13/05/2026
Rina Kamberi Coku Rina është kryeinfermierja e qendrës tonë, zyra e së cilës hapet herët në mëngjes dhe është e fundit që mbyllet pas turnit. Ajo i pret dhe i përcjell të gjithë kolegët me buzëqeshje.
Të gjithë do shkojnë të paktën një herë gjatë ditës në zyrën e saj: dikush për të kërkuar bazë materiale për punën e vet, dikush për të shfryrë lodhjen e ditës, dikush për të ndarë shqetësime, e herë dikush që kërkon leje, për të ndërruar turnin në grafikun e rradhës apo edhe thjeshtë për t'a përshëndetur... ama, të gjithë do të shkojnë atje.
Ndërsa, Rina është përherë aty, e buzëqeshur, fjalë pak, e dëgjueshme, duke i dhënë hapësirën çdo kolegu e pacienti të ndihet i dëgjuar dhe i respektuar; e gjithmonë e gatshme për të ndihmuar të gjithë.
Rina e kryen me shumë modesti profesionin e saj: jo vetëm sot, por në çdo ditë që ka shënuar rrugëtimin e saj profesional në QSSH7, sepse kjo është ajo çfarë beson dhe në fakt e ka ndihmuar të ndërtojë besim e respekt tek të gjithë pacientët dhe komuniteti i Laprakës.
Por, sot dita mori ngjyra të bukura kur një vlerësim i veçantë si "Infermieri i vitit" erdhi nga Presidentja e Urdhrit të Infermierit Tiranë, në kuadër të Ditës Ndërkombëtarë të Infermierit; profesionistët që janë modestë e punëtorë, të domosdoshëm e të padukshëm, shërues e të heshtur, sepse në fakt kështu janë liderët me integritet, e Rina është padyshim një ndër to!
Qendra jonë shpreh respekt, mirënjohje për Rinën dhe kontributin e saj; për për vlerësimin ndaj koleges tonë!
Si Rina, të gjitha infermieret që punojnë në QSSH 7 janë model i përkushtimit e profesionalizmit!
Faleminderit që frymëzon, Kryeinfermiere Kamberi Coku!
Gëzuar Ditën Ndërkombëtare të Infermierëve! 🎉🎉
