07/01/2026
مرة أم قالتلي:
« بنتي ما بتسمعني… بحكي معها وما بتطلع فيني ولا بتكون معطتني اهتمامها».
سألتها سؤال بسيط:
«لما بنتك تحكيلك شي مهم، شو بتكوني عم تعملي بالعادة؟ وكيف بتكون ردة فعلك؟»
قالتلي:
«بكون عم اغسل الصحون، أو عم اشتغل شغل البيت».
هون وضح السبب ببساطة وعرفت الجذر لسلوك البنت.
مو لأن الأم غلطانة،
ولا لأن البنت سيئة،
بس لأنه العلاقة عم تتشكل بينهن بدون أساس قوي للتفاهم والحوار والاهتمام.
الطفل بيتعلم كيف يسمع أهله… من الطريقة اللي بيسمعوه فيها.
إذا حكيه بيجي بوقت تكون إيديك مشغولة وعيونك بعيدة وبالك مش معه، هو رح يعمل نفس الشي معك!.
ووقتها لا تستغرب ليش ما بيركّز معك، وليش ما بيطلع فيك، وليش “ما بيسمعك”.
أحيانًا الحل مو إعادة الكلام اللي عم يحكيه، ولا رفع حدة الصوت، ولا إنك تقول له: «ركز معي».
أحيانًا الحل إنك توقف اللي بإيديك دقيقة، وتطلع فيه، وتسمعه فعلًا!.
برأيك…
لما طفلك يحكيك اليوم،
بتحس إنك عم تسمعه فعلًا؟!
🙏🏽💜
#الابناء #الطفل #الأطفال
