كتير: *"يا دكتورة ليه الدكتور طلب لي مزرعة؟ ما يده أي مضاد وخلاص؟"*

تعالوا أوريكم شغلنا في المعمل بمشي كيف 👇

*أولاً: يعني شنو "مزرعة" Culture؟*
ببساطة كده: بناخد العينة بتاعتك _بول، بلغم، جرح، دم_
وبنختها في *صحن فيه أكل للبكتيريا* اسمه agar وبنخليها 24-48 ساعة.

لو في بكتيريا.. حتقوم وتتكاثر وتبقى واضحة لينا تحت الميكروسكوب.
كده عرفنا *"العدو منو بالضبط"* 🦠

*ثانياً: اختبار الحساسية Sensitivity Test*
بعد عرفنا نوع البكتيريا.. بنجي لأهم خطوة.
بنجيب الصحن القامت فيه البكتيريا وبخت فيه *أقراص صغيرة فيها مضادات حيوية مختلفة*.
بنخليها يوم.. وتاني يوم بنجي نشوف:
- *حول القرص فاضي؟* معناها المضاد ده بقتل البكتيريا دي ✅ "Sensitive"
- *البكتيريا قايمة لحد القرص؟* معناها المضاد ده ما بعمل شي ❌ "Resistant"

*الخلاصة:*
المزرعة + الحساسية = *بنديك اسم البكتيريا + بنديك اسم المضاد البقتلها بس*
عشان كده ما بنختار مضاد ساي.. بنختار *المضاد الصاح للبكتيريا الصاح* 👌وده دورنا احنا 🙏
*: متين الدكتور بطلب المزرعة؟*

بنطلبها في 3 حالات:
1. *التهاب ما بستجيب* لمضاد عادي
2. *التهاب متكرر* زي التهابات البول
3. *حالة خطيرة* في المستشفى وعاوزين أسرع علاج.
4. * حالات القدم السكري والجروح البتتبعه

*ليه ما بنبدأ بأقوى مضاد طوالي؟*

عشان ما نعمل *مقاومة بكتيرية*
لو استخدمنا التقيل من البداية، البكتيريا بعدين بتتعود وما بيتأثر بأي شي.

بنبدأ بالأخف.. ولو ما نفع بنرجع للتقرير حقنا ونديك التقيل البقتلها 100%

دي اسمها *العلاج الموجه* Targeted therapy


# مايكروبيولوجيست

السلام عليكم 🌸🌸موضوعنا الليلة مهم مهم شدييييد ح نتناول فيه اكتر حاجة الناس بتاخدها عشوائيا وتسببت في الآونة الآخيرة بمش...
22/07/2026

السلام عليكم 🌸🌸
موضوعنا الليلة مهم مهم شدييييد ح نتناول فيه اكتر حاجة الناس بتاخدها عشوائيا وتسببت في الآونة الآخيرة بمشاكل كتيرة ومعظم الناس بقت تمشي تشكي وتاخد العلاج وم ينفع معاها ويقولو دكتور فلان م نااااجح والمعمل الفلاني تشخيصه غلط😴 وهي.... المضادات الحيوية 😔😔خط أحمر والله
🧪💊
المضاد الحيوي - سلاح ذو حدين* ⚔️
*المضاد الحيوي Antibiotic*
نعمة كبيرة.. لكن الاستخدام الغلط بقلبها نقمة 😔

تعالوا نفهمه صح عشان ما نأذي نفسنا 👇

*أولاً: المضاد الحيوي بقتل شنو؟*
بقتل *البكتيريا* بس ❌
*ما بقتل الفيروسات*
يعني:
- *بنفع معاه:* التهاب بكتيري، التهاب بول، جرح ملوث
- *ما بنفع معاه:* برد، كحة، انفلونزا، كورونا

عشان كده لمن تجيك كحة وتقول "أدوني مضاد" نحن بنقول ليك لا 😅

*ثانياً: أكبر 3 أخطاء بنعملها*
1. *نوقفه برانا* أول ما نحس بتحسن. البكتيريا الباقية بترجع أقوى
2. *ناخده بدون وصفة* من الصيدلية ساي
3. *نستخدمه للبرد* وهو ما بعمل شي للفيروس

النتيجة؟ *مقاومة بكتيرية*.. يعني بعدين البكتيريا ما بتتأثر بأي مضاد 💔
طيب نستخدمه متين وكيف؟*
1. *بوصفة طبيب فقط* هو البحدد النوع والجرعة
2. *كمل الكورس كامل* حتى لو بقيت كويس. 5 أيام = 5 أيام
3. *في نفس الزمن كل يوم* عشان الدم يكون فيه تركيز ثابت
4. *ما تشارك علاجك* مع زول تاني
مرات بنعمل ليك *مزرعة + حساسية* في المعمل عشان نعرف ياتو مضاد بقتل البكتيريا العندك بالضبط 👌
طيب أفرق كيف برد ولا بكتيريا؟* 🤧
**الفيروس** **البكتيريا**
**المدة** 3-7 أيام وبتروح اما البكتيريا بتطول وما بتتحسن
**البلغم** شفاف أصفر/البكتيرياأخضر تقيل
**الحمى** خفيفة البكتيريا عالية ومستمرة
لكن التشخيص النهائي عند الدكتور ما تخمن براك☺️

صحتك مسؤوليتنا ❤️

في البوست الجاي ح اتكلم عن التزريع وليييه الدكتور مرات بطلب منك تمشي تزرع عينتك؟؟؟؟؟

السلام عليكم 🌸🌸اليوم حنتكلم عن *أشهر تحليل عندنا: السكر*لأنو السكري بقى مرض العصر، دورنا نوعي ونشرح.حأقسم ليكم الموضوع ...
20/07/2026

السلام عليكم 🌸🌸

اليوم حنتكلم عن *أشهر تحليل عندنا: السكر*
لأنو السكري بقى مرض العصر، دورنا نوعي ونشرح.

حأقسم ليكم الموضوع على 3 محاور مهمة 👇
الأعراض أول .. بعدين التحليل .. بعدين الوقاية

- الأعراض 🚨*
_اسمع جسمك قبل التحليل
دي العلامات البتخلي الدكتور يقول ليك "امشي حللي سكر":
1. *عطش شديد + خشم ناشف* طوالي
2. *تبول كتير* خاصة بالليل
3. *تعب وإرهاق* بدون مجهود
4. *زغللة في النظر*
5. *جروح ما بتبرا سريع*
6. *نقص وزن مفاجئ* _ده غالبا النوع الأول_

لو عندك 2 من ديل ما تنتظر. التحليل بسيط وبيطمنك 💙
- كيف بنحلل السكر في المعمل؟*
_عشان تشيل الخوف_

عندنا 3 تحاليل أساسية بنشتغلها:

*1. سكر صايم FBS*
*كيف؟* دم وريدي بعد صيام 8-12 ساعة. موية بس مسموحة.
*بقيس شنو؟* مستوى السكر الأساسي حقك.
*الطبيعي:* أقل من 100

*2. السكر التراكمي HbA1c*
*كيف؟* دم بدون صيام في أي وقت.
*بقيس شنو؟* متوسط السكر في آخر 3 شهور. ده أهم تحليل للمتابعة.
*الطبيعي:* أقل من 5.7%
*ليه مهم؟* ما بيغش. حتى لو صمت يوم واحد

*3. سكر عشوائي RBS*
*بقيس شنو؟* للطوارئ وللناس العندها أعراض..
الطبيعي لحدي 180
تذكر: نحن بنديك الرقم.. والتشخيص عند الدكتور
👨‍⚕️
الوقاية - مسؤوليتك* 🛡️
_الوقاية خير من العلاج_
عشان ما تصل مرحلة التحليل كل شهر:
1. *أكل صحي:* قلل السكر والعيش الأبيض. زيد خضار وبروتين
2. *حركة:* 30 دقيقة مشي في اليوم بتفرق
3. *وزن مثالي:* البطن الكبيرة = خطر سكري
4. *فحص دوري:* لو عندك وراثة حلل كل سنة بعد عمر 35
5. *التزم بالعلاج:* لو طلع عندك سكري، ما تقطع العلاج براك.
🌸🌸🌸🌸🌸
حللتو سكر قبل كده والنتيجة كانت كيف؟؟؟؟؟

السلام عليكم 🌸لاحظت حاجة مشتركة بين ناس كتير.. أول ما الدكتور يقول "أمشي أعمل تحاليل" القلب بيدق والواحد بخاف جدا عشان...
19/07/2026

السلام عليكم 🌸

لاحظت حاجة مشتركة بين ناس كتير..
أول ما الدكتور يقول "أمشي أعمل تحاليل"
القلب بيدق والواحد بخاف جدا عشان كده
حأوريكم *5 حقائق لازم تعرفوها عن التحاليل الطبية:*

*1.* التحليل ما "حكم"
هو بس بوصلة بتساعد الدكتور يشوف الصورة كاملة

*2.* الصيام 8 ساعات؟
المقصود أكل.. لكن الموية مسموحة عادي وبتسهل سحب العينة

*3.* النتيجة "عالية شوية" ما معناها مرض
النوم، الأكل، التوتر، وحتى وقت سحب العينة بيفرق

*4.* أرخص تحليل ممكن ينقذ حياتك
الوقاية والاكتشاف المبكر أرخص من العلاج

*5.* جسمك بيكلمك بالأرقام
لما تفهم تحاليلك.. بتفهم صحتك

أكتر تحليل محيرك أو خايف منه شنو؟
اكتبه لي في الكومنت وأنا في البوست الجاي بشرحه ليك بأبسط طريقة ممكنة

19/07/2026

*بسم الله الرحمن الرحيم*

*﴿ بسم الله نبدأ وعلى بركة الله نسير ﴾* ✨

أنا سحر الرشيد
أخصائية مختبرات طبية
*التخصص:* بكالوريوس مختبرات طبية - الأحياء الدقيقة Microbiology

الصفحة اتعملت نحو مجتمع واعٍ بصحته.. يفهم جسده.. يحمي أهله.. ويقي نفسه قبل أن يمرض.

*💡 رسالتنا*

> *﴿ وَفِي أَنفُسِكُمْ أَفَلَا تُبْصِرُونَ ﴾*

> نيتنا في هذا العمل: *علمٌ ينتفع به* و *صدقةٌ جارية*
> نسأل الله الإخلاص والقبول.

*تابعوني في رحلة المعرفة*

Address

سنار
Sennar

Website

Alerts

Be the first to know and let us send you an email when D. Sahar Alrasheed posts news and promotions. Your email address will not be used for any other purpose, and you can unsubscribe at any time.

Shortcuts

Share

Category