vriende wat omgee

vriende wat omgee Hierdie groep stig ek vir gebed en bewusmaking van PTSD. Ondersteuning vir my ma en hul omstandighede

15/02/2025

15 Februarie 2025
Saterdag
Dag 122

Goeie more!

*Af met die Maskers – Ontmoet die Ware Jy*

*Psalms 139:14*
Afrikaans 1933/53
_"[14] Ek loof U, omdat ek so vreeslik wonderbaar is; wonderbaar is u werke! En my siel weet dit alte goed."_

Het jy al ooit gewonder hoekom ons so maklik maskers opsit?
Ons hoop dat mense van ons sal hou, maar dan raak hulle eintlik verlief op 'n fasade of dekmantel of 'n skyn, nie die werklike ons nie.
Hoe ironies is dit dat hierdie strategie ons eintlik vervreem van die liefde en aanvaarding waarna ons smag?

D**k aan ‘n toneelstuk waarin ‘n akteur ‘n masker moet dra...
Elke dag leef hy so oortuigend ín sy karakter in dat mense begin glo dit is wie hy werklik is. Maar as hy die masker tuis afhaal, voel hy eensaam en leeg – niemand ken die wérklike persoon agter die masker nie.

Net so dra ons maskers voor God en ook voor ander mense, maar dit bring geen ware vervulling nie.

*1 Samuel 16:7*
Afrikaans 1933/53
_"[7] Maar die Here sê vir Samuel: Kyk nie na sy voorkoms en sy hoë gestalte nie, want Ek ag hom te gering. Want nie wat die méns sien, sien God nie; want die mens sien aan wat voor oë is, maar die Here sien die hart aan."_

Wanneer ons ons wérklike self probeer wegsteek, wanneer ons voorgee om te wees wie ons nié is nie, verloor ons uit op die seëninge wat God vir ons beplan...
Dis soos _masking tape_ – dit voorkom dat God se "verf" van genade en seën ons hele wese bereik.
Net soos jy nie ‘n muur kan verf as daar _masking tape_ oor is nie, kan God nie werk met die dele van ons wat ons wegsteek nie.

Maar, hoe bevrydend is dit nie om te weet dat ons deur en deur, deur God geken en aanvaar word nie!

*Jeremia 1:5*
Afrikaans 1933/53
_"[5] Voordat Ek jou in die moederskoot gevorm het, het Ek jou geken; en voordat jy uit die liggaam voortgekom het, het Ek jou geheilig; Ek het jou tot 'n profeet vir die nasies gemaak."_

Stel jou voor jy kry ‘n werk deur voor te gee jy is iemand anders.
Jy sal gedurig angstig wees om jou ware self te openbaar. Maar God vra jou net om jouself te wees – want Hy het jou spesifieke talente en gawes gegee.

*Kolossense 3:23*
Afrikaans 1933/53
_"[23] En wat julle ook al doen, doen dit van harte soos vir die Here en nie vir mense nie,..."_

In verhoudings dra ons dikwels maskers om liefde te verdien. Maar die liefde van God is onvoorwaardelik, sonder masker.

*Romeine 8:38-39*
Afrikaans 1933/53
_"[38] Want ek is versekerd dat geen dood of lewe of engele of owerhede of magte of teenwoordige of toekomende dinge [39] of hoogte of diepte of enige ander skepsel ons sal kan skei van die liefde van God wat daar in Christus Jesus, onse Here, is nie."_

Dit begin by eerlikheid met God en jouself. Maak jou hart oop en laat God toe om jou soos jý is te vorm.
Wanneer jy ophou voorgee, maak jy ruimte vir God se volle seën in jou lewe.

*2 Korinthiërs 3:18*
Afrikaans 1933/53
_"[18] En terwyl ons almal met onbedekte gesig soos in 'n spieël die heerlikheid van die Here aanskou, word ons van gedaante verander na dieselfde beeld, van heerlikheid tot heerlikheid, as deur die Here wat die Gees is."_

Maak tyd om éérlik met God te praat oor jou vrese en onsekerhede.

Leef met integriteit, wetende dat jy uniek geskape is deur God.

Vertrou wat God oor jou sê, nie wat jy d**k ander van jou verwag nie.

*Efésiërs 2:10*
Afrikaans 1933/53
_"[10] Want ons is sy maaksel, geskape in Christus Jesus tot goeie werke wat God voorberei het, sodat ons daarin kan wandel."_

Hemelse Vader,
Dankie dat U my geskep het, vreeslik en wonderbaar. Help my om my masker af te haal en my ware self aan U en die wêreld te wys. Here, lei my om U wil te volg en te wandel in die waarheid van wie U my gemaak het om te wees. Dankie dat U my liefhet net soos ek is en dat U my met U seëninge wil oorlaai. Ek vertrou U, Here, en gee elke deel van my hart oor aan U.
In Jesus se Naam bid ek.
Amen.

Laat los die masker – ontvang God se volle seën!

Blessings!🌻

13/02/2025

13 Februarie 2025
Donderdag
Dag 120

*Geluk vs. Vreugde – Wie wen die stryd?*

So, kom ek vertel julle hoe dit werk in hierdie Lessing-huis soggens. Dis chaos tot Nico die pad vat werk toe. Daarna is dit so stil, jy kan ’n naald hoor val. Ek vat my koppie koffie, sit buite en luister na die voëls wat hul karaoke sessie begin. Hulle maak nie geraas oor wie meer saad het of wie die beste nes gebou het nie – nee, hulle sing net!
Dis vir my 'n _reality check._ Hier sit ek, ’n mens met _issues_ en _to-do lists,_ en húlle? Hulle is net dankbaar...

Maar wag, hier’s die _catch:_ Hoeveel keer sê mense nie vir mekaar “Gelukkige Nuwe Jaar!” of “Gelukkige verjaarsdag!” "Gelukkige moedersdag!" "Gelukkige die of daai!" nie?
Maar geluk is só broos.
Dis soos daai een ou wat die Lotto wen – hy’s op _cloud nine,_ maar sodra die geld op is, is hy weer _miserable._ Geluk is soos ’n reënboog – mooi om te sien, maar jy kan dit nie gryp nie.

En toe lees ek iets wat my ore laat regop staan:
_"Happiness is not determined by what’s happening around you, but rather what’s happening inside you."_
_Bóóm!!!_
Dis toe ek besef daar’s ’n verskil tussen geluk en vreugde.
Kom ek vertel julle wat ek geleer het...

Geluk hang af van wat buite om jou gebeur.

Jy kry dit as jy ’n bonus kry, maar dis weg as die kar breek.

Dis soos daai oomblik as jy ’n lekker roomys kry – _amazing,_ maar as jy dit laat val, is dit _game over._

Jy kan dit _fake._
Jy kan glimlag en maak asof jy gelukkig is al is jy nie.

Vreugde is ’n innerlike _vibe_ wat niemand kan steel nie.

Dit kom van God af – en ja, dis _permanent stock._

Jou lewe kan chaos wees, maar jy het steeds vreugde, want jou anker is by die Here.

Dit maak nie saak hoeveel dinge skeef loop nie, jy’t hierdie _inner peace_ wat nét God kan gee.

*Matthéüs 5:8*
Die Boodskap
_"[8] “Gelukkig is almal wie se lewe van binne af nuut geword het. God sal sorg dat hulle Hom met hul eie oë sien."_

Dís die tipe vreugde waarna ek streef.
Nie die _on and off_ geluk nie, maar daai _24/7 inner glow_ wat net van die Here af kán kom.
So volgende keer as jy voel alles om jou val uitmekaar, onthou hierdie: Jou vreugde hang nie af van jou baas, ook nie van jou saldo of jou situasie nie. Jou vreugde kom van God – Hy is jou _Plug_ vir blywende vreugde.

Wanneer jy voel jou vreugde begin gly, maak tyd om by die Here stil te word.

Fokus op alles waarvoor jy dankbaar is.

Sing saam met die voëls – letterlik of figuurlik – en laat God jou hart verfris.

Abba Vader, dankie dat U ons ’n vreugde gee wat die wêreld nie kan steel nie. Help ons om nie vas te kyk in die oombliklike _highs_ van geluk nie, maar eerder om ons vreugde in U te vind. Laat ons besef dat U die bron van ware tevredenheid is, al lyk dinge soms deurmekaar. Dankie vir U blywende teenwoordigheid.
In Jesus se Naam.
Amen.

Geluk is tydelik, maar vreugde is ’n _vibe_ wat nét God kan gee.

Blessings!
Christah Lessing🌻

11/02/2025

11 Februarie 2025
Dinsdag
Dag 118

*Gehoorsaamheid*

Ek wonder as ek my eie klein getuienis met jul kan deel, wie eerlik genoeg daarmee kan identifiseer....
Ek is baie geneig om vinnig goed sommer sélf te wil doen. So weet ek dit word gedoen, sommer nes ék dit gedoen wil hê, _first time round!_

Jare gelede, toe my kinders nog babas was, staan ek in die kombuis by ons huis en was my 21-maande oue dogtertjie se bottels. Meteens besef ek dat ek een van haar bottels in die kamer vergeet het.
Gedruk vir tyd, vra ek my 4-jarige seuntjie wat in die speelkamer speel om die bottel vinnig te gaan haal.
Waar hy gewoonlik dadelik gehoorsaam sal wees, antwoord hy dié keer: "Mamma, ek sal nou-nou gaan. Ek speel net gou eers hier klaar."
Wát!!?
Nie nou-nou nie!
*NÓÚ!!!*
Nou-nou gaan dit te laat wees.

Half verbaas, half gefrustreerd, was ek op die punt om hom die Leviete voor te hou en selfs die bottel self te gaan haal (aangesien dit baie vinniger sal wees as om 'n 4-jarige te probeer oortuig), toe ek duidelik die Heilige Gees se stem ervaar:
"Christah, verstaan jý nou hoe frustrerend dit soms vir My is as Ek 'n opdrag aan een van My kinders gee en hulle dit nie dadelik gehoorsaam nie - omdat hulle 'te besig' met hulle eie dinge is?"

Noag, Gideon en Abraham. Al drie hierdie mans het 'n opdrag van God gehad.
Noag moes 'n ark bou.
Gideon moes as Rigter die manskappe in 'n veldslag lei (al het hy in homself en sy eie vermoë getwyfel).
En Abraham moes die seun, Isak vir wie hy etlike dekades gewag het, gaan offer.
Wat sou gebeur het as hierdie mense "te besig" was om God se opdrag te gehoorsaam?
Sou Noag en sy familie dalk saam met die res van die mensdom verdrink het?
Sou Gideon die aanval van die vyandige weermag oorleef het?
En sou Abraham ooit die genot van God se beloftes ten volle beleef het?

*1 Samuel 15:22*
Afrikaans 1933/53
_"Daarop sê Samuel: Het die Here behae in brandoffers en slagoffers soos in gehoorsaamheid aan die stem van die Here? Kyk, om gehoorsaam te wees is beter as slagoffer, om te luister beter as die vet van ramme."_

*Johannes 14:15*
Afrikaans 1933/53
_"As julle My liefhet, bewaar my gebooie."_

*Deuteronómium 5:33*
Afrikaans 1933/53
_"In al die weë wat die Here julle God julle beveel het moet julle wandel, sodat julle kan lewe en dit met julle goed kan gaan en julle die dae kan verleng in die land wat julle in besit sal neem."_

Onmiddellike gehoorsaamheid wys ons geloof in EK IS.
Dit demonstreer aan Hom dat ons Hom méér vertrou as wat ons toelaat dat vrees en onsekerheid oor ons toekoms ons oorweldig.
In die kombuis het my seuntjie se ongehoorsaamheid veroorsaak dat ek self die bottel gaan haal het. Tóg wonder ek hoeveel keer my eie ongehoorsaamheid aan God se opdragte veroorsaak het dat ek 'n geleentheid gemis het om 'n instrument in Sy hande te wees (terwyl Hy daarna die opdrag aan iemand anders moes gegee het).

Kom ons kies vandag saam om onmiddellik gehoorsaam te wees.
Al maak die opdrag in die hede nie sin nie kan ons weet dat ons 'n God aanbid wat die toekoms in sy hande hou.
Sterkte.

Abba Vader, Here, baie dankie dat U my steeds ten spyte van my swakpunte en tekortkominge gebruik. Versterk my asseblief deur u Heilige Gees om onmiddellik gehoorsaam te wees as U my lei. Ek vra dit in die Naam van Jesus Christus.
Amen.

Moenie wag nie, doen dit nou – God se stem vra gehoorsaamheid!

Blessings
🌻

10/02/2025

10 Februarie 2025
Maandag
Dag 117

*God se Plan: Van Alleenheid na Gemeenskap*

In ‘n wêreld waar daar meer mense is as wat ons brein gemaklik kan verwerk (8.2+ miljard!), behoort eensaamheid vir seker onmóóntlik te wees...
En tog, tussen skerms en skedules, voel ons dikwels só alleen – ironies genoeg, selfs in die kerkbank, of by die restaurant, of in 'n skoolsaal vol mense.
Já, ons gesels wel oor die weer en koffiepryse en lighartige onbenullighede maar wanneer laas het ons wérklik iemand se hart leer ken?

Die Skrif nooi ons egter na iets ryker – ‘n gemeenskap wat nie net koffie drink nie, maar harte verbind.
Kom ons kyk wat God se Woord oor hierdie reis sê...

*Génesis 2:18*
Afrikaans 1933/53
_"[18] Ook het die Here God gesê: Dit is nie goed dat die mens alleen is nie. Ek sal vir hom 'n hulp maak wat by hom pas."_

God het nie net oor huwelike gepraat nie; Hy het gemeenskap geskep omdat Hy weet ons floreer saam.
Soos brikette en hout op ‘n vuur, hou ons mekaar warm.
Sonder dit raak ons vlamme maar flou.

Die wêreld sê vir ons: “Wees onafhanklik,” maar God sê: "Wees eensaam? Nee dankie."

Paulus skryf in *1 Korinthiërs 12:12-27* mooi uiteen ons is dele van één liggaam. Sonder mekaar funksioneer ons nie reg nie. Kan jy jou voorstel hoe dit lyk as jou hand besluit om alleen aan te gaan? Snaaks, maar tragies...

*Hebreërs 10:24-25*
Afrikaans 1933/53
_"....en laat ons op mekaar ag gee om tot liefde en goeie werke aan te spoor; en laat ons ons onderlinge byeenkoms nie versuim soos sommige die gewoonte het nie, maar laat ons mekaar vermaan, en dit des te meer namate julle die dag sien nader kom."_

Die Woord herinner ons om mekaar aan te moedig. Hier is die geheim: Ons is gemaak om mekaar te help groei. Soos Barnabas vir Paulus, Paulus vir Timóthéüs, en Timóthéüs vir... wel, almal.

Gemeenskap is waar ons ons vreugdes deel en ons laste ligter maak.

*Galásiërs 6:2*
Afrikaans 1933/53
_"Dra mekaar se laste en vervul so die wet van Christus."_

As jý jouself ooit wonder waarom jou gewigte swaar voel, vra dalk: “Waar is my spanmaats?”

Wié sê Jesus-volgelinge mag nie lag nie?

*Handelinge 2:46*
Afrikaans 1933/53
_"[46] En dag vir dag het hulle eendragtig volhard in die tempel en van huis tot huis brood gebreek en hulle voedsel met blydskap en eenvoudigheid van hart geniet,..."_

Jy d**k dalk kerk is net ‘n ernstige gesig met ‘n harde preek. Maar die vroeë kerk het feesgevier – met kos, liedere en ‘n goeie geselskap.

*Psalms 133:1*
Afrikaans 1933/53
_"'n BEDEVAARTSLIED. Van Dawid. Kyk, hoe goed en hoe lieflik is dit dat broers ook saamwoon!"_

As jy jou broers (of susters) lanklaas gesien het, miskien is dit tyd om weer die bordjies met _snacks_ uit te haal!

*Matthéüs 18:20*
Afrikaans 1933/53
_"[20] Want waar twee of drie in my Naam vergader, daar is Ek in hul midde."_

Ons het nie ‘n spesiale gebou of formele program nodig nie – net oop harte.
Wanneer ons saamkom, word ons ontmoet deur dié Een wat gemeenskap uitged**k het.

Begin klein. Nooi iemand vir koffie, vra oor hul week en wees eerlik oor jou eie. Wees versigtig om nie uit 'n plek van hoogmoed te vertel hóé _awesome_ jou week was of is, as dit eintlik _crappy_ was nie!

Maak tyd. Dis maklik om gemeenskap af te skeep in ‘n besige skedule, maar dis ‘n belegging in jou gees. Máák tyd, jy het gemeenskap nodig, moenie dat die vyand jou anders laat glo nie.

Wees ‘n lig. Begin die tipe gemeenskap wat jy wens jý kon hê. Liefde trek aan.

*1 Johannes 3:11*
Afrikaans 1933/53
_"Want dit is die boodskap wat julle van die begin af gehoor het, dat ons mekaar moet liefhê..."_

Here,
Dankie dat U ons geskep het vir gemeenskap. Help ons om ons harte oop te maak en werklik vir ander daar te wees. Vul ons gemeenskappe met U liefde, U vreugde en U vrede. Leer ons om mekaar te ondersteun, aan te moedig en te lag soos U wil hê ons moet. Mag ons U lig dra in alles wat ons doen.
In Jesus se Naam bid ons dit.
Amen.

Gemeenskap: Dis waar harte warm bly en geloof sterker groei!

Blessings!🌻

08/02/2025

ñ Mooi ietsie om te lees wat ek ontvang het. En eintlik so van pas in ons lewe.....

🌹🗣️n Mens sterf en sien God naderkom met 'n groot reistas in Sy hand. Hulle begin praat...

God:"Kom my kind, dis tyd om te gaan."
Mens: "So gou? Maar ek het nog baie planne om..."
God: "Jammer. Dis tyd om te gaan."
Mens: "Wat is in die tas?"
God: "Jou besittings."
Mens: "U bedoel my goed? Soos geld en klere en..."
God: "Al daai goed was nooit joune nie, dit behoort aan die Aarde."
Mens: "Is dit my herinneringe?"
God: "Nee, dit behoort aan Tyd."
Mens: " Is dit my talente?"
God: "Nee, dit behoort aan Omstandighede."
Mens: "Is dit my vriende en familie?"
God: "Nee, dit behoort aan die Pad deur jou geloop."
Mens: " Is dit my huweliksmaat en kinders?"
God: "Nee, dit behoort aan jou Hart."
Mens: "Dan moet dit my liggaam wees!"
God: "Nee my kind, dit behoort aan Stof."
Mens: "Dan is dit beslis my siel!"
God: "Ongelukkig is jy verkeerd. Jou siel behoort aan My."

Moedeloos en hartseer vat die mens die tas by God en maak dit oop....

Leeg...

Hartgebroke vra die mens:
"Het ek dan nooit niks besit nie?"
God: "Dis reg ja. Jy het nooit niks besit nie."
Mens: "Maar, wat wàs dan ooit myne?"
God: "Oomblikke. Elke oomblik wat jy geleef het, was joune. Jy het nét oomblikke besit."

Daarom: Doen goed, in elke oomblik.
D**k goed, in elke oomblik.
Lééf, in elke oomblik.
Hê lief, in elke oomblik.
Dank God vir elke oomblik.

Die lewe is net 'n oomblik.
Léwe dit...
Geniét dit...
Liéf dit...
in elke oomblik.

06/02/2025

6 Februarie 2025
Donderdag
Dag 113

*Lig in die Stormwinde*

In die lewe kom ons almal op ’n tydstip in aanraking met storms – daardie woeste winde wat alles deurmekaar wil waai en ons stuurloos laat voel.
In sulke tye is daar ’n Lig wat nooit ophou skyn nie: God se liefde, God se genade en God se waarheid.
Hy is ons rotsvaste Fondament en ons Reddende Ligtoring in die donkerste nag.

’n Ligtoring is meer as net ’n gebou... dit is ’n lewenslyn vir skepe.
Soos die ligtoring op ’n rots gebou is, is ons geloof in God die Fondament wat ons help om staande te bly, ongeag hoe hewig die storms is.

*Psalms 62:7*
Afrikaans 1933/53
_"[7] Sekerlik, Hy is my rots en my heil, my rotsvesting; ek sal nie wankel nie."_

Net soos hierdie toring, word ons geroep om onwrikbaar te staan en ons lig te laat skyn, selfs wanneer die storms van die lewe ons tref.
Hierdie lig is nie nét vir onsself nie, maar ook vir diegene wat verlore is en hoop nodig het.

Die gewig van skuld en die onsekerheid oor hoe ons rekeninge betaal gaan word, voel soos woeste golwe wat oor jou kop slaan. Jy voel oorweldig deur finansiële probleme, maar kies om nog steeds vrygewig te wees, al is dit met net ’n brood of ’n gebed vir iemand in groter nood.

*Filippense 4:19*
Afrikaans 1933/53
_"[19] En my God sal elke behoefte van julle vervul na sy rykdom in heerlikheid deur Christus Jesus."_

Chroniese pyn of ’n ernstige siekte kan soos ’n aanhoudende storm voel. Dit toets jou geloof en jou uithouvermoë. Al worstel jy met jou eie pyn, deel jy God se liefde deur ander aan te moedig wat óók siek is – dalk deur ’n boodskap van hoop of ’n besoek.

*2 Korinthiërs 12:9*
Afrikaans 1933/53
_"[9] En Hy het vir my gesê: My genade is vir jou genoeg, want my krag word in swakheid volbring. Baie liewer sal ek dus in my swakhede roem, sodat die krag van Christus in my kan woon."_

Wanneer jou huwelik, jou familie of jou vriendskappe in konflik is, voel dit soos ’n storm wat jou uitmekaar ruk. Jy weerhou jou van harde woorde en kies om vrede en vergifnis na te streef, selfs al voel jy te na gekom. Jou reaksie kan ’n baken van kalmte en genade wees.

*Romeine 12:18*
Afrikaans 1933/53
_"[18] ...as dit moontlik is, sover as dit van julle afhang, leef in vrede met alle mense."_

Wanneer jy nie God se stem hoor nie, voel dit soos om alleen in ’n donker see te dryf. Jy kies om aan te hou bid en die Bybel oop te maak, selfs wanneer jy nie vóél of hóór nie. Deur geloof hou jy jou lig aan die brand.

*Psalms 119:105*
Afrikaans 1933/53
_"[105] U woord is 'n lamp vir my voet en 'n lig vir my pad."_

Die druk van werk en sosiale verwagtinge kan jou oorweldig. Jy voel dalk nooit goed genoeg nie. Al is jy oorweldig, dien jy ander met ’n glimlag en help jy jou kollegas, selfs wanneer jy self moeg is.

*Galásiërs 6:2*
Afrikaans 1933/53
_"[2] Dra mekaar se laste en vervul so die wet van Christus."_

Soos die ligtoring se lig, is ons ook geroep om onsself nie net te red nie, maar ander te wys na die ewige Lig – Jesus Christus.

*Matthéüs 5:16*
Afrikaans 1933/53
_"[16] Laat julle lig só skyn voor die mense, dat hulle julle goeie werke kan sien en julle Vader wat in die hemele is, verheerlik."_

*Psalms 27:1*
Afrikaans 1933/53
_"[1] 'n PSALM van Dawid. Die Here is my lig en my heil: vir wie sou ek vrees? Die Here is die toevlug van my lewe: vir wie sou ek vervaard wees?"_

Ons lig word sterker wanneer ons kies om op God te vertrou en Sy liefde uit te straal, selfs al voel ons swak of oorweldig.

Die storms van die lewe is onvoorspelbaar, maar die lig van God ín ons is konstant.
Net soos ’n ligtoring stewig op die rots staan, kan ons geloof ons onwrikbaar maak. Mag ons lig skyn in die donkerste tye en ander help om die pad na God se genade en liefde te vind.

Abba Vader,
Dankie dat U ons rots en ons lig is in die storms van die lewe. Gee ons die moed om onwrikbaar te staan, selfs wanneer die golwe dreig om ons te oorweldig. Help ons om ons lig te laat skyn – nie net vir onsself nie, maar vir diegene wat hoop en leiding nodig het.
Here, ons gee U al ons vrese, pyn en onsekerheid. Help ons om aan U vas te hou en ander na U te lei deur die manier waarop ons leef. Mag ons altyd ’n refleksie wees van U genade en liefde.
In Jesus se Naam bid ons dit.
Amen.

Selfs in die donkerste storm, laat jou lig die weg na God wys.

Blessings!🌻

03/02/2025

3 Februarie 2025
Maandag
Dag 110

*Gelyk, Glad en Gematig... Maar Wat As Die Pad Skielik Rof Word?*

Dit gaan nie oor die pad nie, maar oor jou Anker...

*Nahum 1:7*
Afrikaans 1933/53
_"[7] Die Here is goed, 'n toevlug in die dag van benoudheid, en Hy ken die wat by Hom skuil."_

Mense droom van gladde paaie en maklike tye.
Maar kom ons wees eerlik: die lewe is meer soos ‘n _4x4 challenge,_ vol skerp draaie, sinkgate, en opdraandes.

Esmé het pas ‘n werk gekry waarvoor sy gebid het, maar die vreugde was kortstondig. Die projekte het hopeloos geraak, haar baas was onredelik, en sy het begin twyfel of dit regtig van God was.

Tog het sy vasgehou aan ‘n eenvoudige beginsel: God is nie net God van die stil water nie; Hy is ook God van die warrelwinde. Esmé het by Job aangesluit...

*Job 23:10*
Afrikaans 1933/53
_"[10] Want Hy weet hoe my wandel is; as Hy my toets, sal ek soos goud te voorskyn kom."_

Ons wil graag hê die lewe moet eenvoudig wees, maar uitdagings is deel van die reis.
Die waarheid is: ‘n gelyke, gladde pad maak ons lui. Ons groei wanneer die pad rof raak, wanneer ons moet vasklou aan God, en wanneer ons Hom régtig leer ken deur ervaring – nie net teorie nie. Wanneer lewe gebeur, dis daar waar ons karakters vorm in Hom.

Jesus het dit duidelik gemaak: “In die wêreld sal julle verdrukking hê; maar hou goeie moed, Ek het die wêreld oorwin.” (Johannes 16:33).

Die vraag is nie of die pad gelyk of glad is nie, maar hóé ons die reis aanpak.
Hoe gouer ons leer om aan God te vasklou in elke seisoen, hoe meer sal ons sien hoe Hy werk – selfs in die chaos.

In gelyke tye...
Moenie gemaklik raak nie. Gebruik hierdie seisoen om te leer en geestelik sterker te word. Dít is wanneer jy jou toerusting moet slyp vir moeiliker tye. Spreuke 6:6-8 herinner ons om soos die mier vooruit te beplan.

In gladde tye... Geniet die oomblikke, maar vergeet nóóit waar jou hulp vandaan kom nie. Maak seker dat jou dankbaarheid jou nader aan God bring.

*1 Thessalonicense 5:18*
Afrikaans 1933/53
_"[18] Wees in alles dankbaar, want dit is die wil van God in Christus Jesus oor julle."_

In moeilike uitdagende tye: Laat jou vertroue in God jou leiding wees.

*Psalms 46:11*
Afrikaans 1933/53
_"[11] Laat staan en weet dat Ek God is; Ek sal hoog wees onder die nasies, hoog op die aarde."_

In elke seisoen: Fokus op die ewige. Al is jou pad gelyk of rof, God werk aan jou karakter vir ‘n groter doel.

*Romeine 5:3-4*
Afrikaans 1933/53
_"[3] En nie alleen dit nie, maar ons roem ook in die verdrukkinge, omdat ons weet dat die verdrukking lydsaamheid werk [4] en die lydsaamheid beproefdheid en die beproefdheid hoop;..."_

Die lewe is nie ‘n motorreis waar ons die perfekte GPS het nie. Dit is ‘n wildernisreis met ‘n hemelse Gids. In plaas daarvan om te bid vir ‘n maklike pad, bid vir wysheid, moed en volharding.
Vertrou op God se karakter – nie op jou omstandighede nie.

Here,
Help ons om U stem te hoor, maak nie saak hoe die pad lyk nie. As ons in tye van vrede en voorspoed verkeer, herinner ons aan U goedheid. As ons deur storms gaan, wees ons anker. U Woord sê dat U nooit ons voete sal laat wankel nie. Hou ons sterk en fokus ons oë op die ewige doel, eerder as die tydelike hindernisse. Dankie dat ons kan weet: U gee nie net die pad nie, U gee ook die krag om dit te stap.
In Jesus se Naam. Amen.

God verseker nie ‘n gladde reis nie, maar Hy waarborg jou bestemming.

Blessings!🌻

Ek het hierdie van 'n ander blad geleen, en ek deel dit graag want ek glo baie van ons kan daarmee vereenselwig. ❤ ...
01/02/2025

Ek het hierdie van 'n ander blad geleen, en ek deel dit graag want ek glo baie van ons kan daarmee vereenselwig. ❤ *Amen en koebaai..._*

Ek weet nie van jou nie, maar ek het twee soorte bid in my lewe:

♡ die een is sommer die gewone praat met God, geliefdes voor Sy voete lê, Hom aanbid vir Sy liefde en sorg, en dan opstaan en die dag voluit aanpak...

♡ En dan is daar die amen en koebaai bid.

♡ Daardie oggende wat jou bid nie woorde wil kry nie, en sommer net rou emosie is:
☆ verlange wat te veel word,
☆ vrees vir dinge wat wag,
☆ hartseer oor dinge wat gebeur het.

♡ En as mens so voor die Here 'voel', wil mens nie amen sê nie ... want amen voel partydae soos koebaai, so al asof jy en God julle eie koers gaan inslaan, tot die volgende gebed natuurlik.

♡ Op sulke dae klou jy wanhopig aan die Here vas, weet jy met kinderlike geloof dat die Here jou nie mag los nie. Nie op daardie oomblik nie. Nooit nie.

♡ Iemand het eendag gesê dat mens soms moet bid, en ander kere net moet toelaat dat die Here jou liefhê...

♡ Op amen en koebaai dae, mag jy maar net stil by Hom sit en Hom vra om vir jou lief te wees.

♡ Op amen en koebaai dae, mag jy jou oë toemaak en in jou gedagtes voel hoe die Here jou styf vashou.

♡ Op amen en koebaai dae mag jy maar jou kop teen Sy bors laat sak, en jou huile huil.

♡ Op amen en koebaai dae maak dit nie saak of jy amen sê nie ... want die Een wat jou naam in Sy handpalm geskryf het, het gesê: "Moenie bang wees nie (nie vir die hartseer van verlang na 'n geliefde nie en die uitdagings wat voorlê nie)."

❤ *_"Want Ek is by jou ... Altyd"_*
Skrywer onbekend

31/01/2025

31 Januarie 2025
Vrydag
Dag 107

*Agtervolg deur Genade*

’n Paar weke gelede stap ek by die Mall in.
Alles voel normaal, totdat ek agterkom daar is twee oukies wat my volg...
Ek maak ’n vinnige draai by ’n winkel om seker te maak ek verbeel my nie – en ja, daar is hulle weer.
Nóú’s ek op my hoede...
Ek probeer hulle afskud deur nóg ’n draai in ’n ander winkel te maak, maar hulle hou my dop soos valke.

Met my adrenalien wat pomp, besluit ek om regtig slim te wees. Ek drafstap na buite en soek skuiling agter ’n pilaar in die parkade. Met my skokstok in die hand wag ek dat hulle nader kom. Toe ek hulle uiteindelik in die oë kyk, vra ek woedend: “Hoekom volg julle my?”

En toe... sien ek hul name.

Goedheid en Guns.

*Psalm 23:6*
Afrikaans 1933/53
_"[6] Net goedheid en guns sal my volg al die dae van my lewe; en ek sal in die huis van die Here bly in lengte van dae."_

Hoe wonderlik is dit nie om te weet dat God se Goedheid en Guns ons elke dag agtervolg!
Soos ’n getroue skadu bly hulle by ons, maak nie saak waar ons gaan nie.

Goedheid is nie net ’n mooi woord nie – dis ’n aktiewe, oorweldigende liefde wat ons vul en motiveer om ander mense ook te dien.
Guns is daardie onverdiende genade wat ons telkens weer laat besef: God is vír ons, selfs al het ons dit nie verdien nie.

In Galásiërs 5:22-23 lees ons hoe goedheid deel is van die vrug van die Gees. Dit gaan oor vriendelikheid, geduld en die vermoë om ander se laste te dra.
Guns, soos Efésiërs 2:8 dit beskryf, is ’n geskenk van God – Sy liefde wat oor ons spoel soos golwe in die see.

D**k net: Goedheid en Guns maak elke dag ’n pad oop voor jou. Hulle beskerm jou, troos jou en herinner jou aan God se onfeilbare liefde.

Maar hulle is ook daar om uitgedeel te word...
Hoeveel mense kruis ons pad wat dors is na genade, of wat honger is vir vriendelikheid?
Ons kan Goedheid en Guns wees vir ander, deur klein gebare, woorde van aanmoediging, of net om teenwoordig te wees in iemand se swaarkry.

My uitdaging aan jou vandag:
Wees Goedheid en Guns vir iemand. Laat jou dade spreek van genade en jou woorde ’n bron van lewe wees.
Die wêreld kort dit – en jy hét dit om te gee!

Abba Vader, dankie dat U Goedheid en Guns ons elke dag agtervolg. Dankie dat ons nooit sonder U liefde en genade hoef te wees nie. Help ons om hierdie seëninge te deel met die mense om ons. Maak ons hande vrygewig, ons woorde sag en ons dade vol liefde. Ons vra dit in Jesus se naam.
Amen.

Laat Goedheid en Guns jou agtervolg – en wees iemand anders se tweekies!

Blessings!🌻

Address

Klerksdorp

Website

Alerts

Be the first to know and let us send you an email when vriende wat omgee posts news and promotions. Your email address will not be used for any other purpose, and you can unsubscribe at any time.

Shortcuts

Share

Category