اتزان مع دكتوره دنيا مصطفى

13/08/2025

23/06/2025

من داس على همومه إنتصر، ومن داست عليه همومه انكسر

23/06/2025

حاله النهارده طفل عمره 10 أيام مامته جايباه للإطمئنان عشان إصفر شويه بعد الولادة وطلع عنده نزيف علي المخ بسبب الاهل !









الصفرا اللي بتبدأ من بعد أول يوم دي إحنا بنسميها صفرا فسيولوجية ، بتبقي غالبا نتيجة إن البيبي مرضعش كويس أو كمية اللبن عند الأم قليلة .
بدأنا نفحص الطفل الفحص الروتيني بتاعنا ، الطفل مستوى الوعي عنده منخفض والرضاعه بتاعته سيئه جدا ومش مستجيب معانا للتنبيه والمؤشرات الحيويه بتاعته كلها نازله سواء تشبع الدم بالاكسجين أو النبض و ضغطه ودرجة حرارته قليله مع شحوب بالوجه وبرودة بالاطراف ملحوظة جدا ؛ يعني الموضوع بيدي إحتمال حاجه أكبر من الصفرا او الولد دخل في صدمه بسبب ميكروب بالدم مثلا لكن مبدئيا خلينا نحافظ علي حياته لحد ما يتم التشخيص الدقيق
بدأنا سريعا ندي أدويه الصدمة مع الأكسجين وأدوية معينه بتمنع هبوط الدوره الدموية ،الطفل إلى حد ما بدأ يفوق معانا وبدأنا رحلة البحث عن التشخيص وبعدها العلاج ، في الحالات اللي زي كده بنفكر في أسباب زي نقص في الصفائح الدموية أو نزيف داخلي او انيميا تكسيريه أو ارتفاع سيولة الدم نتيجة نقص عوامل التجلط في الدم وده بيكون غالبا في البيبيهات ناقصي النمو أو ممكن لأسباب وراثية ..

فحصنا الولد تاني وسألنا الأهل هل حصل نزيف من أي مكان أو الولد رجع دم مثلا او فيه تغيير في لون البول أو البراز ، والأهل اجابوا بالنفي ..
طلبت من الممرضة لما تغيرله البامبرز توريني الحمام بتاعه وللأسف زي ما توقعنا كان فيه دم كتير ف البراز ..
سحبنا للبيبي صوره دم و تحاليل كامله طلعت الانيميا وصلت نسبة الهيموجلوبين ل 6 مع ميكروب بالدم ..
بسرعة طلبنا للولد دم وبلازما عشان نصلح الأنيميا والميكروب اللي في دمه وبدأنا نفكر في السيناريو المحتمل الأسوأ (نزيف في المخ )

طلبنا اشعه مقطعيه على المخ وقبل ما الاهل يروحوا يعملوها الطفل بدأ يتشنج مع الأسف وده ييأكد بنسبة كبيرة احتمالية النزيف ودي فعلا كانت نتيجة الاشعه المقطعيه لما طلعت، بس بفضل ربنا إن النزيف مكانش واخد مساحه كبيره في المخ و بدانا نسأل نفسنا إيه اللي يخلي طفل في العمر دا يجي بنزيف في المخ اكيد موقعش من السطح مثلا ! ولو كان وقع من إيد أهله كانوا هيعرفونا وكانوا يجوا بيه جري في وقتها !!
المهم دلوقتي إن التشخيص تم تأكيده shaken baby syndrome أو" متلازمه الطفل المهزوز " نتيجه الغربله او الهشتكه العنيفه في عمر أيام دي المهم بدأنا نتحرك سريعا في اتجاهين أولا التعامل مع النزيف بحيث يبدأ حجمه يقل ، و ف نفس الوقت نصلح السيولة العاليه ف الدم عشان ميحصلش نزيف أكتر والطفل يمو.ت مننا فجأه .

بدأنا ندي للطفل محلول اسمه مانيتول وده بيستخدم للتعامل مع بعض حالات النزيف بالمخ وبيقلل حجمه ، في نفس الوقت اللي كنا بندي الدم والبلازما والمضادات الحيويه والمحاليل وعلاجات التشنجات وبنتابع العلامات الحيويه كل ساعة ..
بلغنا استشاري المخ والأعصاب وطلب نكمل على نفس البروتوكول اللي ماشيين عليه مع وضعه تحت الملاحظة المستمرة ..

الولد بعد 5 ايام معانا بدأ يستقر ، والتشنجات وقفت والانيما والسيولة اتصلحوا والعلامات الحيوية اتظبطت وبدأ الرضاعة والتنفس الطبيعي طلبنا اشعه مقطعيه جديده وبفضل الله مفيهاش حاجه ، وبعدها بيومين الأهل جم عشان يستلموه من الحضان
كان أول سؤال سألناه للأهل لما جم : انتوا عملتوله سبوع ؟
وبكل سرور وانشراح قالوا ايوه طبعا عملنا سبوع، ده أول طفل لينا ولازم نفرح بيه ..
وطبعا حطيتوه في الغربال وغربلتوه ؟
وبانشكاح أكبر من الاولاني : طبعا غربلناه عشان يطلع قلبه جامد !!

طيب يا جماعة اللي انتوا عملتوه ده أقذر حاجه ممكن تتعمل للبيبي اللي لسه مولود وده كان السبب إن الولد يحصل عنده تكسير في كرات الدم الحمرا والصفايح واحتمالات كبيره للنزيف ، من اخطرها نزيف المخ لأن البيبي بتبقى الأوعية الدموية للمخ عنده بتبقى هشه جدا وعرضه للتمزق والنزف بسهولة جدا ..وكان ممكن الولد ده يعيش باعاقه بدنيه أو ذهنية أو الاتنين مع بعض طول عمره بسبب الحركة دي ..
الشاهد من القصه : رجاء حار من الأهل بلاش تغربلوا ولادكم وهما هيطلعوا إن شاء الله قلبهم جامد وحلوين وطعمين من غير غربله

31/03/2025

في ناس بتفتكر إن علاقتهم بأهاليهم كانت “عادية”… لحد ما يشوفوا حاجة زي لام شمسية كده .









وفجأة، القلب يتقبّض…
وتبدأ تسأل: هو أنا كنت متشاف؟
هو كنت محبوب ولا كنت مجرد “مسؤولية”؟
هو أنا اتربّيت في حضن آمن؟ ولا حضن خايف ومرتبك زي حضن رباب أو حضن نيلي أو حضن أم وسام؟
…
كل واحد فينا شاف جزء من نفسه، من أمه، من أبوه، من طفولته، من ناس عايشه حواليه أو مر عليهم في حد من الشخصيات.

انا عارفه اللي هاكتبه هنا ممكن يكون تقيل عشان كده لو انت بتتأثر متكملشي قرايه،
في المسلسل شفنا دور الأب …. الاب في لام شمسية ماكانش بيضرب، ولا بيزعّق… بس كان غايب.
غايب بروحه، غايب بضميره، غايب بإنسانيته. كان طفل في جسم كبير مش بيجرح بالكلام لكن افعاله تموت.

الغياب مش لازم يبقى سفر… أوقات بيبقى جوه البيت، وإنت قاعد… وإنت “مش موجود”

اما الامهات فكان عندنا انواع من الامهات اللي كتير بنشوفها حوالينا و انا كمان باشوفها في العياده النفسيه كتير ، الأم المضحيه ( نيلي) اللي عايشه دور أم لجوزها و عيالها و ناسيه نفسها و مشاكلها اللي معطلها و ده بتصحي علي كابوس زي الخيانه الزوجيه أو ادمان حد من الاولاد و الام ده علي قد طبيتها وحنيتها علي قد ما مشاعرها الطاغيه طول الوقت بترعب اللي حواليها، و لكن واحدة من أكتر الشخصيات اللي وجعتنا (هبه) الام اللي مش عارفه تبقي أم لكن بتحاول و بتقرب ابنها شويه و شويه تتجاهله و الام المنسحبة ( رباب) و ده قررت انها تنسحب بمرضها عن المواجهة و انها تسيب الشخص اللي بيأذيها أم بقي أخطر الامهات كانت عندنا أم وسام.
الأم اللي كان شكلها تقليدي، كلامها تقليدي، بس جواها فيه عنف دفين، ومخزون من الإساءة بيطلع على شكل “تربية”…
لكن الحقيقة؟
الإساءة النفسية عمرها ما كانت تربية.
والسيطرة مش حب…
والقهر مش حرص…والشتيمة مش وسيلة تعديل سلوك!
أم وسام كانت نموذج للأم اللي اتعلمت إن الحب يعني خوف، وتحكم…
بس النتيجة كانت ولد بيحترق، وبيحاول يرضيها وهو بيختنق.
ولد مش قادر يحب نفسه… لأنه عمره ما حس إنه محبوب.
ولد قرر يبوظ كل اللي أمه صنعته بشكل غير واعي و ده اللي بنشوفه بين جدران العياده النفسيه، سواء بالادمانات السلوكيه او الادمانات المواد المخدره يمكن يقدر الادمان ده يعوض الحب اللي ناقص جواهم .
و للاسف بيقي جواهم ولد غضبان محترق داخليا ابن ناس مهمين في المجتمع لكن عاوز يأذي نفسه و يأذي الاخرين كجزء من عدم تصديقه انه يستاهل يبقي موجود ،.

وده يخلينا نسأل السؤال الأهم:
طب نعمل إيه؟ إزاي نكسر السلسلة؟

العلم النفسي مش بيقف عند التشخيص…
العلاجات الحديثة زي الـ EMDR، والعلاج السلوكي الجدلي (DBT)، والعلاج بالمخططات (Schema Therapy) بقت أدوات قوية لعلاج الصدمات النفسية، سواء كانت صدمة كبيرة أو سلسلة من الإساءات الصغيرة اللي بتحصل كل يوم في البيت من غير ما نحس.

EMDR مثلاً بيساعد الشخص يعيد معالجة الذكريات المؤلمة بطريقة ما تفضلش تلاحقه في كل لحظة.

والـ DBT بيعلّم الناس المهارات اللي ما اتعلموهاش في بيوت الاضطراب:
زي ضبط المشاعر، وبناء علاقات صحية، والمرونة النفسية.

والأجمل؟
إن الناس اللي اتوجعت، ممكن تتعافى…
ممكن تعيش من غير جلد للذات، ومن غير لوم دائم، ومن غير خوف مزمن من الرفض.

⸻

ولو كنت أب أو أم، خُد خطوة واعية، وانظر لجواك قبل ما تمد إيدك أو ترفع صوتك… لأن الطفل اللي قدامك، بيكوّن صوته الداخلي دلوقتي… وده الصوت اللي هيفضل معاه طول عمره.

“مفيش حد بييجي الدنيا مستعد للأذية… بس كلنا نقدر نختار….. اه و الله ممكن نختار و نربي نفسنا من جديد ، ممكن نتعلم، نتغير، ونحب بوعي.”

30/03/2025

العلاقات النرجسية تستهلكك بصمت
شخص يعطيك جرعة حب، ويسحبها فجأة! يخليك دايمًا محتار، ومرتبك، ومش عارف حالك.

الحل؟

اعرف قيمتك،

ارسم حدود واضحة،

لا تبرر،

وابتعد بهدوء… لأن كرامتك مش قابلة للتفاوض

22/01/2025

لما الذكر بيدخل العلاقة تركيزه الأساسي بيكون من مدخل العلاقة الجنسية ..








أما الأنثى لما بتدخل العلاقة بيكون تركيزها الأساسي من مدخل العاطفة ..

وبالتالي وقت التعارف والخطوبة بيكون الطرفين واقفين عند مدخل العاطفة (اللي هو بيبسط الأنثى)

ولكن بعد الزواج بتصطدم الأنثى في مدخل الذكر وبتشكك في عاطفته لإن هو بيعبرلها بطريقته الذكورية وهي مش قادره تستوعبه ..

فتكون جواها صراع وبتحتاج وقتها إنها تطمن ولكن في نفس الوقت الذكر بيكون جواه صراع وبيشكك في رغبتها له ..

فيحصل مشاكل كتير جدا وهما الاتنين منتظرين إن حد منهم يطمن التاني ..

ودي بقى بداية الفجوه ..

وعلشان كدا مهم إن الأنثى تعرف مدخلها ولكن كمان تعرف الذكر وطريقته ..

والذكر زي ما هو واعي بالمدخل بتاعه فهو كمان محتاج يدرك أهمية مدخل الأنثى ..

وعلشان كدا ضروري جدا إن الذكر هو اللي يطمن الأنثى ويشبع عاطفتها علشان تقدر تتحرك معاه للعلاقة الجنسية ..

الذكر بيقدر يقوم بالعلاقة الجنسية من غير عاطفة ولكن الأنثى مش بتعرف تعمل كدا (إلا لو عندها اضطراب في أنوثتها) ..

فإنت كذكر محتاج تقدم لنفسك في العلاقة ..

مفيش حاجه اسمها أمال هي متجوزه وفاكره الجواز إيه؟
علشان هي بنسبه كبيره فاكره الجواز كلام حب وأحضان وفسح .....

فهي عارفه إن فيه علاقة جنسية ولكنها مش أولويتها بنفس الزاويه اللي إنت شايف وحاسس الموضوع بيه ..

وعليه إنت دورك تشبع عاطفتها وتغمرها بالأمان علشان تقدروا توصلوا بسلام لعلاقة عاطفية جنسية ..

ومهم إن كل طرف ياخد باله إنه هيتعلم من الرف التاني عن الجزء اللي هو يعتبر مش قوي فيه ..

فإنتوا مختلفين ولكن كل طرف بيدرك الاختلاف وبيتعلم وبيعلم الآخر واحده واحده علشان يحصل حال من المودة والرحمة والسكن ..✨️

16/11/2024

من آراء الحضور ❤️❤️❤️❤️
المحاضره المجانية
بعنوان اخطاء التفكير وكيفية تعديلها

15/11/2024

الأمان في العلاقات بيبدأ من قدرتك على الكلام بتلقائية ..









والتعبير عن اللي جواك من غير ما تفكر ألف مرة ممكن اللي قدامك يفهمه ازاي،
وبيكمل لما الطرف التاني يسمعك مهما عكيت ويقولك "أنا فاهمك وواثق في نيتك مهما خانك التعبير"!

15/11/2024

المحاضره مجانية فى تمام التاسعه مساء

26/10/2024

من آراء حضور ندوة الصحة النفسية للمرأة في ضوء الكتاب والسنه