Wesam Mahmoud “Psychologist & Behavioral Therapists”

30/04/2026

18/03/2026

حدودنا النفسية:

الحدود النفسية غالبًا بتتشكل بدري جدًا، جوه علاقتنا بأهلنا.

لو الطفل كبر في بيت بيحترم مشاعره ورغباته —
لو حد سأله: “تحب كده ولا لأ؟”
ولو كلمة “لا” اتسمعت واتقدرت…
غالبًا بيكبر وهو عارف إن ليه حق يكون له حدود.

لكن في بيوت كتير، ده ما بيحصلش.
أحيانًا الطفل بيتعلم من بدري إن الحفاظ على العلاقة أهم من الحفاظ على نفسه.
وإنه لو قال “لا” ممكن يزعل حد… أو يخسره.
فبالتدريج يتعلم إنه:
يرضي الآخرين على حساب نفسه
يتجاهل إحساسه الداخلي
أو يشك أصلاً إن من حقه يرفض.

لما الحب يتعارض مع الحدود
في بعض المواقف المؤلمة، الطفل بيحس إنه لازم يختار بين حاجتين صعبتين:
يا إما يحافظ على قربه من أهله…
يا إما يحافظ على حدوده.
طفل مثلًا ما يحبش حد يقعده في حضنه، لكن لما يرفض يشوف نظرة زعل أو تجاهل.
فيتعلم درسً صامت:
“عشان تفضل محبوب… لازم تتنازل عن اللي مش مريحك.”
ومع الوقت، الدرس ده بيتحول لعادات في العلاقات:
الصمت بدل التعبير
الطاعة بدل الاختيار
أو أحيانًا العكس تمامًا… عدوانية مبالغ فيها.

المشكلة إن العادات دي كانت وسيلة بقاء… لكنها بتتعبنا بعدين
الطفل اتعلمها عشان يحافظ على العلاقة، أو عشان يتجنب الغضب والرفض.
لكن لما يكبر، ممكن يلاقي نفسه:
بيتحمل ما لا يريده
بيتعرض للاستغلال أو الضغط
أو بيحس إنه مجبر يقول “نعم” حتى لما قلبه بيقول “لا”.

🧠 الجسد… أول من يعرف أن حدوده اتعدّت
المثير للاهتمام إن حدودنا مش كلمات بس.
في الحقيقة، الجسد غالبًا بيتكلم قبل الكلام.
ممكن الجسد يقول:
شدّ في الصدر
انقباض في المعدة
نفس قصير
توتر في الفك أو الكتفين
الإشارات دي أحيانًا بتكون طريقة الجسد يقول:
“هنا في حاجة مش مريحة… هنا محتاج حد.”
لكن لو اتعودنا نتجاهل إحساسنا سنين طويلة، ممكن ما نلاحظهاش أصلًا.

️ فالحدود مش كلمات بس… دي كمان لغة جسد
حتى لما نقول “لا”،
لو صوتنا متردد، أو نظرنا للأرض، أو جسدنا منسحب…
الرسالة ممكن توصل بشكل مختلف.
لكن لما الكلام يتوافق مع:
وقفة مستقيمة
صوت واضح
تواصل بصري ثابت
الرسالة بتبقى أوضح:
“ده حدي… وأنا جاد فيه.”
والمفاجأة إن أغلب الناس… بتحترم الحدود الواضحة.

️ الحدود الصحية مش بتبعد الناس… أحيانًا بتقربهم أكتر
كتير مننا بيخاف يقول حدوده لأنه متخيل إن ده ممكن يجرح الآخر أو يبعده.
لكن الحقيقة إن الحدود الواضحة:
بتحمينا
وبتخلي العلاقات أصدق
وبتمنع تراكم الغضب والضيق.
لأن العلاقة الصحية مش اللي مفيهاش حدود…
العلاقة الصحية هي اللي فيها احترام متبادل للحدود.

حتي لو تم سلب حقنا في وضح الحدود في وقت من الاوقات زمان فمع الوقت والممارسة، ممكن نتعلم من جديد:
نسمع إشارات جسدنا،
ونعبّر عن احتياجاتنا بوضوح،
ونفهم إن قول “لا”… أحيانًا هو أول خطوة حقيقية نحو علاقة صحية.
مستوخي من كتاب"العلاج الحسي الحركي"

#نفسيه
#علاقات
#نفسانى

31/12/2025

ازاي ألم المنهج مع ابني بسرعة والحق الوقت🙆

عشان نلم المنهج احنا محتاجين مهارتين ألا وهما😊
إدارة الوقت والتركيز

⭕ أولا نشتغل على التركيز

ازاي اضاعف انتاجية طفلي وأخليه مركز ؟

هانشتغل بطريقة Open book
ودي طريقة فعالة جدا جدا للمذاكرة
أولا : مش كل اللي في الكتاب محتاج يتذاكر
الطريقة كالآتي
هانجيب المخلصات او الملزمة نفتحها قصاد الطفل
ونجيب امتحانات السنين اللي قبل كدة
ومطلوب منه يحل الامتحان بمساعدة الملخص
بمعنى يدور على اجابة السؤال في الملخص اللي مفتوح قدامه
وأتمنى إنك تساعديه الاول يتعلم ازاي يعمل كدة🥰

✓ حد هنا هايسألني طيب والرياضيات او ال maths
هنا هنستخدم اجابات الامتحانات اللي في آخر الملخص
الطريقة دي هاتساعد الطفل يحل المسائل المشابهة
دورك هنا تساعديه يشرح الحل مش يكتبه 🫣
يعني يشرح القانون اللي استخدموه ونغير في المسألة شوية في أرقامها ونشوف هايحلها ولا لأ 💚

أول حاجه هاتكتشفي إن فيه جزء من المنهج أهم من باقي المنهج
بمعنى
الاسئلة المتكررة هاطلعلك الدورس المهمة 😎
اللي التركيز عليها اكتر من غيرها

تاني حاجه شرح الطفل ليكي الاجابة وكتابتها هاتخليه مينسهاش
وبكدة تركيزه هايتضاعف

تالت حاجه الساعتين بتوع الصبح هايغنوكي عن عشر ساعات عمالين نلف حوالين بعض عشان نذاكرهم🥴

✓ هايجيلي أم تقولي مش أما يقعد يذاكر الأول😏

طيب الفترة دي الطفل فعلا بيكون حاسس
انه مش هايلحق حاجة في المنهج
وكدة كدة ضيع خلاص الوقت😞
عشان كده بيكون مش فارق معاه يذاكر او لأ

نحفز بقى 💪

خلينا نتكلم عن تحفيزه في بوست تاني عشان ميطولش مننا البوست اكتر من كده 😊

⭕ إدارة الوقت
وطبعا دي مهارة ضايعة غالبا عند كل الأطفال
عشان كده إنتي اللي هاتساعديه فيها
فمطلوب منك إن الطفل

أولا : ينام اقل حاجه 8 ساعات وينام بدري🛏️😴

لان دا افضل معاد في اليوم المخ بيكون في أفضل أداءه
هو بعد الفجر😎
طيب ازاي انيم الطفل بدري؟
لأ ، أنا مش هانيمه بدري
أنا هاصحيه بدري يوم وأملا اليوم شغل كدة
معلش هاتتعبي معاه

وبليل هانشربه أي حاجة تهدي ليه أعثابه زي الكاموميل
ويفضل في الفترة دي نستخدم مكمل( الماغنسيوم) لانه بيساعد على النوم بعمق

ـ نبدأ الصبح بفطار متوزان وفيه بروتين عالي عشان المخ محتاج تغذية صحية جدا الفترة دي
وزودي دهون صحية زي زيت الزيتون او المكسرات
ـ ساعتين المذاكرة بتوع الصبح دول فيهم الخلاصة
هانقسمهم اربع اجزاء وكل جزء 25 دقيقة مذاكرة وخمس دقايق راحة تقومي الطفل يتنطط وياخد مكافأة ويقعد تاني


#يلامذاكره
#ليلةالامتحان

31/08/2025

الإدمان العاطفي على الماضي – كيف نكسر حلقات التعلق بالأحداث القديمة

فيه نوع من الألم مش بيمشي مع الوقت… لأنه بيتغذّى على عقلنا الباطن طول الوقت.
مش بس "ذكرى"؛ ده إدمان عاطفي. والمشكلة إن العقل بيعامل الماضي كأنه "ملاذ مألوف"، حتى لو كان موجع.

ليه بنتمسّك بالماضي رغم ألمه؟

الأمان الزائف: الألم اللي نعرفه أحيانًا بيبان أأمن من المجهول اللي قدامنا.

الحنين للتفاصيل: ذكريات المواقف، الروائح، الكلمات… بتدي إحساس لحظي بالدفء، حتى لو تسببت في نزيف داخلي.

العقل العاطفي بيفضل التكرار: المشاعر المألوفة بتتحوّل لإدمان، زي مادة كيميائية بيفرزها الدماغ.

الخوف من الفراغ: الماضي حتى لو مؤلم، بيملأ مساحة… والفراغ بيخوف أكتر.

إزاي نكسر الحلقة دي؟

التسمية بوضوح: اعترف إنك "مدمن على استدعاء الماضي"، مش بس "بتتذكر". التسمية بتفك أسر النكران.

قطع الروابط الحسية: الصور، الأغاني، الأماكن… كل دي مش مجرد تفاصيل، دي "أزرار" بتعيد تشغيل الذاكرة. ابتدي بسحب طاقتك منها.

الملاحظة الواعية: كل مرة ييجي خاطر من الماضي، لاحظه زي ما هو… "أهو تكرار تاني" من غير ما تدخل جوا السيناريو.

الاستبدال التدريجي: زي ما الجسم بيتعوّد على إدمان، لازم يتفطم. حط ذكريات جديدة، أنشطة جديدة، عادات مختلفة.

إعادة صياغة الحكاية: الماضي مش عدوك، هو فصل اتقفل. لما تعيد صياغته كدرس أو محطة، بيتحوّل من "سجن" إلى "معلم".

إشارات إنك متحرر فعلًا:

لما تمر على مكان أو شخص مرتبط بالماضي من غير ما يستفزك داخليًا.

لما يكون عندك استعداد تعيش لحظة جديدة بدل ما تعيد تدوير اللحظة القديمة.

لما مشاعرك تبقى أوسع من حدود الحكاية اللي فاتت.

الفارق بين العيش في الماضي والتعلّم منه:

العيش في الماضي = إعادة تشغيل الجرح كل يوم.

التعلّم من الماضي = تحويله لجزء من نضجك.

الماضي مش بيتحرر منك… إنت اللي بتتحرر منه.
وكل مرة تختار الحاضر على حسابه، إنت بتكسر حلقة من حلقات الإدمان.
#علاقات
#نفسانى