14/09/2026
Ծնող և երեխա հարաբերություն
Ընտանեկան երջանկություն ապահովելու գործում հայրը անգնահատելի դեր ունի:
Հոր` ընտանիքի գլխավորի պարտականությունն է` դաստիարակել իր երեխաներին, որպեսզի նրանք դառնան ընտանիքին ու հասարակությանը պիտանի անձինք և հավատարմորեն կատարեն իրենց պարտականությունները:
Ընտանիքը` հայրը, մայրը և երեխաները, անքակտելի մի ամբողջություն են: Ընտանեկան երջանկություն ապահովելը միայն մոր խնդիրը չէ: Հայրերը նույնպես գործունեության կարևոր դաշտ ունեն: Ամուսինը ընտանեկան հարաբերությունները կապող օղակն է, նա իր ուժեղ, անկեղծ, քնքուշ կապվածությամբ միավորում է ընտանիքի անդամներին` մորը և երեխաներին, կազմելով ամուր միություն: Կինը, հանձին նրա, սեր է որոնում, երեխաների դաստիարակության գործում` կարեկցանք ու օգնություն, ինչն, անշուշտ, արդարացի է: Հայրը պատասխանատու է երեխաների համար նույնքան, որքան և մայրը, և հավասարապես պիտի շահագրգռված լինի նրանց բարօրության հարցում: Երեխաները դիմում են հորը` խորհուրդների համար, և նա պարտավոր է իր ավանդը բերել ընտանիքի երջանկությունը կերտելու գործում: Որքան էլ ծանր լինեն նրա հոգսերն ու գործերը դրսում, դրանք չպիտի մթագնեն ընտանիքի ուրախությունը` հայրը պետք է տուն վերադառնա ժպիտով ու բարի խոսքերով:
Հայրերի մեծ մասը բաց են թողնում երեխաներին դեպի իրենց գրավելու և նրանց հետ սերտ կապ հաստատելու բարեպատեհ հնարավորությունները` ձեռք մեկնել նրանց իրենց փոքրիկ դժվարություններում, կապել նրանց սրտերն իրենց սրտերին սիրո ամուր թելերով:
Հայրը սովորականի պես այդ երեկո տուն մտավ հոգնած ու անտրամադիր: Դռների մոտ նրան դիմավորեց հնգամյա որդին.
-Հայրի՛կ, կարո՞ղ եմ քեզնից մի բան խնդրել:
-Իհարկե, ի՞նչ կա, որդի՛ս:
-Հայրի՛կ, դու որքա՞ն ես վաստակում:
-Դա քեզ չի վերաբերում,-բարկացավ հայրը, – և հետո, ինչու՞ է դա քեզ հետաքրքրում:
-Պարզապես ուզում եմ իմանալ, խնդրում եմ, ասա՛, որքա՞ն գումար ես ստանում մեկ ժամվա համար:
-Դե, ընդհանրապես, 2000 դրամ:
Ոտքից գլուխ զննելով հորը` որդին դիմեց նրան.
-Հայրի՛կ, կարո՞ղ ես ինձ պարտքով 1000 դրամ տալ:
-Դու հարցնում էիր, որպեսզի ես ինչ-որ մի հիմար խաղալիքի համար գումա՞ր տամ քեզ: Անհապաղ անցիր սենյակդ ու պառկիր քնելու. մի եղիր այդքան եսասեր: Ես ողջ օրն աշխատում եմ, սարսափելի հոգնում, իսկ դու քեզ անմիտ տղայի պես ես պահում:
Գլուխը կախ, տրտում` տղան անցավ իր ննջասենյակը: Հայրը դեռ կանգնած էր դռների արանքում, և նրա վրդովմունքը տակավին չէր մարել: Որոշ ժամանակ անց նա հանգստացավ և սկսեց սթափ դատել.«ՙԳուցե նրան իսկապե՞ս շատ է անհրաժեշտ այդ գումարը: Ի՞նչ կա որ, կարելի է և այդ 1000 դրամը տալ նրան: Չէ որ տղաս երբևէ գումար չի խնդրել»՚:
Երբ հայրը մտավ ննջասենյակ, որդին անկողնում էր:
-Ի՞նչ է, դու դեռ քնած չէ՞ս :
-Ո՛չ, հայրի՛կ, քունս չի տանում:
-Ես երևի շատ կոպիտ խոսեցի քեզ հետ: Այս օրը ծանր էր ինձ համար: Ես հունից դուրս եկա: Ների՛ր ինձ, վերցրու քո ցանկացած գումարը:
Տղան նստեց անկողնուն և խորհրդավոր ժպտաց.
-Հայրի՛կ, շնորհակալ եմ…
Այնուհետև փոքրիկը բարձի տակից ինչ-որ գումար հանեց: Այդ տեսնելով` հայրը կրկին բարկացավ: Տղան, նայելով հորը, ամբողջ գումարը հավաքեց ու հաշվեց:
-Էլ ինչո՞ւ էիր գումար խնդրում, եթե ունեիր,-շտապով վրա բերեց հայրը:
-Որովհետև իմ գումարը չէր բավարարում, իսկ այժմ լրացավ,-պատասխանեց որդին: -Այստեղ ուղիղ 2000 դրամ է: Հիմա ես կարո՞ղ եմ քեզանից մեկ աշխատանքային ժամ գնել: Խնդրում եմ, վաղը աշխատանքից մեկ ժամ շուտ տուն արի: Ես շա¯տ-շա¯տ եմ ուզում, որ դու մեզ հետ ընթրես…
Այս պատմության հերոսի պես բազում մանուկներ փափագում են իրենց հոր հետ պարզապես մեկ ժամ ավելի անցկացնել, ինչը նրանց համար սովորական մեկ ժամ չէ…
Հայրե՛ր, ձեր երեխաների հետ այնքան ժամանակ անցկացրե՛ք, որքան կարող եք: Ձեր շուրթերից երբեք չպիտի հնչի հիասթափեցնող որևէ խոսք: Ձեր երեխաների հետ եղե՛ք բարի և քնքուշ, բայց ոչ անտեղի ներողամիտ: Թող նրանք սովորեն պայքարել սեփական փոքրիկ անախորժությունների դեմ, ինչպես բոլորը: Նրանց մի՛ խրախուսեք ձեզ դիմել միմյանց դեմ բողոքներով: Սովորեցրե՛ք նրանց լինել հանդուրժող մեկը մյուսի նկատմամբ և ձգտե՛ք փոխադարձ վստահություն ու հարգանք պահպանել: Քնքշանքը զուգակցե՛ք խստությամբ, բարությունն ու կարեկցանքը` հաստատուն որոշումներով: Ձեր ազատ ժամանակի մի մասը նվիրե՛ք երեխաներին, ձգտե°ք նրանց ավելի լավ ճանաչել, նրանց հետ զբաղվե՛ք աշխատանքով և սպորտով, ձե՛ռք բերեք նրանց վստահությունը:
Հա՛յր,
Մի՛ գնա ինձանից առաջ. ես չեմ հասնում քեզ:
Մի՛ գնա ինձանից հետո. ես չեմ կարող տանել քեզ:
Պարզապես գնա՛ իմ կողքով և եղի՛ր ինձ ընկեր:
#լոգոմեդարմենիա
