港伴 HKCS

Directions Contact the practice

港伴 HKCS 喺BC省註冊嘅非牟利組織，成員喺最近由香港移居溫哥華嘅RCCs (Registered Clinical Counsellor), 希望可以為近年移居BC省嘅港人提供心理情緒支援以及推廣情緒健康嘅重要性。

【療癒身心系列：隨墨而安 — 酒精墨水畫工作坊】對於未知的未來，我們該如何面對？酒精墨水流動、碰撞、渲染，就像生命中無數個無法預期的轉折。在控制與無法掌控之間，試著放慢呼吸，靜靜觀察與感受。邀請你一起透過酒精墨水畫（Alcohol Ink ...
10/20/2026

【療癒身心系列：隨墨而安 — 酒精墨水畫工作坊】

對於未知的未來，我們該如何面對？

酒精墨水流動、碰撞、渲染，就像生命中無數個無法預期的轉折。在控制與無法掌控之間，試著放慢呼吸，靜靜觀察與感受。

邀請你一起透過酒精墨水畫（Alcohol Ink Art），學習與內在的動盪相處。放下對結果的執念，在色彩的流動中找到平衡與平靜。

🌿 Embrace the uncertainty，隨墨而安。

日期： 2026年11月7日（星期六）
時間：7:00pm - 8:30pm
地點：8711 Alexandra Road, Richmond V6X 1C3
費用：每位$10 （包括所有活動材料費用）
名額：8人
報名方式：https://forms.gle/bvi76F7vgBY8GBCh6 （收到報名資料後將會以電郵方式傳送付款資料，請兩天內付款以確認報名。）
查詢：港伴 Facebook 或 Instagram inbox

備註：
*請穿著可以弄污的衣物出席活動
*須先付費作實才確認成功報名。

感謝號角月刊的訪問!⏳ PR 等待可以好漫長，但人生唔需要停低。面對漫長而未知嘅 PR 審批期，焦慮、無力、失眠、疲累，甚至身體不適，都可能係長期壓力嘅訊號。「港伴」成員 Lily Lin 分享：有啲事情我哋控制唔到，但我哋仍然可以選擇今日...
10/09/2026

感謝號角月刊的訪問!

⏳ PR 等待可以好漫長，但人生唔需要停低。

面對漫長而未知嘅 PR 審批期，焦慮、無力、失眠、疲累，甚至身體不適，都可能係長期壓力嘅訊號。

「港伴」成員 Lily Lin 分享：有啲事情我哋控制唔到，但我哋仍然可以選擇今日點樣生活。 與其不停等待一個未知嘅答案，不如重新思考當初移民嘅初心，好好照顧自己、陪伴家人、維持生活規律，亦容許自己一步一步面對「去定留」嘅選擇。

無論將來點樣，PR 都只係人生其中一部分，唔需要定義我哋嘅價值。

不要讓等待未來，變成停止現在。

詳細訪問內容請參閱：
文字版：https://www.heraldmonthly.ca/newspaper/web/ePaper.php?date=202610&ed=CW

YouTube 版: https://youtu.be/1vqejNACGsg

#港伴 #救生艇計劃 #香港移民 #新移民 #移民加拿大 #心理健康 #情緒健康 #擁抱未知 #活在當下 #照顧自己 #移居港人 #香港人 #移民故事

🎬 港伴送戲飛｜交換故事你有冇一段屬於自己嘅「流散故事」？可能係離開香港嗰一刻、第一次落地另一個城市嘅不安；可能係重新建立生活、搵返歸屬感嘅過程；又或者，只係一啲一直放喺心入面、未有機會同人講嘅故事。今次，我哋想聽你嘅故事。💛🎞️ 10月3...
10/07/2026

🎬 港伴送戲飛｜交換故事

你有冇一段屬於自己嘅「流散故事」？
可能係離開香港嗰一刻、第一次落地另一個城市嘅不安；
可能係重新建立生活、搵返歸屬感嘅過程；
又或者，只係一啲一直放喺心入面、未有機會同人講嘅故事。
今次，我哋想聽你嘅故事。💛

🎞️ 10月31日｜《風繼續吹》放映會
多謝 .ca 嘅戲飛贊助，港伴今次可以送出 4張戲飛，即係 2位朋友，每人2張！

🌱 參加方法好簡單：
1️⃣ 同我哋分享你自己嘅流散／移民故事
2️⃣ 於 10月18日或之前，透過 Facebook / Instagram Inbox 或 Email 聯絡我哋
3️⃣ 如果收到多過兩位朋友嘅分享，我哋會從中選出兩位送出兩張戲飛

🔒 你嘅故事唔會公開。
我哋尊重每一個故事，未經你同意，我哋唔會公開或者分享你嘅內容。
有啲故事，未必需要好完整；
有啲感受，亦未必容易用文字講清楚。
你可以由任何一個你覺得重要嘅片段開始。
你願意講，我哋願意聽。
或者，今次就由你嘅故事開始。🌿

📩 截止日期：10月18日

#港伴 #流散故事 #移民故事 #香港移民 #風繼續吹 #移居港人 #香港人 #情緒健康

《戀．敢．講》 第五集 ｜愛情保鮮法愛情唔係靠感覺維持，而係靠學習。你有冇試過覺得：💭「我明明好愛佢，但點解佢感受唔到？」💭「每次一嘈交，就變成鬥輸贏？」💭「拍拖耐咗，感情好似愈嚟愈平淡？」其實，健康嘅關係唔係冇衝突，而係願意一齊學習點樣溝...
09/09/2026

《戀．敢．講》 第五集 ｜愛情保鮮法

愛情唔係靠感覺維持，而係靠學習。

你有冇試過覺得：
💭「我明明好愛佢，但點解佢感受唔到？」
💭「每次一嘈交，就變成鬥輸贏？」
💭「拍拖耐咗，感情好似愈嚟愈平淡？」

其實，健康嘅關係唔係冇衝突，而係願意一齊學習點樣溝通。

今集《戀．敢．講》，我哋同大家分享幾個經營關係嘅小貼士：

❤️ 認識彼此嘅 Love Language（愛的語言）
🗣️ 用 I-statement 表達感受，而唔係控訴對方
🚫 避開 Gottman 提出嘅「四大溝通地雷」：批評、輕蔑、防禦、冷戰
🤝 衝突後點樣修補關係，比起分對錯更加重要
🌱 每一次爭執，其實都係認識自己同建立更深連結嘅機會。

好多時，我哋以為伴侶唔愛自己，其實可能只係大家表達愛嘅方式唔同。當關係愈安全，就愈容易坦誠、愈願意改變，亦愈能夠一齊成長。

💕 無論你而家拍緊拖、已婚，定係單身，都值得學習建立健康關係——因為最重要嘅，唔係遇到一個完美嘅人，而係學識點樣同另一個人一齊成長。

🎧 收聽《戀．敢．講》第五集《愛情保鮮法》，一齊學習令關係歷久常新！

👇 留言分享：
你覺得自己嘅 Love Language 係咩？又有冇一個維繫感情嘅小秘訣想同大家分享？

#港伴 #戀敢講 #心理健康 #愛情保鮮 #溝通技巧 #情侶相處 #婚姻 #香港人 #加拿大生活 #親密關係 #心理學講愛情 #感情關係 #戀愛的事勇敢講 #移居港人 #心靈健康 #情緒健康

《戀．敢．講》第四集｜「仆街磁石」有無得救？點解有啲人好似總係遇到唔認真、唔尊重人、甚至傷害自己嘅對象？係自己眼光唔好？定係喺關係入面，我哋不知不覺重複緊熟悉嘅模式？今集《戀．敢．講》，我哋想同大家了解一吓「仆街磁石」背後可能經歷過嘅心理狀...
09/02/2026

《戀．敢．講》第四集｜「仆街磁石」有無得救？

點解有啲人好似總係遇到唔認真、唔尊重人、甚至傷害自己嘅對象？係自己眼光唔好？定係喺關係入面，我哋不知不覺重複緊熟悉嘅模式？

今集《戀．敢．講》，我哋想同大家了解一吓「仆街磁石」背後可能經歷過嘅心理狀態。

有時，我哋會：
✨ 明明見到 red flag，仍然選擇留低
✨ 習慣付出、忍耐，將自己嘅需要擺到最後
✨ 覺得只要再努力啲，就可以改變對方
✨ 好驚會失去關係，所以唔敢表達不滿、唔敢設界線
✨ 一次又一次被類似嘅人吸引

呢啲關係模式可能同我哋嘅成長經歷有關，例如細細個點樣學識去表達愛、接受愛同埋點樣去依靠人哋。當一個人好驚被拋低、好需要對方肯定自己，就會好容易將 spotlight 放晒喺對方身上，慢慢唔記得咗：我自己想要咩？我嘅底線又喺邊？

不過，你唔需要一世做「仆街磁石」嘅，改變可以由幾個baby step 開始：

💡 覺察自己一焦慮就想討好、想挽留嘅反應
💡 寫低過往關係嘅 pattern 同 red flag
💡 練習講出需要、拒絕唔舒服嘅事
💡 觀察有安全感嘅朋友點樣建立界線
💡 將注意力帶返自己身上：我值得一段點樣嘅關係？

真正健康嘅愛，唔係靠犧牲自己去換返嚟；而係兩個人都願意尊重、溝通，同用心栽種。

你有冇試過明知唔對路，仍然唔捨得離開？💬

#戀敢講 #戀愛的事勇敢講 #心理學講愛情 #仆街磁石 #感情關係 #依附關係 #焦慮型依附 #界線感 #自我價值 #親密關係

《戀．敢．講》第三集｜Green Flag 定 Red Flag？一段健康關係，你最重視啲咩？如果有人問你：「揀另一半最重要係咩？」你會點答？有人會睇性格、價值觀，有人會睇相處舒服唔舒服，亦有人好著重誠信同情緒管理。近年網絡成日都講「Gre...
08/26/2026

《戀．敢．講》第三集｜Green Flag 定 Red Flag？一段健康關係，你最重視啲咩？

如果有人問你：「揀另一半最重要係咩？」你會點答？

有人會睇性格、價值觀，有人會睇相處舒服唔舒服，亦有人好著重誠信同情緒管理。近年網絡成日都講「Green Flag」同「Red Flag」，但其實每個人心目中嘅標準都唔一樣，因為每個人重視嘅價值觀都唔同。

今集《戀．敢．講》，我哋冇打算話邊個標準先係最好，而係分享咗我哋作為輔導員，同時亦作為普通人，喺多年工作同生活經驗中觀察到，一段健康關係可能會出現嘅 Green Flag，同埋值得留意嘅 Red Flag。

我哋討論咗，一個真正令人感到安心嘅伴侶，未必係完美，而係願意俾你舒服咁做自己、願意分享自己嘅脆弱、懂得回應彼此情緒需要，亦願意探索世界、認識自己，同身邊嘅人建立真誠而尊重嘅關係。呢啲特質未必轟轟烈烈，卻往往係關係可以長久同行嘅基礎。

另一方面，我哋亦分享咗幾個值得提高警覺嘅 Red Flag，例如情緒失控、Passive-aggressive（被動攻擊式）溝通、將過去嘅傷口不斷翻出嚟作為攻擊對方嘅武器，以及缺乏坦誠同信任。好多時真正傷害關係嘅，未必係一次衝突，而係雙方慢慢失去理解、失去溝通，亦失去共同面對問題嘅能力。

不過，我哋都想強調，Red Flag 並唔等於一個人「冇得救」。每個人都有自己成長嘅背景，同埋需要學習嘅地方。重要嘅唔係追求一個零缺點嘅伴侶，而係彼此有冇覺察自己、願唔願意改變，同埋願唔願意一齊經營一段關係。

最後想問下大家，如果只能夠揀一個，你最重視另一半邊一個 Green Flag？又有冇一個 Red Flag，係你無論如何都接受唔到？

歡迎留言同我哋分享你嘅睇法，一齊討論愛情入面嘅大小事。💛

#移居港人 #情緒健康 #戀敢講 #溫哥華 #心理學講愛情 #安全感 #親密關係 #心靈健康 #港伴

《戀．敢．講》第二集｜｜寂寞的心，秒秒叫？！🌙明明有朋友、有伴侶、有工返，點解有時仲係覺得好寂寞？原來「寂寞」唔等於身邊冇人。有另一半，都可以覺得冇人明白；有一大班朋友，都可以覺得冇一個真正可以依靠。第二集《戀敢講》就係同大家傾吓「寂寞」—...
08/19/2026

《戀．敢．講》第二集｜｜寂寞的心，秒秒叫？！🌙

明明有朋友、有伴侶、有工返，點解有時仲係覺得好寂寞？

原來「寂寞」唔等於身邊冇人。有另一半，都可以覺得冇人明白；有一大班朋友，都可以覺得冇一個真正可以依靠。

第二集《戀敢講》就係同大家傾吓「寂寞」——你係想搵個人陪，定係想被真正理解？拍拖、flirt、識更多朋友，係咪就能填補內心嘅空虛？其實，我哋要先學識聆聽自己真正嘅需要。希望被了解同被明白係人類嘅基本渴求，要得到呢種滿足，有時候係要同人有深層次嘅交流，就算再多嘅吃喝玩樂都未必填補得到。

咩叫寂寞、點樣解決寂寞，其實冇標準答案。一個人食飯、睇戲、行街、睇海，未必係可憐；懂得享受獨處，可能正正係照顧自己嘅開始。

當寂寞感湧上嚟，不妨試下：✨ 問自己：我而家真正需要嘅係咩？✨ 主動聯絡一個令你安心嘅人✨ 去散步、親近自然✨ 留啲時間，好好陪伴自己

人類或許需要寂寞——因為透過面對佢，我哋先會慢慢搵到真正需要嘅關係同連結。

你最近嘅寂寞，係「想有人陪」，定係「想有人明」？留言同我哋傾下啦 💬

#溫哥華 #情緒健康 #心靈健康 #移居港人 #戀敢講 #心理學講愛情 #寂寞的心秒秒叫 #孤獨感 #情感性寂寞 #親密關係 #安全感 #自我了解

《戀．敢．講》第一集｜ 世界真係有完美戀愛方程式？！愛情，到底係一種感覺、一種選擇，定只係大腦分泌出嚟嘅化學作用？《戀．敢．講》第一集，我哋由呢個最簡單但又最難回答嘅問題開始，同大家一齊拆解愛情。好多人都形容愛情係心動、係非理性、係見唔到...
08/12/2026

《戀．敢．講》第一集｜ 世界真係有完美戀愛方程式？！

愛情，到底係一種感覺、一種選擇，定只係大腦分泌出嚟嘅化學作用？

《戀．敢．講》第一集，我哋由呢個最簡單但又最難回答嘅問題開始，同大家一齊拆解愛情。

好多人都形容愛情係心動、係非理性、係見唔到對方就會掛住，甚至會覺得「情人眼裡出西施」。原來，呢啲感覺並唔係你幻想出嚟，而係因為戀愛時，我哋嘅身體會分泌唔同嘅化學物質，例如多巴胺、催產素、腎上腺素同安多酚，令我哋感到興奮、依戀、心跳加速，甚至將注意力都放晒喺對方身上。所謂「戀愛腦」，其實某程度上係每一個人墮入愛河時都可能經歷嘅自然狀態。

不過，當熱戀嘅激情慢慢退去，愛情又靠咩維繫落去？我哋今集亦分享咗心理學家 Robert Sternberg 提出嘅「愛情三角理論」。一段成熟而健康嘅關係，唔單止需要激情（Passion），仲需要建立彼此信任同安全感嘅親密（Intimacy），以及願意一齊走落去、共同經營關係嘅承諾（Commitment）。愛情並唔係只靠心動，而係需要兩個人一次又一次選擇對方、理解對方，同埋願意一齊面對關係中嘅高低起跌。

今集我哋除咗分享心理學理論，亦會用生活化嘅例子，同大家討論「戀愛腦」、熱戀期點解會令人失去理性，以及一段關係點樣由激情慢慢發展成更深層嘅連結。

如果你曾經戀愛、準備戀愛，或者對親密關係充滿好奇，希望今集都可以帶俾你一個重新理解愛情嘅角度。歡迎收聽《戀．敢．講》第一集，亦歡迎留言分享你心目中嘅愛情，究竟係一種感覺，定係一個每天都要作出嘅選擇？💛

#心理健康 #香港人 #港伴 #移居港人 #溫哥華香港人 #溫哥華 #戀敢講 #完美愛情方程式 #戀愛腦

我哋從小，努力證明自己夠好、夠叻、夠有能力、夠完美。阿媽教落：「做人要快手快腳。」�「唔好阻住人。」�「唔好成為人哋嘅負擔。」老師教落：「要快。」�「要叻。」�「做得慢，就係唔夠努力。」社會教落：有效率，先叫有用。�有成就，先值得驕傲。�唔...
07/29/2026

我哋從小，努力證明自己夠好、夠叻、夠有能力、夠完美。
阿媽教落：
「做人要快手快腳。」�「唔好阻住人。」�「唔好成為人哋嘅負擔。」
老師教落：
「要快。」�「要叻。」�「做得慢，就係唔夠努力。」
社會教落：
有效率，先叫有用。�有成就，先值得驕傲。�唔拖累人，先值得被尊重。
從細，我哋就被教要展示自己最好嗰一面。
要證明自己有本事。�要收埋自己嘅缺點。�要隱藏自己嘅脆弱。
好似只有愈完美、愈有「生產力」，先至愈有價值。
但當有一日，疾病令你無辦法再維持別人眼中嘅「完美」，你會唔會開始羞恥於呢個被視為有「缺陷」嘅自己？
********************************************************************
每年7月，都係 Disability Pride Month。想改變嘅，係社會點樣理解 Disability。
佢源於1990年7月美國《身心障礙者法案》（ADA），其後逐漸成為全球慶祝身心障礙人士身份、文化、社群同貢獻嘅月份。
想表達嘅係！！
Disability Pride 唔係話 Disability 冇痛苦，亦唔係為有Disability而自豪。
而係Disability 係人類多樣性自然存在嘅一部分，拒絕以Disability為恥。拒絕將自己收埋。拒絕相信只有健康、獨立、快速、有效率，同符合主流標準嘅人，先值得被看見、被尊重、被接納同被愛。
7月 Disability Pride Month 提醒我：
人嘅價值，根本唔需要證明。
也許真正有缺陷嘅，從來唔係殘疾，而係呢個只識得欣賞「完美」嘅標準。

#港伴 #移居港人 #溫哥華 #情緒健康 #溫哥華香港人 #香港人 #情緒支援 #精神健康 #心理健康

【靜觀當下漫步行 2.0】 活動感想港伴連續第二年同溫哥華街坊會合辦「靜觀當下漫步行」，希望透過推廣靜觀，等大家喺日常生活入面可以實踐覺察，好好擁抱每一個當下。有時生活真係太忙碌，忙到我哋都冇好好停落嚟細心觀察自己嘅需要，或者感受身邊環境同...
07/14/2026

【靜觀當下漫步行 2.0】 活動感想

港伴連續第二年同溫哥華街坊會合辦「靜觀當下漫步行」，希望透過推廣靜觀，等大家喺日常生活入面可以實踐覺察，好好擁抱每一個當下。

有時生活真係太忙碌，忙到我哋都冇好好停落嚟細心觀察自己嘅需要，或者感受身邊環境同我哋嘅互動。有參加者分享話，今次活動提醒咗佢哋，原來平時嘅生活節奏真係太急促，平時好少會留意自己同埋身邊嘅環境。亦有人坦白分享，原來「活在當下」真係好難，就算去行山，身邊都有好多嘢令我哋分心；而身邊嘅事物因為見慣見熟，好容易就變得理所當然——我哋每秒鐘都呼吸緊，經常都見到大自然，又有啲咩好睇、好觀察呢？

其實，靜觀就係教我哋重新運用每個人都有嘅好奇心，去觀察同體驗生活。有參加者話，去程同回程嘅感受截然不同，原來只要換個心態，同一條路都可以變成一個全新嘅經歷。其實我哋嘅生活都係一樣：我哋每日可能都重複做緊同一件事，但點樣令到自己心意更新、保持內在嘅好奇心，從而為生活帶嚟一啲新嘅體驗呢？

生活再忙，都記得留返一個呼吸嘅空間比自己。你今日又有冇用好奇心，發現到生活入面一啲平時睇唔到嘅小驚喜呢？歡迎留言同我哋分享。一齊喺每個當下，好好照顧自己！

#靜觀 #港伴

Address

North Vancouver, BC

Website

Alerts

Be the first to know and let us send you an email when 港伴 HKCS posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to 港伴 HKCS:

Shortcuts

Sponsored

Share

Category