01/06/2026
Bilihii koowaad, labaad iyo saddexaad ee sannadkan, Gobolka Saaxil waxaa soo maray xaalad adag oo xumad daran ah oo si weyn u saamaysay bulshada. Xaaladdaasi waxay la mid ahayd xumadda maanta ka jirta Gobolka Maroodi-jeex. Runtii, waxay ahayd mid ka mid ah waqtiyadii iigu adkaa intii aan ka shaqaynayay gobolka Saaxil.
Xaaladdani waxay ahayd imtixaan adag oo hor yimid Wasaaradda Horumarinta Caafimaadka, hase yeeshee wasaaraddu waxay muujisay karti, diyaargarow iyo wada-shaqayn wanaagsan, taas oo suuragelisay in si hufan loo maareeyo loogana gudbo caqabaddaas.
Intii aan ka soo kabanaynay xaaladdaas, waxaa isla markiiba bilaabmay dillaaca cudurka jadeecada, kaas oo ilaa maanta maareyntiisu si wanaagsan u socoto. Dadaallo ballaadhan oo ay hormuud ka tahay Wasaaradda Horumarinta Caafimaadku ayaa la fuliyey, kuwaas oo qayb weyn ka qaatay xakamaynta iyo yaraynta saamaynta cudurka.
Wasaaradda Horumarinta Caafimaadku waa hay’ad qaran oo leh nidaam iyo hab-maamul u gaar ah oo loogu talagalay maaraynta xaaladaha caafimaad ee degdegga ah. Shaqadeedu way ka duwan tahay wasaaradaha kale, maadaama dhammaan saraakiisha caafimaadku ay u abaabulan yihiin si nidaamsan, isla markaana ay u shaqeeyaan hab qorshaysan, isku-duuban (tactical approach), si looga jawaabo xaaladaha caafimaad ee soo kordha.
