Kolegji i Kirurgëve të Kosovës / Kosova College of Surgeons

15/09/2026

NUMRI MË I RI I BULETINIT TË KOLEGJIT TË KIRURGËVE TË KOSOVËS

Ky edicion sjell një pasqyrë të aktiviteteve, arritjeve dhe zhvillimeve që kanë shënuar punën e Kolegjit gjatë muajve Janar – Qershor 2026, duke dëshmuar kështu angazhimin tonë të vazhdueshëm për avancimin e edukimit kirurgjikal, bashkëpunimit profesional dhe shkencës mjekësore.

Në këtë numër mund të lexoni më shumë për:
🔹 Themelimin e Kolegjit Pan-Shqiptar të Kirurgëve
🔹 Programet e edukimit kirurgjikal gjatë vitit 2026
🔹 Kursin e Shkathtësive Themelore Kirurgjikale
🔹 Bashkëpunimet akademike dhe profesionale rajonale
🔹 Numrat e ri nga Kosova Journal of Surgery
🔹 Arritjet e anëtarëve kryesisë të Kolegjit dhe aktivitetet e tyre

Buletini prezanton gjithashtu aktivitetet që na presin gjatë muajve të ardhshëm, me ngjarjen tonë kryesore , Kongresin e Dytë Klinik të Kirurgëve Shqiptarë dhe Kongresin e 6-të Klinik të KKK-së.

Ju ftojmë ta lexoni dhe ta ndani edicionin më të ri të Buletinit, i cili pasqyron punën e përbashkët të komunitetit tonë profesional në Kosovë, rajon dhe më gjerë.

📖 Lexojeni Buletinin e plotë këtu:
https://koscs.org/sq/buletini-i-kolegjit-te-kirurgveve-te-kosoves-vellimi-5-numri-1/

04/09/2026

Themelohet Dega e Parë e Kolegjit Pan-Shqiptar të Kirurgëve – Dega e Austrisë

Më 3 shtator 2026 u themelua zyrtarisht Dega e Austrisë e Kolegjit Pan-Shqiptar të Kirurgëve (KPSHK), dega e parë e këtij Kolegji.

Takimi themelues u udhëhoq nga Prof. Dr. Lumnije Kqiku dhe mblodhi kirurgë shqiptarë nga fusha të ndryshme të kirurgjisë: kirurgji e përgjithshme dhe viscerale, ortopedi dhe traumatologji, si dhe kolegë të specializuar në kirurgji robotike, endovaskulare dhe në fusha të tjera nën-specialistike, të ardhur nga qytete e institucione të ndryshme.

Prof. Dr. Rifat Latifi, Kryetar Themelues i KPSHK, përshëndeti themelimin e degës, falenderoj Prof. Kqikun dhe të gjithë të pranishmit, dhe shpalosi rëndësinë e këtij hapi në fuqizimin e Kolegjit në përgjithësi.

Në fjalën e tij, Prof. Latifi u shpreh:

"Ndihem thellësisht i lumtur dhe krenar që sot po shoh të mbledhur në Austri kirurgë shqiptarë të ardhur nga vende e qytete të ndryshme, dhe nga degët më të ndryshme të kirurgjisë. Nëse dikush ka pasur ndonjëherë qoftë edhe dyshimin më të vogël për nevojën e themelimit të Kolegjit Pan-Shqiptar të Kirurgëve, ai dyshim sot është shuar plotësisht. Duke dëgjuar për arritjet, përkushtimin dhe nivelin profesional të këtyre kirurgëve shqiptarë në Austri, bëhet e qartë sa e nevojshme dhe sa e drejtë ishte kjo nismë. Ata tashmë njihen dhe takohen me njëri-tjetrin, dhe së bashku e duan vendlindjen dhe e ndihmojnë kirugjinë në përgjithësi. Kjo është pikërisht ajo që synonim: t'i bashkojmë, t'i afrojmë dhe t’i kthejmë të gjithë kirurgët te njëri-tjetri, kudo që janë shpërndarë nëpër botë”.

Me këtë rast, Prof. Latifi ftoi të gjithë kirurgët shqiptarë,si ata që morën pjesë në takim, ashtu edhe ata që nuk patën mundësi të jenë të pranishëm, që të bëhen pjesë e Kolegjit Pan-Shqiptar të Kirurgëve dhe e komiteteve të tij. "Kjo ftesë u drejtohet kirurgëve shqiptarë kudo që ushtrojnë profesionin: në Shqipëri, Kosovë, Luginë të Preshevës, Mal të Zi, në mbarë Evropën dhe në Shtetet e Bashkuara të Amerikës. Pjesëmarrja aktive në komitetet e Kolegjit është rruga më e drejtpërdrejtë për të ngritur nivelin shkencor dhe klinik të anëtarësisë së KPSHK-së dhe për të ndarë përvojën e secilit me kolegët”, shtoj ai.

Ky moment shënon një hap të rëndësishëm drejt bashkimit të ekspertizës shqiptare në mjekësi, krijimit të një rrjeti bashkëpunimi profesional dhe forcimit të lidhjeve akademike e shkencore midis kirurgëve shqiptarë kudo që ndodhen. Dega e Austrisë do të shërbejë njëkohësisht si model për degët e ardhshme të Kolegjit në vende të tjera.

01/09/2026

TELEGRAM NGUSHËLLIMI ME RASTIN E NDARJES NGA JETA TË PROF. DR. OSMAN SEJFIJAJT
-----------------------------------------------

LAMTUMIRË PROFESOR SEJFIJA!

Sot, Kolegji i Kirurgëve të Kosovës dhe Kolegji Pan- Shqiptar i Kiriurgëve, përcjellë me dhimbje të thellë dhe me nderimin më të madh, Prof.Dr. Osman Sejfijajn, Anëtar Nderi, dhe një prej figurave më të rëndësishme të historisë së mjekësisë dhe kirurgjisë në Kosovë dhe më tej.

Prof. Sejfija ishte një nga themeluesit e Kirurgjisë Maksillofaciale në Kosovë, kirurg i jashtëzakonshëm, mësues i shumë gjeneratave dhe, mbi të gjitha, një njeri që tërë jetën ia kushtoi profesionit, pacientit dhe formimit të brezave të rinj në ndertim të shkencës në Kosovë.

Jeta e tij profesionale u zhvillua në kohë të vështira, kur për të ndërtuar diçka e re kërkohej jo vetëm dije, por edhe guxim, këmbëngulje e besim.

Kur Kosova kaloi nëpër ditët ma të rënda të historisë së saj, Profesor Sejfija ishte aty ku duhej të ishte një mjek. Si kirurg, ai u përballë me plagë e tragjedi njerëzore që vështirë harrohen. Në ato ditë, kur gjithçka ishte e pasigurt, ai vazhdoi ta kryente misionin e tij: të shpëtojë jetë dhe të jetë pranë njerëzve kur më së shumti kishin nevojë.

Por trashëgimia e Prof. Dr. Sejfijajt nuk përfundon në sallën e operacionit.

Ajo jeton në shumë breza kirurgësh që kanë mësuar prej tij. Shumë prej nxënësve të tij sot janë emra të respektuar të kirurgjisë në Kosovë dhe në qendrat më të njohura të Evropës. Ata janë dëshmia më e fuqishme e punës së tij. Sepse, derisa një kirurg i madh e shpëton një jetë, një mësues i madh i ndryshon jetën një gjenerate të tërë.

Sot, kur po e përcjellim për në amshim, fjalët duken të vogla përballë asaj që la pas.

Prof. Sejfija la një profesion më të fortë, nxënës që u bënë profesorë e kirurgë të shquar, dhe dije që vazhdon të përcillet nga një gjeneratë tek tjetra. Ai la një histori pune, sakrifice dhe përkushtimi që nuk mund të harrohet.

Por mbi të gjitha, Prof. Sejfija la kujtime në zemrat e njerëzve që patën fatin ta njohin.

Kolegji i Kirurgëve të Kosovës dhe Kolegji Pan-Shiptar i Kirurgëve i shpreh ngushëllimet më të sinqerta familjes, kolegëve, nxënësve dhe të gjithë atyre që sot ndjejnë mungesën e tij.

Prof. Sejfijajt sot po i themi lamtumirë me zemër të rënduar, por me kokën lartë, sepse një jetë e tillë nuk kalon kot.

Ai do të mbetet në ADN-në e çdo kirurgu që e ka mësuar, të çdo pacienti që e ka shëruar, dhe tek brezi që do të vazhdojë ta çojë përpara atë që ai e nisi.

Faleminderit për gjithçka që i dha mjekësisë, kirurgjisë së Kosovës dhe kirurgjisë shqiptare pergjithësisht.

Lavdi veprës dhe kujtimit të tij!

Kolegji i Kirurgëve të Kosovës dhe Kolegji Pan-Shqiptar i Kirurgëve

26/08/2026

📢 ANËTARËSIMI NË KOLEGJIN E KIRURGËVE TË KOSOVËS - PËRFITIME TË VEÇANTA PËR ATA QË ANËTARËSOHEN DERI MË 1 TETOR 2026

Kolegji i Kirurgëve të Kosovës fton të gjithë kirurgët, mjekët në specializim dhe profesionistët e fushave të lidhura kirurgjikale që t’i bashkohen familjes sonë profesionale.

Anëtarësimi në Kolegjin e Kirurgëve të Kosovës ofron:
✔️ Pjesëmarrje aktive në aktivitetet shkencore dhe edukative të Kolegjit;
✔️ Qasje në kongrese, simpoziume, trajnime dhe programe certifikuese;
✔️ Përfshirje në rrjetëzim profesional kombëtar dhe ndërkombëtar;
✔️ Mundësi për të kontribuar në avancimin e standardeve kirurgjikale dhe të kujdesit shëndetësor në Kosovë.

🎯 PËRFITIME TË VEÇANTA PËR ATA QË ANËTARËSOHEN DERI MË 1 TETOR 2026

Të gjithë ata që anëtarësohen në Kolegjin e Kirurgëve të Kosovës deri më 1 tetor 2026 do të mund të përfitojnë:
✅ Regjistrim falas në Kongresin e 2-të Klinik të Kirurgëve Shqiptarë, njëherësh Kongresi i 6-të Klinik i Kolegjit tëi Kirurgëve të Kosovës, që do të mbahet në Tiranë, 22-24 Tetor 2026.
✅ Pjesëmarrje në punëtorinë e laparoskopisë, e cila do të udhëhiqet nga ekspertë të njohur ndërkombëtarë gjatë pjesës së dytë të muajit Shtator.
✅ Pjesëmarrje në Simpoziumin e Gjirit, që do të mbahet gjatë muajit Tetor;
✅ Zbritje domethënëse në tarifën e regjistrimit për Simpoziumin e 3-të “Prof. Rao Ivatury – Update on Trauma, Emergency General Surgery, Critical Care & Burns”, që do të mbahet në muajin Dhjetor.

📌 Vëmendje: Anëtarësimi aktiv është kusht për pjesëmarrjen dhe përfitimin nga aktivitetet e KCS-së. Për punëtorinë e laparoskopisë, anëtarësimi duhet të bëhet përpara datës së zhvillimit të aktivitetit.

📩 Për informata të hollësishme rreth procedurës së aplikimit dhe pagesës së anëtarësisë, klikoni në:
👉 https://koscs.org/sq/anetaresohu/

Bëhuni pjesë e platformës kryesore profesionale të kirurgëve në Kosovë dhe kontribuoni në ndërtimin e së ardhmes së kirurgjisë në vendin tonë!

21/08/2026

📢 AFATI PËRFUNDIMTAR PËR DORËZIMIN E ABSTRAKTEVE

Duke marrë parasysh interesimin e vazhdueshëm dhe kërkesat e shumta të autorëve, gjersa deri më tani janë dorëzuar mbi 250 abstrakte, Komiteti Shkencor ka vendosur të bëjë zgjatjen e fundit të afatit për dorëzimin e abstrakteve. Kjo shtyrje synon t’u japë mundësi të gjithë kirurgëve dhe profesionistëve të interesuar që të përfaqësohen dhe të kontribuojnë në këtë aktivitet të rëndësishëm shkencor.

🔹 Kongresi i 2-të Klinik i Kirurgëve Shqiptarë
dhe
🔹 Kongresi i 6-të Klinik i Kolegjit të Kirurgëve të Kosovës

📅 AFATI PËRFUNDIMTAR: 30 GUSHT 2026

Ftojmë kirurgët, specializantët, studiuesit dhe profesionistët shëndetësorë që ende nuk kanë dorëzuar punimet e tyre ta shfrytëzojnë këtë mundësi të fundit për t'u bërë pjesë aktive e programit shkencor të Kongresit.

Abstraktet mund të dorëzohen në kategoritë:

🔹 Prezantim Oral
🔹 Quick Shot
🔹 Poster

🏅 Punimet më cilësore do të konsiderohen për publikim në Kosova Journal of Surgery (KJS).

Kongresi do të sjellë në Tiranë ekspertë, kirurgë, studiues dhe profesionistë shëndetësorë nga hapësira shqiptare, Evropa, SHBA dhe vende të tjera të botës, duke krijuar një platformë të rëndësishme për shkëmbimin e njohurive, prezantimin e arritjeve shkencore dhe forcimin e bashkëpunimit profesional.

⏳ Mos e humbni afatin përfundimtar!
Dorëzoni abstraktin tuaj dhe bëhuni pjesë e ngjarjes më të rëndësishme të komunitetit kirurgjikal shqiptar.
https://ample.al/thirrje-per-abstrakte-kongresi-i-2-te-i.../

📅 Afati përfundimtar për abstrakte: 30 Gusht 2026
📍 Tiranë | 22–24 Tetor 2026

18/08/2026

📢 SIMPOZIUMI I 3-të “PROF. RAO IVATURY” DO TË MBAHET NË PRIZREN

Kolegji i Kirurgëve të Kosovës ka kënaqësinë të njoftojë se Simpoziumi i 3-të Ndërkombëtar “Prof. Rao Ivatury Update on Trauma, Emergency General Surgery, Critical Care & Burns”, i cili do të mbahet më 17–18 Dhjetor 2026, do të organizohet në Premium Park Hotel, në Prizren.

🏨 Premium Park Hotel, Prizren
📅 17–18 Dhjetor 2026

Këtë herë, Prizreni do të jetë mikpritës i ekspertëve, kirurgëve dhe profesionistëve shëndetësorë nga Kosova, rajoni dhe vende të ndryshme të botës.

Kolegji i Kirurgëve të Kosovës vazhdon me organizimin e aktiviteteve të nivelit ndërkombëtar në kuadër të edukimit të vazhdueshëm profesional. Simpoziumi “Prof. Rao Ivatury" tashmë po konsolidohet si një ngjarje e rëndësishme shkencore në fushën e traumës dhe kirurgjisë emergjente, duke sjellë së bashku ekspertë dhe ligjërues të njohur ndërkombëtarë dhe vendorë.

Ky edicion merr një rëndësi të veçantë, pasi organizohet në kuadër të shënimit të 8-vjetorit të themelimit të Kolegjit të Kirurgëve të Kosovës, duke e bërë atë një ngjarje të veçantë për komunitetin kirurgjik dhe mjekësor të Kosovës, rajonit dhe më gjerë.

Gjatë dy ditëve të simpoziumit, fokusi do të jetë në zhvillimet dhe praktikat bashkëkohore në:

🔹 Traumë
🔹 Kirurgji Emergjente
🔹 Kujdes Intensiv
🔹 Djegie

Programi do të përfshijë ligjërata të nivelit të lartë shkencor nga ekspertë ndërkombëtarë dhe vendorë, diskutime interaktive dhe shkëmbim të përvojave klinike, me fokus në përmirësimin e kujdesit ndaj pacientëve dhe avancimin e edukimit kirurgjik.

📖 Punimet e ligjëruesve do të publikohen në një numër special të Kosova Journal of Surgery, duke kontribuar në përhapjen e njohurive shkencore dhe promovimin e kërkimit në fushën e kirurgjisë.

📌 REZERVO DATAT
📅 17–18 Dhjetor 2026
📍 Premium Park Hotel, Prizren

Së shpejti do të publikojmë programin shkencor, listën e ligjëruesve ndërkombëtarë dhe vendorë, si dhe detajet për regjistrimin e pjesëmarrësve.

Ju mirëpresim në Prizren për dy ditë të dedikuara dijes, shkëmbimit të përvojave, bashkëpunimit profesional dhe avancimit të kirurgjisë.

05/08/2026

03/08/2026

📢 SHTYHET AFATI PËR DORËZIMIN E ABSTRAKTEVE!

Për shkak të interesimit të madh dhe kërkesave të shumta nga autorët, Komiteti Organizativ ka vendosur të zgjasë afatin për dorëzimin e abstrakteve deri më 20 gusht 2026 për:

Kongresin e 2-të Klinik të Kirurgëve Shqiptarë
dhe njëherësh
Kongresin e 6-të Klinik të Kolegjit të Kirurgëve të Kosovës

Ky është një nga aktivitetet më të rëndësishme shkencore në fushën e kirurgjisë, i cili do të mbledhë në Tiranë kirurgë, studiues dhe profesionistë shëndetësorë nga mbarë hapësira shqiptare dhe nga shumë vende të botës, duke krijuar një platformë të përbashkët për shkëmbimin e përvojave, prezantimin e risive shkencore dhe forcimin e bashkëpunimit profesional.

Abstraktet mund të dorëzohen në kategoritë:
• Prezantim Oral
• Quick Shot
• Poster

📅 Afati i ri i dërgimit të abstraktit: 20 gusht 2026
https://ample.al/thirrje-per-abstrakte-kongresi-i-2-te-i.../

🏅 Punimet më cilësore do të konsiderohen për publikim në Kosova Journal of Surgery (KJS).

Mos e humbni mundësinë të bëheni pjesë e këtij kongresi prestigjioz dhe të kontribuoni në avancimin e shkencës kirurgjikale shqiptare dhe ndërkombëtare.

📍 Tiranë | 22–24 Tetor 2026

27/07/2026

🌍 Njihuni me Ligjëruesit e Ftuar Ndërkombëtarë – Kongresi i 2-të Klinik i Kirurgëve Shqiptarë
Kolegji Pan-Shqiptar i Kirurgëve
Kolegji i Kirurgëve të Kosovës

Në Kongresin e 2-të Klinik të Kirurgëve Shqiptarë që do të mbahet në Tiranë, më 22-24 Tetor 2026, jemi të nderuar të mirëpresim ekspertë të njohur ndërkombëtarë, të cilët do të ndajnë njohuritë, përvojën dhe përparimet e tyre më të fundit në fushat e tyre përkatëse.

Pjesëmarrja e tyre dëshmon angazhimin tonë për të ofruar një program shkencor të nivelit botëror dhe për të nxitur bashkëpunimin ndërkombëtar.

Sot kemi nderin që këtë prezentim ta fillojmë me Prof. Dr. Demetrius Litwin, një nga liderët botëror të kirurgjisë.

Gjatë ditëve në vijim do të prezantojmë secilin prej ligjëruesve tanë të ftuar.

22/07/2026

𝐀𝐓𝐋𝐒 𝐊𝐨𝐬𝐨𝐯𝐚 | 𝟏𝟗–𝟐𝟏 Tetor 𝟐𝟎𝟐𝟔

Kolegji i Kirurgëve të Kosovës ka kënaqësinë t'ju njoftojë se kursi i radhës "Advanced Trauma Life Support (ATLS) Kosova" do të mbahet më 19–21 Tetor 2026 në Prishtinë, në partneritet me Sanford Medical Center, Fargo, North Dakota, USA, si dhe me mbështetjen dhe autorizimin e Committee on Trauma (COT) të American College of Surgeons (ACS).

ATLS është standardi ndërkombëtar për vlerësimin dhe menaxhimin fillestar të pacientëve të traumatizuar dhe konsiderohet një nga programet më prestigjioze të edukimit mjekësor në fushën e traumës. Kursi ofron qasje të strukturuar dhe të bazuar në evidencë për trajtimin e pacientëve me trauma, duke ndihmuar profesionistët shëndetësorë të marrin vendime të shpejta, të sigurta dhe efektive në situata kritike.

Deri më sot, rreth 100 profesionistë shëndetësorë nga Kosova dhe rajoni janë certifikuar me sukses përmes programit ATLS Kosova. Rezultatet e deritanishme kanë dëshmuar se ky trajnim ka pasur ndikim të rëndësishëm në zhvillimin profesional të pjesëmarrësve, duke forcuar aftësitë e tyre klinike, si dhe duke rritur sigurinë në menaxhimin e rasteve të traumës dhe duke përmirësuar cilësinë e kujdesit ndaj pacientëve në institucionet ku ata veprojnë.

Kursi është i certifikuar nga American College of Surgeons (ACS) dhe njihet ndërkombëtarisht në vendet e Bashkimit Evropian, Shtetet e Bashkuara të Amerikës, Kanada dhe në shumë vende të tjera. Gjithashtu, ai është i akredituar nga ACS me 16 kredi për edukim të vazhdueshëm (CME) për pjesëmarrësit. Certifikata e fituar është e vlefshme dhe e njohur në nivel ndërkombëtar.

Numri i pjesëmarrësve është i kufizuar. Përparësi do të kenë kandidatët që aplikojnë më herët. Për anëtarët e Odës së Mjekëve të Kosovës (OMK) kursi ofrohet pa pagesë. Të interesuarit e tjerë mund të na kontaktojnë në: [email protected].

Kandidatët duhet të kenë njohuri të mjaftueshme të gjuhës angleze për të kuptuar literaturën mjekësore, pasi materialet e kursit janë në gjuhën angleze. Ligjëratat, stacionet e trajnimit praktik dhe testimi do të zhvillohen në gjuhën shqipe.

Ekipi i trajnerëve përbëhet nga instruktorët e certifikuar të American College of Surgeons dhe Kolegjit të Kirurgëve të Kosovës.
Kursi do të mbahet në Qendrën e Mjekësisë Urgjente në Prishtinë.

Për regjistrim, kandidatët duhet të plotësojnë formularin online të aplikimit:
https://koscs.org/sq/regjistrimi-ne-kursin-atls/

Afati për aplikim: 31 Gusht 2026

Të gjithë kandidatët do t'i nënshtrohen procesit të përzgjedhjes. Kandidatët e pranuar do të pajisen me librin zyrtar ATLS, të licencuar individualisht dhe të botuar nga American College of Surgeons, i cili do të shërbejë si material bazë për përgatitjen dhe ndjekjen e kursit.

Për më shumë detaje rreth kursit:
https://koscs.org/.../broshura-advanced-trauma-life.../