09/10/2026
Հարց — Ո՞րն է ստոմատոլոգիական կլինիկաների՝ «ԱՐՄԵԴ» համակարգին միանալու իմաստը։
Պատասխան — Եթե ձգտում ենք առաջընթացի և մեր քաղաքացիներին որակյալ բուժծառայություններ մատուցելու, ապա սա անխուսափելի քայլ է։
«ԱՐՄԵԴ» համակարգը բժշկին հնարավորություն է տալիս ստանալ պացիենտի առողջության վերաբերյալ անհրաժեշտ տեղեկատվություն, օրինակ՝ նրա ալերգիաների, նախկինում կրած հիվանդությունների, իրականացված միջամտությունների և այլ տվյալների մասին։ Սա բժշկին հնարավորություն է տալիս ավելի ամբողջական պատկերացում կազմել պացիենտի առողջական վիճակի վերաբերյալ և պլանավորել առավել օպտիմալ բուժական մոտեցումը։
Պացիենտի հետ իրականացված յուրաքանչյուր բժշկական գործողություն պետք է ունենա իր թվային արտացոլումը, որպեսզի հետագայում, այլ բուժհաստատություն այցելելիս, պացիենտը հնարավորություն ունենա անհրաժեշտության դեպքում իր առողջության վերաբերյալ տվյալները կամ դրանց մի մասը տրամադրել իրեն բուժող հաջորդ բժշկին։
Սա է «ԱՐՄԵԴ» համակարգին միանալու հիմնական իմաստը, և այն բխում է առաջին հերթին պացիենտի, ինչպես նաև պետության և բժշկի շահերից։
Հատված «Էլեկտրոնային առողջապահության ազգային օպերատոր» ընկերության տնօրեն Ավետ Մանուկյանի՝ «Care by SZ Pharma» ստոմատոլոգիական մասնագիտական ամսագրին տված հարցազրույցից։ Հարցազրույցն ամբողջությամբ կհրապարակվի շուտով։
