29/08/2026
بسم الله الرحمن الرحیم
📢د لسګونه تنه محصلینو څخه د ۱۴۰۵ کال د خزاني سمستر د کانکور ازموینه واخیستل شوه
نن شنبه، د ۱۴۰۵ کال د سنبلې ۷مه، د غازي امان الله خان د روغتیایي علومو انسټیټیوټ د ۱۴۰۵ کال د خزاني سمستر د نوي جذب کانکور ازموینه، د یو شمېر درنو علمي او اداري مسؤلینو په حضور کې، په منظم، شفاف او باوري ډول ترسره او په بریالیتوب سره پای ته ورسېده.
د ازموینې د مراسمو پیل د قرآن کریم د مبارکو آیتونو په تلاوت وشو. ورپسې محترم مفتي صاحب ګډونوالو ته د ښه راغلاست او پرانیستې خبرې وکړې او د ازموینې د اهمیت په اړه یې څرګندونې وکړې.
وروسته انجینر شفیق رفیقي د ازموینې د تخنیکي بهیر او اړوندو اجراآتو په اړه ګډونوالو ته لازم معلومات وړاندې کړل. د دې لپاره چې د ازموینې پروسه په بشپړ شفافیت ترسره شي، د سوالونو مهرلاک صندوق د راغلي محترم پلاوي، د انسټیټیوټ د رئیس او ګډونوالو په حضور کې پرانیستل شو او له هغې وروسته د کانکور ازموینه په رسمي ډول پیل شوه.
ازموینه د ټاکل شوي پلان له مخې په منظم ډول ترسره او په بریالیتوب سره پای ته ورسېده.
په دې علمي او ارزښتناکه پروسه کې له کابل څخه راغلي محترم پلاوي، د ننګرهار د روغتیایي علومو انسټیټیوټ له محترم پلاوي، د غازي امان الله خان د روغتیایي علومو انسټیټیوټ له رئیس، اداري پرسونل او قدرمنو استادانو څخه د ګډون، همکارۍ او هڅو له امله ځانګړې مننه کوو.
همدارنګه له ټولو هغو قدرمنو ځوانانو او کاندیدانو څخه چې زموږ پر علمي بنسټ یې باور وکړ، نوملېکنه یې وکړه او په ازموینه کې یې ګډون وکړ، د زړه له کومې مننه کوو.
ستاسو باور زموږ مسؤلیت لا دروندوي؛ د بریا په هیله!
غازي امان الله خان د روغتیایي علومو انسټیټیوټ
زمونږ ژمنتیا د غوره او باکیفیته زده کړو لپاره ده.
