الاستشاري النفسي عمرو المهدي

13/09/2026

نظام يومي مقترح مع عوده المدارس من جديد 👌

13/09/2026

🎒 نظام يومي مقترح للأطفال مع عودة المدارس

🌅 الصبح

⏰ الاستيقاظ في موعد ثابت يوميًا قدر الإمكان.

🛏️ ترتيب السرير وفتح الشباك وتهوية الغرفة.

🚿 غسل الوجه والأسنان وارتداء ملابس المدرسة.

🥪 فطار مناسب وهادئ، من غير استعجال أو خناقات.

❤️ كلمة تشجيع قبل الخروج:
"يومك جميل.. ولو قابلتك أي مشكلة، احكيلي."

🏫 أثناء المدرسة

الاهتمام بالتركيز والمشاركة، مش إن الطفل يكون مثالي طول الوقت.

تشجيعه إنه يطلب المساعدة لو مش فاهم أو مضايق.

عدم تخويفه من المدرس أو الامتحان.

🏠 بعد الرجوع

🍽️ غداء وراحة من 30–60 دقيقة.

❌ بلاش أول جملة تكون: "هات كراسة الواجب!"

اسأله الأول:
"يومك كان عامل إيه؟"
"في حاجة ضايقتك؟"

📚 وقت المذاكرة

تحديد وقت ثابت للمذاكرة قدر الإمكان.

تقسيم المذاكرة إلى فترات قصيرة يتخللها راحة.

الموبايل والألعاب بعيدين وقت المذاكرة.

مساعدة الطفل عند الحاجة، لكن من غير ما نعمل الواجب مكانه.

التركيز على المجهود والتقدم، وليس المقارنة بزملائه.

⚽ وقت اللعب

الطفل محتاج لعب وحركة ووقت حر يوميًا.

اللعب مش تضييع وقت؛ هو جزء مهم من تنظيم الانفعالات وتقليل الضغط.

👨‍👩‍👦 وقت الأسرة خصصوا يوميًا حتى لو 15–20 دقيقة للكلام مع الطفل بدون موبايلات أو أوامر أو مذاكرة.

اسألوه:

إيه أحسن حاجة حصلت النهارده؟

إيه الحاجة اللي ضايقتك؟

محتاج مني مساعدة في إيه؟

🌙 قبل النوم

تقليل الشاشات قبل النوم.

تجهيز شنطة وملابس اليوم التالي.

روتين هادئ وثابت.

النوم في موعد مناسب يسمح له بعدد ساعات نوم كافٍ لعمره.

والأهم من كل الجدول ❤️

متخليش البيت يبقى امتداد للمدرسة.

الطفل محتاج يعرف إن: المدرسة مكان للتعلم، والبيت مكان للأمان والاحتواء.

ولو لاحظ الأب أو الأم بشكل مستمر تغيرًا واضحًا في النوم أو الشهية، قلقًا شديدًا، رفضًا متكررًا للمدرسة، انعزالًا، عصبية غير معتادة أو تراجعًا ملحوظًا في الأداء، فالأفضل ما نفسرش ده على إنه "دلع أو كسل"، لكن نحاول نفهم السبب النفسي وراء السلوك.

عودة مدارس موفقة… وسنة دراسية هادئة نفسيًا قبل ما تكون ناجحة دراسيًا. 🌱🎒

13/09/2026

رجوع المدارس مش معناه إننا نرجّع الولاد للمذاكرة وبس… إحنا كمان بنرجّعهم لضغط ومسؤوليات وروتين جديد.
ومع بداية السنة الدراسية، خلينا ناخد بالنا من حاجة مهمة جدًا:
نفسية ابنك.
في أطفال بتكون فرحانة إنها هترجع المدرسة، وفي أطفال تانية ممكن تكون جواها مشاعر مختلفة تمامًا… قلق، خوف، توتر، أو حتى رفض لفكرة الرجوع.
والطفل مش دايمًا هييجي يقولك:
"أنا قلقان."
ممكن القلق يظهر في شكل عصبية، زن، بكاء، قلة نوم، وجع بطن أو صداع، تشتت، فقدان تركيز، أو إنه يبدأ يتهرب من المدرسة والمذاكرة.
وهنا دور الأب والأم مش إنهم يزودوا الضغط.
يعني بدل ما أول سؤال يكون:
"ذاكرت؟ هتجيب كام؟ إنت ليه مش زي فلان؟"
جرب تسأله:

"إيه أكتر حاجة مقلقاك من السنة دي؟"
"في حاجة حصلت قبل كده ومش عايز تتكرر؟"
"تحب أساعدك إزاي؟"
الفرق كبير جدًا بين طفل بيذاكر لأنه خايف من العقاب، وطفل بيذاكر لأنه حاسس بالأمان وعنده دافع ينجح.
ومتفتكرش إن كل طفل بيرفض المذاكرة يبقى كسول، أو كل طفل درجاته نزلت يبقى مهمل.
أحيانًا السلوك اللي شايفينه مشكلة بيكون وراه مشكلة نفسية محتاجة نفهمها الأول.
وفي نفس الوقت، الاحتواء مش معناه إننا نلغي القواعد.
الطفل محتاج حب + حدود + روتين واضح + تشجيع.
نظبط النوم تدريجيًا، ننظم وقت المذاكرة والراحة، نقلل المقارنة، ونسيب مساحة للعب والكلام… لأن الراحة النفسية مش عكس النجاح الدراسي، دي جزء من النجاح.
وأهم رسالة ممكن توصل لابنك مع بداية السنة:
"أنا عايزك تنجح، آه… بس مش على حساب نفسيتك."
"غلطك مش معناه إنك فاشل."
"درجتك مش هي اللي بتحدد قيمتك."
"ولو قابلتك مشكلة… تعالى احكيلي، مش تخاف مني."
لأننا مش بنربي أطفال عشان يجيبوا درجات وبس…
إحنا بنربي إنسان هيكبر، وهيواجه ضغط وفشل ونجاح وقرارات وحياة كاملة.
فخلّوا عودة المدارس بداية سنة دراسية جديدة…
وبداية اهتمام حقيقي بنفسية أولادنا كمان. ❤️
عمرو عادل المهدي
استشاري الصحة النفسية واضطرابات السلوك

19/08/2026

تخيل إن قدامك كرسي فاضي…
مش مجرد كرسي، لكنه مساحة تقدر فيها تتكلم عن حاجات يمكن عمرك ما عرفت تقولها.

مش كل اللي بيلجأ للعلاج النفسي بيكون ضعيف… أحيانًا بيكون شخص تعب من كتر ما شال، وتأذى من علاقة، أو اتأثر بتجربة لسه سايبة أثر جواه.

العلاج مش بس إننا نحكي اللي حصل…
لكن إننا نفهمه، نفهم تأثيره علينا، ونعرف إزاي نكمل من غير ما يفضل الماضي هو اللي بيسوق حياتنا.

يمكن إنت ماخترتش اللي حصل لك…
لكن تقدر تختار إزاي تتعامل معاه من هنا.

وأحيانًا بداية التعافي بتكون في سؤال بسيط:

"أنا محتاج أعمل إيه علشان أعيش بشكل مختلف؟"

وساعتها… مش بتفضل مجرد شخص بيحاول يتجاوز اللي أذاه،
لكن بتبدأ تبني حياة جديدة بإيدك.

الاستشاري النفسي عمرو المهدي
استشاري صحة نفسية واضطرابات سلوكية،.

12/08/2026

🚨 بتقارني ابنك بأخوه… وبتستغربي إنه بيغير منه؟ 😔

إنتِ ممكن تقولي:
"بص أخوك عامل إزاي!" 👀
وتفتكري إن المقارنة هتخليه يتحسن…

لكن أحيانًا الرسالة اللي بتوصل له بتكون:
"إنت مش كفاية." 💔

كل مرة تقارنيه بأخوه، ممكن يبدأ يشوف أخوه كمنافس على حبك واهتمامك، ويحس إن قيمته مرتبطة بإنه يبقى شبهه.

❌ "بص أخوك أشطر منك."

جربي بدلها:

✅ "أنا عارفة إنك تقدر تعمل أحسن من كده."

قارني ابنك بنفسه… مش بأخوه.

شوفي كان فين وبقى فين.
👏 ركزي على تقدمه، حتى لو كان بسيط.

❤️ لأن دورك مش إنك تخليه نسخة من أخوه…

دورك تساعديه يبقى أفضل نسخة من نفسه.

ومن وجهة نظري كاستشاري نفسي، المقارنة المستمرة بين الإخوات ممكن تخلق مشاعر من الغيرة والمنافسة، وتؤثر مع الوقت على الثقة بالنفس وصورة الطفل عن ذاته وعن علاقته بأخوه.

لكن التشجيع، والاعتراف بالمجهود، ووضع توقعات واقعية… بيساعدوا الطفل يبني إحساس صحي بقيمته.

الخلاصة:
👈 المقارنة ممكن تخلي الإخوات يتنافسوا على حبك…
لكن التشجيع يخلي كل واحد فيهم يتنافس مع نفسه ويكبر بطريقته.

12/08/2026

الطفل بيتعلم الأمان من العلاقة… مش من الكلام.

الطفل اللي بيعيش وسط صراخ مستمر، عصبية، وتقلبات في ردود أفعال الكبار، ممكن يبدأ مع الوقت في مراقبة الجو حواليه بدل ما يعيش طفولته بشكل طبيعي.

يبدأ يسأل نفسه:
"ماما متضايقة؟"
"بابا زعلان؟"
"هو أنا عملت حاجة غلط؟"

ومع تكرار ده، ممكن يظهر عنده فرط اليقظة Hypervigilance؛ يعني يفضل منتبه لأي تغيير في نبرة الصوت أو تعبيرات الوجه، لأنه اتعلم إن التغيير البسيط ممكن يسبق حاجة تخوفه.

وده مش معناه إن الأب أو الأم ممنوع يغضبوا… الغضب جزء طبيعي من الحياة والتربية.

المشكلة لما يبقى الخوف وعدم التوقع هو المناخ الدائم داخل البيت.

الطفل محتاج يعرف إن:
ممكن تغضب منه… لكن مش هتهدده.
ممكن تصحح له… لكن مش هتهينه.
ممكن تحط حدود… لكن من غير ما تخليه يخاف منك.
وممكن يحصل خلاف… من غير ما يحس إن الحب والأمان انتهوا.

لأن الطفل في سنواته الأولى بيتعلم يهدّي نفسه من خلال الشخص اللي قدامه.

قبل ما الطفل يتعلم ينظم مشاعره بنفسه، هو بيتعلم التنظيم من خلال علاقة آمنة ومستقرة.

وعشان كده التربية مش بس أكل وتعليم وقواعد…
التربية كمان إنك تعلم ابنك، من خلال تصرفاتك، إن العالم مش مكان لازم يفضل فيه متوتر ومستعد للخطر.

الطفل مش محتاج أب وأم ما بيغضبوش…
هو محتاج أب وأم يعرفوا يختلفوا ويغضبوا، من غير ما يحوّلوا البيت لمصدر خوف.

11/05/2026

❤️❤️

03/05/2026

🙂

الصفحة الرسمية د.عمرو المهدي استشاري الصحة النفسية والعلاقات الأسرية مذيع للبرنامج الاجتماعي #مشاعر

12/04/2026

لو كل بنت أو راجل صدّقوا كلام حد، واتعلقوا بوعوده، وسلموا قلبهم ليه، وفي الآخر اكتشفوا إنه كان بيتسلى… وقرروا ينهوا حياتهم، كان زمان مفيش حد فينا باقي.

بس الحقيقة إننا أقوى من كده…

إوعى تربط قيمتك بأي شخص،
ولا تخلي حد هو مصدر سعادتك الوحيد.
اللي بيروح… كان لازم يروح،
واللي بيكسر… بيكشف لك حقيقته مش أكتر.

بص لنفسك، لحياتك، لأهلك، لشغلك، لمستقبلك…
فيه حياة كاملة مستنياك، مش واقفة على حد.

عوض ربنا مش شخص…
عوض ربنا راحة بعد وجع، قوة بعد ضعف، وبدايات أنضف وأصدق.

ولو اتخدعت؟
ازعل… طبيعي.
بس متغرقش نفسك في الوجع.
يومين كفاية، والتالت ارجع لنفسك أقوى، وكأنك بتبدأ من جديد

03/02/2026

الصورة دي لمخّين:
واحد طبيعي، وواحد عنده اكتئاب.

بص كويس…
ملاحظ النور والحركة في المخ اللي على اليمين؟
وملاحظ إزاي المخ اللي على الشمال كأنه مطفي؟

الاكتئاب مش فكرة، ومش دلع، ومش ضعف.
الاكتئاب بيأثر على المخ فعلًا.

عارف لما حد يقولك:
«حاسس إني انطفيت»؟
هو مش بيبالغ…
مخه فعلًا انطفي.

الشخص المكتئب مش شخص بيشتكي وخلاص،
ولا واحد “مكّبر الموضوع”.

في فرق حقيقي، فسيولوجي وعصبي،
بين مخ إنسان طبيعي
ومخ إنسان عنده اكتئاب.

والتقيلة بقى…
الاكتئاب مش هو الحزن اللي بييجي بعد صدمة
ولا وجع الفراق
ولا الفشل
ولا الخسارة.

الحاجات دي طبيعية أي إنسان يتأثر بيها.

الغريب إن أعراض الاكتئاب
هي نفسها مشاعر بتمر علينا كلنا،
بس الفرق في المدة والشدة.

يعني إيه؟
يعني لو المشاعر دي مكملة أكتر من أسبوعين،
وبتسوء،
وبتعطّل حياتك…
ساعتها ده اكتئاب.

أعراضه ناس كتير عاشتها في وقت ما من حياتها:
• حزن من غير سبب
• إحساس بالذنب وتأنيب النفس على كل حاجة
• فقدان المتعة في أي حاجة كانت بتفرحك
• مفيش طاقة تعمل أي حاجة
• أكل زيادة أو فقدان شهية
• نوم كتير قوي أو أرق مستمر

الشخص اللي بينام طول الوقت
ممكن يكون بينام عشان يهرب من واقع مش قادر يستحمله.

واللي بيأكل بشراهة
أو اللي مش قادر يحط لقمة في بقه
ممكن يكون مكتئب.

النقص أو الزيادة الكبيرة في الوزن
ممكن تكون عرض من أعراض الاكتئاب.

وفي ناس…
بتفكر في الموت كتير
أو بتتمنى يحصلها أي حاجة
المهم تهرب من الحياة دي.

دول مش ناس “بتدلع”.
دول ناس تعبانة بجد.

أغلبهم بيلوم نفسه طول الوقت
على حاجات هو مالوش ذنب فيها أصلًا.

وأقسى حاجة ممكن تتقال لشخص مكتئب:
«ده عشان بعيد عن ربنا»
أو
«لو قربت من ربنا هتبقى كويس».

الكلام ده بيجرح
وبيكسر
وبيزوّد إحساس الذنب اللي هو غرقان فيه أصلًا.

الفرق بين إنسان طبيعي مر بظروف صعبة
وإنسان مريض اكتئاب
إن الطبيعي حياته بتكمّل
حتى لو بتوجع.

لكن مريض الاكتئاب…
حياته واقفة.

مش قادر يشتغل
ولا يذاكر
ولا يقعد مع أهله
ولا يخرج مع صحابه.

كل حاجة بقت بطعم واحد…
طعم ماسخ
لا ليه لون
ولا ريحة
ولا معنى.

حتى الأكل
مش داخل النفس
بس بياكل عشان يعيش
مع إنه مش حاسس إنه عايش.

التفكير في الانتحار موجود
بس في خوف من ربنا
وخوف يخسر آخرته
بعد ما حاسس إنه خسر دنياه.

عشان كده
لو تعرف حد مكتئب
أو حاسس إنك مكتئب…

قبل أي نصيحة
وقبل أي حكم
ودّه لطبيب أو أخصائي نفسي.

الاكتئاب مرض
مش هزار
ولا تريقة
ولا ضعف شخصية.

ولو مش هتعرف تساعد
بلاش تزود وجعه بكلمتين.

ولو مش قادر تمد إيدك
بلاش تكرهه في المساعدة
وفي الحياة.

مريض الاكتئاب محتاج:
علاج
وأدوية
وجلسات نفسية.

مش محتاج شيخ
ولا بخور
ولا “غير جو”
ولا “كُل فراخ”.

الاكتئاب بيتعالج
والاكتئاب بيخف
وفيه أمل…

أمل حقيقي
إن الإنسان يرجع يعيش
ويرجع يحس
ويرجع ينور من تاني.

الاستشاري النفسي
عمرو المهدي