Respublika Kliniki Uroloji Xəstəxanası

08/09/2026

Bu 5 əlaməti gördükdə vaxt itirməyin!

Bədəninizin verdiyi xəbərdarlıq siqnallarını diqqətsiz qoymayın. Aşağıdakı əlamətlər uroloji problemin göstəricisi ola bilər:

1️⃣ Sidikdə görünən qan
2️⃣ Sidik ifrazı zamanı ağrı və ya yanma
3️⃣ Bel, böyrək və ya qasıq nahiyəsində davamlı ağrı
4️⃣ Sidiyə getməkdə çətinlik, zəif axın və ya sidiyin tam dayanması
5️⃣ Tez-tez və təcili sidiyə getmə ehtiyacı

Bu əlamətlər hər zaman ciddi xəstəlik demək deyil. Lakin onların səbəbini yalnız həkim müayinəsi və müvafiq müayinələr əsasında müəyyənləşdirmək mümkündür.

❗ Sidikdə qan, sidiyin tam dayanması və ya hərarətlə müşayiət olunan güclü böyrək ağrısı təxirəsalınmaz tibbi qiymətləndirmə tələb edir.

Əlamətləri gözardı etməyin - vaxtında müraciət erkən diaqnostikanın əsas şərtidir.

07/09/2026

Bilirdinizmi?

ÜST-nin Beynəlxalq Xərçəng Araşdırmaları Agentliyinin GLOBOCAN 2024 hesablamalarına əsasən, dünyada bir il ərzində 1,5 milyondan çox yeni prostat xərçəngi halı qeydə alınır.

Prostat xərçəngi erkən mərhələdə uzun müddət heç bir əlamət verməyə bilər. Buna görə yalnız şikayət yarandıqdan sonra deyil, yaş və fərdi risk faktorları nəzərə alınmaqla müayinədən keçmək vacibdir.

Ailə tarixçəsi, yaş və müəyyən genetik faktorlar riskin qiymətləndirilməsində xüsusi əhəmiyyət daşıyır. Erkən diaqnostika xəstəliyin vaxtında aşkarlanmasına və uyğun müalicə strategiyasının seçilməsinə imkan yaradır.

Sağlamlığınızı təsadüfə buraxmayın — profilaktik müayinə üçün uroloqa müraciət edin.

03/09/2026

PCNL — böyrək daşlarının dəridən açılan kiçik bir giriş yolu ilə çıxarılması üsuludur.

Perkutan nefrolitotomiya adlanan bu əməliyyat daha çox iri, mürəkkəb və digər üsullarla çıxarılması çətin olan böyrək daşlarında tətbiq edilir. Prosedur zamanı bel nahiyəsində yaradılan kiçik girişdən böyrəyə xüsusi alətlər yönləndirilir, daş parçalanaraq xaric edilir.

PCNL-in tətbiqinə daşın ölçüsü, yerləşməsi, böyrəyin quruluşu, infeksiya riski və pasiyentin ümumi sağlamlıq vəziyyəti nəzərə alınaraq qərar verilir.

Hər böyrək daşı PCNL tələb etmir. Müalicə üsulu uroloji müayinə və görüntüləmə nəticələrindən sonra fərdi şəkildə müəyyənləşdirilməlidir.

21/07/2026

Mif yoxsa doğru?

"Çox su içmək böyrək daşının qarşısını tam alır".

❌ Mif

Kifayət qədər su qəbulu böyrək daşlarının yaranma riskini azaltmağa kömək edən əsas amillərdən biridir. Lakin təkcə çox su içmək böyrək daşlarından tam qorunmaq üçün kifayət etmir.

Böyrək daşlarının əmələ gəlməsinə qidalanma vərdişləri, duzun həddindən artıq qəbulu, genetik meyillilik, bəzi metabolik pozğunluqlar və digər sağlamlıq amilləri də təsir göstərir. Buna görə də profilaktik tədbirlər kompleks şəkildə həyata keçirilməlidir.

Böyrək sağlamlığının qorunması üçün:
✔ Gün ərzində kifayət qədər maye qəbul edin.
✔ Duz və yüksək oksalat tərkibli qidaların qəbulunu nəzarətdə saxlayın.
✔ Balanslı qidalanmağa üstünlük verin.
✔ Hərəkətli həyat tərzi sürün.
✔ Müntəzəm tibbi müayinələrdən keçin.

Unutmayın ki, böyrək daşlarının qarşısının alınması fərdi yanaşma tələb edir. Risk faktorlarının qiymətləndirilməsi və düzgün profilaktik tədbirlərin müəyyən edilməsi üçün həkim-uroloqun məsləhəti vacibdir.

17/07/2026

Hafiz Ağalar oğlu Ağayev 1971-ci ildə Bakı şəhərində anadan olub. 1988-ci ildə orta məktəbi qızıl medalla bitirib.

1988–1995-ci illərdə N. Nərimanov adına Azərbaycan Dövlət Tibb İnstitutunda təhsil alıb. 1994–1995-ci illərdə Akademik Mirməmməd Cavadzadə adına Respublika Kliniki Uroloji Xəstəxanasında internaturadan keçib və həmin xəstəxanada həkim-nefroloq kimi əmək fəaliyyətinə başlayıb.

2006-cı ildə tibb elmləri namizədi elmi dərəcəsini alıb.

Peşəkar inkişafına daim önəm verərək urologiya və nefrologiya sahəsində dəfələrlə ixtisasartırma kurslarında iştirak edib. Belə ki, 26.09.2011–19.12.2011-ci illərdə Berlin/Bakı Təhsil Proqramı çərçivəsində Berlində Humboldt klinikasında nefrologiya üzrə 3 aylıq təkmilləşmə kursu keçib.

2022-ci ildən TƏBİB-in tabeliyindəki Akademik Mirməmməd Cavadzadə adına Respublika Kliniki Uroloji Xəstəxanasının Hemodializ şöbəsinin müdiri vəzifəsində çalışır və eyni zamanda həkim-nefroloq kimi fəaliyyətini davam etdirir.

Azərbaycan Respublikası Prezidenti İlham Əliyevin 16 iyun 2023-cü il tarixli Sərəncamı ilə səhiyyə sahəsində səmərəli fəaliyyətinə görə "Tərəqqi" medalı ilə təltif edilib.

Hazırda Yeni Azərbaycan Partiyasının xəstəxanadakı təşkilatı komitəsinin sədri kimi də fəaliyyət göstərir.

15/07/2026

15/07/2026

Böyrəklərin normal fəaliyyəti orqanizmin ümumi sağlamlığı üçün mühüm əhəmiyyət kəsb edir. Böyrəklər qanın təmizlənməsində, maye və elektrolit balansının tənzimlənməsində, habelə qan təzyiqinin idarə olunmasında əsas rol oynayır.

Böyrək xəstəlikləri çox zaman ilkin mərhələlərdə simptomsuz keçə bilər, bu səbəbdən aşağıdakı əlamətlərə diqqətli olmaq tövsiyə olunur:

* Sidik ifrazında dəyişiklik (rəng, tərkib və ya tezliyin dəyişməsi)
* Əllərdə və ayaqlarda şişkinlik
* Yorğunluq və halsızlıq hissi
* Bel nahiyəsində ağrı
* Yüksək qan təzyiqi
* Sidik ifrazının azalması
* Yuxu pozğunluğu və iştahsızlıq

Qeyd olunan əlamətlərdən hər hansı birini müşahidə etdiyiniz təqdirdə, vaxt itirmədən müvafiq mütəxəssisə – nefroloqa və ya ailə həkiminə müraciət etməyiniz tövsiyə olunur. Erkən diaqnostika böyrək xəstəliklərinin ağır fəsadlarının qarşısını almaqda mühüm rol oynayır.

15/07/2026

TƏBİB-in İcraçı direktoru Anar Bayramov vətəndaş qəbulu qrafikinə uyğun olaraq 24 iyul 2026-cı il tarixində Qobustan və Şamaxı rayon sakinlərini qəbul edəcək.

📍 Qəbul Qobustan Rayon Mərkəzi Xəstəxanasında keçiriləcək.

📞 Vətəndaşlar [email protected] elektron ünvanına müraciət edə və ya "815" Çağrı Mərkəzi ilə əlaqə saxlayaraq qəbula yazıla bilər.

14/07/2026

13/07/2026

Hörmətli pasiyentlər!

Göstərdiyimiz tibbi xidmətlərin keyfiyyətini daim artırmaq məqsədilə fikir və təkliflərinizi bizimlə bölüşməyinizi xahiş edirik.

Rəyinizi bildirmək üçün QR kodu skan edə bilərsiniz.