دكتور وسيم أشرف - اخصائي نفسي اكلينيكي

26/05/2026

25/05/2026

قالت : لما البيت مايديكش أمان، الدنيا كلها بتبان مكان مؤذي ..

09/05/2026

في ناس مش بتبالغ… هي بس عاشت وقت طويل وهي بتحاول تنجو

06/05/2026

بقينا بنرمي كلمة “نرجسي” على أي حد وجعنا ونستخدم مصطلحات كبيرة بسهولة .. “توكسك” – “Gaslighting” – “Manipulation”

كأن أي خلاف بقى تشخيص!

بس خلّي الكلام أوضح:
• نرجسي = شايف نفسه أهم من غيره، ومش بيشوف احتياجاتك
• توكسك = علاقة مرهقة بتستنزفك نفسيًا
• Gaslighting = بيخليك تشك في نفسك وفي اللي حصل فعلًا
• Manipulation = بيضغط عليك عشان تمشي الأمور على مزاجه

المشكلة؟
مش كل خلاف = كده
ومش كل تقصير = سوء نية أو مرض

مش كل واحد سكت وقت الخناقة يبقى بيتلاعب
ومش كل واحد اتعصب يبقى مؤذي
ومش كل حد مش فاهمك… قاصد يكسّرك

في فرق كبير بين:
• سوء تواصل = مش عارفين نفهم بعض
• إهمال = حد مش بيبذل مجهود كفاية
• أذى متكرر = نفس الغلط بيتعاد من غير محاولة تغيير

وفي فرق أكبر بين:
حد بيتلخبط وبيحاول وحد بيكرر الأذى ومش فارق معاه

إحنا ساعات بنستخبى ورا “التشخيص”عشان نهرب من سؤال أصعب :
“أنا عايز أكمل في ده ولا لأ؟”

اسأل نفسك:
فيه وعي؟ .. فيه محاولة؟ .. فيه تغيير؟

لو آه → ممكن تتصلّح
لو لأ → القرار واضح

مش كل مرة تقول “هو نرجسي” تبقى فهمت
بس كل حاجة محتاجة فهم… وقرار

04/05/2026

كلمة دعم في وقتها ممكن تغيّر كل إحساسك بالموقف.
مش كل حاجة بنعدّيها لوحدنا… وأحيانًا ده بيكون الفارق

25/04/2026

اضطراب كرب ما بعد الصدمة مش مجرد ذكرى مؤلمة بتيجي من وقت للتاني .

هو أثر تجربة كانت أكبر من قدرة الشخص وقتها على التحمل أو الفهم، ففضل جزء من الداخل عالق عند نفس اللحظة.

عشان كده أحيانًا الشخص ما بيفتكرش الحدث فقط… هو بيرجع يحسه.

في جلسة من الجلسات قالت :
روحت مكان… وفجأة كل حاجة رجعت .. وشوش الناس، الريحة، الصوت، نفس الإحساس ..
كأن اللي حصل زمان بيتعاد قدامي وأنا واقفة بتفرج… ومش قادرة أعمل حاجة.

إن بعض الأماكن ما بتبقاش مجرد أماكن، وبعض الأغاني ما بتبقاش مجرد أغاني، وبعض الروايح ما بتبقاش مجرد ريحة.

أحيانًا بيبقوا مفاتيح لذاكرة صادمة لسه متخزنة في الجسم والجهاز العصبي كإن الخطر ما انتهيش.

في اللحظة دي، المخ ما بيفرقش بسهولة بين “زمان” و “دلوقتي”، فيتعامل كأن التهديد رجع تاني.

فيجري القلب،
يضيق النفس،
يتجمد الجسم،
و العقل يحاول يفهم هو فين .

وده مش ضعف، ومش مبالغة، ومش تمثيل.

دي استجابة نجاة قديمة .. بتشتغل تلقائيًا لما حاجة تفكّر الجسم بالألم.

ولو ده حصل:
بص حواليك وسمّي 5 حاجات شايفها
المس حاجة ثابتة وركّز في ملمسها
قول لنفسك: أنا هنا… وده وقت مختلف
خُد نفس ببطء أطول من الزفير
اتحرك خطوة أو اخرج من المكان لو تقدر وبعدها… ما تلومش نفسك

التعافي مش نسيان ..التعافي إن المكان يبقى مكان.. والماضي يبقى ماضي .. مش حاجة بتتكرر كل مرة

#التعافي

18/04/2026

مش كل حد كان “مضمون” كان ضعيف أو مش قادر يمشي

في ناس كانت سايبة مساحة للحب مش للاستهلاك

بس لما الأمان يبقى تقليل والاتعود يتحوّل لإهمال

ساعتها…
اللي كان ثابت بيعرف يمشي فجأة

مش لأنه اتغير
بس لأنه أخيرًا… فهم قيمته

ويمكن أقسى حقيقة:
إن اللي بيحس إنك مضمون نادراً بيستوعب قيمتك
غير لما يحس إنك اختيار .. مش ضمان ..

#العلاقات

16/04/2026

العلاقات الرمادي
لا هي بتوجعك كفاية تمشي
ولا بتطمنك كفاية تكمّل

معلّقك في نص شعور
اسمه: يمكن”

12/04/2026

في ناس شافت الفيديو على إنه “تريند”
بس الحقيقة إنه ممكن يكون “Trigger” لحد تاني

الانتحار مش “تريند” ولا فضول يتشبع
ولا حاجة تتبعت على واتساب ونقول “شوف اللي حصل”

في ناس بتتفرج… وبتنهار
في ناس بتتفرج… وبتتشجع
وفي ناس كانت بتحاول تقوم… فالفيديو يرجّعها لنقطة أسوأ

اللي حصل مش محتوى دي روح اتكسرت في لحظة وجع حقيقي
وألم أكبر من إننا نحوله لفرجة وقرار لحظة ممكن ناس تانية تكون قريبة منه أكتر ما نتخيل

كل شير منك…ممكن يأذي ، كل مشاهدة…ممكن تفتح جرح في قلب حد وأنت مش شايف

لو حاسس بقيمة الروح…خليك سبب في حماية حد مش كسره
واختار ما تكونش جزء من نشر الوجع

التعب النفسي مش ضعف…ولو حد قريب منك بيمر بوجع
ما تسيبوش لوحده مع أفكاره اسمعه، وخد بإيده لحد يساعده…
يمكن وجودك يكون الفرق بين إنه يكمل…أو يستسلم