19/05/2026
تتفكرو مرة ماضية كي قلتلكم بلي كاين قرارات جديدة راح تطبق على سوق الـ compléments alimentaires؟
بيع المكملات الغذائية راح يكون حصريا عبر الصيدليات، وهذا قرار مهم جدا، خاصة بعد الفوضى لي شفناها في السوق صفحات تبيع، محلات كوسمتيك تبيع، ناس بلا تكوين، وشركات White Label تصنع لأي واحد، وهو يدير packaging ويدخل للسوق بوعود صحية كبيرة.
المكمل الغذائي ماشي bonbon، ماشي parfum، وماشي produit عادي. يدخل لجسم الإنسان، يقدر يتداخل مع الأدوية، يقدر يدير surdosage، ويقدر يضر ناس عندهم أمراض، حوامل، كبار السن، أو ناس يشربو traitement.
من اليوم كمستهلك، كي تحب تشري complément alimentaire، شريه من الصيدلية فقط.
وإذا رحت تشريه من محل كوسمتيك، ولا من باج، ولا من شخص يبيع في السوشيال ميديا، راك تتحمل جزء كبير من المسؤولية.
وأي شركة تصنع أو توزع complément alimentaire خارج الإطار القانوني، أي منتج يتباع خارج الصيدليات، أي صفحة تبيع منتجات صحية بوعود مبالغ فيها، وأي منتج ما عندوش مصدر واضح ومعلومات قانونية، تقدر تبلغ عليه وتدير شكوى للجهات المختصة.
اي زبون يجي للصيدلية هاز boîte في يدو، ويقول نحوس كيفها ولا شفتها فالباج لازم يعرف بلي الصيدلي عندو الحق يسقسي على المصدر، الشركة، المصنع، والتركيبة.
وانا شخصيا، اي منتج مشبوه boîte بلا وضوح، بلا معلومات حقيقية، بلا مسؤولية واضحة، راح نصورها، نبحث على شكون مصنعها، ونبلغ عليها إذا كانت خارج الإطار القانوني.
لأنو خلاص، مرحلة بيع أي حاجة للناس لازم تحبس.
وهنا ندعو الصيدليات وشركات القانونية انها ما تكتفيش غير بالبيع، بل تدير دورات ومنشورات تحسيسية للناس حول المكملات الغذائية
كيفاش تختارها ومنين تشريها وقتاش تحتاجها وقتاش تكون خطيرة وعلاه لازم تستشير الصيدلي قبل الاستعمال
السوق راه يدخل مرحلة تنظيم، وهذا المنشور مهم يتشارك باش يوصل لأكبر عدد من الناس.
المستهلك يسقسي قبل ما يشري، الصيدلي يشرح قبل ما يبيع، والشركات تتحمل مسؤولية المنتج لي راه يدخل لجسم الإنسان.
