06/06/2026
Սոցհարթակներում երբեք երկար գրառումներ չեմ անում իմ կյանքի կամ ընտանիքի մասին, բայց մտածեցի, որ գուցե այս մտքերը շատերի համար օգտակար լինեն, հատկապես այն մարդկանց, ովքեր այսօր իրենք են ընտանիք կառուցում կամ մեծացնում իրենց երեխաներին։
Երեկ իմ ծննդյան օրն էր, իմ ամենասիրելի տոներից մեկը։ Գիտեմ, որ շատերը չեն սիրում իրենց ծննդյան օրը, բայց ես կարծում եմ, որ հենց յուրաքանչյուրիս ծննդյան օրն է մեր կյանքի տոնը։
Ամեն տարի այդ օրը ինձ համար նաև երկար ինքնավերլուծության ու շնորհակալության օր է։ Ու ամենից շատ շնորհակալ եմ իմ ընտանիքի համար։
Ես շնորհակալ եմ այն բոլոր արժեքների, որակների ու հատկանիշների համար, որոնք ունեմ։ Իմ բոլոր ներքին հենարանների, համոզմունքների, կյանքի հանդեպ վստահության և ազատ ընտրություններ կատարելու կարողության համար։ Ու ինչքան մեծանում եմ, այնքան ավելի շատ եմ գնահատում ծնողավարության այն մոդելը, որի մեջ մեծացել եմ։
Ես շնորհակալ եմ, որ մեծացել եմ մի ընտանիքում, որտեղ ինձ սովորեցրել են մտածել, ունենալ սեփական կարծիք, հարգել մարդկանց, բայց նաև հարգել իմ սահմանները: Սովորեցրել են հավատալ, որ ես կարող եմ իմ չափով դարձնել աշխարհը ավելի լավը, օգնել մարդկանց ու ցանկացած իրավիճակում մնալ բարի:
Որտեղ սերը երբեք պայմանավորված չի եղել ձեռքբերումներով, գնահատականներով կամ «հարմար» լինելու պահանջով։ Որտեղ ինձ տվել են ոչ միայն հոգատարություն ու ապահովություն, գիտելիքներ ու դաստիարակություն, այլ նաև ազատություն, վստահություն ու պատասխանատվություն։
Տարիների ընթացքում ավելի եմ համոզվում, որ ամենամեծ ժառանգությունը, որ ծնողները կարող են փոխանցել իրենց երեխաներին, բոլոր նյութական երևույթներից շատ ավելի կարևորը, այն ներքին աշխարհն է, որի վրա երեխան հետո կառուցում է իր ամբողջ կյանքը։
Իսկ քույր ունենալն ինձ համար միշտ եղել է ամենամեծ նվերը կյանքից ու իմ ծնողներից։ Ոչ մի բառ չի կարող նկարագրել, թե ինչ մեծ երջանկություն է ունենալ մի մարդ, որի հետ միասին մեծացել ես, կիսել կյանքի ամենատարբեր փուլերը և գիտես, որ անկախ ժամանակից ու հեռավորությունից՝ նա միշտ քո կողքին է։ Տարիների ընթացքում այդ կապը ավելի է ամրանում, ու ես անսահման շնորհակալ եմ դրա համար։
Ու ինչքան էլ կյանքը բերի փոփոխություններ, դժվարություններ ու նոր փուլեր, ես միշտ ինձ հետ կրելու եմ այն տունը, այն արժեքներն ու այն սերը, որի մեջ մեծացել եմ։ 🤍✨
