Dr. Muhammad Magdy Baby Clinic

10/07/2026

08/07/2026

تحذير .. ممنوع من دخول عياداتي بجميع فروعها سواء
فرع عياده Health clinic في سيلفر مول
أو
عياده Medtown clinic في الحصري
أو
في مستشفى الجابري ..
و ذلك للعلم 😡😡

02/07/2026

انتو بتصنعوا لعب الأطفال اللى هيا دبدوب وقطه وكلب ووزة وعضاضة وشخاليل ومكعبات دى لمين ؟
المفروض تفهموا دماغ الزبون كويس هوا ميحبش الهبل ده .. عاوز فيشة كهربا ..مشترك .. فردة شبشب .. فرشه بلاط ..ريموت ..سكينه..ولاعة .. فرن بوتاجاز شغال ... الخ
فبلاش هيافة واعملولهم الحاجات اللى بتشدهم بجد واعملوا نقلة عالم ف لعب الاطفال هتكسبوا دهب

02/07/2026

حاجات بتحصل لحديثى الولادة و بتلاحظيها على طفلك و تحتارى ياترى ده طبيعى و لا فيه مشكله فى البوست ده هحاول اجمع على قد ماقدر كل الحاجات دى

اللون💥:

1- حديث الولاده يكون لونه احمر بزياده شويه عننا (لان نسبة الهيموجلوبين عندهم اعلى مننا (16 الى 20)
2- الزرقه فى الاطراف ذى الايد و الرجل طبيعية وتتحسن فى اول 24 ساعه
3- الصفراء فى اليوم الثالث و لا تتجاوز بطن الطفل يعنى متتشفش على رجله و الطفل يكون بيرضع كويس ووزنه اكترمن 3 كيلو و مفيش تاريخ مرضى لزيادة صفراء بالاسرة تبقى صفراء فسيولوجيه طبيعية

الراس👶 :

4- لو والده طبيعى ممكن تلاقى الراس مطاوله شويه وفيها ورم او تجمع دموى بسيط وده بيحصل من زنقة الطفل فى الولاده وبيختفى بعد اسبوع الى شهر
5- فتحة الراس بتكون من 2-3 سم و فيه فتحه خلفيه ممكن تكون موجوده و لا تزيد عن 2 سم.

العين👀 :

6- تورم العين طبيعى
7- نزيف تحت الملتحمه (نقطة دم فى بياض العين) طبيعى
8- افرازات من العين و غزارة فى الدموع ده اسمه ضيق فى القناة الدمعية و بيخف بمساج وكمادات وقطره و بيختفى فى الغالبية العظمى من الحالات عند السنه

الأنف👃:

9- الرشح طبيعى و العطس طبيعى والخنفره أيضا

الفم👄👅:

10- رباط اللسان وده بيبقى شكله ذى رباط ماسك اللسان من تحت و هو فى الغالب طبيعى و لا يؤثر على الطفل و نادرا مانحتاج الى قصه
11- رعشة الفم طبيعى
12- ارتجاف الشفاه طبيعى
13- وجود حويصله صغيره لونها ابيض فى سقف الفم طبيعى و بتختفى بعد شهرين

الصدر💖:

14- تورم الصدر طبيعى وقولنا قبل كده متخليش حد يعصره وينزل من الللبن ده اعراض هرمونات من الام وتختفى لوحدها اما لو فيه عروق باينه واحمرار زائد ممكن يكون عمل خراج

البطن و الحوض 😃😘:

15- الفتىء السرى طبيعى و يختفى فى خلال العام الاول ومش محتاج لرباط ولا جنيه ولا حزام سره ولا حد يعمله حجاب😇
16- السرار يقع من 6 الى 14 يوم و يمسح بقطن عليه سبراى مطهر ( كحول 70%)
17- الانتفاخ والمغص اساسى عند حديثى الولاده
18- البراز ينزل اول 24 ساعه ويظل لعدة ايام لونه اخضر ( الجعام)
19- الحزق و العتل اثناء التبرز 😱طبيعى 😃.
20- القشط بعد الرضعه😱 طبيعى 😃.
21- نزول لون بمبى بالبول و تلاحظيه فى البامبرز بتاع الطفل فى اليوم الثالث الى الخامس (متخافيش مش دم ده املاح حمض اليوريك بيكون لونها كده ).
22- بعض نقط دم من المولوده الانثى فى اليوم الثانى الى الخامس طبيعى ودى اعراض هرمونات من الام متقلقيش منها.
23- افرازات مهبليه بيضاء 😱 طبيعى 😄.
24- انتفاخ وتورم الخصيه (كيس ميه على الخصية ) امر شائع ولا يحتاج الى تدخل ويقل و يختفى تدريجيا خلال السنه الأولى
25- وجود خصية معلقه طبيعى وتاحظ فى الشهور الاولى و يستشار الطبيب اذا لم تنزل لكيس الصفن

الاقدام👣:

26- ميل الأقدام لأعلى أو للداخل أو للخارج :نتيجة انقلاب الأقدام في أي اتجاه داخل مربعات الرحم الضيقة، ولكن طالما كانت أقدام الطفل مرنة ويمكن تحريكها بسهولة لتصبح في وضعها الطبيعي؛ فإن ذلك يعني أنها طبيعية، وسوف يصبح اتجاه الأقدام طبيعياً خلال سنة.

الجلد 👶:

27- ظهور شعر ناعم على الظهر والأكتاف طبيعى و يتساقط بالاحتكاك الطبيعي خلال شهر.
28- حب الشباب :حيث تظهر كحبوب الشباب لمدة أيام على وجه الطفل ثم تزول 😇🤔 !! أه اسمه كده حب الشباب ومش عارف ليه كل ماقولها لحد يفكرنى بهزر !!
29- اللماده الشمعية البيضاء على جلد المولود هذا عبارة عن مادة لزجة كانت تسهل حركة الطفل في رحم أمه وتفيد بعد الولادة في حماية جسم الطفل والحفاظ على درجة حرارته
30- عملية التقشير فى الجلد عند الاسبوع الثانى للثالث طبيعية جدا

01/07/2026

اليومين اللي فاتوا ، اكتر الشكاوي و الاستفسارات اللي جايه عندي في العيادة ؛ أن كمية البول قلت جدا او البامبرز ممكن يقعد بالساعات و مفيش فيه بول.
اليومين الحر دول الطفل بيعرق كتير و بيفقد سوائل عن طريق العرق ، و لو متعوضتش كويس ؛ الجسم بيحاول يحافظ على شويه المايه اللي قلت في جسمه عن طريق تقليل كميه البول و بالتالي الأملاح هتزيد نسبيا و تلاقي لون البول بقى اغمق أو واخد اللون البرتقالي.

طب ايه مشكله أن البول كميته قليلة؟
ده معناه أن الطفل داخل في جفاف و الجفاف طبعا مشاكله كتير و هنضطر نعلق محاليل عن طريق الوريد.

طيب بعد ما شرحنا السبب ؛ نعمل ايه بقى يا دكتور؟
لو الطفل أقل من سن ست شهور ، هنزود كميه الرضاعه نخفف الملابس و نشغل المراوح و التكييفات، و في الحالات الشديده ممكن ندي اكياس محاليل جفاف.
لو الطفل اكتر من ست شهور، هنزود من شرب المايه و العصائر و الاكلات اللي فيها كمات كبيرة من السوائل ، و برضه مع المراوح و التكييفات و استحمام على الأقل مرة يوميا.
و لو نفذنا الحاجات البسيطه ديه ، هنلاقي كميه البول اتحسنت مع لون البول رجع لونه يفتح تاني.

شير و انفع غيرك .

د محمد مجدي

01/07/2026

زن الاطفال ده المفروض يصنفوه من اقوي ادوات التعذيب للبشريه.. 🙄🤣🫣

28/06/2026

🤣🤣🤣

28/06/2026

بعد تلات شهور تدريب سباحه، روحت أسأل الكوتش عن مستوي ابني .
بص في الأرض و قالي : بص يا دكتور اعتبره بييجي يستحمى 🫣🫣

27/06/2026

عشان كل أم بتسألني عن وزن ابنها و تقولي أنه خاسس و اقل من وزن ابن عمته ، و طوله أقل من بنت خالته .🙈🙈
لازم تعرفوا أن في اختلافات كبيرة بين الأطفال ، ديه صورة لتوأم مولودين لنفس الام و نفس الكيس و اكيد نفس السنة و وزن واحد فيهم اكتر من ضعف وزن التاني .
الاول وزنه ١٢٠٠ جرام و التاني وزنه ٢٥٠٠ جرام .

فطبيعي لما يكبروا ؛ هيكون في اختلاف في الوزن بينهم مع أنهم كانوا بياخدوا الغذاء من نفس الام .
فتيجي انتي تقارني ابنك مع ابن اخت بنت عمة جوزك .. 😂😂
مادام وزن ابنك بيزيد كويس و ده هتعرفيه بالمتابعة مع دكتور الاطفال و بيتابع طوله و محيط رأسه و كله ماشي مع سنه مظبوط .. متقلقيش .. و ملكيش دعوة بحد.. و ركزي مع ابنك و بس و بلاش مقارنات إذا كان التوائم بينهم اختلافات .
د محمد مجدي

21/06/2026

كل سنة و كل أب طيب ♥️♥️