وزیر محمد اکبرخان ملي اوتخصصی روغتون شفاخانه ملی وتخصصی وزیر محمداکبرخان

30/07/2026

د وزیر محمد اکبرخان روغتون رئیس، ښاغلي عنایت الله عنایت، له ملي راډیو سره ځانګړې مرکه کړې ده.

د مرکې بشپړ ویډیو د لاندې یوټیوب لینک له لارې وګورئ او له مهمو معلوماتو څخه ځان خبر کړئ.

RTA Afghanistan is the state-owned television channel in Afghanista...

29/07/2026

د وزیر محمد اکبرخان تخصصي او ثالثي روغتون د وروستۍ مدیریتي غونډې د پرېکړې له مخې، د ناروغانو او مراجعینو د شکایتونو، وړاندیزونو او سالمو نیوکو د اورېدو په موخه، د سمع شکایتونو د مسئول د اړیکې شمېره له تاسو سره شریکوو.

درنو هېوادوالو!
که د روغتیايي خدمتونو د وړاندې کېدو په بهیر کې له هر ډول ستونزې، نیمګړتیا یا ناسم چلند سره مخ کېږئ، کولای شئ خپل شکایت، وړاندیز یا سالمه نیوکه د لاندې شمېرې له لارې له موږ سره شریکه کړئ. ستاسو هره نیوکه او شکایت په بشپړ محرمیت، جديت او مسئولیت سره ارزول کېږي او د اصولو له مخې به ورته لازم اجراآت ترسره شي.

د سمع شکایتونو د مسئول د اړیکې شمېره:
0706976898

ستاسو سالمې نیوکې او رغنده وړاندیزونه زموږ د خدمتونو د لا ښه والي لامل ګرځي.

26/07/2026

نن د ۱۴۰۵ کال د زمري په ۴مه نېټه، د وزیر محمد اکبر خان تخصصي او ثالثي روغتون کې د ۳۰۰ زره امریکایي ډالرو په ارزښت د ۲۰۰ کیلوواټه لمریزې برېښنا سیستم د ځانګړو مراسمو په ترڅ کې ګټې اخیستنې ته وسپارل شو.

په دې مراسمو کې د عامې روغتیا وزارت د روغتیايي خدمتونو وړاندې کولو معین مولوي عبدالولي حقاني، د اروپایي ټولنې استازې، په افغانستان کې د ملګرو ملتونو پراختیايي پروګرام (UNDP) استازو، د وزیر محمد اکبر خان ملي او تخصصي روغتون رئیس ډاکټر عنایت الله عنایت،روغتیايي کارکوونکو او یو شمېر نورو مسؤلینو ګډون کړی و.

د وزیر محمد اکبر خان تخصصي او ثالثي روغتون رئیس، ډاکټر عنایت الله عنایت، د یادو مراسمو پر مهال وویل چې برېښنا د روغتیايي مرکزونو لپاره یوه اساسي او حیاتي اړتیا ده. نوموړي زیاته کړه چې د لمریزې برېښنا دغه سیستم به د روغتون د روغتیايي خدمتونو د لا ښه وړاندې کولو، د برېښنا د دوام په تأمین او د لګښتونو په کمېدو کې مهم رول ولوبوي.
ډاکټر عنایت الله عنایت د عامې روغتیا وزارت او UNDP موسسې له دوامداره همکاریو او ملاتړ څخه مننه وکړه او ویې ویل چې د روغتون اداره به د دغه سیستم د ساتنې او اغېزمنې ګټې اخیستنې لپاره لازم اقدامات ترسره کوي.

د عامې روغتیا وزارت د روغتیايي خدمتونو وړاندې کولو معین مولوي عبدالولي حقاني وویل، چې دغه پروژه د عامې روغتیا وزارت او UNDP موسسې د ګډو همکاریو پایله ده. نوموړي څرګنده کړه چې روغتونونه دوامدارې او باکیفیته برېښنا ته اړتیا لري او د ۲۰۰ کیلوواټه لمریزې برېښنا سیستم به د روغتون د انرژۍ اړتیاوو په پوره کولو او د برېښنا په لګښتونو کې د پام وړ کمښت رامنځته کولو کې مرسته وکړي.

د روغتیايي خدمتونو وړاندې کولو مرستیال ټینګار وکړ چې د افغانستان ا.اژمن دی څو د هېواد روغتیايي مرکزونه په معیاري تجهیزاتو سمبال کړي. هغه د مرستندویه ادارو له همکاریو مننه وکړه او د روغتون له ادارې یې وغوښتل چې د دغه سیستم ساتنه او پالنه په ښه ډول ترسره کړي.

د UNDP استازو هم په خپلو خبرو کې د لمریزې انرژۍ پر ارزښت ټینګار وکړ او ژمنه یې څرګنده کړه چې د روغتیايي مرکزونو د ملاتړ او پراختیا په برخه کې به خپلو همکاریو ته دوام ورکړي.

د یادونې وړ ده چې یاده پروژه د درېو میاشتو په موده کې بشپړه او ګټې اخیستنې ته وسپارل شوه.

23/07/2026

د وزیر محمد اکبرخان تخصصي او ثالثي روغتون رئیس د درې میاشتنیو ښو لاسته راوړنو په بدل کې وستایل شو
کابل – د وزیراکبرخان روغتون
د عامې روغتیا وزارت له لوري د وزیر محمد اکبرخان تخصصي او ثالثي روغتون رئیس ښاغلي ډاکټر عنایت الله عنایت د اغېزمن مدیریت، غوره رهبرۍ، نه ستړې کېدونکو هڅو، صادقانه خدمتونو، د روغتیايي خدمتونو د کیفیت د لوړولو، د روغتون د اداري او تخنیکي چارو د سمون، د روغتیايي تجهیزاتو او زیربناوو د پیاوړتیا او د پام وړ لاسته راوړنو له امله په ځانګړې تقدیرنامو ونازول شو.
په همدې مناسبت ځانګړې غونډه چې د وزیر محمد اکبرخان تخصصي او ثالثي روغتون د روزنیزو پروګرامونو په تالار کې، د عامې روغتیا وزارت د چارسمبالي او د روغتیايي خدمتونو د وړاندې کولو مرستیال، ښاغلي مولوي عبدالولي حقاني، په مشرۍ نن د پنجشنې ورځ په ٨-٠٢-١٤٤٨ نيټه جوړه شوې وه، چې د وزارت مسؤلینو، د روغتون رهبرۍ، متخصصینو، ډاکټرانو او د روغتون ګڼ شمېر کارکوونکو پکې ګډون کړی و.
د غونډې په پیل کې د روغتون رئیس، ښاغلي ډاکټر عنایت الله عنایت، د خپلې دندې د لومړیو درېیو میاشتو مهمې لاسته راوړنې د یوه جامع پریزنټېشن له لارې ګډونوالو ته وړاندې کړې. نوموړي د روغتون په اداري اصلاحاتو، د روغتیايي خدمتونو د کیفیت په لوړولو، د نویو روغتیايي تجهیزاتو په برابرولو، د زیربناوو په پیاوړتیا، د کاري نظم په ټینګښت او د ناروغانو لپاره د معیاري خدمتونو د پراختیا په برخه کې ترسره شوي اقدامات په تفصیل سره تشریح کړل.
ښاغلي ډاکټر عنایت الله عنایت د دې ویاړ له امله د عامې روغتیا وزارت له رهبرۍ او د روغتون له ټولو کارکوونکو څخه د زړه له کومې مننه وکړه او ویې ویل: «دا تقدیر یوازې زما نه، بلکې د وزیر محمد اکبرخان تخصصي او ثالثي روغتون د ټولو ډاکټرانو، متخصصینو، نرسانو، اداري او خدماتي کارکوونکو د ګډو هڅو او نه ستړې کېدونکو خدمتونو پایله ده. موږ به د هېوادوالو لپاره د باکیفیته او معیاري روغتیايي خدمتونو د وړاندې کولو په موخه خپلې هڅې لا زیاتې کړو.»
ورپسې د اورتوپیدي او تروماتولوژۍ څانګې مشر او د افغانستان د معالجوي کدر د انجمن رئیس، ښاغلي استاد ډاکتر ایمل وردګ، د روغتون د رئیس د درې میاشتنیو لاسته راوړنو ستاینه وکړه. نوموړي وویل چې د نوي مدیریت او رهبرۍ په راتګ سره د روغتون په کاري چاپېریال کې د پام وړ مثبت بدلونونه رامنځته شوي، د کارکوونکو ترمنځ همغږي او همکاري پیاوړې شوې او ټول پرسونل په ښه روحیه او مناسب کاري چاپېریال کې خپلې دندې ترسره کوي. هغه هیله څرګنده کړه چې په نږدې راتلونکي کې به روغتون د لا ډېرو پرمختګونو شاهدان وي.
همدارنګه د ثالثي او تخصصي روغتونونو رئیس، ښاغلي ډاکټر امین الله مومند، د روغتون د رهبرۍ او کاري ټیم د یووالي، همغږۍ او لاسته راوړنو ستاینه وکړه او ټینګار یې وکړ چې د لا غوره خدمتونو د وړاندې کولو لپاره باید د تفاهم، ګډ کار او متقابل ملاتړ فرهنګ نور هم پیاوړی شي.
د غونډې په پای کې د عامې روغتیا وزارت د روغتیايي خدمتونو د وړاندې کولو مرستیال او د وزارت چارسمبالي، ښاغلي مولوي عبدالولي حقاني، ګډونوالو ته په خپلو اختتامیه خبرو کې وویل: «موږ ویاړو چې زموږ په روغتیايي بنسټونو کې ژمن، باوري او مسلکي افغان کدرونه خدمت کوي. د وزیر محمد اکبرخان تخصصي او ثالثي روغتون وروستي پرمختګونه د اغېزمن مدیریت، ګډ کار او سالمې رهبرۍ څرګند مثال دی.» چې مونږ د وزیر اکبرخان د روغتون د ریئس ډاګتر عنایت الله عنایت څخه مننه کوو او کارونه یی تقدیروو.
نوموړي زیاته کړه: «د عامې روغتیا وزارت به د روغتون له رهبرۍ او ټولو کارکوونکو سره خپل هر اړخیز ملاتړ ته دوام ورکړي. نننی تقدیر د ښاغلي ډاکټر عنایت الله عنایت د غوره مدیریت، ارزښتناکو لاسته راوړنو او صادقانه خدمتونو د ستاینې څرګندونه کوي، او موږ د لوی څښتن تعالی له درباره ورته په راتلونکو مسؤلیتونو کې د لا ډېر توفیق، بریالیتوب او خدمت کولو دعا کوو.»
غونډه د خیر او برکت د دعا په ویلو او د روغتون ریئس ښاغلي ډاګترعنایت الله عنایت ته تقدیرنامې په اهداء کولو پای ته ورسېده.

16/07/2026

د وزیر محمد اکبرخان روغتون د کنفرانس نوې خونې پرانیسته:
د وزیر محمد اکبرخان روغتون د رئیس، ښاغلي ډاکټر عنایت الله عنایت، د اغېزمن مدیریت، دوامداره هڅو او د روغتون د پرمختګ لپاره د ځانګړې پاملرنې په پایله کې، د روغتون نوې او معیاري کنفرانس خونه په رسمي ډول فعاله او د استفادې لپاره چمتو شوه.
د یادې کنفرانس خونې فعالول د روغتون د علمي، اداري او مسلکي فعالیتونو د پیاوړتیا په برخه کې یو مهم او ارزښتناک ګام بلل کېږي. له دې وروسته به علمي کنفرانسونه، تخصصي سیمینارونه، روزنیز ورکشاپونه، اداري غونډې او نورې مسلکي برنامې په یو مناسب، مجهز او معیاري چاپېریال کې ترسره کېږي، چې دا به د روغتیايي خدمتونو د کیفیت په لوړولو، د روغتیايي کارکوونکو د مسلکي ظرفیت په پیاوړتیا او د ادارې د لا ښه همغږۍ په برخه کې مهم رول ولوبوي.
د وزیر محمد اکبرخان روغتون اداره ژمنه ده چې د هېوادوالو لپاره د معیاري روغتیايي خدمتونو د وړاندې کولو ترڅنګ، د روغتون د علمي او اداري زیربناوو د پراختیا او عصري کولو په برخه کې خپلو هڅو ته دوام ورکړي، ترڅو د ناروغانو او روغتیايي پرسونل لپاره لا غوره او معیاري چاپېریال برابر شي

03/07/2026

وزیر محمد اکبرخان روغتون د رئیس ښاغلي ډاکتر عنایت الله عنایت په هڅو او عامې روغتیا وزارت مشرتابه د کلک ملاتړ په پایله کی د یاد روغتون درې منزله عملیاتي خونې ودانۍ د جوړولو پروژې عملي کار د بیا پیل مراسم ترسره شول

د وزیر محمد اکبرخان روغتون یادې پروژې د بیا پیل رسمي مراسم د عامې روغتیا وزارت د مشرتابه، د روغتون د مسؤلینو او د قراردادي شرکت د استازو په حضور کې ترسره شول.

یاده پروژه د سدیس هلمندوال ساختماني او سړک جوړونې شرکت له لوري تطبیقېږي او مالي لګښت یې د عامې روغتیا وزارت له بودجې تمویلېږي.

په دغو مراسمو کې د عامې روغتیا وزارت له لوري مالي او اداري معین، قاري عبدالولي صدیقي، او د معالجوي طب عمومي رئیس، ډاکټر وحدت الکوزی، ګډون کړی و.

غونډه د وزیر محمد اکبرخان روغتون د رئیس، ډاکټر عنایت الله عنایت، په پرانیستونکې وینا پیل شوه. نوموړي په خپلو خبرو کې د روغتون د وروستیو لاسته راوړنو، ترسره شویو فعالیتونو او راتلونکو پرمختیايي پلانونو په اړه هر اړخیز معلومات وړاندې کړل او ټینګار یې وکړ چې د روغتون د خدمتونو د لا ښه والي لپاره به ټولې هڅې په پوره ژمنتیا دوام ومومي.

وروسته مالي او اداري معین، قاري عبدالولي صدیقي، خپلې وینا ته په دوام د پروژې د بیا پیل هرکلی وکړ او له تطبیقوونکي شرکت څخه یې وغوښتل چې چارې د ټاکلي مهالویش او لوړ کیفیت له مخې په چټکۍ سره بشپړې کړي. نوموړي د دولتي روغتونونو د روغتیايي کارکوونکو نه ستړې کېدونکې هلې ځلې او د ناروغانو د درملنې په برخه کې د هغوی ارزښتناک خدمات د ستاینې وړ وبلل او ډاډ یې ورکړ چې وزیر محمد اکبرخان روغتون به په پرمختللو او معیاري طبي تجهیزاتو سمبال شي، ترڅو هېوادوالو ته لا غوره روغتیايي خدمتونه وړاندې شي.

ورپسې د معالجوي طب عمومي رئیس، ډاکټر وحدت الکوزی، د یادې پروژې د عملي کار د بیا پیل له امله خپله خوښي څرګنده کړه او ویې ویل چې د عامې روغتیا وزارت هڅه کوي وزیر محمد اکبرخان روغتون د تروماتولوژۍ او اورتوپېډۍ په برخه کې د هېواد یوازینی فوق تخصصي او معیاري مرکز وګرځوي، څو ناروغان وکولای شي د لوړ کیفیت تخصصي خدمات د هېواد دننه ترلاسه کړي.

د غونډې په پای کې د روغتون د شکایتونو د اورېدو مسئول، مولوي جمعه خان همدرد، د اختتامیې دعا وکړه او د پروژې د بریالي تطبیق، د روغتیايي خدمتونو د لا پراختیا او د هېواد د سوکالۍ لپاره یې د الله تعالی له درباره د بریا او توفیق غوښتنه وکړه.

24/06/2026

د عامې روغتیا وزارت په بلنه د دوه همسایه هیوادو د حسن نیت، علمي وړتیا جوړونی په خاطر د قزاقستان هېواد د اورتوپیدۍ متخصص ټیم وزیر محمد اکبر خان روغتون ته د یوی هفتې لپاره راغۍ.
نوموړي تیم لمړۍ د وزیر اکبرخان روغتون له مشرتابه او متخصصینو سره لیدنه ترسره کړه.په دې ناسته کې قزاقستاني متخصصینو ژمنه وکړه چې د یکشنبې څخه تر پنجشنبې پورې به د روغتون د اورتوپیدۍ له متخصصینو سره په ګډه د مغلقو او تخصصي جراحي عملیاتونه ترسره کړي. چې په نتیجه کی د روغتون د ریاست لخوا نوموړي پلاوي او تخنیکي تیم لپاره د روغتون د ریاست لپاره د یوی هفتي ګډ پلان ترتیب او د کړنو په موخه دوی سره شریک کړل شو.
همدارنګه، یاد ټیم د اورتوپیدۍ څانګې لپاره دElizarov په ګډون یو شمېر مهم او پرمختللي طبي وسایل او تجهیزات له ځان سره راوړي وو، چې د روغتون ریاست ته یې وسپارل. دا هغه تجهیزات دي چې د ځینو مغلقو اورتوپیدي عملیاتو لپاره یې جدي اړتیا موجوده وه او نشتون یې د متخصصینو او ناروغانو لپاره ستونزې رامنځته کولې.
دا ډول علمي او مسلکي همکارۍ نه یوازې د افغانستان او قزاقستان ترمنځ د حسن نیت، او طبي تجربو د تبادلې زمینه برابروي، همدارنګه د هیواد په د ننه د متخصصینو د ظرفیت لوړولو، د پیچلو جراحي عملیاتو د بریالیتوب او د روغتیايي خدمتونو د کیفیت د ښه والي لپاره هم ارزښتناک رول لري.

28/04/2026

دوشنبه، د ۱۴۰۵ کال د غویي ۷مه، د وزیر محمد اکبر خان روغتون رئیس ډاکتر عنایت الله عنایت په مشرۍ د روغتون د ټولو څانګو له مسؤلینو سره د همغږۍ ناسته ترسره شوه.

د یادې ناستې موخه د روغتون د چارو د لا پیاوړتیا، د شته ستونزو پېژندنه او د هغو لپاره د مناسبو حل لارو موندل و. په ناسته کې د بېلابېلو برخو مسؤلینو خپل نظرونه شریک کړل او پر مهمو موضوعاتو مفصل بحث وشو.

د روغتون رئیس اړوندو مسؤلینو ته لارښوونه وکړه، څو د درېیو ورځو په موده کې د خپلو څانګو لاسته راوړنې، ستونزې او وړاندیز شوې حل لارې ترتیب او د روغتون ریاست ته وسپاري، تر څو د همدې معلوماتو پر بنسټ یو جامع او عملي پلان جوړ شي.

همداراز پرېکړه وشوه، چې له راتلونکې شنبې ورځې څخه به په روغتون کې د انتان د مخنیوي او کنټرول په موخه د ناروغانو د لیدنې وختونه تنظیم شي. له دې وروسته به پایوازانو ته یوازې د سهار له ۵ بجو تر ۷ بجو او د مازدیګر له ۴ بجو تر ۶ بجو پورې د لیدنې اجازه ورکول کېږي.

د دې پرېکړې له مخې، ډاکتران به په ټاکل شویو غیرملاقاتي وختونو کې د ناروغانو په درملنې لا زیات تمرکز کوي. د روغتون اداره له ټولو هېوادوالو هیله کوي، چې د یادو اصولو په رعایت کې همکاري وکړي.

26/04/2026

نن د ۱۴۰۵/۲/۶ نېټه د مرحوم محمد موسی وردګ یادګار روغتون لخوا د وزیر محمد اکبر خان ملي تخصصي روغتون سره د ۴۵ کارټنه نارمل سالین (N.S) سیرومونو مرسته وشوه.

د یادې مرستې موخه د روغتیايي خدمتونو پیاوړتیا او د ناروغانو لپاره د اړینو درملو برابرول ښودل شوي دي.

د وزیر محمد اکبرخان روغتون رئیس داكتر عنایت الله عنایت د نوموړو سیرومونو د تسلیمي په وخت کې د ډاکتر ایمل وردګ له اخلاص او همکاریو څخه د مننې ترڅنګ ژمنه وکړه، چې د روغتون د ضرورتونو د پوره کیدو لپاره به نور ورته خیریه هیوادوال وهڅوي، تر څو د روغتون سره دا ډول مرستې زیاتې کړي.تر څو د روغتون ستونزې تر یو حده مرفوع شي.

پلان کې ده، چې دا سیرومونه به د بېلابېلو ناروغانو په درملنه کې ترې ښه استفاده وشي او هغه تشه به تر یوه بریده ډکه کړي، چې د ورته موادو په برخه کې موجوده وه. هغه زیاته کړه،چې د روغتیايي مرکزونو سره دا ډول مرستې او همکارۍ کولای شي، چې د روغتیایي خدمتونو کیفیت لوړ کړي او د ناروغانو ستونزې تر یو حده راکمې کړي.

25/04/2026

عنایت الله عنایت د یوې رسمي غونډې په ترڅ کې د روغتیا وزارت د چارواکو له لوري د وزیر محمد اکبرخان ملي او تخصصي روغتون د مشر په توګه وټاکل شو.

د معرفت په غونډه کې ښاغلي عنایت الله«عنایت» ژمنه وکړه چې د روغتون د خدماتو کیفیت به لوړ کړي او ناروغانو ته به لا ښه اسانتیاوې برابرې کړي. هغه همداراز ټینګار وکړ چې د روغتون د پیاوړو کارکوونکو سره به په ګډه کار وکړي تر څو د روغتیايي خدمتونو په برخه کې مثبت بدلونونه راولي.

وزیر محمد اکبرخان روغتون د افغانستان له مهمو دولتي روغتونونو څخه دی چې هره ورځ پکې د زرګونه ناروغان درملنه ترسره کېږي. تمه ده چې د نوي رئیس په ټاکل کېدو سره به د دې روغتون فعالیتونه نور هم منظم او اغېزناک شي.