09/09/2026
بنت داخلة كلية الطب… واكتشفنا بالصدفة إن عينها اليمين نظرها 6/60! 👁️
جتلي امبارح في العيادة بنت، ما شاء الله، داخلة كلية الطب. ❤️
كانت رايحة تعمل الكشف الطبي قبل دخول الكلية، وهناك اكتشفوا إن نظر العين اليمين ضعيف جدًا 6/60، بينما العين الشمال 6/6.
كشفت عليها، واكتشفت إن العين اليمين ضعيفة من فترة طويلة، والأهم إنها عمرها ما كشفت قبل كده ولا لبست نظارة.
للأسف، حصل كسل وظيفي بالعين (Amblyopia) نتيجة عدم اكتشاف ضعف النظر في سن مبكرة، وأصبحت تعتمد بشكل أساسي على العين السليمة.
وفي هذا العمر، علاج كسل العين بيكون أصعب بكثير، وفرص التحسن بتكون محدودة مقارنةً باكتشافه وعلاجه في الطفولة.
ولما سألتها:
"ليه ما قلتيش لأهلك إنك حاسة إن عينك اليمين ضعيفة؟"
قالتلي إنها كانت فعلًا شاكّة إن العين اليمين ضعيفة…
لكنها اتكسفت تقول لأهلها.
وهنا السؤال:
كم طفل تاني ممكن يكون عنده نفس المشكلة، ومحدش واخد باله؟
🔴 ضعف النظر عند الأطفال مش لازم يكون واضح.
الطفل ممكن يتعود على الرؤية بعين واحدة، ويعيش حياته بشكل طبيعي جدًا، من غير ما أهله يلاحظوا إن فيه مشكلة.
علشان كده، فحص نظر الأطفال بشكل دوري خلال سنوات الدراسة مهم جدًا، حتى لو الطفل مش بيشتكي.
زمان كنا بنشوف كشف النظر الدوري في المدارس، ولو الطبيب شك إن الطفل نظره ضعيف، يتبعت جواب لأهله.
يمكن النظام ده قلّ دلوقتي، لكن نقدر نعوضه بالوعي والمتابعة.
ما تستنوش الطفل يقول: "أنا مش شايف".
افحصوا نظر أولادكم بشكل دوري، لأن اكتشاف ضعف النظر بدري ممكن يفرق جدًا في مستقبل نظر الطفل. ❤️
