10/09/2026
لو العامل اتعرض لأكتر من تركيز لمادة كيميائية معينة خلال الـShift...
يعني تركيز المادة في المكان اللي هو بيشتغل فيه بيتغير من وقت للتاني… إزاي تعرف إن تعرضه مقبول ومازال ضمن الحد العتبي؟
هل بناخد أعلى قراءة؟
ولا متوسط القراءات؟
ولا الموضوع بيتحسب بطريقة مختلفة؟
استكمالًا لسلسلة المخاطر الكيميائية وحدود التعرض المهني (OELs)...
خلينا النهاردة نفهم واحدة من أهم طرق تقييم التعرض للمواد الكيميائية:
TWA – Time-Weighted Average
الفكرة ببساطة إننا مش بنبص للتركيز بس، لكن بنحسب كمان ((مدة التعرض لكل تركيز))
مثال:
عامل خلال Shift مدته (8 ساعات) تعرض لمادة كيميائية كالتالي:
ساعتين عند (3 ppm)
4 ساعات عند (1 ppm)
ساعتين عند (0 ppm)
ازاي احسب متوسط التعرض خلال الشيفت عشان اقارنه بالحد المسموح؟
الحساب:
هنضرب مدة كل تعرض في تركيز المادة خلال هذه المدة
وبعدين نجمعهم مع بعض
وبعدين نقسم على 8 لان الشيفت 8 ساعات
يبقى:
(3x2) + (1x4) + (0x2)
-------------------------
8
يعني:
TWA = [(3×2) + (1×4) + (0×2)] ÷ 8
يساوي:
TWA = 1.25 ppm
إذن متوسط تعرض العامل خلال الـ8 ساعات = 1.25 ppm
دلوقتي هنقارن الرقم دا بالحد العتبي المسموح للمادة دي خلال 8 ساعات
لو كان الرقم بتاعنا اقل يبقى الوضع آمن
لو كان أكتر يبقى لازم ناخد اجراءات لمنع هذا التعرض الزائد
بعد ما عرفنا الطريقة
دورك تحل المثال ده:
عامل آخر تعرض خلال Shift مدته **8 ساعات** إلى:
⏱️ ساعة واحدة → **5 ppm**
⏱️ 3 ساعات → **2 ppm**
⏱️ 4 ساعات → **0.5 ppm**
والـ TWA OEL = 2 ppm (المسموح خلال 8 ساعات)
احسب الـTWA
وهل تعرض العامل:
**A — أقل من الـOEL
**B — يساوي الـOEL
**C — أعلى من الـOEL
اكتب الإجابة وطريقة الحساب في الـComments
ولو أول مرة تشوف الصفحة، راجع البوستات السابقة من **سلسلة المخاطر الكيميائية** علشان تعرف الفرق بين:
**OEL – TWA – STEL – Ceiling – IDLH**
وتابع **HSE Simplified | السلامة ببساطة** لاستكمال السلسلة ومعرفة كيفية الحساب في شيفت مدته اكتر من 8 ساعات.
