Wael sultan وائل سلطان

07/06/2026

أسوأ ما في الأمر...
إنك مطلوب منك إنك تكون المتوقع منك...
إنك تكون عادي...
و الحقيقة...
إن معظم الناس الا قليل...
مش شايفاك من جوة و لا شايفة حالك...
هم غير مهتمين الا بالحاجات اللي تهمهم و تفرق معاهم...
و ده برضه عادي...
و بناء عليه انت لو محتاج تتعلم حاجة...
فهي إنك تعرف تقول إيه لمين...
لإن كشف ما بداخلك لمن لا يهتم لأمرك أو على الأقل لا يستطيع فهمك...
هو ألم جديد يضاف لآلامك...
و زي ما مداواة بعض جراح النفس في كشفها...
زي ما تعرض جرح في جسمك للشمس و الهواء...
فبعض الجراح أمانها في كتمانها...
خليك عادي...
أحسن كتير...
الا مع قليل...
دول وجودهم...
مش عادي...
وجودهم بيفرق كتير...

31/05/2026

30/05/2026

🌊 لما بنعمل العلامة دي تحت المية 👌…

إنت بتقول للي حواليك كلمة OK… أوكيه.

يعني: كله تمام 👍

ودي مش رفاهية…

دي ممكن تبقى علامة حياة أو موت تحت المية وفي الأعماق.

🥶 ممكن أكون بردان…

وأقول لنفسي:

“لو كملت حركة ححس بالدفا…”

👎 لكن مش شرط ده يحصل.

🤿 ممكن الهوا قرب يخلص…

وأقول:

“ما إحنا قربنا نطلع… ولو الهوا خلص آخد من اللي جنبي.”

👎 ممكن يكون هواه قرب يخلص هو كمان…

أو الغطسة تطول لأسباب مفاجئة.

💪 أحس بشد عضل أو وجع في الضهر…

وأقول:

“لو طلعت هطلع المجموعة كلها معايا وهنكد عليهم.”

👎 رغم إن لما أي حد بيعمل كده — وده الصح — عمري ما بزعل.

بالعكس…

بكون مقدّر.

📢 تحت المية بنتعلم إن أول إشارة خطر لازم تتقال.

متستناش الظروف تتحسن لوحدها…

لأنها أحيانًا مبتتحسنش.

🎓 أي حد مبتدئ في الغطس عارف إن كل اللي بعمله ده غلط وخطر.

وأنا كواحد بغطس بقالي سنين…

ومعايا شهادات متقدمة فيه…

عارف ده كويس.

وحافظه.

وبقوله للي معايا.

حتى لو معملتش بيه.

🧠 ده نمط تفكير…

مش نقص معلومات.

🙏 والحقيقة إنه بفضل ربنا…

ده لم يؤدِّ لكوارث.

لكن عمل حاجة أهم…

✈️ خلاني لمدة سنة أسافر أماكن فيها غوص…

ومعايا معداتي كاملة.

وزي ما بروح بيها…

برجع بيها.

🏖️ مش بتلمس المية.

بكتفي بالسباحة والسنوركلينج.

مش بغطس.

مقضيها من على الوش.

💔 الأسوأ إن الثمن مكانش حادثة.

الثمن كان إني بطلت أغطس.

👀 بقيت مراقب للشاطئ…

غريبًا عن العمق الذي كنت يومًا أتنفس فيه.

❤️ الحاجات اللي بتحبها…

هتكون تقيلة عليك.

وممكن كريهة كمان.

لو مش مرتاح فيها.

⚠️ وأصعب أنواع عدم الراحة…

عدم الراحة اللي إنت السبب فيها…

ومسؤول عنها.

❓هل ممكن ده يحصل في الحياة؟

الحقيقة…

انه مش بيحصل غير في الحياة.

👌 مش كل “أوكي” معناها إن كله تمام.

والحمد لله…

مش معناها إنك بخير.

🚶‍♂️ وإن الدنيا ماشية…

مش دايمًا تساوي إنك بتتحرك معاها.

ممكن جدًا تكون شاطر إنك تتحرك فيها…

علشان متبقاش إنت اللي معطل السكة.

⏳ الدنيا في كل الأحوال مش واقفة على إذنك علشان تمشي…

هي ماشية بيك…

ومن غيرك.

🕊️ يمكن إنت اللي محتاج تدي نفسك الإذن تكون فيها…

وإنت مرتاح.

مرتاح…

مش بس بتقول أوكي 👍

❔قولي بقى…

إنت بتقول أوكيه…

وإنت أوكيه؟

أم إنك على نظام:

🤲 “كله على الله إن شاء الله…”

وعايش من على الوش…

🏊‍♂️
بس أهي ماشية…؟

09/05/2026

بفكر نعمل جمعية المعالجين النفسيين لدعم الأهالي… 🫂💸

لأ… مش زي ما فهمتم 😅
إحنا مش حنعالجهم…

علشان ده أمر مشكوك فيه أصلًا 🤷‍♂️

إحنا حنلم من بعض فلوس 💰
ونوزعها عليهم…

يطلعوا بيها عمرة 🕋
يروحوا الساحل 🌊
يشتركوا في Netflix 📺
يعملوا أي نشاط…
غير إنهم يطلعوا عقدهم على عيالهم 🙂💔

أصل إحنا مش عايشين في فيلم ١٠٠٠ مبروك…
اللي نبات فيه… نصحى فيه 🎬⏳

يعني ما يبقاش الأهل مطلعين عين ابنهم:
دونية…
مقارنات…
ضغط…
وتكسير ثقة بالنفس يوم ورا يوم 🪨

يكونوا عملوا اللي عليهم…
ودمروا شخصيته تمامًا 🫠

تيجي إنت بعد كده:
تشتغل معاه 🛠️
والجروب يشتغل معاه 👥
وكل المؤمنين بالإنسان يدعموه ❤️
وهو أصلًا شغال على نفسه كل يوم…

وبعد ما ربنا ينفخ في صورته شوية 🌱
ويبدأ يتحرك…

تلاقي حد راجع يقوله:

“إنت ولا حاجة…
إنت واللي معاك
واللي مصدقينك.” 👏🙂

طيب هو إنت بتجرب كفاءة شغلي مثلًا؟ 😅

ده أنا لو ببيع طبق بايريكس…
مش حترميه على الأرض
علشان تشوفه حيتكسر ولا لأ 🍽️💥

طيب يمكن بعتّه العلاج
علشان بطل ياخد ويدي معاك؟ 🤔

قولت تبعته ياخد وش صيانة 🔧
علشان يرجع يشتغل تحت إيدك تاني…

وعمومًا…
أغراض الجمعية واضحة جدًا 📋

شيلوا إيدكم عنهم ✋
واتسلوا…
وطلعوا عقدكم على أي حاجة غيرهم.

لأن المشكلة عمرها ما كانت في الأذى…

المشكلة…
لما الأذى ييجي
من اللي بنحبهم 💔

وسواء كان بحب أو من غير…
بقصد أو من غير…

يظل اسمه:
أذى

06/05/2026

بمراقبة الأحداث…
في الحياة والعلاقات…
بقيت متأكد جدًا…
إننا ماشيين صح…
وبسرعة مناسبة…
في الاتجاه الغلط…

ودي حاجة تطمّن…
إننا على الأقل عرفنا…
إحنا رايحين على فين…

رحلة سعيدة وآمنة…
ونوصل بالسلامة...

03/05/2026

لما طفل اتضرب من والده أثناء تنفيذ حكم الرؤية في دمياط… 💔
الأطفال هما اللي اتلمّوا واتدخلوا علشان يحموه… 🧒🧒
مفيش حد كبير اتدخل… 🚫

وفي البيوت…
لو الأم اتضربت، ممكن طفلها يتدخل يحميها… 👶🛡️
ويمكن يتضرب معاها كمان… 💥

لكن لو الطفل هو اللي بيتعرض للعنف…
محدش بيتدخل ❗
تحت مسمى: “أبوه وأمه أدرى بمصلحته”…

الطفل بقى:
أداة ضغط… 🔧
وسيلة ابتزاز… 🎭
ناقل رسائل بين أطراف متخاصمة… ✉️

هو “السفنجة” اللي بتمتص الغضب والإحباط… 🧽
والمخاوف اللي مالوش ذنب فيها…

وسيلة لتحقيق أحلام ما اتحققتش… 🎯
أو مجرد “اسم” ينادي بيه الأب: يا أبو فلان…
أو جواز مرور لوجود أم وسط عيلة جوزها… 👑

الطفل بقى:
المُحلِّل لجوازة كان لازم تنتهي…
والسبب اللي بيتقال عليه: “مستحملين علشانك… 😞

لو متربي: يبقى “ابني” ✔️
لو غلط: يبقى “ابنها” ❌
لو نجح: لأهلها 👏
لو فشل: شبه أهل أبوه 😔

أول واحد يتعمل عليه مزاد قدام الناس… 🗣️
وآخر واحد يتسأل هو رايح مع مين لو حيتطلقوا… 🚪

الطفل…
هو الشخص المنسي في قصة المفروض يكون بطلها… 🌫️

ورغم كل ده…
لسه فيه ناس عندها إنسانية… 🤍
ناس ما قستش… وما تخلتش…

لكن في حكايات كتير…
فيه ناس بتفخر بخصوبة نطف مالهاش فضل فيها…
وسابت الأمانة تضيع… ⚠️

يمكن دول محتاجين يربّوا قطة… 🐱
يمكن يتعلموا منها الرحمة…

بس حتى دي مش مضمونة…
لأن القطة بتهرب بولادها…

وفي أوقات كتير…
الشارع بيكون أحن… 🛣️
من بيوت ساكنها وحوش… 👹
لابسين وشوش بشر… 🎭