30/05/2026
نصيحة مني لكل أب و أم : كي تتفارقو ولا يكونوا مشاكل بيناتكم ما تفتحوش هاذ المواضيع مع ولادكم.
مهما صار، ومهما كان الوجع كبير، كاين حوايج ما لازمش الولاد يعرفوها.
1- ما تحكيوش لولادكم على عيوب الطرف الآخر ولا على الأخطاء والمشاكل اللي كانت بيناتكم. هذي أسرار بين زوج وزوجة وما عندها حتى فايدة للولد ولا للبنت.
2- الأبناء ماشي ساحة حرب. ماشي من حق البنت تعرف واش كانت عيوب أبيها تجاه امها ،
وماشي من حق الإبن يعرف تفاصيل تقصير أبوه ولا أمه.
هاذ الأمور غير تكسرهم من الداخل.
3- الخلافات الكبيرة والمشاكل الزوجية ما تتحكاش قدام الولاد. يمكن تظن بلي راك تكسب تعاطفهم وتخليهم يوقفو معاك، بصح في الحقيقة راك تهدم صورة الأب في عين بنتو، ولا صورة الأم في عين ولدها.
راهم يكبرو بقلب مجروح ونظرتهم للأسرة والعلاقات تتأثر بزاف.
إذا وقع هاذ الشي وخلاص تكلمتو، ما تزيدوش تكبرو المشكلة. اسكتو وخلّو الأمور تهدى.
وإذا سقساوكم الولاد، قولولهم: "الحمد لله، ربي يفرجها وكل شيء يتصلح بإذن الله."
ماشي كل صراحة نافعة، وكاين فرق بين الستر وبين التشهير.
المشكل الكبير كي يولي واحد فيكم يحكي على الآخر باش يربح ولادو لصفو ويقلبهم على الطرف الثاني.
ديننا علمنا: يا تقول خير يا تسكت. راهم بزاف شباب وبنات كبروا متألمين بسبب الكلام اللي كانوا يسمعوه من واحد من الوالدين على الآخر.
إذا ما عندكش كلمة مليحة تقولها على الطرف الآخر قدام ولادك، اسكت وخلي أمرك لله.
إما إمساك بمعروف أو تسريح بإحسان.
حتى إذا كان الفراق، يكون باحترام وأدب وحفظ للكرامة، ماشي بالفضايح وتشويه الصورة قدام الأولاد..
حتى لو أخطأ الوالدين في حق أحدهما الآخر لازم تبقى الصورة نظيفة ؛ لأن العقدة اللي راح يكتسبها الأبناء جراء مثل هذه التعليقات السلبية راج تكبر معاهم و يورثوها لأبناءهم و يبنيو هوما بدورهم عائلات مريضة مستقبلا.
في الأخير، الأولاد كي يكبرو ويفهمو، راح يحملو هموم ومشاكل أكبر منهم..
