يلا نطور أنفسنا-Yasmin Abdelaziz

يلا نطور أنفسنا-Yasmin Abdelaziz أخصائي نفسي إكلينكي

التغيير الحقيقي لازم يبدأ من داخل الشخص نفسه﴿إِنَّ اللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنْفُسِ...
26/08/2026

التغيير الحقيقي لازم يبدأ من داخل الشخص نفسه
﴿إِنَّ اللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنْفُسِهِمْ﴾

ولما تدرك إن طيبتك مش هتقدر تغيّر شخص مش شايف أصلاً إن عنده مشكلة أو محتاج يتغيّر… هنا بييجي الوعي ليعلّمنا إن مش كل علاقة تستحق الاستمرار، وإن أحياناً الانسحاب والرحيل بيكونوا الاختيار الأصح🤍🌿




أحياناً بنخلط بين الأمان وبين إن الحياة ما توجعناش✍️في العلاقات، لما شخص يدينا شوية فتافيت من الحلو وسط كتير من الوجع بن...
23/08/2026

أحياناً بنخلط بين الأمان وبين إن الحياة ما توجعناش✍️

في العلاقات، لما شخص يدينا شوية فتافيت من الحلو وسط كتير من الوجع بنقول:
"دي علاقة مش آمنة… أنا مش عايزة أفضل مستنية إمتى هيكون كويس وإمتى هيوجعني."

لكن لما نتألم في الحياة، بنسأل:
ليه ربنا بيسمح بالمرض؟ والفقد؟ والخذلان؟
ليه ندعي، ربنا يفرّجها، وبعدين نمر بابتلاء جديد؟

لأن الأمان مع ربنا مش معناه إننا مش هنتوجع.

الأمان إن الوجع نفسه ما يخليناش نحس إننا لوحدنا متروكين.

الدعاء مش وعد إن كل شيء هيحصل بالشكل اللي إحنا عايزينه، لكنه مساحة نرجع فيها لربنا بكل خوفنا وعجزنا وحيرتنا ونقول:

«يا رب، مليش غيرك.
لو فيه وجع، قوّيني عليه.
لو فيه فقد، ثبّتني وعوّضني.
لو فيه باب مقفول، افتح لي غيره.
ولو فيه حاجة أنا متعلقة بيها ومش خير ليا، ساعدني أسيبها.
ولو الطريق اللي أنا عايزاه مش خير ليا، إديني القدرة أقبل طريقك وأثق في حكمتك حتى لو مش فاهمها.»

اللجوء إلى الله والدعاء له مش بيمنعوا الوجع، لكن بيخلّونا نواجهه وإحنا مش لوحدنا. 🤍🌿

وعشان كده، فيه فرق كبير بين وجع العلاقات السامة، اللي بيخلينا خايفين من تقلب الشخص نفسه:
هل هيحبني؟ هل هيؤذيني؟ هل هيسيبني؟

وبين الحياة، اللي بطبيعتها بتتقلب وتتغير، لكننا مش محتاجين نفسّر كل وجع فيها على إنه تخلٍّي من الله.

﴿وَلَقَدْ خَلَقْنَا الْإِنسَانَ فِي كَبَدٍ﴾

الحياة فيها وجع، وفقد، ومرض، وأشياء مش هنفهم حكمتها كلها.

لكن الأمان مش إنك تعرف إن بكرة مش هيكون فيه وجع…
الأمان إنك تعرف لمين هتروح لما الوجع ييجي 🤍🌿




ناس كتير لما تتأذى من طيبتها بتقرر تاخد اقصى القسوة في التعامل والتجرد من المشاعر عشان تحمي نفسها من الاذى مع إبقاء الجس...
14/08/2026

ناس كتير لما تتأذى من طيبتها بتقرر تاخد اقصى القسوة في التعامل والتجرد من المشاعر عشان تحمي نفسها من الاذى مع إبقاء الجسم في حالة تأهب واستعداد للخطر في أي وقت🤕
بس حابة اوضح احنا كده برضه عايشين في حالة حرب داخلى بدل السلام الداخلي
عشان كده الصح اننا نفهم ازاي نتعامل بطيبتنا في مواجهه الحياة بدون توتر وخوف من اذى تاني
الطيبة مش معناها إنك تسمح بالأذى ولا إنك تدي ثقة بلا حدود ولا انك تكون مستباح طول الوقت
الطبية بوعي معناها:
🌿تتعلم تحط حدود في تعاملك
🌿تقول «لا» للأذى ولأي شيء مش مناسب لقيمك ومبادئك
🌿تعلم تحط كل شخص في مكانته الحقيقية وعلى قد رصيده عندك لأن مش كل الناس تستحق نفس القدر من القرب والثقة والاهتمام
فتفضل طيب لكن بوعي وحدود… عشان طيبتك ما تتحولش لاستنزاف نفسي وصحي🤍



عارفين إيه اللي ممكن يهوّن على الواحد رحلة الحياة؟ إنه يكون عارف هو عايش ليه… وحضوره في المكان بيضيف إيه🤍🌿إنك تدخل كل مو...
07/08/2026

عارفين إيه اللي ممكن يهوّن على الواحد رحلة الحياة؟

إنه يكون عارف هو عايش ليه… وحضوره في المكان بيضيف إيه🤍🌿

إنك تدخل كل موقف وأنت حاسس إن لوجودك معنى، وإن غيابك مش مجرد غياب شخص، لكن غياب شيء كنت بتضيفه أنت بطريقتك.

مش لازم يكون معنى حياتك حاجة عظيمة أو إنجاز يصفق له الناس…
أحياناً المعنى يكون في الأثر الصغير اللي بتسيبه في حياة اللي حواليك.

ربّة منزل مثلاً لو حطت في ذهنها إن من قيمتها في بيتها إنها تكون مصدر للراحة والدفء والبهجة، وإن ابتسامتها وهدوءها وأمانها النفسي يوصلوا لأهل بيتها…
هتبدأ تشوف شغلها بشكل مختلف.
مش مجرد طبخ وتنظيف ومسؤوليات متكررة، لكن حضور بيصنع بيت يشعر فيه أهله بالأمان🤍🌿

وأم لو حطت لنفسها معنى:
"حضوري مع ولادي يكون فيه حب ولعب وضحك وذكريات حلوة."

مش معنى كده إنها عمرها ما هتتعصب أو تغلط…
لكن نيتها وقيمتها اللي عايشة عشانها هتخلي الحب والاحتواء والضحك هم الغالبين على علاقتها بيهم.

ومع الوقت، لما أولادها يكبروا، مش هيكون رصيد ذكرياتهم عنها هو المواقف اللي عصبت فيها فقط…
لكن هيكون عندهم رصيد أكبر من:
"ماما كانت بتحبنا… كنا بنضحك معاها… كنا بنحس بالأمان وهي موجودة."🤍🌿

ونفس الفكرة في الشغل.

لو شخص شايف إن قيمته في مكان عمله إنه يترك أثر طيب، وإن وجوده يكون إضافة للفريق، مش مجرد سلطة وفرض وسيطرة…
هيتعامل بشكل مختلف.

لأنك ممكن تخلي الناس تحترمك خوفًا منك وإتقاء لشرك…
وممكن تخليهم يحترموك لأنهم فعلاً مقدّرينك
وممكن بعد ما تمشي من المكان، يفتكروك بالخير ويقولوا:
"كان وجوده فارق."🤍🌿

وده في رأيي معنى مهم جداً للنجاح والسعي في الحياة برغم معاناتنا.

حتى أنا كأخصائية نفسية، لما أفتكر معنى شغلي:
"ومن أحياها فكأنما أحيا الناس جميعاً"

وأفتكر إن من الممكن ان تكون جلسة واحدة سبب في إنسان يفهم نفسه أكثر، أو يغيّر طريقة تعامله مع أولاده، أو يتوقف عن إيذاء نفسه، أو يستعيد قدرته على الحيا🤍🌿
ساعتها الشغل مايبقاش مجرد ساعات بشتغلها مقابل أجر،
يبقى عندي رسالة وأثر ومعنى.

والمعنى مش بس بيخلينا نتحمل الحياة…
المعنى بيخلينا نحضر فيها بوعي.

كل واحد فينا محتاج يسأل نفسه✍️

أنا عايش عشان إيه؟
إيه القيمة اللي نفسي أضيفها؟
وجودي في حياة الناس بيضيف لهم إيه؟
ولو غِبت… إيه الشيء الجميل اللي هيفتقدوه مني؟

لأن لما الإنسان يعرف قيمته ومعنى وجوده، حتى الأيام العادية بتاخد طعم مختلف.

الأكل اللي بتحضره…
الضحكة اللي بتديها…
الحضن…
كلمة التشجيع…
صبرك على ابنك…
إخلاصك في شغلك…
احتواؤك لشخص متألم…
كلها أشياء ممكن تبدو صغيرة جداً في لحظتها…

لكنها قد تكون المعنى الكبير في حياة شخص آخر🤍🌿

فمتستناش إن حياتك تكون عظيمة عشان تحس إن ليك قيمة.

ابحث عن القيمة اللي تقدر تعيشها كل يوم.
واجعل حضورك في الحياة إضافة… لا مجرد وجود🌿

يمكن أجمل سؤال نسأله لأنفسنا مش:
"أنا حققت إيه؟"
لكن:
"أنا أثّرت في مين؟
وسيبت ورايا إيه من الخير؟" 🤍🌿




مش كل سكوت اسمه صبر... ومش كل تحمّل للأذى فضيلة.في شغلي كأخصائية نفسية، قابلت ناس كتير عاشوا سنين وسط الإهانة، أو العنف،...
11/07/2026

مش كل سكوت اسمه صبر... ومش كل تحمّل للأذى فضيلة.

في شغلي كأخصائية نفسية، قابلت ناس كتير عاشوا سنين وسط الإهانة، أو العنف، أو التقليل من قيمتهم، وهم مقتنعين إن ده صبر ربنا بيؤجرهم عليه.

لكن مع الوقت اكتشفوا إن اللي حصل مش سلام نفسي... ده كان استنزاف للنفس والروح.

الصبر الحقيقي مش معناه إنك تسمح لحد يهينك، أو يكسر كرامتك، أو يؤذيك، وأنت قادر تحمي نفسك، أو تضع حدود، أو تبعد.

في فرق كبير بين:
🌿 الصبر على ابتلاء لا تملك تغييره، كمرض أو فقد.
🌿 وبين الاستسلام لأذى إنسان يملك الاختيار للإصلاح من نفسه، وأنت أيضاً تملك حق حماية نفسك.

﴿وَلَقَدْ كَرَّمْنَا بَنِي آدَمَ﴾
فالكرامة ليست رفاهية... بل قيمة منحها الله لكل إنسان.

ومن الناحية النفسية، الاعتياد على الإهانة لا يصنع شخصية قوية، بل قد يجعل الإنسان يفقد ثقته بنفسه، ويعتاد الألم، ويصدق أنه يستحق ما يحدث له.

وربنا قال:
﴿وَلَا تُلْقُوا بِأَيْدِيكُمْ إِلَى التَّهْلُكَةِ﴾
فالنفس أمانة، وحمايتها جزء من المسؤولية.

ولو كنت محتاج تضع حدود، أو تقول "لا" للأذى، أو تطلب حقك، أو تخرج من علاقة أو بيئة مؤذية... فده مش ضعف، ولا قلة صبر.

بل إن الله قال:
﴿وَلَمَنِ انْتَصَرَ بَعْدَ ظُلْمِهِ فَأُولَٰئِكَ مَا عَلَيْهِمْ مِن سَبِيلٍ﴾

أحيانًا تكون أول خطوة في التعافي هي أن تتوقف عن تسمية الخضوع صبر، وأن تبدأ في تسمية الأشياء بأسمائها.

الصبر لا يُلغي الكرامة... والرحمة بالنفس ليست أنانية.




إزاي ترجع شغفك وطموحك بعد أزمة كسرتك؟أوقات كتير بنفتكر إننا فقدنا الشغف لكن الحقيقة إننا فقدنا الطاقة بعد وجع أو صدمة أو...
07/07/2026

إزاي ترجع شغفك وطموحك بعد أزمة كسرتك؟

أوقات كتير بنفتكر إننا فقدنا الشغف لكن الحقيقة إننا فقدنا الطاقة بعد وجع أو صدمة أو خذلان أو سلسلة ضغوط استنزفتنا

أول خطوة... إرحم نفسك وتصالح مع فكرة إن الإنسان ضعيف

تقبل إنك إنسان وإن الإنسان يضعف ويتعب ويغلط ويقع... وده لا يقلل من قيمته أبداً

الفشل أو التعثر مش نهاية الرحلة لكنه جزء طبيعي منها

اسمح لنفسك تحزن وتحبط وتاخد هدنة لو محتاج... لكن متخليش الهدنة تتحول لإقامة دائمة... ارجع تاني حتى لو بخطوة صغيرة

هات ورقة وقلم✍️واكتب كل اللي بيدور في دماغك...طلع الدوشة اللي جواك ورتب أفكارك
اسأل نفسك:

- إيه اللي واقف في طريقي؟
- إيه اللي محتاج أتعلمه أو أطوره؟
- إيه أصغر خطوة أقدر أبدأ بيها النهارده؟

افتكر إن الشغف مش شرط ييجي الأول... في أوقات كتير الشغف بيرجع بعد ما نبدأ نتحرك.

ولو تقدر خلي دائرة علاقاتك فيها ناس عندهم نفس أهدافك أو بيشتغلوا في نفس مجالك.

البيئة الداعمة والطاقة الإيجابية أحياناً بتكون سبب إنك ترجع تؤمن بنفسك من جديد

ومتنساش تكافئ نفسك على أي تقدم حتى لو كان بسيط. كوب قهوة بتحبه، أكلة مفضلة، مكان بيريحك، أو شخص وجوده بيهون عليك... التفاصيل الصغيرة دي بتجدد الروح.

وفي النهاية... متستغربش إن الطريق صعب، لأن ربنا قال:

﴿لَقَدْ خَلَقْنَا الْإِنسَانَ فِي كَبَدٍ﴾.

الحياة فيها مشقة، لكن قوتنا الحقيقية مش في إننا منقعش وإنما في إننا كل مرة نقع نعرف نقف تاني ونكمل بمرونة وصبر وسلام داخلي

خد وقتك... لكن متفقدش الأمل. يمكن البداية الجديدة تكون على بُعد خطوة واحدة منك 🤍🌿




هذه سنة الحياة...💔أنت تريد وأنا أريد، والله يفعل ما يريد❤️‍🩹نهاية مسلسل "ورد على فل وياسمين" كانت مؤلمة وموجعة... لكنها ...
17/06/2026

هذه سنة الحياة...💔
أنت تريد وأنا أريد، والله يفعل ما يريد❤️‍🩹

نهاية مسلسل "ورد على فل وياسمين" كانت مؤلمة وموجعة... لكنها واقعية جدًا.

وعارفة انه كتير من المشاهدين وانا منهم اتوجعنا من الفقد والنهاية المأسوية وعارفة انه فيه مشاهدين عندهم حالة من الذهول من رد فعل طارق، وأنه سافر واتجوز وخلف وأكمل حياته بعد رحيلها.
استمرار الإنسان في الحياة لا يعني أنه نسي، أحيانًا يعني فقط أنه تعلّم كيف يعيش مع الفقد.
لكن الحقيقة أن سنة الحياة لا تتوقف عند أحد.

الإنسان مطالب بالسعي والمعافرة واستكمال رحلته، مهما كان حجم الفقد والألم. فالحزن حق، والبكاء حق، والاشتياق حق... لكن الغرق في الحزن لن يحيي ميتاً، ولن يغير قدراً كتبه الله.

الحياة مش دايمًا بتدي كل واحد اللي قلبه تمناه، ومش كل قصة حب نهايتها اجتماع الأحبة.

في ناس بنحبها بصدق، وبنعافر عشانها بكل ما نملك، لكن بيبقى للنصيب رأي تاني.💔

وده لا يقلل من قيمة الحب، ولا من صدق المشاعر اللي كانت موجودة.
نحزن...
نتألم...
نقف قليلًا...
نفتقد...
ونحتفظ بذكرى جميلة أو موجعة، ثم نرجع نعافر ونبني حياتنا من جديد.

الأثر يظل موجودًا في الذاكرة، لكن الحياة لا تتوقف عند أحد.

قد نبتسم عندما تلمحنا ذكرى قديمة، أو يسرح عقلنا للحظة في شخص كان له مكانة خاصة في قلوبنا...

لكننا نكمل لأن الإنسان لا يعيش على الذكريات فقط، وإنما على ما تبقى له من حياة أيضًا.❤️‍🩹




بشوف إن من أكبر مميزات توسيع دائرة علاقاتك إنك بتشوف نفسك بعيون وقلوب ناس أكتر...لأن لما تحاصر نفسك في حياة شخص واحد فقط...
16/06/2026

بشوف إن من أكبر مميزات توسيع دائرة علاقاتك إنك بتشوف نفسك بعيون وقلوب ناس أكتر...

لأن لما تحاصر نفسك في حياة شخص واحد فقط ممكن تبدأ تشوف نفسك من خلال نظرته هو وبس ،وتستمد ثقتك وقيمتك من رأيه وحده. ولو كان شخص غير سوي أو نظرته سلبية، هتلاقي نفسك فجأة بتشك في شخصيتك وقيمك ومبادئك، رغم إن المشكلة قد لا تكون فيك من الأساس

لكن لما تخرج للعالم وتتعامل مع ناس مختلفة، وتوسع دائرة معارفك وعلاقاتك، بتبدأ تشوف الصورة بشكل أوسع وأوضح. وقتها بيبقى صعب على شخص واحد يهزك نفسياً أو يخليك تعيد تقييم نفسك مع كل كلمة بيقولها ليك

كل ما بنكبر ونتعامل مع ناس أكتر بنكتشف حقيقة مهمة...

إن قيمتك مش محتاجة إثبات طول الوقت، ومش مطلوب منك تفضل تشرح نفسك أو تدافع عن نواياك لكل حد

في ناس هتفهم كلامك من المكان اللي جواها...
لو جواها راحة وثقة هتشوف فيك الخير
ولو جواها شك أو غضب أو أحكام مسبقة، ممكن تفسر نفس الكلام بشكل مختلف تماماً

وعشان كده متحاولش تحمل نفسك مسؤولية الصورة اللي كل شخص رسمها عنك في دماغه

أنت مسؤول عن احترامك، ووضوح كلامك، وصدق نيتك...🤍🌿
لكن مش مسؤول عن طريقة استقبال الآخرين ليك

ومع الوقت هتكتشف إن اللي عايز يقبلك هيقبلك بعيوبك قبل مميزاتك، واللي مصمم يغلطك أو يرفضك عمره ما هيقتنع حتى لو عملت كل اللي يرضيه

قيمة الإنسان في حقيقته وأخلاقه ووجوده...🤍🌿
مش في محاولاته المستمرة لكسب رضا الجميع💁‍♀️



من أكتر الحاجات اللي لفتت انتباهي في مسلسل ورد على فل وياسمين إنه بيطرح سؤال مهم:هل قيمة كل علاقة في إنها تستمر؟ ولا في ...
15/06/2026

من أكتر الحاجات اللي لفتت انتباهي في مسلسل ورد على فل وياسمين إنه بيطرح سؤال مهم:

هل قيمة كل علاقة في إنها تستمر؟ ولا في الأثر اللي بتسيبه جوانا حتى لو انتهت؟

علاقة طارق وإلهام بالنسبة لي كانت إلتقاء روحين مُنسجمين في وجود بعض، لكن وفق المعايير والتوقعات المتعارف عليها في مجتمعنا كانا شخصين مختلفين في السن والتعليم والظروف والخلفية وطريقة النظر للحياة.

ومع ذلك ترك كل واحد منهما أثراُ في الآخر وأضاف له شيئاً لم يكن موجوداً قبل هذا اللقاء.

إلهام كانت أكثر واقعية ومدركة حجم التحديات والفروق بينهم لذلك كانت تنظر للعلاقة بعين القلب والعقل معاً وتتساءل: هل هذا حب قادر على بناء حياة كاملة؟ أم أن لكل منهما طريقاً مختلفاً في النهاية؟

وده خلاني أفكر في حقيقة بنشوفها كتير في الواقع...

مش كل علاقة اتخلقت علشان تكمل ومش كل حب مكتوب له يستمر العمر كله.

في علاقات بتدخل حياتنا علشان تعلمنا حاجة عن نفسنا، أو تضيف لنا خبرة، أو تساعدنا ننضج، أو تفتح عيوننا على جوانب ما كناش شايفينها، وبعد ما تؤدي رسالتها تمضي.

ولذلك أحياناً بنحزن جداً عندما تنتهي علاقة ما، ونعتبر أن النهاية معناها الفشل، مع أن بعض العلاقات تكون نجحت بالفعل في مهمتها... غيرتنا، ووسعت وعينا، وعلمتنا دروس ما كناش هنتعلمها بنفس العمق بأي طريقة أخرى.

ليس كل من أحببناه كان مقدراً له أن يبقى.

فبعض الأشخاص يكونون رحمة في مرحلة معينة من حياتنا، ينيرون جزءاً من الطريق، ويساعدوننا على رؤية أنفسنا بشكل أوضح، ثم يكمل كل منا رحلته.

لا تقيسوا قيمة العلاقات باستمرارها أو انتهائها...بل في أنه كيف ساعدنا على اكتشاف أنفسنا وأن نصبح نسخة أفضل من أنفسنا ثم يكمل كل منا طريقه وهو يحمل أثراً جميلًا من الآخر🤍🌿



مش كل المعارك محتاجة مواجهة…في معارك، النجاة منها هو الانتصار الحقيقي.ولو علاقة أفسدت جزء منك…فمسؤوليتك دلوقتي إنك ترمّم...
06/05/2026

مش كل المعارك محتاجة مواجهة…
في معارك، النجاة منها هو الانتصار الحقيقي.

ولو علاقة أفسدت جزء منك…
فمسؤوليتك دلوقتي إنك ترمّم نفسك، مش تستنى اللي كسرك هو اللي يصلحك

في الجلسات بشوف سؤال بيتكرر كتير قوي:
"ليه عمل فيا كده؟ أنا عملتله إيه؟"

أوقات كتير بنبقى فاكرين إن التعافي مرتبط باعتراف الطرف التاني أو تفسيره لأذيته…
لكن الواقع إن الشخص اللي أذى، غالبًا مش عنده الوعي الكافي اللي يخليه يفسّر،
ولو عنده الوعي ده… كان من البداية وقف أذى.

بالعكس ده اللي أذاك ممكن:
يبرر أفعاله
يطلعك إنت الغلطان

ويخليك تشك في نفسك لدرجة تقول: "يمكن أنا أستاهل...يمكن العيب فيا...يمكن بتهيألي"

وهنا بيبدأ أخطر نوع أذى… الأذى اللي بيغير نظرتك لنفسك.

في شغلي كأخصائية، دايمًا بركز مع الناس على نقطة مهمة:
التعافي مش مرتبط بالمؤذي
مش مهمته يجاوبك
مش مهمته يعتذرلك
مش مهمته يفهمك

زي محدش بيروح للثعبان يسأله ليه بيعُض ويبُخ سِمه…
ولا للأسد يسأله ليه بيأذي وبياكل البشر…لان ده طبيعتهم

التعافي مرتبط بيك إنت ديه مهمتك:
تفهم إيه اللي حصلك وتأثيره عليك🔦
تحمي نفسك من تكرار نفس الأذى🤚
تعيد ترتيب أفكارك واختياراتك✍️
تبني وعي يخليك تختار صح المرة الجاية🌟

وقول لنفسك وقت ما قبلت الأذى كان على قد وعيي وخبرتي بالحياة ...حاليا عندي خبرة ووعي ومهارات كفيلة تخليني اختار صح المرة الجاية🤍🌿



Address

سموحه/أمام جرين بلازا/خلف قرية عبدالمجيد للمشويات/عمارات المستشارين/أعلي صيدلية هيكل/الدور الأول
Alexandria

Website

Alerts

Be the first to know and let us send you an email when يلا نطور أنفسنا-Yasmin Abdelaziz posts news and promotions. Your email address will not be used for any other purpose, and you can unsubscribe at any time.

Shortcuts

Share

Category