14/07/2026
Lidhur me publikimin e një fotografie që synon të krijojë përshtypjen e një situate kaotike në Spitalin e Kavajës, sqarojmë opinionin publik se një moment i izoluar nuk pasqyron domosdoshmërisht mënyrën se si funksionon institucioni gjatë gjithë ditës.
Shqetësimi i qytetarëve për pritjen në radhë është legjitim dhe merret seriozisht nga strukturat përgjegjëse. Përmirësimi i organizimit të shërbimit dhe ulja e kohës së pritjes mbeten objektiva të vazhdueshëm të punës sonë.
Vizitat në Spitalin e Kavajës organizohen sipas tre fashave orare, të përcaktuara nga mjeku i familjes: 08:00–10:00, 10:00–12:00 dhe 12:00–14:00. Në praktikë, një pjesë e qytetarëve paraqiten që në orët e para të mëngjesit, përpara orarit të caktuar për vizitën e tyre. Ky fenomen krijon grumbullime të përkohshme në ambientet e pritjes, të cilat nuk pasqyrojnë domosdoshmërisht fluksin real të pacientëve përgjatë gjithë ditës.
Pritja për shërbime shëndetësore është një sfidë me të cilën përballen edhe sistemet shëndetësore të vendeve evropiane. Në çdo vend, fluksi i pacientëve ndryshon sipas orareve dhe kërkesës për shërbim. Për këtë arsye, respektimi i orareve të përcaktuara dhe organizimi i vizitave janë elementë thelbësorë për shmangien e grumbullimeve dhe për ofrimin e një shërbimi sa më efikas.
Gjithashtu, është e rëndësishme të theksohet se Spitali i Kavajës ndodhet në një fazë të rëndësishme ristrukturimi, pas shkëputjes nga Spitali Universitar "Shefqet Ndroqi". Ky proces nënkupton ngritjen dhe konsolidimin e strukturave të tij organizative dhe funksionale, me synimin për të rritur kapacitetet dhe cilësinë e shërbimeve të ofruara.
Në kuadër të kësaj riorganizimi, organika e spitalit do të plotësohet me mjekë dhe personel të ri shëndetësor. Ky fuqizim i burimeve njerëzore pritet të ndikojë drejtpërdrejt në rritjen e kapaciteteve të shërbimit, uljen e kohës së pritjes dhe përmirësimin e mëtejshëm të kujdesit ndaj pacientëve.
Mirëpresim çdo kritikë dhe sugjerim që ndihmon në përmirësimin e shërbimit ndaj qytetarëve. Megjithatë, informimi i publikut duhet të mbështetet në fakte dhe në paraqitjen e plotë të situatës, duke shmangur interpretimet që krijojnë një perceptim të deformuar mbi funksionimin e institucionit. Angazhimi ynë mbetet i pandryshuar: ndërtimi i një spitali më të fortë, me më shumë kapacitete dhe me shërbime gjithnjë e më cilësore për qytetarët e Kavajës.
