21/06/2026
Shqipëria në protestë, kryeministri në shkëputje të plotë nga realiteti
Kam ndjekur me shumë vëmendje zhvillimet e këtyre ditëve në vendin tonë të dashur.
Jemi dëshmitarë të një prej protestave më masive, më qytetare dhe më domethënëse që ka njohur Shqipëria në historinë e saj.
Kryefjala e kësaj proteste është rinia, masiviteti dhe qytetaria, të shoqëruara me një zemëratë të papërmbajtur kundër korrupsionit, keqqeverisjes, oligarkisë dhe kapjes së shtetit nga një grup i vogël njerëzish në aleancë me krimin dhe interesat klienteliste.
Shqipëria është vendi ynë. Këtu kemi lindur, këtu po rrisim fëmijët tanë dhe për këtë vend të parët tanë kanë luftuar e kanë derdhur gjak ndër shekuj.
Po jetojmë një kohë të vështirë, të krijuar nga ata që ne vetë i votuam për të na qeverisur, e jo për të na grabitur.
Edi Rama u votua në vitin 2013 me shpresën për ndryshim dhe për një model të ri qeverisjeje. Por me kalimin e viteve, ai ndërtoi një sistem të mbështetur te oligarkia, klientelizmi dhe kontrolli i institucioneve.
Kur intelektualët dhe profesionistët ngritën zërin, ata u injoruan, u sulmuan, u shantazhuan ose u blenë. Kur shpresa dukej se po shuhej, ajo u ringjall nga rinia dhe qytetarët e zakonshëm.
Ata thanë: "Mjaft! Ky është vendi ynë dhe ne do ta mbrojmë."
Përballë këtij reagimi qytetar, pushteti vazhdon të sillet sikur asgjë nuk po ndodh. Në vend të reflektimit, zgjedh etiketimet, teoritë konspirative dhe gjuhën përçarëse.
Kjo dëshmon një shkëputje të thellë nga realiteti dhe nga hallet e qytetarëve.
Detyra jonë është të shpëtojmë vendin tonë nga keqqeverisja, korrupsioni dhe paaftësia, por edhe të mësojmë nga gabimet tona, në mënyrë që askush, pavarësisht emrit apo partisë, të mos e ketë më mundësinë ta marrë peng të ardhmen e Shqipërisë.
Rroftë Shqipëria! 🇦🇱🇦🇱🇦🇱
Nesër, më shumë.
