طبيب الأطفال د. مزوار عبد الرحيم مستغانم dr. mezouar Pédiatre mostaganem

طبيب الأطفال د. مزوار عبد الرحيم مستغانم dr. mezouar Pédiatre mostaganem نصائح طبية علمية بعيدا عن الحنتيت والعرعار ووذنين الفار 🐭
المتابع على الراس و العين مادام الإحترام متبادلا تسيء الأدب غير شوية يأتيك البلوك من حيث لا تدري
(449)

🔹1-انتبهو الأمهات مرة شفت مولود جديد👶 عنده 3 أيام يعاني من بكاء شديد 😩 وانتفاخ بعد الفحص تبين أنه ماعندهش فتحة الشرج أصل...
24/07/2026

🔹1-انتبهو الأمهات مرة شفت مولود جديد👶 عنده 3 أيام يعاني من بكاء شديد 😩 وانتفاخ بعد الفحص تبين أنه ماعندهش فتحة الشرج أصلا! يعني ملي زاد ماوسخش هذا لازمله عملية جراحية مباشرة 🔪.
🔸2-انتبهو الأمهات لازم نراقبو تبول المولود الجديد الذكر إذا ماقدرش أو يدير بصعوبة ويوجد انتفاخ أسفل البطن هنا لازم يشوفه طبيب بسرعة ونديرو اييكو و راديو أخرى لاحتمال وجود تشوه أسفل الجهاز البولي يحتاج عملية.
🔹3-انتبهو الأمهات إذا رضيعك 👶 يبكي بكاء هستيري(مشي كيما موالف) يتقيأ🤮 و لقيتي شوية دم🩸 في لاكوش هنا لازم إيكو لاحتمال إصابته بانغلاف الأمعاء لي يحتاج عملية.
🔸4-انتبهو الأمهات مازال كاين حالات الضيقة بمرض الربو و التهاب القصيبات الهوائية إذا رضيعك ينهج بزاف و يغيص ويسها وفمه أزرق و حبس الرضاعة اديه للمستشفى حالا.
🔹5- انتبهو الأمهات إذا شفتي مولودك الجديد يبيدالي برجله ويدور في يديه أو يرمش بعينيه أو يمص بشواربه لوحده و بطريقة غريبة ومتكررة عدة مرات في اليوم هذي ممكن لاكريز صوريها و ديها للطبيب يشوف.
🔸6-انتبهو الأمهات إذا ولدك يزيد في الوزن بزاف و بطريقة سريعة جدا لازم تزوري الطبيب ممكن يكون خلل في الهرمونات أو اضطراب في عمل بعض الغدد.
🔹7-انتبهو الأمهات إذا شفتي مولودك عنده أعضاء تناسلية غير واضحة يعني ما يبان لا ولد لا بنت اجري للطبيب هذو الصوالح مافيهمش حشمة و شا يقولو علينا الجوارين!
🔸8-انتبهو الأمهات دايما فلي رضيعك و عسي إذا كاين التفاف شعرة حول أصابع يديه أو رجليه أو حتى عضوه!.
🔹9-انتبهو الأزواج الجدد قبل الزواج ماتتهاونوش في عمل تحاليل الأمراض المعدية هذي مافيهاش ثقة ومش ثقة راهي حياتك في اللعب وربي يحفظ و يشافي كل مبتلى.
🔸10-ربي ستر كنت محضّر هذا المنشور عندي في الهاتف باش ننسخه ونحطه في الصفحة، بالخطأ نسخت قائمة القضيان كنت غادي اليوم ننفضح😬 تلقاو منشور فيه "خاص رطل السلاطة كيلو بطاطا رطل زرودية 2 ريسان ثوم وليكوش" 🤦‍♂️

كتبه

24/07/2026

كل التضامن مع إخواننا المتضررين بهذه الحرائق وكذلك رجال الحماية المدنية الأبطال و الناس المتطوعين الأحرار
وحسبنا الله و نعم الوكيل

قصيدة في نص القايلة في هاذ القصيدة نحكيو على الأكل 🔹🔸اسمعي يا أم و لي مازلتي عروسةهكذا ينصح أطباء الأطفال🔹🔸معلومات جد مه...
24/07/2026

قصيدة في نص القايلة

في هاذ القصيدة نحكيو على الأكل 🔹🔸اسمعي يا أم و لي مازلتي عروسة
هكذا ينصح أطباء الأطفال🔹🔸معلومات جد مهمة و مدروسة
ذوقيه بين الشهر الرابع و السادس 🔹🔸مثل الجزر بطاطا و زيد معاهم الكوسة
بعدها ممكن تعطيه الفاكهة🔹🔸كالموز و التفاح طبعا دايما مهروسة
مسموح ياكل الجبن و الزبادي 🔹🔸وحدها أو مع باقي الأكل ممروسة
أكيد يحتاج البيض و اللحوم 🔹🔸ماتبقايش غي في الخضر محبوسة
ماتنسايش زيت زيتون في كل مرة 🔹🔸 راهي مهمة و فايدتها ملموسة
ديري بعض التوابل تزيد في البنة🔹🔸إلا الملح يُفضّل تكون مسُّوسة
ويشرب الماء بعدما ياكل🔹🔸 هكذا الطريقة وليست معكوسة
المكسرات مطحونة من الشهر السادس🔹🔸مع الأكل أو في الياوورت مغموسة
في الأكل المهم هو النوعية 🔹🔸ماتكونيش بالسمنة ديما مهووسة
بعد سنة اعطيه العسل الحرة🔹🔸ماتخليهاش في البلاكار مدسوسة
وقت الغدا لازم يكون متعة🔹🔸اصبري معه وإياك تكوني عبوسة
إذا كلا مليح كاش نهار🔹🔸شجعيه وقوليلو هاك عمري بوسة
و مع بداية ظهور الأسنان🔹🔸ولفيه يغسلهم راكي عارفة السوسة
طبعا ماكانش كيما الأكل الصحي🔹🔸اخطونا من الشيبس العصير و البسبوسة
كذلك ماكانش كيما الرضاعة الطبيعية 🔹🔸لازم تكون قناعة في عقلك مغروسة
ختاما الله يبعد عليكم الهمّ 🔹🔸سواء فقر أو مرض أو عنوسة

و المتنبي راه حاكم كوانة و يندب من تحت للفوق 😏

كتبه

24/07/2026

تقييد مفاجئ على الصفحة بسبب آخر منشور

23/07/2026

قالك آسيدي الرضاعة تغلظ الراس بعد العامين.. و القماطة تكسل الرجلين ..و الكحل يكبّر العينين.. و البكاء يوسع الرئتين ..و القيء يعرّض المعدة و المصارين... وحليب الأم ماينفعش الغراوين... و البيض يبَلّع الثقب في الشرايين ...هذا الكلام في ألفين و ستاوعشرين ..لذلك تبانلي نهاجر للصين..ندير مشروع تربية المقنين🐦.. سينو غادي نهبل فالحين ..ونزيد البلة للطين أيا تصبحو بخير متابعيا الزينين

كتبه

23/07/2026

ولفيه الرفود

🔹1-لكزيما لي تجي الرضيع 👶 ومايبراش منها بالأدوية احتمال تكون حساسية حليب لازم يتبدل.🔸2-ننصحك من البداية اشري لابنك بيبرو...
22/07/2026

🔹1-لكزيما لي تجي الرضيع 👶 ومايبراش منها بالأدوية احتمال تكون حساسية حليب لازم يتبدل.
🔸2-ننصحك من البداية اشري لابنك بيبرون🍼 بماركة تكون نوعية جيدة ياك أنت صارف صارف 💸 ممكن غي بالبيبرون ينقص عليه المغص و الارتجاع.
🔹3- ستة أشهر الأولى دير بيبرون من زجاج ثم بعدها بلاستيك.
🔸 4- ممنوع منعا باتا تسخين الحليب في الميكرووند.
🔹5-ماتنسايش تبدلي لمولودك الجديد حجم لاكوش من 1 إلى 2 بلخف يكبر عليها مش حتى يولي يخرجله ويديرله الطفح.
🔸 6-ماتكونيش مهووسة بصحة ابنك النهار كامل تقلبي فيه و تدخلي في حالة توتر و خوف تحرمك من الاستمتاع بطفلك و أمومتك..طبعا إذا قالك طبيبك راه مليح.
🔹7-الطفل لي عنده إمساك مزمن قد يصل به الأمر يولي يوسخ على روحه بكمية قليلة بدون ما يشعر يسموه التبرز اللاإرادي فأنت مين تضربه على هذا الشي راح تزيد تأزم الوضع أكثر.
🔸8-مين يكون الطفل رضيع قلشوه و دللوه قد ماتقدرو بصح يكبر شوية لازم تتبدل العقلية 😏.
🔹9-ماتتقلقوش على رقاد الرضيع في النهار وتقولو ما يحبش يقيّل..مين ينعس راح يرقد، مش بالسيف آو .
🔸10-حاولو تديرو إنعاش للحياة الزوجية باش تخرجو من الروتين..مرة في الأسبوع ديرو خرجة مع الأطفال تضحكو وتلعبو فيها لكن بدون منغصات مش الطريق كاملة تفوت غي سڨمي خمارك،دخلي شعرك ،بلّع أنت،اسكت أنت، بابا حبسلي جاتني بولة، ماما راني جيعان، الزوبير رجعني للدار نسيت التيليفون...

كتبه

لكل أم جديدة مرحبا بك في عالم الأمومة الرائع اخترت لك باقة من عبارات الحب و الدعم النفسي لي راح تسمعيها خلال مشوارك 🥰 🔹1...
21/07/2026

لكل أم جديدة مرحبا بك في عالم الأمومة الرائع اخترت لك باقة من عبارات الحب و الدعم النفسي لي راح تسمعيها خلال مشوارك 🥰
🔹1-يا تل راكي حاسبة غي نتي لي ولدتي.
🔸2-مازلتي صغيرة جايا للدنيا ماتعرفيش تربي.
🔹3-بركاي ماتزيدي عليها راكي تشكي بزاف.
🔸4-راكي غي راقدة وسامحة في ولادك.
🔹5- حنا واه بكري كنا نعانو في التربية نتوما جيل الأمهات تاع درك ماكان والو.
🔸6-ولادك راهم ضعاف واش راكي توكليهم.
🔹7-شحال تشكو من الحمل و الولادة أنا ولدي زيدته وحدي في الدار لا قابلة لا والو و راه كي السبع درك.
🔸8-شوفي لالاك فلانة عندها 5 ذراري و قايمة بيهم الله الله وأنت واحد برك حصلتي فيه.
🔹9-ماراكيش تشوفي ولدك غي يشيان..ديريله حليب القوطي.
🔸10-مرة واحد النصاب كتبلي في التعليقات أنا نفك العين و السحر و الشعوذة والتابعة و تعطيل الزواج ونخبطه ببلوك قتله فك غي البلوك هذا مبعد نهدرو 😏

كتبه

20/07/2026

كثرت العروض التجارية و التخفيضات وين ما تروح تلقى بروموصيون القرن باطل يا مواطن..لكن أنا اليوم جبتلكم أفضل من ذلك بكثير ولا مجال للمقارنة أصلا أغلى عرض ومجانا.."كلمتان خفيفتان على اللسان ثقيلتان في الميزان حبيبتان إلى الرحمن سبحان الله وبحمده سبحان الله العظيم"

قصيدة كتبتها اقروها سيلفوبلي هذي أبيات نقولها جديدة 🔸🔹🔸ونّادي كل أم تسمع الكلامولدك الجديد لازم يشوفه🔸🔹🔸طبيب الاطفال ف...
19/07/2026

قصيدة كتبتها اقروها سيلفوبلي

هذي أبيات نقولها جديدة 🔸🔹🔸ونّادي كل أم تسمع الكلام
ولدك الجديد لازم يشوفه🔸🔹🔸طبيب الاطفال في أولى الأيام
يفحصه مليح ويطمنك عليه🔸🔹🔸أنه بصحة وعلى ما يرام
تحية للأسرة لي تحب الإرضاع🔸🔹🔸يعطيكم الصحة ونبلغكم سلام
وندعي ربي لكل محروم 🔸🔹🔸ربي يرزقه ويزيده توام
انتبهو للعدوى واحمو أولادكم🔸🔹🔸العدوى سريعة والنهاية آلام
اغسل مليح ودير البافيت🔸🔹🔸ومادابيكم ماكانش التسلام
تنظيف الأنف وبخاخ الربو🔸🔹🔸هذا هو الحل والباقي أوهام
واسأل طبيب على لحميات الأنف🔸🔹🔸ممكن تكون هي سباب الأسقام
ومش داوي ولدك أنت لوحدك🔸🔹🔸راه كاين طبا هاد شي راه حرام
وتبع العلم والكلام المعقول🔸🔹🔸راك تشوف واش صاري في وسائل الإعلام
كيفاش تقبل من واحد يقولك 🔸🔹🔸زق الحمام فيه الخير الڨدام
و يقولك اغلق المظلة في البيت🔸🔹🔸 تجيبلك الهمّ وماتحققش الأحلام
نظن فهمتو والفكرة وصلت🔸🔹🔸 ربي يسعدكم أحبابي الكرام
ساعفي راجلك في لحظة غضب🔹🔸🔹أهم حاجة عندو هو الإحترام
وأنت أخي رفقا بأهلك 🔹🔸🔹واتق الله عزوجل في المدام
السعادة سهلة في هذي الدنيا🔸🔹🔸لازم فقط تعمرو التزدام

راني خايف كاش نهار نلقى قصايدي يغنوهم في الأعراس .. قصيدة الشاب مزوار في خاطر قاع لي نوفوني😁

كتبه

Adresse

X465+43M
Mostaganem
27000

Heures d'ouverture

Lundi 08:30 - 16:00
19:00 - 22:00
Mardi 08:30 - 16:00
19:00 - 22:00
Mercredi 08:30 - 16:00
19:00 - 22:00
Jeudi 08:30 - 16:00
19:00 - 22:00
Vendredi 10:00 - 12:00
Samedi 08:30 - 16:00
19:00 - 22:00
Dimanche 08:30 - 16:00
19:00 - 22:00

Téléphone

+213697272128

Site Web

Notifications

Soyez le premier à savoir et laissez-nous vous envoyer un courriel lorsque طبيب الأطفال د. مزوار عبد الرحيم مستغانم dr. mezouar Pédiatre mostaganem publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Raccourcis

Partager

Type