29/08/2026
د ۱۴۰۵ کال خزانۍ سمستر د کانکور ازموینه ترسره شوه
د ۱۴۰۵ کال خزانۍ سمستر لپاره د کانکور ازموینه د سنبلې میاشتې په ۷ مه نېټه، د شنبې په ورځ، د امام غزالي روغتیایي علومو انسټیټوټ په انګړ کې د سلګونو دولسم ټولګي فارغو زدهکوونکو په ګډون ترسره شوه.
د ازموینې د پرانیستې مراسم د قاري صاحب مزار محمدي له لوري د قرآن کریم د څو مبارکو آیتونو په تلاوت سره پیل شول. په دې مراسمو کې د عامې روغتیا وزارت د خصوصي سکتور قدرمن پلاوي مدیر، ښاغلي سهراب شفایي، د ننګرهار روغتیایي علومو انسټیټوټ څخه راغلي پلاوي، ډاکټر عبدالرحمن صافي، د امام غزالي روغتیایي علومو انسټیټوټ رئیس، څارنوال نذیر احمد «دراني»، علمي او تدریسي مرستیال، دوکتور سمندر شریفي، اداري کارکوونکو، درنو استادانو او ګڼ شمېر ګډونوالو حضور درلود.
د مراسمو په پیل کې د انسټیټوټ رئیس، څارنوال نذیر احمد «دراني»، ګډونوالو ته د ښه راغلاست ترڅنګ خپله پرانیستونکې وینا وړاندې کړه او د کانکور ګډونوالو ته یې د بریالیتوب هیله وکړه.
ورپسې د عامې روغتیا وزارت له لوري راغلو مسؤولینو د ازموینې ګډونوالو ته د کانکور ازموینې د بهیر په اړه هر اړخیزې خبرې وکړې. هغوی د روغتیايي خدمتونو په برخه کې د ځوانانو ونډه مهمه او اړینه وبلله او ګډونوالو ته یې د یوې شفافې، عادلانه او باوري ازموینې د ترسره کېدو ډاډ ورکړ.
وروسته د کانکور ازموینې پوښتنپاڼې په منظم ډول ګډونوالو ته ووېشل شوې او ازموینه په ټاکلي نظم او شفافیت سره ترسره شوه.
د ازموینې بهیر په پای کې مراسم د دعا په ویلو سره پای ته ورسېدل.
معیاري زدهکړې، د مسلکي توب ضامن!
پته: جلالآباد ښار، درېیمه ناحیه، د تجربوي عالي لېسې ترڅنګ.
د اړیکو شمېرې: 0731515450 – 0731515440 - 0777317775
په درنښت،
د نشراتو مدیریت
