Dr. Mostafa Abdelaal

Call Directions Contact the practice

Dr. Mostafa Abdelaal اخصائي التغذية السابق للفريق الاول لكرة القدم بنادي سموحة ⚽️ والفريق الاول لكرة السلة بنادي الاتحاد السكندري 🏀

04/10/2026

عمرك سألت نفسك إيه اللي الرياضيين بيشربوه قبل السباق أو الماتش عشان يحسنوا أداءهم؟

واحد من أشهر الحاجات اللي بيستخدمها الرياضيين هو الكافيين.

الكافيين بيقلل الشعور بالاجهاد وبيخليك تتمرن لفترات اطول وبيحسن التركيز والقدرات الذهنية وكمان بيساعد في حرق الدهون عن طريق استخدامها كمصدر للطاقة اثناء التمرين.

الكافيين موجود بشكل طبيعي في القهوة وموجود كمان في مشروبات الطاقة و المكملات الغذائية الي بتحتوي علي الكافيين الي غالبا بتتاخد قبل التمارين والمباريات.

الدراسات اثبتت ان افضل جرعة لتناول الكافيين من ٣-٦ مجم لكل كجم من وزن الجسم وطبعا الجرعة بتختلف من كل شخص لاخر علي حسب مدي حساسيته لمادة الكافيين وتكسرها في جسمه.

لو بنتكلم علي القهوة مثلا تتراوح كمية الكافيين فيها على حوالي من ٦٠-١٨٠ مجم تقريبا وممكن اكتر علي حسب الكمية ونوع البن المستخدم. يعني لو واحد وزنه ٧٠ كيلو ممكن ياخد من ٢٠٠-٤٠٠ مجم من الكافيين قبل التمرين بحوالي نص ساعة عشان يحسن الاداء الرياضي وطبعا زي ما قولنا قبل كده ممكن كمان كمية اقل من ديه وتحسن الاداء وده بيبقي علي حسب كل واحد ومدي حساسيته لمادة الكافيين.

اخر حاجة حاول تبعد عن تناول اي مشروبات تحتوي علي الكافيين قبل النوم بحوالي ٨-١٠ ساعات عشان متتسببلكش في ارق. ولو حسيت بصداع او سرعة في ضربات القلب او توتر يبقي كده انت استهلكت كمية كبيرة منها.

من الافضل طبعا انك تاخد المكملات الغذائية تحت اشراف اخصائي تغذية الرياضيين عشان تتأكد من المكمل انه امن وخالي من اي مواد محظورة.

تحذير هام ⚠️ ‼️ الكافيين ومشروبات الطاقة غير مناسبة للأطفال.

تابعوني ان شاء الله الفترة القادمة حتكلم عن باقي المكملات الغذائية الامنة والي ممكن تحسن الاداء الرياضي.
#تغذيةالرياضيين
#مكملات
#كافيين


19/09/2026

⚠️ اختيار المكمل الغذائي بعشوائية ممكن يوقف مسيرتك الرياضية!

لو أنت رياضي محترف، أو دكتور فريق، أو مدرب، أو أي شخص بيشتغل مع لاعب محترف، مهم جدًا تتأكد إن المكمل الغذائي اللي اللاعب بيستخدمه آمن ومناسب للرياضيين الخاضعين لاختبارات المنشطات.

لأن بعض المكملات ممكن تكون ملوثة بمواد محظورة رياضيًا، حتى لو المادة دي مش مكتوبة على العبوة، وده ممكن يعرض اللاعب لمشكلة في اختبارات المنشطات ويؤثر بشكل كبير على مسيرته الرياضية.

طيب، إزاي نختار المكمل الغذائي بشكل أكثر أمانًا؟

أول حاجة: لازم نراجع مكونات المكمل، ونتأكد إنها لا تحتوي على أي مادة محظورة طبقًا لـ قائمة WADA الحالية للمواد والطرق المحظورة.

تاني حاجة: مش معنى إن المكمل مكتوب عليه “Creatine” أو “Whey Protein” إنه بالضرورة آمن للرياضيين. لأن بعض المكملات ممكن تكون ملوثة بمواد محظورة وغير مذكورة على الملصق.

علشان كده، الأفضل نختار المكملات اللي عليها علامة اعتماد من جهة مستقلة متخصصة في فحص المكملات الرياضية، وأشهرهم NSF Certified for Sport أو Informed Choice، لأن المنتجات دي بتخضع لاختبارات للمواد المحظورة رياضيًا، مع وجود رقابة على جودة المنتج والتصنيع.

وأخيرًا: لو بتشتري المكمل الغذائي من مصر، اتأكد إنه مسجل لدى الهيئة القومية لسلامة الغذاء (NFSA) ويحمل رقم تسجيل الهيئة.

لكن خلي بالك: تسجيل المنتج لدى NFSA لا يعني إنه معتمد من ناحية مكافحة المنشطات أو إنه خضع لاختبارات WADA للمواد المحظورة.

والأهم، اللاعب يفضل دائمًا مسؤول عن المواد الموجودة في جسمه، لذلك اختيار المكملات لازم يتم بحذر شديد وتحت إشراف متخصص في التغذية الرياضية.

تابعوني إن شاء الله، هتكلم الفترة الجاية عن أنواع المكملات الغذائية اللي لها أدلة علمية على تحسين الأداء الرياضي، وإزاي نختارها بشكل آمن.
#تغذيةالرياضيين
#مكملات
#منشطات


“بعد أكتر من سنتين بعيد عن المنافسات… يرجع ويحقق 3 ميداليات في بطولة الجمهورية!”أسر أيمن الكيكي، لاعب نادي سبورتنج، شارك...
17/09/2026

“بعد أكتر من سنتين بعيد عن المنافسات… يرجع ويحقق 3 ميداليات في بطولة الجمهورية!”

أسر أيمن الكيكي، لاعب نادي سبورتنج، شارك في بطولة الجمهورية للجمباز الفني – درجة أولى رجال،

وحقق:

🥈 المركز الثاني في منافسات الفرق مع فريق سبورتنج

🥈 المركز الثاني على جهاز الحركات الأرضية

🥈 المركز الثاني على جهاز حصان القفز

وفخور إني كنت جزء من تجهيز اللاعب قبل البطولة، من خلال تصميم نظام غذائي مناسب له خلال فترة التمرينات والبطولة، وتحديد المكملات الغذائية المناسبة له بهدف دعم وتحسين الأداء الرياضي، مع الحرص على اختيار مكملات آمنة وخالية من أي مواد محظورة.

مبروك لأسر على الـ3 ميداليات 🥈🥈🥈، وبالتوفيق في كل ما هو قادم بإذن الله
#تغذيةرياضيين
#تغذيةرياضية
#جمباز

12/09/2026

كتير من أولياء الأمور بيبقوا محتارين: نحط إيه لأولادنا في لانش بوكس المدرسة؟ 🎒🍱

للأسف، مع ضيق الوقت، كتير من الأهالي بيلجأوا للأكل الجاهز واللحوم المصنعة زي السوسيس والبرجر واللانشون. لكن الافراط في تناول اللحوم المصنعة ممكن يأثر بشكل سلبي على التركيز والنمو عند الاطفال وعلشان كده من الأفضل نقللها قدر الإمكان.

طيب، إزاي نعمل لانش بوكس صحي وسهل ومش محتاج وقت طويل؟

ممكن نستخدم عيش تورتيلا كامل الحبة، ونضيف مصدر بروتين زي فصوص الرومي المدخن او صدور الفراخ المشوية، وممكن نعملهم ناجتس أو ستريبس في الـAir Fryer أو في الفرن. وكمان ممكن نضيف ملعقة من صوص الطماطم، وجبنة موزاريلا، ونعمل بيتزا تورتيلا صحية وسريعة، وطعمها كمان هيكون محبب للأطفال. 🍕

ومتنسوش نضيف الخضروات والفواكه للانش بوكس، زي الطماطم، الخيار، الفلفل الملون، والعنب والموز وغيرها، علشان نوفر للطفل مجموعة متنوعة من العناصر الغذائية.

ولو محتاجين أفكار أكتر للانش بوكس، اكتبوا “لانش بوكس” في الكومنت وأنا هبعتلكم أفكار أكتر.

تابعوني إن شاء الله، هتكلم عن مواضيع كتير مهمة في تغذية الرياضيين، شكرا
#تغذيةالرياضيين
#لانشبوكس

01/09/2026

المتابعة أونلاين بتكون من خلال Zoom، مع متابعة مستمرة لمدة شهر عن طريق WhatsApp، وبيتم تصميم البرنامج الغذائي بناءًا على تقييم شامل للاعب، يشمل:

• نتائج قياس InBody.
• نتائج التحاليل الطبية المتاحة للاعب.
• عدد الوحدات التدريبية وشدة وحجم التدريب.
• العادات الغذائية الحالية.
• احتياجات اللاعب وأهدافه.
• ظروف ومواعيد التدريب والبطولات.
• تحديد انواع المكملات الغذائية الأمنة والمدعومة بالأبحاث العلمية لتحسين الأداء الرياضي.

📋 خطوات المتابعة

1️⃣ الجلسة الأولى – التقييم والتخطيط

بتتم من خلال Zoom، وفيها بنعمل تقييم غذائي شامل للاعب، وبنراجع العادات الغذائية، عدد الوحدات التدريبية، نتائج قياس الـInBody، والتحاليل الطبية المتاحة، بالإضافة إلى أهداف اللاعب واحتياجاته الغذائية.

بعد الجلسة، بيتم تصميم برنامج غذائي مفصل ومناسب لاحتياجات وظروف اللاعب.

2️⃣ المتابعة بعد أسبوعين

بعد أسبوعين، بيتم عمل جلسة متابعة عن طريق Zoom لمراجعة الالتزام والنتائج، ومراجعة قياسات الـInBody.

وبناءً على التقدم والنتائج، بنحدد إذا كان الأفضل الاستمرار على نفس البرنامج أو إجراء التعديلات اللازمة.

3️⃣ الجلسة النهائية

في نهاية فترة المتابعة، بيتم عمل جلسة أخيرة عن طريق Zoom لمراجعة النتائج النهائية والقياسات، وتقييم مدى تحقيق الأهداف، وتحديد الخطوات المناسبة للمرحلة القادمة.
#تغذيةرياضية
#تغذيةرياضيين

25/08/2026

لو ابنك رياضي وبتحس دايمًا إن تركيزه ضعيف، والاستشفاء العضلي عنده بطيء، مهم جدًا نتأكد إن نظامه الغذائي بيحتوي علي اوميجا 3 🐟

الأوميجا 3 مهمة جدًا للرياضيين، لأنها بتساعد في دعم الاستشفاء العضلي وبتقلل الالتهابات الناتجة عن التمرين، وكمان ليها دور مهم في صحة المخ والتركيز.

خلينا نشوف أهم الأطعمة الغنية بالدهون الصحية، وخصوصًا الأوميجا 3.

أولًا: الأسماك والمأكولات البحرية (EPA & DHA)

وعلى رأسها السلمون، الماكريل، السردين والرنجة ودي من أفضل المصادر الطبيعية للأوميجا 3.

لكن للأسف، معظم ولادنا مبيكلوش الانواع ديه.

ثانيًا: البذور والمكسرات (ALA)

زي بذور الكتان، بذور الشيا وعين الجمل، وممكن نضيفهم بسهولة لوجباتنا، زي الشوفان ، للزبادي أو للبان كيك.

ولو ابنك مش بياخد مصادر الأوميجا 3 بشكل كافي في وجباته، ساعتها بيحتاج ياخد مكمل غذائي يحتوي علي اوميجا 3 وبيتم تحديد النوع والجرعة تحت اشراف اخصائي التغذية.

تابعوني الفترة الجاية إن شاء الله، هتكلم عن مواضيع كتير مهمة في تغذية الرياضيين
#تغذيةالرياضيين
‏

20/08/2026

لو ابنك دايمًا حاسس بتعب وإرهاق، ومش قادر يكمل التمرين للآخر، أو ساعات بيشتكي من دوخة أو صداع… ممكن يكون عنده نقص في الحديد او انيميا.

الحديد مهم جدًا للرياضيين، لأنه بيدخل في تكوين الهيموجلوبين، اللي وظيفته إنه ينقل الأكسجين لكل خلايا الجسم، ومن ضمنها العضلات.

وعشان كده، نقص الحديد ممكن يأثر بشكل سلبي على طاقة ابنك وتحمله وأدائه في التمرين، وفي بعض الحالات ممكن يوصل لأنيميا نقص الحديد.

🥩 طب إزاي نحمي ابننا من نقص الحديد؟

أول حاجة نهتم إن أكله يكون فيه مصادر كويسة للحديد، زي:

🔸 المصادر الحيوانية:
اللحمة الحمراء، الكبدة البقري، كبدة الفراخ، وكمان بعض المأكولات البحرية زي الجندوفلي والمحار.

🔸 المصادر النباتية:
حبوب الإفطار المدعمة بالحديد، العدس والبقوليات، السبانخ، المشمش المجفف والعسل الأسود.

💡 والحديد الموجود في المصادر النباتية الجسم بيمتصه بدرجة أقل من الحديد الموجود في المصادر الحيوانية، فممكن ناكل معاه مصدر غني بفيتامين C، زي البرتقال أو الفراولة أو الكيوي أو الفلفل، عشان يساعد على امتصاص الحديد.

⚠️ لكن خلي بالك:
لو ابنك عنده نقص حديد و أنيميا بالفعل، الأكل لوحده ممكن ما يكونش كفاية لعلاج النقص، وساعتها ممكن يحتاج مكمل حديد، لكن الجرعة لازم تتحدد حسب مستوى النقص وعمر الطفل وحالته، وده بيتم تحت إشراف أخصائي التغذية.

‎تابعوني الفترة الجاية، وإن شاء الله هتكلم عن مواضيع كتير مهمة في تغذية الرياضيين، شكرا.
#تغذيةالرياضيين
‏

17/08/2026

لو ابنك بيتعرض لإصابات بشكل متكرر، أو الاستشفاء بعد التمرين عنده بطيء، أو ادوار البرد معاه بتطول…
ابنك ممكن يبقي عنده نقص فيتامين د.

فيتامين د مهم جدًا للرياضيين، لأنه بيساعد في الحفاظ على صحة وقوة العظام والعضلات، وكمان له دور في وظائف جهاز المناعة.

وعشان كده، نقص فيتامين د ممكن يأثر بشكل سلبي على صحة وأداء الرياضي.

☀️ طب إزاي نحمي ابننا من نقص فيتامين د؟

أول حاجة: التعرض للشمس بشكل منتظم ممكن يساعد الجسم على تكوين فيتامين د.

🍣 تاني حاجة: نهتم بالأطعمة اللي فيها فيتامين د، زي:
🔸 السلمون والتونة وبعض أنواع الأسماك الدهنية
🔸 البيض
🔸 منتجات الألبان زي اللبن والجبن

⚠️ لكن خلي بالك:
لو ابنك عنده نقص فيتامين د بالفعل، الأكل والتعرض للشمس ممكن ما يكونوش كفاية لتصحيح النقص، وساعتها ممكن يحتاج مكمل فيتامين د، لكن الجرعة لازم تتحدد تحت إشراف أخصائي تغذية.

تابعوني الفترة الجاية، هتكلم عن مواضيع كتير مهمة في تغذية الرياضيين.
#تغذيةالرياضيين
‏

13/08/2026

دايمًا أولياء أمور السباحين بيحتاروا: نأكل ولادنا إيه في يوم البطولة؟ 🏊‍♂️

أول حاجة، خلال الفترة اللي قبل البطولة، نهتم إن وجباتنا تحتوي على مصادر طبيعية غنية بالنترات، زي البنجر والجرجير والسبانخ والكرفس، ونحاول ندخلها بشكل منتظم ضمن النظام الغذائي.

قبل البطولة بيوم، نركز على النشويات في الوجبات على مدار اليوم، وخصوصًا وجبة العشاء، علشان نحافظ على مخازن الجليكوجين في العضلات ممتلئة قدر الإمكان.

وده مهم جدًا لأن بعض السباحين بيكون عندهم سباق بدري جدًا الصبح، وممكن ميكونش عندهم وقت كافي لتناول وجبة إفطار كاملة.

لو السباق مثلًا الساعة ٩ صباحًا، ممكن نصحى حوالي الساعة ٥ صباحًا وناخد سناك خفيف وسهل الهضم، زي توست بزبدة الفول السوداني والعسل، أو بطاطا مشوية مع العسل، أو تمر محشي باللوز.

وقبل السباق بحوالي ساعة أو أقل، ممكن ناخد مصدر سريع وسهل الهضم من الكربوهيدرات، زي الموز أو التمر، خصوصًا لو محتاجين دفعة إضافية من الطاقة.

وبالنسبة للسباحين الأكبر سنًا، استخدام الكافيين أو أي مكملات غذائية لازم يكون مخطط له مسبقًا وتحت إشراف أخصائي تغذية رياضية، خصوصًا إن مش كل مكمل مناسب لكل رياضي، وبعض المكملات تحتاج فترة من الاستخدام المنتظم علشان تحقق فائدتها.

ولو عندنا أكتر من سباق خلال اليوم، غالبًا مش هيكون عندنا وقت كافي لتناول وجبات كاملة، وكمان بعض السباحين بيكونوا متوترين ومش قادرين ياكلوا.

في الحالة دي، ممكن نستخدم مشروب رياضي يحتوي على الكربوهيدرات والإلكتروليتات للمساعدة في تعويض السوائل والطاقة بين السباقات.

وأخيرًا، بعد انتهاء السباقات، نهتم بتناول وجبة متكاملة تحتوي على الكربوهيدرات والبروتين والسوائل، علشان نساعد الجسم على الاستشفاء ونستعد بشكل أفضل لسباقات اليوم التالي.

وبالتوفيق إن شاء الله لكل أولادنا في البطولات ❤️🏊‍♂️

ولو عندك سؤال بخصوص تغذية السباحين في البطولات، اكتبه في الكومنت وأنا هجاوب عليه.

تابعوني الفترة الجاية، هتكلم عن مواضيع كتير مهمة في تغذية الرياضيين
#سباحة
#تغذيةالرياضيين
‏

09/08/2026

🍽️ أهمية وجبة العشاء للرياضيين

ولاد كتير بيفوتوا وجبة العشاء، يا إما عشان خايفين يزيدوا في الوزن، أو عشان بيرجعوا من التمرين متأخر وتعبانين وعايزين يناموا على طول.

لو ابنك رياضي، إنه ينام من غير ما ياكل بعد التمرين مش دايمًا أفضل اختيار.

بعد التمرين، الرياضي بيكون محتاج بروتين وأحماض امينية عشان تساعده في عملية الاستشفاء والبناء العضلي، وكربوهيدرات عشان تعيد ملء مخازن الجليكوجين في العضلات، ووجبة العشاء ممكن تكون فرصة مهمة لتوفير احتياجه الغذائي قبل النوم.

🥣 ومن افضل الاختيارات لوجبة العشاء هيا الجبنة القريش، لأنها قليلة في السعرات وغنية بالبروتين، خصوصا بروتين الكازين، واللي بيتميز إنه بطيء الهضم والامتصاص، وده بيمد الجسم بالأحماض الأمينية لفترة أطول أثناء النوم.

🍕 ولو ابنك احتياجه من السعرات الحرارية اعلى، ممكن كمان تكون البيتزا الصحية اختيار مناسب كوجبة بعد التمرين، ولو عايز تعرف طريقة عمل البيتزا الصحية، اكتبلي بيتزا في كومنت وحبعتلك الطريقة.

تابعوني الفترة الجاية، هتكلم عن مواضيع كتير مهمة في تغذية الرياضيين. شكراً
‎ #تغذيةالرياضيين

Address

ابراج السرايا، برج ٣، امام جرين بلازا، سموحة
Alexandria

Opening Hours

Monday 5pm - 8pm
Wednesday 5pm - 8pm
Saturday 5pm - 8pm

Telephone

+201025479283

Website

Alerts

Be the first to know and let us send you an email when Dr. Mostafa Abdelaal posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to Dr. Mostafa Abdelaal:

Shortcuts

Share

Category