09/09/2025
سادیسم (Sa**sm)
سادیسم – کله چې د نورو درد د خوښۍ سرچینه وګرځي.
په ارواپوهنه کې سادیسم (Sa**sm) هغه رواني تمایل ته ویل کېږي چې پکې یو فرد د نورو د درد، ځورونې، یا تحقیر له لارې د خوند او خوښۍ تجربه کوي. دا اصطلاح د فرانسوي لیکوال مارکي دو ساد (Marquis de Sade) له نومه اخیستل شوې چې په خپلو آثارو کې یې د داسې کرکټرونو کیسې انځورولې چې د نورو له شکنجې او تحقیر څخه به یې خوند اخیستل.
د سادیسم ډولونه
الف – جنسي سادیسم: هغه حالت چې یو شخص د جنسي اړیکو پر مهال یوازې هغه وخت خوند اخلي چې مقابل لوری یې د درد، تحقیر یا زور لاندې وي، ځینې خلکو ته وحشیانه جنسي اړیکې ټینګول خوند ور کوي.
ب – رواني یا ټولنیز سادیسم: په دې ډول سادیسم کې فرد په ورځني ژوند کې له دې چې نور کمزوري کړي، سپک یې کړي یا پرې واکمن شي، ډېر خوند اخلي. دا ډول سادیسم اکثراً له شخصیتي اختلالونو سره تړاو لري.
د سادیستي چلند نښې
۱- د نورو تحقیرول او سپک ګڼل.
۲- د واک د تمرین لپاره د نورو ځورول.
۳- له فزیکي یا رواني تاوتریخوالي څخه خوند اخیستل.
۴- د همدردۍ کموالی او د مقابل لوري له احساساتو سره بې پروايي کول.
د سادیسم اغیزې په ټولنیز ژوند: سادیستي کسان یوازې په جنسي ژوند کې نه وي، بلکې په کورنیو اړیکو، کاري چاپېریال او ټولنیزو اړیکو کې هم لیدل کېږي. یو سادیستي مدیر کېدای شي د کارکوونکو تحقیر او زورونه د خپل واک د ښودلو وسیله وګرځوي. په کورنۍ کې یو سادیستي والد د ماشوم د ځورولو او تنبیه کولو له لارې ځان پیاوړی احساسوي.
په کلینیکي اړخ کې کله چې سادیستي تمایل دومره شدید شي چې د نورو د جدي زیان سبب شي یا د فرد د ژوند نور اړخونه ګډوډ کړي، نو د شخصیتي اختلال (Sadistic Personality Disorder) په کټګورۍ کې راځي.
سادیسم موږ ته ښيي چې د انسان په روان کې مینه او تاوتریخوالی، خوند او درد، واک او بې وسۍ په ډېرو پېچلو لارو سره ګډېږي. که سادیسم د انسان په شخصیت کې ژور ځای ونیسي، کولی شي اړیکې، مینه او ټولنیز باورونه له منځه یوسي.
