21/10/2026
من جلساتي 📝
طب يا دكتور اللي انا فيه مبقتش قادره افرق هو ده حب ولا تعلق مرضي ؟! 😞
بصي يا ستي ساعات بنفتكر اننا بنحب حد اوى، و اننا مش قادرين نعيش من غيره بس الحقيقة اننا ممكن نكون متعلقين بيه اكتر ما بنحبه 🤷🏻♀️
_ الحب الطبيعي بيخليك تحب وجود الشخص في حياتك
_ التعلق المرضي بيخليك تحس ان حياتك ملهاش معنى من غيره و كل حاجه واقفه في عدم وجوده
في الحب، بتفرح باهتمامه، لكن مش بتنهار لو اتأخر
في التعلق لو اتأخر فى الرد ممكن يقلب يومك كله قلق وتفكير وخوف انه يسيبك الدنيا تقوم متقعدش 😂🔥
في الحب، بتختار الشخص عشان بتحبه ♥️
في التعلق، ممكن تتمسك بيه حتى لو بيأذيك و تبقي شايفه مش مناسب و مش حابب شخصيته بس تفضل معاه لمجرد انك خايف تخسره و تبقي لوحدك
طيب نعمل ايه بقي 📝🤔
📌 متخليش حياتك كلها تدور حوالين شخص واحد
📌 اتعلم تهدي خوفك بدل ما كل مرة تدور على تطمن من الشخص التاني
📌 حافظ على أصحابك و الناس اللي حواليك، اهتم بنفسك، وارجع للحاجات اللي بتحبها و اعمل روتين لنفسك
📌 اسأل نفسك انا متمسك بالشخص ده عشان انا مرتاح معاه، ولا عشان مرعوب من فكرة انه يمشي؟
📌 التعلق مش معناه انك ضعيف، ساعات بيكون وراه خوف قديم من الفقد او الرفض، ومحتاج تفهمه وتشتغل عليه، مش تلوم نفسك بسببه
الحب انك تختار الشخص وتكون عايزه في حياتك مش تحس انك من غيره مش هتعرف تعيش 👌🏻
