02/10/2026
တစ်ခါတလေ ကျွန်မတွေးမိတယ်။လူတွေထဲမှာ အရမ်းဆိုးဝါးတယ်၊ အရမ်းယုတ်မာတယ်လို့ ကျွန်မတို့မြင်ရတဲ့သူတချို့ဟာ တကယ်တမ်းကျတော့ အကြောက်တတ်ဆုံးလူတွေ ဖြစ်နေတတ်ကြတယ်။
သူတို့ရဲ့အကြောက်တရားက ကျွန်မတို့သိနေကျ တုန်လှုပ်နေတာ၊ ငိုနေတာ၊ ထွက်ပြေးနေတာမျိုးနဲ့ ပေါ်လာတာမဟုတ်ဘူး။
တချို့လူတွေရဲ့ အကြောက်တရားက တိုက်ခိုက်ခြင်းအဖြစ် ပေါ်လာတယ်။
သူများက ကိုယ့်ထက်တော်သွားမှာ ကြောက်တယ်။
ကိုယ့်ထက်သာသွားမှာ ကြောက်တယ်။
ကိုယ်မကြိုက်တဲ့ ကိစ္စတစ်ခု ပေါ်လာမှာကြောက်တယ်။
ကိုယ်ထိန်းချုပ်ထားတဲ့လူတစ်ယောက် ကိုယ့်စကားကို နားမထောင်တော့မှာကြောက်တယ်။
ကိုယ်မရှိလည်း သူများတွေ ကောင်းကောင်းရပ်တည်နိုင်တာကို မြင်ရမှာကြောက်တယ်။
အဲဒီအကြောက်တရားတွေ များလာတဲ့အခါ ကိုယ့်ကိုယ်ကိုယ် ပိုကောင်းအောင်လုပ်မယ့်အစား သူများကို အောက်ဆွဲချဖို့ ရွေးချယ်တတ်ကြတယ်။
သူများရဲ့ဂုဏ်သိက္ခာကို ဖျက်တယ်။
မဟုတ်တာပြောတယ်။
လူတွေကို အထင်လွဲအောင်လုပ်တယ်။
ခြိမ်းခြောက်တယ်။
အနိုင်ကျင့်တယ်။
ကိုယ့်ကို မကြောက်တဲ့သူကို ကြောက်လာအောင်လုပ်ချင်တယ်။
အပြင်ပန်းကကြည့်ရင် ဒီလူဟာ သိပ်ရဲတင်းတာပဲလို့ ထင်ရတတ်တယ်။
တကယ်တော့ ရဲရင့်တဲ့သူတစ်ယောက်ဟာ သူများကို နင်းပြီးမှ ကိုယ်မြင့်ရမယ်လို့ မတွေးဘူး။
ကိုယ့်တန်ဖိုးကို ကိုယ်သိတဲ့သူက သူများရဲ့တန်ဖိုးကို ဖျက်ဆီးပြီးမှ ကိုယ့်တန်ဖိုးတက်လာမယ်လို့လည်း မထင်ဘူး။
အမှန်တရားကို ယုံကြည်တဲ့သူက လူတိုင်းကို သူ့ဘက်ပါလာအောင် အတင်းလိုက်စည်းရုံးနေစရာမလိုဘူး။
သူ့မှာ ကိုယ့်လုပ်ရပ်ရဲ့အကျိုးဆက်ကို ရင်ဆိုင်ရဲတဲ့သတ္တိရှိတယ်။
ဒါကြောင့် လူတစ်ယောက်ရဲ့အသံ ဘယ်လောက်ကျယ်သလဲဆိုတာထက်၊ သူဟာ ကိုယ့်လုပ်ရပ်အတွက် ဘယ်လောက်တာဝန်ယူရဲသလဲဆိုတာကို ကျွန်မပိုကြည့်တတ်လာတယ်။
သူများအားနည်းချက်ကိုတွေ့တိုင်း နင်းချင်တာဟာ အင်အားကြီးခြင်းမဟုတ်ဘူး။
ကိုယ့်မှာ အခွင့်အရေးရှိနေရင်တောင် မတရားမလုပ်ဖို့ ကိုယ့်ကိုယ်ကိုယ် ထိန်းနိုင်တာကမှ အင်အားကြီးခြင်း။
ပြန်လုပ်နိုင်ပါလျက်နဲ့ ဘယ်အရာက ကိုယ့်ဘဝအတွက် တန်ဖိုးရှိသလဲဆိုတာ ရွေးတတ်တာကမှ သတ္တိ။
ကိုယ့်အမှားကို ကိုယ်မြင်ရဲတာ၊ ဝန်ခံရဲတာ၊ ပြင်ရဲတာကမှ ခွန်အားပဲ။
တချို့ယုတ်မာမှုတွေရဲ့ နောက်ကွယ်မှာ တကယ်တော့ “ငါရှုံးသွားရင် ဘယ်လိုလုပ်မလဲ” ဆိုတဲ့ အကြောက်တရားကြီးတစ်ခု ရှိနေတတ်တယ်။
ဒါကို နားလည်လာတဲ့နောက်မှာတော့ ကျွန်မအတွက် လူဆိုးတိုင်းဟာ ကြောက်စရာမကောင်းတော့ဘူး။
သူတို့လုပ်သမျှကို ခွင့်လွှတ်ပေးရမယ်လို့လည်း မဆိုလိုဘူး။
ကိုယ့်ကိုယ်ကိုယ် မကာကွယ်ဘဲ သည်းခံနေရမယ်လို့လည်း မဆိုလိုဘူး။
လိုအပ်ရင် ဘောင်ခတ်မယ်။
လိုအပ်ရင် ဝေးဝေးနေမယ်။
လိုအပ်ရင် ကိုယ့်အခွင့်အရေးကို ကာကွယ်မယ်။
ဒါပေမဲ့ သူတို့ရဲ့အကြောက်တရားကြောင့် ကိုယ့်ဘဝတစ်ခုလုံးကိုပါ ကြောက်ရွံ့ခြင်းထဲ ဆွဲချမခံတော့ဘူး။
ဘာဖြစ်လို့လဲဆိုတော့ … တကယ့်ခွန်အားဆိုတာ သူများကို ကြောက်အောင်လုပ်နိုင်ခြင်းမဟုတ်ဘူး။
ကိုယ်ကြောက်နေတဲ့အရာတွေရှိနေရင်တောင် မယုတ်မာဘဲ နေနိုင်ခြင်းကမှ တကယ့်ခွန်အားပါ။
ဆင်းရဲလိုခြင်းအချင်းချင်း ကင်းရှင်းကြပါစေ 🤍
