03/09/2026
Ռևմատոիդ արթրիտ vs օստեոարթրիտ․ ո՞րն է տարբերությունը
🔹 Ռևմատոիդ արթրիտը քրոնիկ աուտոիմուն բորբոքային հիվանդություն է։ Առավել հաճախ ախտահարվում են դաստակների, ձեռքերի և ոտնաթաթերի մանր հոդերը՝ սովորաբար համաչափ։ Բնորոշ են հոդերի ցավն ու այտուցը, ինչպես նաև երկարատև առավոտյան կարկամությունը, որը հաճախ տևում է 30–60 րոպեից ավելի։ Ցավը կարող է պահպանվել նաև հանգստի ժամանակ։
🔹 Օստեոարթրիտը հոդի քրոնիկ հիվանդություն է, որի դեպքում աստիճանաբար փոփոխվում են հոդի բոլոր կառուցվածքները, առաջին հերթին՝ աճառը։ Հաճախ ախտահարվում են ծնկները, կոնքազդրային հոդերը, ողնաշարը և ձեռքերի որոշ հոդեր։ Ցավը սովորաբար ուժեղանում է ծանրաբեռնվածության ժամանակ և թեթևանում հանգստից հետո, իսկ առավոտյան կարկամությունը կարճատև է՝ սովորաբար մինչև 30 րոպե։
📌 Հիմնական տարբերությունը
Ռևմատոիդ արթրիտի դեպքում առաջնայինը իմունային համակարգով պայմանավորված բորբոքումն է, իսկ օստեոարթրիտի դեպքում՝ հոդի կառուցվածքային փոփոխությունները, որոնց կարող է միանալ նաև տեղային բորբոքում։
Միևնույն ժամանակ, միայն ախտանշաններով միշտ չէ, որ հնարավոր է տարբերակել այս հիվանդությունները։ Ճիշտ ախտորոշման համար կարող են անհրաժեշտ լինել բժշկի զննում, լաբորատոր և պատկերային հետազոտություններ։
💬 Պահպանեք հրապարակումը, որպեսզի չշփոթեք ռևմատոիդ արթրիտն ու օստեոարթրիտը։
