Dr. Evelina Bakhshinyan/ Էվելինա Բախշինյան, ճառագայթային օնկոգինեկոլոգ

18/03/2026

❕Ասեղներ որոնք կյանք են փրկում

Վուլվայի քաղցկեղ և բրախիթերապիա

Վուլվայի քաղցկեղը բնորոշվում է արագ զարգացումով և մետաստազավորմամբ։ Կան նախաքաղցկեղային հիվանդություններ (լեյկոպլակիա, կրաուրոզ), որոնց բնորոշ են սպիտակ փառի առկայություն, քոր, դիսկոմֆորտ, արտաքին տեսքի փոփոխություններ (կնճռոտում, փոքրացում)։ Այս և այլ ախտանշանների առկայության դեպքում անհրաժեշտ է անհապաղ դիմել գինեկոլոգի՝ քաղցկեղի զարգացման կանխարգելման նպատակով։
Վաղ հայտնաբերման դեպքում վիրահատության կամ ճառագայթային բուժման միջոցով հնարավոր է հասնել լիարժեք ապաքինման։

✔️ Ինչո՞ւ հենց բրախիթերապիա։

Վուլվայի քաղցկեղի դեպքում հեռակա ճառագայթումից հետո մնացորդային ուռուցքը կամ ռեցիդիվը հնարավոր է լիովին թիրախավորել հատուկ մետաղյա ապլիկատորների անհատական կոնստրուկցիայի միջոցով։

❌Միֆ 1. «Դա սարսափելի ցավոտ է»:

✅Իրականություն. միջամտությունը կատարվում է անզգայացմամբ (ողնուղեղային կամ ընդհանուր)։ Պացիենտը ոչինչ չի զգում: Բուժման ընթացքում ասեղները ծառայում են միայն որպես «տրանսպորտ» ճառագայթման համար։

❌Միֆ 2. «Ասեղները մնալու են ընդմիշտ»:

✅Իրականություն. սա ժամանակավոր միջամտություն է։ Ասեղները տեղադրվում են ճշգրիտ հաշվարկված ժամանակով (15-20 րոպե) և լիարժեք հեռացվում են բուժման ավարտից հետո։

❌ Միֆ 3. «Ես դառնալու եմ ռադիոակտիվ»:

✅Իրականություն. բրախիթերապիայի ժամանակ ռադիոակտիվ աղբյուրը շփվում է միայն ուռուցքի հետ: Պրոցեդուրայից հետո պացիենտը բացարձակ անվտանգ է շրջապատի և հարազատների համար։ Շատ հաճախ մարդիկ բրախիթերապիան շփոթում են ռադիոյոդային թերապիայի հետ, որից հետո կարիք է լինում ժամանակավոր մեկուսացման։

04/03/2026

Բրախիթերապիան որպես արգանդի մարմնի ոչ վիրահատելի քաղցկեղի բուժման մեթոդ

📌 (Կլինիկական դեպքի նկարագրություն)

1943թ. ծնված բուժառուն 2023 թ. դեկտեմբերին դիմել է ՈՒԱԿ ներխոռոչային և ներհյուսվածքային ճառագայթային թերապիայի բաժանմունք՝ գանգատվելով արյունային արտադրությունից սեռական ուղիներից: Համալիր հետազոտություններով ախտորոշվել է արգանդի մարմնի քաղցկեղ I փուլ (T1NxM0, G1 ադենոկարցինոմա):

Բուժառուն ուներ մի շարք ուղեկցող հիվանդություններ. սրտի իշեմիկ հիվանդություն, հիպերտրոֆիկ կարդիոսկլերոզ, նախասրտերի ֆիբրիլյացիա, քրոնիկ սրտային անբավարարություն III ֆունկցիոնալ դաս (NYHA III), հանգուցավոր խպիպ, պոդագրա, IV աստիճան ճարպակալում, անեմիա, ինչը վիրահատությունը դարձնում էր բարձր ռիսկային:

🎯 Որոշվեց անցկացնել ամոքիչ հեմոստատիկ 3D բրախիթերապիա՝ Bebig SagiNova սարքով, Rotte ապլիկատորի կիրառումով (ԳԴ՝ 30 Գր , EQD2` 38.4 Գր): Այս ապլիկատորը ի շնորհիվ անկյան տակ միացող երկու ասեղների, ապահովում է արգանդի խոռոչի ամբողջական և համաճափ ճառագայթում: Բուժման արդյունքում դիտվել է արյունահոսության դադարեցում, արյան ցուցանիշների կարգավորում, ընդհանուր վիճակի լավացում:

Բուժումից անցել է մոտ 30 ամիս: Բուժառուն շարունակում է մնալ դինամիկ հսկողության տակ, վիճակը կայուն է, բավարար, ինչը ևս մեկ անգամ ապացուցում է, որ բրախիթերապիան կարող է լինել արդյունավետ ընտրություն ոչ վիրահատելի արգանդի մարմնի քաղցկեղի դեպքում՝ ապահովելով տեղային բարձր վերահսկողություն, կյանքի որակի և տևողության բարելավում:

10/02/2026

Հայկական ուռուցքաբանական 6-րդ կոնգրեսին, որը տեղի ունեցավ փետրվարի 7-ից 8ը, ներկայացրեցի ՈՒԱԿ-ում բրախիթերապիայի հասանելի նոր հնարավորությունները։

05/11/2025

🩺 Վուլվայի քաղցկեղ․

Վուլվայի քաղցկեղը կանանց արտաքին սեռական օրգանների չարորակ նորագոյացություն է, որը կազմում է գինեկոլոգիական քաղցկեղների մոտ 1-5%-ը։ Այն հաճախ զարգանում է նախաքաղցկեղային փոփոխություններից (ներէպիթելային նեոպլազիա, լեյկոպլակիա, կրաուռոզ), որոնք կլինիկորեն դրսևորվում են կարծես «անվնաս» ախտանիշներով, ինչպիսիք են քորը, այրոցը, դիսկոմֆորտը, մաշկի հաստացումը կամ գույնի փոփոխությունը։

⚠️ Վուլվայի քաղցկեղը գինեկոլոգիական մյուս քաղցկեղներից առանձնանում է արագ մետաստազավորումով, կրկնողությունների հաճախադեպությամբ, ինչպես նաև առավել դժվար է ենթարկվում բուժման։

🎯 Բրախիթերապիան վուլվայի քաղցկեղի բուժման մեթոդներից է և կիրառվում է հետևյալ դեպքերում.

✅ Հանդիսանում է բուժման լրացուցիչ մեթոդ վիրահատությունից և/կամ հեռահար ճառագայթային թերապիայից հետո

✅ Հանդիսանում է բուժման միակ եղանակը հիվանդության կրկնողության (ռեցիդիվ) դեպքում

✅ Երբ առկա են հակացուցումներ վիրահատության կամ հեռահար ճառագայթային թերապիայի համար։

🏥 Մեր բաժանմունքի մոտեցումը վուլվայի քաղցկեղի բուժման ժամանակ.

🔹 Իրականացվում է անհատականացված բրախիթերապիա գերմանական BEBIG ընկերության SagiNova (Co-60) սարքով

🔹 Օգտագործվում են հատուկ ներհյուսվածքային և ինդիվիդուալ ապլիկատորների հավաքածուներ

🔹 Կատարվում է 3D պլանավորում (ՀՇ և ՄՌՏ վիզուալիզացիայով)՝ հաշվի առնելով հիվանդի անատոմիան և քաղցկեղային պրոցեսի առանձնահատկությունները։

📌 Այսպիսով, բրախիթերապիան վուլվայի քաղցկեղի բուժման մեթոդ է, որն ապահում է՝ բուժում + կյանքի որակ + օրգան-պահպանում հավասարակշռությունը։


ՆԵՐԽՈՌՈՉԱՅԻՆ ԵՎ ՆԵՐՀՅՈւՍՎԱԾՔԱՅԻՆ ՃԱՌԱԳԱՅԹԱՅԻՆ ԹԵՐԱՊԻԱՅԻ ԲԱԺԱՆՄՈՒՆՔԻ ՂԵԿԱՎԱՐ, Բ.Գ.Դ. ՊՐՈՖԵՍՈՐ Է.Ռ. ԲԱԽՇԻՆՅԱՆ

24/10/2025

Հարգելի հետևորդներ,

Սիրով տեղեկացնում ենք, որ Վ.Ա. Ֆանարջյանի անվան ուռուցքաբանության ազգային կենտրոնը համալրվել է բրախիթերապիայի ժամանակակից ապլիկատորների հավաքածուներով, որոնք հնարավորություն են տալիս ընդլայնել մատուցվող ծառայությունների շրջանակը։

Այսուհետ բաժանմունքում կարող են իրականացվել հետևյալ բրախիթերապևտիկ միջամտությունները՝ տարբեր նպատակներով․

• արտաքին սեռական օրգանների (վուլվայի) ներհյուսվածքային մոդեռն բրախիթերապիա

• մաշկի ոչ մելանոմային քաղցկեղների (տափակաբջջային և բազալ բջջային) և կելոիդների մակերեսային և ներհյուսվածքային բրախիթերապիա

• սարկոմաների ներհյուսվածքային բրախիթերապիա

• հետանցքային խողովակի և ուղիղ աղու չարորակ նորագոյացությունների ներխոռոչային և ներհյուսվածքային բրախիթերապիա։

Նորից ուզում եմ հիշեցնել, որ բրախիթերապիան ճառագայթային բուժման տեսակ է, որը հնարավորություն է տալիս բարձր ճշգրտությամբ նպատակաուղղել ճառագայթումը թիրախի վրա՝ չվնասելով շրջակա առողջ օրգաններն ու հյուսվածքները: Բացի այդ ունի բարձր արդյունավետություն (local control 98-99%) և բարելավում է բուժառուների կյանքի որակը։

Ներխոռոչային և ներհյուսվածքային ճառագայթային թերապիայի բաժանմունքի ղեկավար, բգդ, պրոֆեսոր Է.Ռ. Բախշինյան

17/02/2025

🎗Սքրինինգը հայտնաբերում է արգանդի պարանոցի նախաքաղցկեղային հիվանդությունները և քաղցկեղը վաղ փուլերում։
Նախաքաղցկեղային հիվանդությունները լիովին բուժելի են, իսկ քաղցկեղի վաղ հայտնաբերումը զգալիորեն բարելավում է բուժման արդյունավետությունը։ Այդ նպատակով խորհուրդ է տրվում դիմել բժշկի, անցնել համապատասխան հետազոտություններ` ՊԱՊ քսուք և մարդու պապիլոմավիրուսի (ՄՊՎ) որոշում:
Այն կանայք, ովքեր ունեն իմունային համակարգի տարբեր ծագման անբավարարություն պետք է ավելի զգոն լինեն և ավելի հաճախ դիմեն բժշկի:
📍ՈւԱԿ-ի Ճառագայթային գինեկոլոգիայի բաժանմունքի բանիմաց մասնագետներն անցնում են համապատասխան վերապատրաստումներ, իսկ կենտրոնը հագեցած է անհրաժեշտ բոլոր սարքավորումներով:

Obstetrician-Gynecologist (OBGYN)

29/07/2022

Վերջերս որպես Ուռուցքաբանության ազգային կենտրոնի ներկայացուցիչ մասնակցել եմ «Շինոն» ընկերության կազմակերպած կարևոր բժշկական համաժողովի:
«Շինոն» կազմակերպությունը առաջատար է աշխարհում և համագործակցում է ավելի քան 400 բժշկական կենտրոնների հետ։ Վերջերս, այդ ընկերությունը ուռուցքաբանության ոլորտի մասնագետների համար կազմապերպել էր հանդիպում-քննարկումներ՝ աշխարհի գերզարգացած մասնագիտացված 3 կլինիկաներում՝ Հնդկաստանի «Apollo Proton Cancer Centre»-ում , Դուբայի «American Hospital»-ում և Աբու Դաբիի «Burjeel Hospital»-ում:
Կիսվելով այցի տպավորություններով՝ պիտի առանձնացնեմ ճառագայթային գերժամանակակից՝ պրոտոնային թերապիայի ներկայացումը, որը կատարվում է Հնդկաստանի «Apollo Proton Cancer Centre»-ում: Այս կենտրոնը առաջինն ու միակն է Հարավային Ասիայում և Միջին Արևելքում, որտեղ բուժում են ստանում ավելի քան 35 երկրների բուժառուներ: Պրոտոնային թերապիայի առավելությունները շատ են, ամենակարևորը՝ դրա շնորհիվ հնարավոր է թիրախին տալ մաքսիմալ թումորոցիդ ճառագայթում՝ նվազեցնելով ճառագայթային դոզան շրջակա առողջ հյուսվածքների և օրգանների վրա:
Պրոտոնային թերապիան կիրառվում է տարբեր ուռուցքային տեղւմների դեպքում՝ կենտրոնական նյարդային համակարգի (աստրոցիտոմա, խոնդրոսարկոմա,խոնդրոմա, գլիոմա, մեդուլոբլաստոմա և այլն), ոսկրերի և փափուկ հյուսվածքների (խորդոմա, փափուկ հյուսվածքների և Էվինգի սարկոմա,խոնդրոսարկոմա և այլն), թոքերի, գլխի և պարանոցի, ողնաշարի, ստամոքսաղիքային համակարգի (կերակրափող, լյարդ),շագանակագեղձի և գինեկոլոգիական քաղցկեղների դեպքում:
Հաշվի առնելով պրոտոնային թերապիայի առավելությունը՝ երկրորդային ազդեցությունների բացակայությունը, համեմատ ավանդական ճառագայթային բուժմանը, այն հնարավորություն է տալիս լայնորեն օգտագործել նաև երեխաների բարորակ և չարորակ նորագոյացությունների բուժման ժամանակ: Կենտրոնի բուժված դեպքերի 24 %-ը կազմում է մանկական օնկոպաթոլոգիան (Յուինգի սարկոմա, աստրոցիտոմա, գլիոբլաստոմա, մենինգիոմա և այլն ):
Կենտրոնում փոքրիկ բուժառուների համար նաև օգտագործվում է «Pencil beam scanning» մեթոդը, որն ավելի գերճշգրիտ և արդյունավետ է պրոտոնային թերապիայի մեջ:
Պրոտոնային թերապիան իր ուրույն դերն ունի ուռուցքային հիվանդությունների կրկնության ժամանակ, 50 % -ը արդեն իսկ դիմել են հիվանդության առաջին կրկնությամբ, 22 % ՝ երկրորդ կրկնությամբ, իսկ 20%՝ նախկինում ստացած ճառագայթային բուժումից հետո:
Այցի ընթացքում ձեռք են բերվել պայմանավորվածություններ ինչպես բժշկական կենտրոնների, այնպես էլ այցերին մասնակցած ոլորտային մասնագետների հետ: