04/12/2025
კ ვ ე ბ ი ს პრინციპები.
ამ საკითხზე მრავალი განსხვავებული აზრია. გიზიარებთ ჩვენს აზრს, იმის შესახებ - არა რა, არამედ რ ო გ ო რ იკვებო.
1 ~ ცნობიერად ჭამე. მოერიდე პარალელურად ეკრანის ყურებას (ტელევიზორს, კომპიუტერს, ტელეფონს), საქმის კეთებასა და სხვა ყურადღების გამფანტავ მოქმედებას. დააკვირდი გემოებს, შეგრძნებებს და მხოლოდ ამით იყავი დაკავებული.
2 ~ ზომიერად ჭამე. შენი შესაძლებლობის ნახევარი, ან იმდენი მაინც, რომ კუჭი სრულად არ აავსო.
3 ~ ამჯობინე სეზონური ცოცხალი/უმი/ბუნებრივი საკვები დამუშავებულს, რამდენადაც ჯანმრთელობა გაძლევს საშუალებას.
4 ~ კვებებს შორის შუალედი დაიჭირე, რომ საჭმლის მომნელებელმა სისტემამ დაისვენოს. შიმშილობაც მთელი სხეულის დასვენება და აღდგენაა (მაგრამ მის დაპრაქტიკებამდე რჩევა მიიღე სპეციალისტისგან)
5 ~ გახსოვდეს, რომ საკვები უპირველესად წამალია. ჯანმრთელი კვება სხეულის გარდა ჯანმრთელ გონებასა და მენტალურ მდგომარეობას ნიშნავს! კვების პრინციპების სრული უარყოფა ეტაპობრივად ქიმიურ წამლებზე მიჯაჭვულს გაგხდის.
6 ~ იპოვე შენი კვება და შემდგომ ზოგჯერ დაარღვიე და შეცვალე ის, რომ მიაჩვიო ორგანიზმი ახალს, უცხოს, უჩვეულოს, გახადე მოქნილი და ადაპტირებადი. ასეთი მიდგომა მეტაბოლიზმის, კუჭ-ნაწლავის ვარჯიშია. ორგანიზმს უნდა ჰქონდეს არაჯანსაღ საკვებთან და ტოქსინებთან გამკლავების უნარიც, რადგან დღეს მიწა, წყალი და ჰაერი საშინლად დაბინძურებულია. მაგრამ ეს პრაქტიკა უნდა შეადგენდეს შენი კვების არაუმეტეს 10-20%-ს.
7~ ისწავლე სხეულის მოსმენა და იპოვე შენი პირადი, მარგებელი კვების წესი - დატესტე სხვადასხვა დიეტა, მეთოდი, დააკვირდი და შეისწავლე შედეგები მოკლევადიან და გრძელვადიან პერიოდში, დაადგინე კვების მეცნიერება შენთვის, სუბიექტურად.
8 ~ კვება არაა რელიგია და ფილოსოფია.
9 ~ საკვები უნდა იყოს ჯანმრთელი და გემრიელი ერთდროულად.
10 ~ შენი ხელით შინ მომზადებული საკვები ყოველთვის აჯობებს გარეთ შეძენილს, ბუნებრივი პროდუქტით დამზადებული აჯობებს მზა საკვებს.
11 ~ რა ემოციითაც ჭამ, იმ ემოციას ჭამ. არასოდეს ჭამო გაბრაზებულმა, სევდიანმა, არ ჭამო როცა გეჩქარება. ჭამე მადლიერების განცდით, მშვიდად.
12 ~ არსებობს ხუთი ტიპის საკვები (ყველაზე უხეშიდან უფაქიზესამდე)
ა) საჭმელი - მყარი
ბ) წყალი - თხევადი
გ) ჰაერი - აირადი
დ) სინათლე
ე) ინფორმაცია/სიტყვა/აზრი
მუდმივად კვებაზე ფიქრი მტანჯველია, კვების სრული უარყოფა კი ავადმყოფობა, გზა შუაში გადის.
